O ULANGAN 29
29
1Nenanga o jaji mabetongo deʼ ma Jou Ai pareta o Musa deʼ o o Israel manyawa yadiai maöraha önanga naga o Moab ma tonakoka. O jaji gënanga marupa madogo o jaji ma Jou wadodiai deʼ önanga o Sinai mal̄okuoka.
Yohiningali ma Jou Ai oa-oa deʼ Ai jaji
2O Musa wä huloko o Israel manyawa mata-mata ima toomu, daha wätemo onangika, ”Ngini mahirete nia makeoka okianaga ma Jou wa dodiai o Mesir ma koanoika, ai popegawe deʼ ai berera yamode-modekika. 3Nginiö nia makeoka o bodito-bodito nio modo-modongo, idö dadadi ihera-heranga, deʼ ihö hera-heranga ma Jou wadodiai. 4Mä hiädono o wange nënanga winihi doakowahi ngini ni mangarati mata-mata ngini nia mö make-make gënanga. 5O taongo moruata madekana ma Jou winï tuda ngini nia nonu o tonaka ikokakaha, mä nia pakeanga deʼ nia sandal koi babitua. 6Ngini koiwa nia roti mangale nia inomo, o angguru mateongo ekola nia oke-okere ikokua-kuata, mä ma Jou wini hidöaka hagala ngini nipoparalu hupaya ngini nihi öriki Unanga gënanga ma Jou nia Jou Madutu. 7#Bil. 21:21-35 De maöraha ngone homa hiädono o ngï ino nënanga, ma Koano Sihon o Hesybonino deʼ ma Koano Og o Basanino yoboa i nä parangi ngone. Mä ngone hahohihanga önanga. 8#Bil. 32:33 Toönanga manga tonaka ngone haora deʼ ngone hahi kodoku o Ruben, o Gad manga hoanika deʼ mahononga o Manasye ai hoanika. 9Done kokiani ngini nisetia nihi ngounu ingodumu o jaji nënanga, hupaya ngini nihasili hagala nia usaha magoronaka.
10O wange nënanga ngini mata-mata nima okoino ma Jou nia Jou Madutu Ai himangoka, mata-mata nia hoana ma hae-haeke, o balu-baluhu, o kokapita, mata-mata o nau-nauru, 11O ngongoheka, deʼ mata-mata o nyawa yotagi-tagino yogogere tingini nia hidogoronaka deʼ iniriwo ngini yotobiki o gota deʼ o akere yomoku. 12Ma Jou nia Jou Madutu wodiai o jaji dede ngini, deʼ ngini mata-mata nima toomu nenangoka dau mangale nia liko o jaji gënanga ikali nia tarima mamanarama inihi patu-patutu. 13Deʼ o jaji gënanga o wange nënanga ma Jou wohi kuata ngini nidadi Ainyawa, deʼ Unanga wodadi nia Jou madutu hokä wojajajioka nginika deʼ nia ete deʼ nia tohoraika o Abraham, o Ishak deʼ o Yakub. 14O jaji gënanga deʼ hagala ipatu-patutu idiai ma Jou wadiai kadede nginiua dika, 15Mä de moi-moi o nyawa naga o wange nënanga imaokoino nënangoka dau, nanga Jou ma Jou Madutu Ai himangoka, deʼ tongone nanga difaukuö o öraha nanga himangika.”
O setiaua ma Jouika mahasili
16”Ngini kanio hiningahi sarakia tongone nanga ngango o Mesiroka deʼ sarakia ngone hotagi hanonu o hoana deʼ o berera manyawa mahomoa manga berera. 17Ngini nia make toönanga manga barahala madulada ha emo-emono yadodiai deʼ o gota, o helewo, o haaka deʼ o gurasi. 18#Ibr. 12:15 Hoʼ nima goana uha hiädono imatengo ani nia hidogoronaka, o nauru ekola o ngoheka, nia tau madol̄a ekola nia hoana ima oko-okoino nenangoka dau, iwï porete nanga Jou ma Jou Madutu mangale yahuba o hoana deʼ o berera manyawa mahomoa manga gikiri. O manarama gënanga hokä o ngutuku iwö wango-wango idadi idö dato-datomo mamali-mali deʼ ipopadoha. 19Ngini nia hidogoronaka ni ihe-ihene o gogahoko ikokiria gënanga uha naga ima pikiri manga wowango madodagi aha kahirahi yaoa, ngaroka ünanga deʼ ai hininga mabuturungu wanïki ai ngekomo mahirete. O hali gënanga aha inï binaha ngini mata-mata, o nyawa madorou kayaoa o nyawa maoa. 20Ma Jou aha wahi apongua o nyawa hoko gënanga. I idulu yaino, ünanga aha iwi korona ma Jou Ai gangamo ihebu-hebulu, deʼ hagala o bodito yatö tuli-tulihi o buku nënanga magoronaka aha iwi tapal̄u ünanga hiädono ünanga ma Jou wï binaha. 21Ma Jou aha wadiai ünanga o dulada moi mangale mata-mata o Israel manyawa, deʼ wï hukumu ünanga deʼ o lolai ya heto-hetongo o jaji magoronaka yatö tuli-tulihi o buku nënanga magoronaka, ma Jou Ai Tita mabuku.
22O wange maduruino, ani difauku deʼ o nyawa yotagi-tagino o berera magogurutoka deʼ yaino aha yamake o bodito-bodito deʼ o huha deʼ o hangihara ma Jou wodotagao ani bererauku. 23#Kej. 19:24-25 Ani dumule aha imadadi o tonaka ikokakaha o walira deʼ o gahi yatamunuku. matonaka yakunua yodatomo deʼ o momo ioluku iwango genangokadau. Ani berera aha imahi rupa o Sodom deʼ o Gomora, o Adama deʼ o Zeboim makota wabö bobinaha ma Jou maöraha ai dohata irama. 24Done o dunia yamode-modekika aha yoleha, ’Yadodoa homa Jou wadiai hoko gënanga toönanga manga berera? Mahababu okia ünanga wongamo mamogiria gënanga?ʼ 25Deʼ mabobaluhu genangala, ’Karana önanga ihi pongono ma Jou ai jaji toönanga manga ete deʼ manga tohora manga Jou Madutu; o jaji wadodiai dede önanga maöraha Unanga wä ao önanga yuhupu o Mesirino. 26Onanga imahi gilaongo o gikiri mahomoaika koyanö nako-nakoua önanga, ena hioko ma Jou waduhunu önanga yahuba hagala o gikiri gënanga. 27Mahababu gënanga ma Jou wä ngamo Ai umatika deʼ wodotagao toönanga manga bereraika mata-mata o bodito yatö tuli-tulihi o buku nënanga magoronaka. 28Ma Jou Ai dohata ipotoka de magiria, deʼ ai dohata ma amoko magoronaka Unanga warahuku o Israel manyawa toönanga manga tonakoka deʼ wahikaweli o berera mahomoaika hiädono önanga naga dokengoka.’
29Naga o hali muruono naga ma Jou tongone nanga Jou Madutu warorahasia; mä Ai tita wohi nyataka ngoneino, deʼ ngone ikali tongone nanga difauku kokiani hohingounu kahi ado-adonika.”
Currently Selected:
O ULANGAN 29: TLB
Highlight
Copy
Compare
Share
Want to have your highlights saved across all your devices? Sign up or sign in
