O AMOS 9
9
O lolega mangale o hukumanga ma Jou ino
1Ngohi ti make ma Jou woma okoino woma hitigi-tigi ka o huhuba mangï ika. Unanga wo hidoaka o pareta nënanga, ”Na gohara na kua-kuata ma haeke o liate Ahi Tau oka hupaya mata-mata ma pandopo igiwi. Nia ruba hagala o liate gënanga hagala o nyawa manga haekuku. Onanga yo hone-honengua aha Tä toma o parangi magoronaka. Ka moi ö ma yakunua ihi oara manga diri, kao nyawa moi ö ma aha koyootanua. 2Ngaroko önanga yö dotara o nyawa yo hone-honenge manga dunia ika Ngohi aha tä tauru önanga. Ngaroko önanga yo döa o dihangil̄e, Ngohi aha tahiguti onanga genanginodau. 3Nako önanga ima ngiunu o Karmel mal̄oku ma tubuil̄e, Ngohi aha tä lingiri deʼ tä tagoko önanga. Nako önanga ima ngiunu o ngöto ma hohol̄eoka, Ngohi aha ta pareta o naga o ngötoka layä tuduku önanga. 4Nako önanga yä tagoko manga haturü, Ngohi aha tä pareta hupaya önanga yä toma. Ngohi de ahi hininga ma gahumu to mau tä binaha önanga, deʼ aha kotä riwoua önanga.”
5O dunia aha i giwi deʼ yogö gogere yo duka,
karana wa tigi ma Jou Duru Wokö kurutil̄e deʼ Duru Wo kokuaha.
Hokä o Nil ma Ngairi idoa deʼ iowaha
hoko genangoli önanga yo döa daha yo tifa.
6Ma Jou wohi goko Ai tau magurutika o ngawa-ngawa ka,
o dunia mal̄okuoka Wohipake beloho o dihanga hokä o tatangu,
deʼ o gahi o ngötoka Wo duguhe o dudungiha,
ya dodiai mata-mata gënanga Ai romanga ena genangala ma Jou!
7Ma Jou wotemo, ”Hei Israel ma umat, Ngohi ta tailako tohidodiai o Sudan manyawa ima tero hokä Ngohi tinï tailako ngini tohidodiai. Ngohi tä aöka o Filistin manyawa o Kreta ma bereraino deʼ o Siria manyawa o Kir ma bereraino ima tero hokä Ngohi tinï ao ngini o Mesir ma tonakoka de niaino. 8Ngohi, ma Jou Duru Tokö kurutil̄e, ma gogiriaka tatö tailako o Israel ma popareta ibö baradoha nënanga, deʼ Ngohi aha ta hohihanga o dunia mal̄okuoka. Mä o Yakub ai difa uku ko mata-mataua aha Tä binaha. Ngohi, ma Jou to temoka.
9Ngohi aha tahipareta deʼ yä tal̄oko o Israel manyawa hokä o nyawa yo tal̄oko o gandum o tatapa magoronaka. Mangale tahirehene mata-mata yobö baragunaua toönanga manga hidogoronaka, Ngohi aha tä kirotaka önanga hagala o hoana deo berera manga hidogoronaka. 10Hagala o nyawa yobö baradoha Ahi umati manga hidogoronaka yo temo, ’Ma Jou Madutu aha wonä mal̄aikaua ngone inä tapal̄u o bodito.’ Mä igou-goungu önanga aha yä toma o parangi ma goronaka.”
O Israel aha ihigilio hoihira-hirali ya make-make
11 #
Kis. 15:16-18
Ma Jou wotemo, ”Aha iböa maöraha Ngohi tohigilio hoihira-hiraoli o Daud ai popareta. Oraha nënanga o popareta gënanga idadioka hokä o tau iruba iha. Mä hagala ma bebeno o mehele aha Tohidiai deʼ Tohi gokoli hiadono idadi hokaʼ ma hira inoli. 12O Israel manyawa aha ya kuaha o Edom maberera na hou-houohi inoli mata-mata o hoana deo berera ma hiraino to Ngohi. Ngohi, ma Jou, to temoka deʼ Ngohi aha ta diai o hali gënanga.”
13Ma Jou wotemo, ”Aha iböa maöraha o gandum iwango hokogënanga ma japati hiadono o gugutuku maöraha koitoa-toakua. O angguru ma gota ma utu aha iwango duru i taiti hiadono o nyawa aha koihoa-hoanua yo diai o angguru ma akere. O angguru ma akere aha i tututu o l̄oku-l̄okuino deʼ ihahuru hagala o doporonino. 14Ngohi aha ta diai Ahi umati o Israeloka manga hasili iwöe oli. Onanga aha ihi gokoʼli hagala toönanga manga kota iruba-ruba oka, deʼ önanga aha yo gogere dokengoka. Onanga aha yö datomo manga angguru ma dumule, deʼ yokere o angguru önanga imä datomo, deʼ ya ol̄omo ma hasili. 15Ngohi aha tahi gogere Ahi umati manga ngï o bereraka Ta hidoa-doakoka onangika. Onanga aha yä rahukokaua genangokadau. Ngohi, ma Jou toönanga manga Jou Madutu to temoka.”
Currently Selected:
O AMOS 9: TLB
Highlight
Copy
Compare
Share
Want to have your highlights saved across all your devices? Sign up or sign in
