O KORINTUS MAHINOTOKA 1
1
1 #
Kis. 18:1
Roriadodoto ma Jou Madutu aijemaat o Korintusoka deʼ mata-mata ma Jou Madutu aiumati o Akhaya madaera mata-mataika.
Ngohi, o Paulus, o Yesus Kristus airasul wohigoraka imoteke aimau ma Jou Madutu, mimanïki de tongone nanga riadodoto o Timotius, 2tonganono tanu ma Jou Madutu tongone nanga Ama de o Jou Yesus Kristus winihidöaka o barakati deʼ o lolä nginika.
O Paulus wosukur ma Jou Madutuika
3O puji ma Jou Madutu, o Ama tongone nanga Jou Yesus Kristusino. Unanga o Ama aihininga duru maoa-oa deʼ Unanga ma Jou Madutu wohidöa-döaka o hininga makuata o nyawaika. 4Unanga wohikuata tongomi miahininga o huha mahigeto-getongo magoronaka ngomi miaohana, la de o kuata ngomi miatarima ma Jou Madutuino gënanga, ngomiö yakunu miahikuata manga hininga o nyawa mata-mata o huha magoronaka. 5O hangihara-o hangihara waoha-ohana o Kristus mangöeoka ngomiö miaohana. Deʼ mangale o Kristusoli, tongomi miahininga duru ihikuata. 6Nako ngomi miaohana o huha, ganga gënanga mangale yakuata niahininga, karana niahalamati. Nako tongomi miahininga ikuatoka, tinginiö maimoteke ikuata hiädono ngini nidadi nibarani o huha magoronaka hokä ngomiö miatagongoka. 7Ngomi mingaku hokogenangika deʼ midodatoua mangale Riadodoto, hababu ngomi mihiöriki nginiö niatagongo o hangihara dede ngomi. Deʼ karana gënanga nginiö inihikuata homakinïki dede ngomi.
8 #
1Kor. 15:32
Roriadodoto! Ngomi mimau ngini nihiöriki mangale o huha ngomi miaöhana o Asia madaeraka. O hangihara ngomi miatagongo gënanga, itubuhoholi ngomi imibänga, hiädono koiwaka miangonganono ngomi aha miwangoli; 9miamäo matero-tero imihukumanga o honenge iputuhoka. Mä o hali gënanga idadi hupaya uha ngomi mimahitangono miadiri makuatika mahirete, mä kiani ma Jou Madutuika o nyawa yohonengoka de wahiwö wango-wango. 10Unanga womihihalamatoka ngomi o huha o honenge i lamo-amokoino gënanga. Deʼ Unangö aha womihihalamati ngomi damä, o wange nanga hima-himangika, hababu ka Unangika dika ngomi mimahinganono. 11Ngomi mingaku de nianiata mangale ngomi, ma Jou Madutu aha womihihalamatoli ngomi o huhaino. Ma Jou Madutu wöigo womihibarakati ngomi hokä mabobaluhu mangale nianiata mangöe mangale ngomi, deʼ karana gënanga o nyawa mangangöe aha yotemo tarimakasi ma Jou Madutuika.
O Paulus watagali aidatoro
12Ngomi miahininga ilamoko, hababu de miahininga iboberehi ngomi miangaku mahirete mangale tongomi miangango o duniaka nënanga – duru mal̄okuoka nangadodohanga ngomi dede ngini Riadodoto – ngomi mihidagioka de miahininga rikoto deʼ itebini. Ngomi miadiai gënanga, koigoungua de nyawa mabarija, mä de o kuata ma Jou Madutu womihidöaka. 13-14Ngomi mitulihi nginika ganga duga-duga mangale o hali-o hali ngini yakunu niabasa deʼ nimamangarati. Orahanënanga ngini nimangaratiua de madiai mangale ngomi, mä ngohi tonganono damä ngini aha igou-goungu nimangarati mangale ngomi. De hokogënanga, damä maöraha ma Jou Yesus woböa, ngini aha niahininga ilamoko mangale ngomi, hokä sarakia de ngomiö miahininga ilamoko mangale ngini.
15Karana o ngongaku gënanga ngohi kamahirahi tatatoroka mangale tinilega ngini la ngini niamäke o barakati o lape hinoto. 16#Kis. 19:21 Ngohi ahidungutu tinilega ngini ahidodagi magoronaka o Makedoniaika, deʼ tomakilioro ahidodagi magoronaka, ngohi tiniduluoli nginika, hupaya ngini yakunu nihiriwo tongohi ahidodagi tohigila-gila o Yudeaika. 17Mä ngohi tatagalioka ahidungutu gënanga; aa, boteka gënanga ihimatoko tongohi ahihininga itatapua? Maöraha todiai o datoro, boteka ngohi todiai o datoro imoteke tongohi ahimau mahirete, botino totemo, ”Ia”, deʼ botino ”Kowali”? 18De ma Jou Madutu yakunu hingaku, tongohi ahi jaji Riadodotika koigoungua ”Ia” deʼ ”Kowali”. 19#Kis. 18:5 Hababu o Yesus Kristus, ma Jou Madutu ai Ngohaka, inihingahuoka nginika o Silas, o Timotius, deʼ ngohi mahirete igoungua o nyawa ”Ia” deʼ ”Kowali”. Idulu yaino Unanga marupa ma bobaluhu ”Ia” ma Jou Madutuino. 20Hababu de madodagi ma Jou Madutu wotemoka ”Ia” Ai jajika mata-mata. De matiti gënanga, ngone hotemo ”Amin” ma Jou Madutuika karana o Yesus Kristus. Ngomi midiai hokogënanga hupaya ma Jou Madutu iwihimulia. 21Ma Jou Madutu mahirete wadiai ngomi de Riadodoto hobitumu horimoi de o Kristus; Unangö wonairikoka ngone mangale Toünanga aidiri woma dingakoka. 22Mangale gënanga ma Jou Madutu wohigoungoka, ngone nënanga Toünanga madutu, deʼ wonahidöaka ai Womaha tongone nangahininga magoronaka, hokä o roriwo ënanga aha inahi döaka ngoneino mata-mata inahijäjajioka.
23Ma Jou Madutu tongohi ahihakihi – hababu Unanga wohiöriki tongohi ahihininga madol̄a – ngohi tadadiua toiki o Korintusika, karana ngohi töluku tadiai niahininga tahuha. 24Ngohi tiniributua ngini mangale okia kiani ngini niangaku, hababu ngini duru niwingakuoka o Kristusika. Ngohi duga-duga homateke manarama moi la ngini iholoi niutumu.
Currently Selected:
O KORINTUS MAHINOTOKA 1: TLB
Highlight
Copy
Compare
Share
Want to have your highlights saved across all your devices? Sign up or sign in
