O DANIEL 11
11
1Unanga dika iwihi momanarama wohibatumu deʼ wohihiboa ngohi o taongo madodihiraka aipopareta o Darius o Media manyawa gënanga. 2Deʼ okianaga aha taheto-hetongo ngonaika ganga i tiai.”
O Mesir mapopareta deʼ o Siria mapopareta
O Malaekat gënanga wahetongo, ”Yaruange o koano mahomoa aha yapareta o Persia, yänikino ma koano maiatoka aha iholoi wo kaya de mahomoa. Ai kuaha de aikaya mabatingoka yail̄e, ünanga aha aikuata ihikepeleke de o Yunani mapopareta.
3De ipaha aha ipuda womatengo ma koano wopoputurungu. Unanga aha wapareta o popareta duru ilago-agomo deʼ aha wodiai ai mau-mau. 4Mä aimulia mabatingoka yail̄e, aipopareta aha ikilianga deʼ iregu-regu idadi o hidoku iata. O kokoano ai difaukuua aha yopareta hokä aidagali, deʼ önanga hokä ünanga aikuata.
5Ma koano o koreharauku maberera aha idadi wokuata. Mä womatengo aikokapitaino aha wodadi iholoi wokuata dede ünanga, deʼ ünanga aha wapareta o popareta iholoi iamokoli. 6O taongo muruono naga ipahaika ma koano o koreharauku maberera aha wadiai o rimoi dema koano o koremieil̄e maberera deʼ womihi kawingi ngoiora dema koano o koremieil̄e maberera gënanga. Mä o rimoi gënanga i tedekanua deʼ ma koano ngoi ora gënanga aha imitoma, hokogenangoli amirokata deʼ amingoha-ngohaka deʼ ami gogilaongo imihi ngota-ngotakoka. 7Genanga dei boto i tedekanua, womatengo o riadodoto dema koano ngoiora gënanga aha wo dadi o koano. Unanga aha ma koano o koremieil̄e maberera aitentara iwiparangi, ya kilianga manga dadatoko o bebeno o mehele deʼ iwihohihanga. 8Maöraha ünanga womakilioro o Mesirika, ünanga aha wao ai haturü manga gikiri ma dulada dema pakakaha o gurasi deʼ o haaka ihihöhuba-hubaka aigikirika gënanga. O taongo muruono naga madekana ünanga aha wïparangiua ma koano o koremieil̄e maberera. 9De ipaha ma koano o koremieil̄e maberera aha yaparangi o koreharauku maberera, mä ünanga aha iwihidodohuku deʼ wolio ai bereraika mahirete.
10Daha ma koano o koremieil̄e maberera aingoha-ngohaka o nauru aha imahidiai mangale yoparangi deʼ yä toomu o tentara ma lago-agomo. Womatengo onangino gënanga aha wotagi aihimangika woparangi hokä o nguihi. Wängika mahinotoka ünanga waparangi o haturü manga dadatoko o bebeno o mehele. 11Dema koano o koreharauku wongamo, deʼ ünanga aha wotagi aihimangiha o parangi mangïika wïlawani ma koano o koremieil̄e maberera. Unanga aha wo hasili wäutumu o tentara malago-agomo tätotoomu ma koano o koremieil̄e maberera. 12De ipaha ünanga aha aihininga ilamoko karana aiutumu deʼ karana wä honengoka mangangöe aihaturü, mä ünanga aha koigila-gilaua wokuaha.
13Wohigali mahinotoka ma koano o koremieil̄e maberera aha wätoomu o tentara mangaduduono i lamo-amoko, inoli iholoi i lamoko dema dodihiraka. Nako maöraha iboa, ünanga aha wotagi aihimangika de aitentara ilago-agomo deʼ manga pakakaha duru kahängoe. 14Done manga ngöe o nyawa aha i malawani ma koano o koreharauku mabereraika. Deʼ yamuruono naga yohohatera anihoanino, Daniel, aha i malawani karana önanga yamakeoka moi o lolega. Mä önanga aha youtumua. 15De ipaha ma koano o koremieil̄e maberera aha ihigiloliti moi o kota de madodadatokoka o bebeno o mehele deʼ yaora. O koreharauku maberera mangatentara imäriwo yakunua, deʼ aitentara manga duduono wairi-irikika makoyakunokaua imalawani. 16Ma koano o koremieil̄e gënanga aha wadiai aimau-mau dekamahuhutulö ma wamakeua o lolawani. Unanga aha wogogere o tonaka ihöhailoa deʼ wakuaha mata-mataika.
17De ipaha ma koano o koremieil̄e maberera aha wasadia aitentara yongodumu la wäparangi o berera o koreharauku. De aidungutu wakuaha ingodumu aihaturü manga popareta, ünanga aha wadiai imateke fakati dema koano o koreharauku maberera deʼ ngoiora womihikawingi deo Mesir ma koano gënanga ma aha ihasilua. 18Gënanga de iboto ünanga aha waparangi hagala o hoana de o berera o gahi madatekil̄e, deʼ mangöe wahohihanga. Mä womatengo o berera maporetino mangatutuda aha wohigumal̄aokaua o hikauku wadodiai gënanga, maboboloi aha wabalahi o hikauku gënanga unangika. 19Ma koano o koremieil̄e maberera gënanga aha womakilioro aiberera mahireteika dema dodadatoko o bebeno o mehele, mä ünanga aha iwihohihanga deʼ koiwaka aiabari mangale ünanga.
20Unanga aha iwitagali de womatengo ma koano aha wähuloko aipegawe koiwa-iwa manga hayanga mangale yotoomu o soungu dema pakisa la wohidogo aipopareta makaya. Oraha madodipoko magoronaka gënanga ma koano aha iwitoma ima hitotararonukuua, deʼ ko o parangi magoronakaua.”
Ma koano o koremieil̄e maberera itorou
21O Malaekat gënanga ihitemoli, ”Ma koano moioli wa popareta o koremieil̄e maberera ganga womatengo okia-kiaua iwidaene aihakuua wodadi o koano. Ma ünanga aha woboa ko ima nako-nakoua deʼ waora igogere o koano mapangkati de aitipu madorou. 22Hagala o tentara iwilawan-lawani ünanga, ya maboboloi ma Imam womo Muliaö ma aha wähehara wätebi-tebinoka deʼ wäbinaha. 23Unanga wohipongono hagala o jaji gënanga dahaö wadodiai de hagala o hoana deo berera mahomoa. De ünanga aha idadi iholoi wokuata, ngarokä ünanga duga-duga wapareta o negara maiteteke. 24De o akali madorou ünanga aha waparangi o daera-daera iboburere maoraha yogögogere yamao yosanangi genangokadau. Unanga aha wodiai okianaga aiete de aitohora komaiwahi yadiai. Daha ünanga aha wäkokeregu iwïriwo-riwoika hagala o baranga yaora-oraino deʼ o kaya wamö make-make o parangi magoronaka. Unanga aha wodiai o siasati la waparangi hagala o ngï dema dodadatoko o bebeno o mehele, mä aioraha aha itaiti ipaha imata.
25De ipaha de aibarani ünanga aha wätuku doomu o tentara ilago-agomo la wïparangi ma koano o koreharauku maberera womasosadiakali womau wïlawani ünanga de o tentara yokua-kuata deʼ duru kamanga ngöe. Mä ma koano o koreharauku maberera aha kowakunua woma tumunguku karana aha yosatiakaua unangika. 26Iwi nonasehati duru yotigi-tigi unangika aha iwi hitifa ünanga. Manga ngöe aitentara-tentara mahidogoronaka yätoma, deʼ aha yähehara yätebi-tebinoka. 27De ipaha o koano yahinoto gënanga aha yogogeruku o meja moioka deʼ yol̄omo imatuonino, maönanga manga dungutu itorou, deʼ önanga aha imabori eluku. Mä toönanga manga dato-datoro gënanga kai tifauku hababu maöraha yadonuahi. 28De ipaha ma koano o koremieil̄e maberera aha wolio aibereraika de hagala mabaranga wamömake-make. Unanga adekati i wedere o agama yamote-moteke ma Jou Madutu Ai umati. Unanga aha wodiai aimau-mau daha womakilioro aibereraika mahirete.
29O öraha muruono naga ipahaika ünanga aha waparangioli o koreharauku maberera, mä gorehau ima howono dema dodihiraka. 30Hababu o Roma manyawa dema kapa-kapa aha iboa o Siprus de yaino deʼ iwiparangi ünanga, hiadono ünanga idadi kawo hawa-hawanika.
Daha ünanga aha walio duru de aidahata deʼ wohidailako wawedere ma Jou Madutu Ai umati manga agama. Unanga aha wamoteke toönanga manga nasihati yodohukoka manga agamaika. 31#Dan. 9:27, 12:11; Mat. 24:15; Mark. 13:14 De ünanga wohidingoto aitentara ma duduono yapöpese-peseke ma Jou Ai Tau. Onanga aha ya ehe o huhuba o wange ihigetongo deʼ ihigokoil̄e okianagamoi höboborohono yahöheto-hetongo o Dorou wede-wedere. 32De ai akali madorou ma koano gënanga aha wäbaja hagala o nyawa yamal̄a-mal̄aka toönanga manga agama hupaya yomau iwibatumu. Mä hagala o nyawa ihingou-ngounu ma Jou Madutuika aha yobarani iwilawani ünanga. 33Hagala o nyawa yososawaro yätuda-tuda o kawaha aha yadiai o nyawa mangangoe imangarati. Mä o oraha muruono naga madekanino, yamuruono naga toönanga manga hidogoronaka aha yätoma karana o parangi ekola karana o uku, deʼ yamuruono nagaoli aha yäora deʼ yätagoko. 34Ma gogiriaka o doma gënanga igila-gila, ma Jou Madutu Ai umati aha yamake mahuhutulu bobatumu, mämanga ngöe o nyawa aha imahidogo dede önanga duga-duga karana toönanga manga paralu mahirete. 35O hidoku moi o tutuda-tutuda yososawaroino gënanga aha yä toma, mä gënanga marupa o ujian o umatika hiadono önanga aha idadi yotebini. O hali gënanga aha itagi gila-gila hiadono o wange mabaha wohi totatapuoka ma Jou Madutu.
36 #
2Tes. 2:3-4; Him. 13:5-6 Ma koano o koremieil̄e maberera aha wodiai aihininga mamau. De aiedenge ünanga aha wotemo ünanga iholoi woamoko deo gikiri okiadika, maboboloioli iholoi woamoko dema Jou Madutu Duru Wokökurutil̄e. Unanga aha wakunu wodiai hoko gënanga, hiadono ma Jou Madutu Ai muruka ihibobaha. Hababu okianaga ma Jou Madutu wohitotatapuoka kokiani ihira wadiai. 37Ma koano gënanga aha kowölegaikaua o gikiri okiadika yahö huba-huba aiete de aitohora, yöngohamika o gikiri yapöpuji-puji o ngongoheka. Unanga wahaduliua hagala o gikiri gënanga karana ünanga womamao aidiri iholoi woamoko dede önanga. 38Iduluyaino, ünanga aha wahoromati o gikiri komaiwahi aiete de aitohora yahuba, enagënanga o gikiri o dadatoko o bebeno-bebeno mehele. Unanga aha wohihuba o gurasi, o haaka, o paramata deʼ o huhuba-huhuba ihöhailoa mahomoaohi, o gikirika komaiwahi aiete de aitohora yahuba. 39Unanga aha wäiriki hagala o nyawa yahö huba-huba o gikiri mahomoaino, la waparangi o dadatoko o bebeno-bebeno, o mehele ikö kua-kuata. Onagona yangaku o gikiri gënanga aha yahidöaka o horomati maamoko deʼ manga gogere o pangkati magö gurutil̄e de inoli o tonaka hokä manga hewa.
40Nako aikuaha mabaha ma koano o koremieil̄e maberera ngadeke itigioka imahiadono, ma koano o koreharauku maberera aha wïparangi ünanga. Dema koano o koremieil̄e maberera aha wabalahi o parangi gënanga duru kahä giria. Unanga aha watoomu mangöe o kereta ihipoparangi, o kuda deʼ o kapa. Unanga aha waparangi hokä o nguihi, deʼ wögogere o berera kahängöe. 41Maboboloi o tonaka ihöhailoa ma aha wöngohamoli, deʼ de manga ribu-ribuhu o nyawa aha yätoma. Mä o popareta-popareta o Edom, o Moab deʼ mahidoku mal̄akuoka, o Amon mapoparetaino aha ihalamati. 42Maöraha ünanga wögogere o popareta-popareta gënanga, o Mesir mapoparetaö aha iwïiotanua. 43Unanga aha waora o Mesir maarata marupa o gurasi deʼ o haaka de inoli o arata mahomoa duru dema ija-ijaka. Unanga aha iwï riwo Libia manyawa deʼ o Sudan manyawa. 44Daha o abari o wange ma hiwariha deʼ o koremieil̄e aha yahitodokana, hiadono ünanga aha woparangi duru kahägiria deʼ wätoma manga ngoe o nyawa. 45Ma boboloi ünanga aha pake aipopareta matau-tau mahidogorona o ngoto deʼ ol̄oku mahidogorona ma Jou Ai Tau mangi. Mä de ipaha ünanga aha wohonenge deʼ kao nyawa moi ö ma aha koiwi riwoua.”
Currently Selected:
O DANIEL 11: TLB
Highlight
Copy
Compare
Share
Want to have your highlights saved across all your devices? Sign up or sign in
