O KISAH RASUL-RASUL 24
24
O Paulus iwikalaki o Yahudioka manyawa
1O wange motoa ipaha, ma Imam womo Mulia o Ananias deʼ o Yahudioka manga tutuda-tutuda yoiki o Kaisariaika ima kinïki womatëngo o juru kuaha airomanga o Tertulus. Onanga iwihimanga ma Gubernur Feliks deʼ ihingahu to önanga manga galaki mameta o Paulusika. 2Maöraha o Tertulus iwiahoko mahimangika, ünanga wikalaki o Paulus hokä hokonënanga,
”Tuanga Gubernur No Mo Mulia! Ani tutuda matimioka Tuanga tongomi miaberera irïdi. Deʼ anibarijaö Tuanga mangöe yahungi okali yadiai miahoana ngomi. 3Mata-mata gënanga ngomi miö dahongo de itogu-togumua miatarima kasi deʼ mini horomati kohagurutil̄e kiakaö dika. 4Mä hupaya Tuanga uha naumo ani öraha ilamoka, ngohi togahoko tanu nomodeke Tuanga nohi gihene tongomi miagalaki madodipoko nënanga. 5Ngomi miwi mäke o nyawa nënanga woruae kohadorou. Kiaka honanga ünanga wohi puda o gigoro o Yahudioka manyawa manga hidogoronaka de ünanga wodadi wohibaluhu o Nazaret manyawa manga manaramoka. 6Ma ünanga wohi tailoka wadiai wapesekoka ma Jou ai Tau mä ngomi miwitagokoka ünanga. [Ngomi miadungutu miwi tailako imoteke tongomi mia agama matita mahirete. 7Mä o tentara duru manga baluhu o Lisias wiora ünanga ngomioka, 8deʼ wapareta hupaya iwikokokalaki inihimanga Tuanga.] Nako Tuanga nitailako o nyawa nënanga, Tuanga mahirete aha noihene unangino madiai ngomino mata-mata miwilawani nënanga unangika.” 9O Yahudioka manyawa genangokaö imahimoteke iwikalaki o Paulus deʼ ihigoungu mata-mata wotemo o Tertulus.
O Paulus woma demo o Feliks aihimangoka
10Daha magubernur gënanga wihidöaka o nonako o Paulusika la ünanga wotemo. O Paulus wotemo, ”Ngohi tohiöriki Tuanga nodadioka o hakimi o berera nënanga de matao-taongo madekana. Hababu gënanga ngohi tamäo tosanangi taao ngohi tomademo nënanga anihimangoka Tuanga. 11Tuanga mahirete yakunu nohitailako de madiai o wange ngimoi de hinoto iholoiuahi ipahaika, ngohi toiki o Yerusalemika mangale tohubayanga. 12Deʼ komaiwahi o Yahudioka manyawa gënanga ihimäke ngohi mima tekeributu o nyawa moiö ma, ekola tatoomu o nyawa mangale todiai o huru-hara yaoa ma Jou ai Tauoka yaoa o puji matau-tauoka ekola okiaka dika o kota magoronauku. 13Onangö yamäkeua manyonyata manga galaki-galaki önanga yaoka ngonaika Tuanga madungutu ngohi. 14Igoungu ngohi kiani tomangaku ngonaika Tuanga ngohi tihuba miaete de miatohora manga Jou Madutu imoteke o Yesus aidodötoko ngaro önanga yato ihowono. Mä ngohi kato ngakuohi mata-mata itotuli-tulihi o Musa ai Buku magoronaka deʼ o Nabi-nabi manga Bukuoka. 15Hokä mimakadäene de önanga, ngohiö de ma ënanga ahi ngonganono ma Jou Madutuika mata-mata o nyawa yohonengoka ma aha yowangokali – o nyawa maoa-oa, yaoa o nyawa madorou! 16Mahababu gënanga ngohi hoko genangika tohidailako tohidodiai, hupaya tongohi ahihininga madobote de itebini ma Jou Madutuika deʼ itebini madungutu o nyawaika.
17 #
Kis. 21:17-28
O taongo muruono naga koihiwa o Yerusalemoka, ngohi toma idulu dokengika mangale tao ahiroriwo o tiwi tongohi ahihoanika deʼ mangale tohihuba ahihuhuba ma Jou Madutuika. 18Maöraha ngohi magogiriaka tadiai gënanga, önanga ihimäke ngohi ma Jou ai Tauoka, ipahaino ngohi tadiai madodagi tatebini ahi diri. Koiwa naga o nyawa yowöe-wöe mimakinïki de ngohi, deʼ koiwa nagaö o gigoro genangoka öraha gënanga. 19Duga-duga naga o Yahudioka manyawa yamuruono naga dokengoka o Asia maprovinsino. Onanga kokiani naga nenangoka mangale önanga yoao o galaki ngonaika Tuanga, nako önanga naga okia naga manga galaki madungutu ngohino. 20Ekola hamal̄aika o nyawa nënanga mahirete ihingahu o dorou okia önanga yamäke ngohioka maöraha ngohi ihihihimanga o Agama ma Juru Hakimika. 21#Kis. 23:6 Onanga yamäke duga-duga o demo moi nënanga dika ngohi totemoka önanga manga himangoka, enagënanga o demo nënanga: Ngohi nihi tailako o wange nënanga hababu ngohi tongaku o nyawa yohonengoka aha yowangokali.”
22Daha o Feliks wohiorikoka mangöe o Yesus aidodötoko, wohi bobaha o parakara madoomu gënanga. ”Ngohi aha taputuhu o parakara nënanga,” wato, ”nako o tentara duru manga baluhu o Lisias woböainoka.” 23Daha ünanga wipareta o tentara manga baluhu wigöa-göana o Paulus gënanga hupaya tatapu witumungu o Paulus, mä wihidöaka mahuhutulu iuwini unangika de yahigumal̄a aidodiawo iwihidöaka unangika okia woparalu.
O Paulus o Feliks deʼ o ngo Drusila manga himangoka
24O wange muruono naga ipahaika, o Feliks woböa ngoi hekata midodiawo amiromanga o ngo Drusila; münanga o Yahudioka manyawa moi. Daha o Feliks wähuloko o nyawa iwil̄ë o Paulus aha o Feliks wohigihe-gihene o Paulus wotemo-temo mangale o ngongaku o Kristus Yesusika. 25Mä maöraha o Paulus wohi gila-gila aidemo-demo mangale o diai deʼ hatumungu nanga nahihu deʼ mangale o hukumanga o Kiamati ma Wangeoka, o Feliks idadi wohawana daha wotemo, ”Ngona iyakunu noiki örahanënanga. Ngohi aha toni ahokoli nako naga öraha.” 26Oraha gënanga o Feliks wönganono aha wamäke o tiwi o Paulusino. Hababu gënanga wohigali-gali wähuloko o nyawa iwingoho o Paulus mangale ima ade-ade dede ünanga.
27O taongo hinoto ipaha, o Perkius Festus witagali o Feliks hokä o gubernur. Deʼ karana o Feliks womau wol̄ë o hininga o Yahudi manyawaika, ünanga iwimal̄aika o Paulus o bui magoronaka.
Currently Selected:
O KISAH RASUL-RASUL 24: TLB
Highlight
Copy
Compare
Share
Want to have your highlights saved across all your devices? Sign up or sign in
