O AMOS 7
7
O LOLEGA MANGALE O HUKUMANGA MA JOU INO
O kahoho
1Ngohi ta make moi o lolega ma Jou Duru Wokö kuruntil̄e ino. Ngohi ta make Unanga wo diai o kahoho ma tika ma ago-agomo ma orahoka o nyawa ya mal̄aino yo pairi o momo mangale ma koano, deʼ o momo ma hungi i mulaengoli iwango. 2Hagala o kahoho gënanga ngade-ngadehe yaol̄omo ol̄omo mata-mata iwe wango-wango o tonakoka. Daha ngohi to temo, ”Jou Duru Nokö kurutil̄e, nahiapongo Ani umati! Onanga yo etekeholi deʼ yo bole sarakia yakunu önanga yo tongohono?”
3Ma Jou wa ngali Ai datoro deʼ wotemo, ”Namö make-make gënanga aha koi dadiua.”
O uku
4Ngohi ta make moioli o lolega ma Jou Duru Wokö kurutil̄e ino. Ngohi ti make Unanga magogiria woma hidiai ma gogiria la wä hukumu Ai umati deo uku. O uku gënanga ya al̄eme yamata-mataka o ngoto ma ago-agomo o dunia ma timiuku deʼ imulaenge ya tuhuku o dumule. 5Ngohi to temo, ”Ya Jou ma Jou Madutu, natogumu tanu hohonenge o uku gënanga! Ani umati hoko gënanga manga mengeteke deʼ yo bole, sarakia yakunu önanga yo tongohono?”
6Ma Jou wa ngali oli Ai datoro deʼ wotemo, ”Nenango ma aha koi dadiua.”
O rukiti ma duduga irikoto itotiai ile
7Ngohi ta make moi o lolega ma homoa ma Jou ino. Tï make Unanga woma okoino ma datekoka moi o bebeno o mehele ihi gö goko-goko deya pake o duduga. Ai giamoka Unanga wasö ino o rukiti gënanga mangale wa tailako boteka o bebeno o mehele gënanga itotiaiil̄e ekola kowali. 8Unanga wo leha ngohino, ”Ngona o kia na make, Amos?”
Ngohi to haluhu, ”Orukiti, o duduga irikoto itotiail̄e, Jou.”
Daha ma Jou wotemo, ”Ngohi ta pake o rukiti o duduga nënanga la ihidumutu Ahi umati hokä o bebeno o mehele iriko-rikotil̄eua, Ngohi aha ta ngali oli Ahi datoro, Ngohi marai aha tä hukumu önanga. 9Hagala o ngï ya pake-pake o Ishak aidifauku mangale yo puji aha ya wedere ikilianga. Hagala o Israel manyawa manga ngï i tebi-tebini aha ya kilianga binaha. Ngohi aha tä binaha ma Koano Yerobeam aidifauku.”
O Amos deʼ o Amazia
10O Amazia, ma imam o Betelika, wohidingoto o laporan nënanga o Yerobeam ika o Israel manga koano, ”O Amos ima teke hikagaro wo rimoi deo kawaha iwi lawani Jou Koano. Ai demo-demo wä dofo-dofo o kawaha aha idadi o hababu o berera nënanga iwedere. 11Unanga wotemo Jou Koano aha wo hönenge o parangi ma goronaka deʼ o Israel manyawa maraioka yä toraka o tabuangika, magurutika detoönanga manga berera ma hirete.”
12Daha o Amazia wïtemo o Amos ika, ”Hei nabi, nolio o Yehudaika! Dokengoka no riwayati. Mal̄aikala önanga ini hidoaka o inono ngona ika! 13Uha oli no riwayati o Betel mabereraka. O kota nënanga yatingakoka mangale ma koano, deʼ o pupuji mangï tö kawaha.”
14O Amos wo haluhu, ”Ngohi koigoungua o nabi karana o jabatan. I moteke ma diai ngohi o aiwani topö paliara deʼ o ara ma hohoko to page-pagele. 15Mä ma Jou wohi l̄ë ngohi ahi manaramaka, deʼ wohi huloko ngohi tohiadono Ai behehongo o Israel manyawaika. 16Mangale gënanga no ihene okianaga ma Jou wa heto-hetongo ngona ika. Karana ngona nohï duhunu ngohi to riwayati tä lawani o Israel manyawa. 17Ma Jou wotemo ngoni hekata aha ami roehe ma huku-hukunu o kota ma ngeko-ngekomika, deʼ ani ngoha-ngohaka yä toma o parangi magoronaka. Ani tonaka aha yä hikodoku o nyawa ma homoaika, deʼ ngona ma hirete aha no honenge o nyawa iwi nako-nakoua ma Jou manga bereraka. Iogogere o Israel manyawa maraioka aha yä toraka o tabuangika magurutika de toönanga manga berera ma hirete.”
Currently Selected:
O AMOS 7: TLB
Highlight
Copy
Compare
Share
Want to have your highlights saved across all your devices? Sign up or sign in
