O KORINTUS MADODIHIRAKA 15
15
Mangale o Kristus iwihi wango okaoli o honengino
1Deʼ orahanënanga, Roriadodoto, ngohi tomau ngini niohiningaoli o Abari ma Oa ma Jou Madutuino ngohi tinihingahuoka nginika kahuruonika. Ngini niatarima, deʼ niwi ngaku o Kristusika karana o Abari ma Oa gënanga. 2Nako ngini niasosö ibitumu okia ngohi tohi ngahuoka gënanga, done o Abari ma Oa gënanga ini hihalamati ngini; sowaliua nako riadodoto ningaku de koiwa mamangarati.
3 #
Yes. 53:5-12
Okia ngohi tinihingahu o Roriadodotika nagala ngohiö tatarimaka. Duruhe mal̄okuoka, hokä itulihi Ma Jou Ai Demo ma Buku magoronaka, ngohi tinihingahu nginika o Kristus wohonenge karana tongone nanga baradoha; 4#Mzm. 16:8-10; Mat. 12:40; Kis. 2:24-32 de Unanga iwilungunoka, mä o wange hange ipaha iwihiwangokali. Genangö itulihi Ma Jou Ai Demo ma Buku magoronaka. 5#Mat. 28:16-17; Mark. 16:14; Luk. 24:34, 36; Yoh. 20:19 Ngohiö tinihingahu nginika o Kristus iwihi wango okali gënanga womahi matoko ö Ai diri o Petrusika, dahaino o rasul yangimoi de yahinotoika. 6Ipaha gënanga Unanga womahi matokoli Ai diri kamamoi iwininïka yaratuhu motoa iholoika. Yowöe-wöe o nyawa gënanga kayowangohi örahanënanga, duga-duga o nyawa yamuruononaga yohonengoka. 7Ipaha gënanga, o Kristus womahi matokoli Ai diri o Yakobusika deʼ aha o rasulika mata-mata.
8 #
Kis. 9:3-6
Duru mabobobahaka, Unanga womahi matoko Ai diri ngohino ö – ngohi hokä o ngohaka imakil̄au ma örahauahi! 9#Kis. 8:3 Ngohi nagala ma Jou airasul duru topoluluku. Ngohi ipatutua ihi hetongo o rasul, hababu ngohi taaniayaka ma Jou Madutu aijemaat. 10Mä karana Ai dora ma Jou Madutu ngohi todadi hokä öraha nënanga naga. Deʼ kaparahajaua ma Jou Madutu wohïhi apongo ngohi. De kangohila tomanarama iholoi tohauku de ngaro o rasul mata-mata mahomoa. Mä genanga tongohiua ahimanarama; gënanga ma Jou Madutu Ai dora mamanarama deʼ imakinïki womanarama de ngohi. 11Hoʼ, o nagonaino ö ngini niatarima o Abari ma Oa gënanga – bote gënanga ngohino, ekola o rasul-rasul mahomoaino – gënanga idadiua o hababu. Duruhe mal̄okuoka ganga, ngomi mihi ngahu o Abari ma Oa gënanga, deʼ Riadodoto niangaku.
Mangale o nyawa yohonengoka de yowangokali
12Nako ngomi mihingahu gënanga o Kristus ganga wohonengoka de womomikoli, yadodoa naga niahidogoronaka yotemo o nyawa yohone-honenge aha yowango okauaoli? 13Nako itiai o nyawa yohone-honenge aha yowango okauaoli, gënanga mamangarati o Kristusö wohonengoka de womomikokaua. 14Deʼ nako hohiade o Kristus wohonenge de wowangokaua, okia-kiaua naga mabaraguna okia naga ngomi mihingahu, deʼ koiwali naga mabaraguna tingini niangongaku, hababu niangongaku gënanga okia-kiaua toënanga mahohol̄e. 15I holoi de gënanga inyata ngomi mielu-eluku mangale ma Jou Madutu, hababu ngomi mihingahu o Kristus wohonengoka ma ma Jou Madutu wihi momikokali, enahioko ma Jou Madutu wihi wangokaua Unanga – nako igoungu itiai o nyawa yohonengoka de yowangokaua! 16Hababu nako o nyawa yohone-honenge yahi wango okaua, o Kristusö wohonengoka de iwihi wangokaua. 17Deʼ nako o Kristus iwihi wangokaua done niangongaku duga-duga o hayali märërë; gënanga mamangarati ngini kao baradoha magoronakahi deʼ kautuö de koiwa nianganono. 18Gënanga mamangaratioli o Haranioka manyawa yohone-honengoka, toönangö koiwa manga ngonganono. 19Nako tongone nanga nganono o Kristusika mabatingi katongone nanga wowango o duniaka nënanga dika, done o umati o nyawa o duniaka nënanga mata-mata, ngonela duru hobodito!
20Mä inyata o Kristus wohonenge de wowangokali. Nenangala idadi o roriwo o nyawa yohone-honengoka aha yahiwangokali. 21Hababu o honenge iwohama o dunia magoronaka wadiai o nyawa womatëngo, hoko genangö yohonengoka de yowangokali yahidöaka o nyawaika de wadiai o nyawa womatëngoli. 22Hokä sarakia o nyawa mata-mata yohonenge karana o rimoi de o Adam, hoko genangö mata-mata aha yahi wango karana o rimoi de o Kristus. 23Mä moi-moi aha yahiwango imoteke o hidoku: madodihiraka o Kristus; damä maduruino maöraha Unanga woböali, yanïki o hidoku o nyawa iwohama toma Kristus ainyawa madutu. 24Ipaha gënanga idadi o kiamati. Maöraha gënanga o Kristus wapareta hagala o popareta, hagala o kuaha deʼ hagala o kuata; daha Unanga ahao wohilapahi Ai kuaha hokä o koano, ma Jou Madutuika, tongone nanga Ama. 25#Mzm. 110:1 O Kristus kiani gila-gila wopareta hiädono ma Jou Madutu wadiai o Kristus aihaturu mata-mata iwihigihene o Kristusika. 26O haturu duru mabobaha aha wautumu ganga o honenge. 27#Mzm. 8:6 Ma Jou Ai Demo ma Buku magoronaka itulihi hoko nënanga, ”Ma Jou Madutu wadiaioka hagala moi-moi iwihi gihene Unangika.” De madiai madungutu de ”hagala moi-moi” gënanga yongohamua ma Jou Madutu mahirete, wadiai hagala moi-moi gënanga iwihigihene o Kristusika. 28Mä ipaha mata-mata wautumoka o Kristus ai pareta matimioka, ma Unanga mahirete enagënanga ma Jou Madutu ai Ngohaka, aha womahikauku Ai diri ma Jou Madutuika, wadiaioka hagala mata-mata iwihigihene Unangika. Ma Jou Madutu mahireteö aha wapareta mata-mata.
29Nako o nyawa yohone-honenge yahi wangookauaoli, yadodoa naga o nyawa yäohiki mangale o nyawa yohone-honenge? Okia mangale önanga yodiai o hali gënanga? Nako igoungu o nyawa yohone-honenge kautuö de koiwa aha yahiwangokali, mangale okia önanga yodiai o hali gënanga? 30Deʼ midodoali ngomi mimau mio himanga o huha öraha mahigetongo? 31O Roriadodoto! O wange mahi getongo ngohi tatäna o hangihara karana ngohi ahi hininga i lamoko mangale niawowango hababu ngini ningakuoka o Kristus Yesusika, tongone nanga Jou. 32#Yes. 22:13 Nako gënanga duga-duga o nyawaka de yaino dika, okia mautumu ngohino mangale tomanarama mahauku matero-tero talawani o aiwani ihohatera, o Efesus mabereraka nënanga? Nako igoungu o nyawa yohonengoka yomomikokaua, aa, iholoi yaoa ngone hanïki o demo hiade nënanga: ”Niaino ngone hol̄omo de hokere deʼ homahi sosanangi, hababu yarehe ngone ahaö hohonenge.”
33Uha initipu! O dodiawo itotorou yadadidorou, o hininga mabiaha maoa-oa. 34Nimamäo öraha nënanga, deʼ uhali nidiai o baradoha. Duru de madiai ngini kiani inimal̄eke, hababu niahidogoronaka naga iwinäkouahi ma Jou Madutu.
O nyawa yohonengoka de yowangoli manga röehe
35Marai naga yoleha, ”Sarakiaë, o nyawa yohone-honenge yahi wangookali? O röehe sarakiaë yahidöaka onangika, yahiwangokali önanga ipahaino?” 36Duru kania bodo! Nako Riadodoto nidatomo o gihihi o tonaka magoronaka, o gihihi gënanga aha iwangoua, nako o gihihi gënanga ihira ihonengua. 37Deʼ o gihihi Riadodoto nadatomo o tonaka magoronaka gënanga – marai o gandum magihihi ekola o gihihi mahomoa – gënanga ganga o gihihi mamuidika, idodato-datomo komata-mataua damä aha iwango. 38Ma Jou Madutu mahirete aha wohidöaka o gihihi kagënanga marupa, imoteke Ai lolegaka yaoa mangale idato-datomo gënanga. Mangale moi-moi marupa o gihihi, ma Jou Madutu wohidöaka marupa idato-datomo moi-moi.
39O dodadi-dodadi maröehe de majiwaka mata-mataua imakadäene. O nyawa toënanga maröehe haramoi, o aiwani-aiwani to enangö maröehe haramoioli; o totaleo-o totaleo maröehe haramoiokali, deʼ o nawoko-o nawoko haramoiokali maröehe.
40Hoko gënangoli de o dodadi-dodadi o dihangoka deʼ o dodadi o duniaka. O dodadi-dodadi o dihangoka moi-moi toënanga makaramata mahirete, deʼ o dodadi-dodadi o duniakaö hokogënangoli. 41O wange mahailoa imahowono de o mede mahailoa. O murumu-o murumö toënanga mamulia mahirete. O murumu dika gënanga moi-moi ö ima kokohowono mamulia.
42Damä hokogënanga mahali de o nyawa yohone-honengoka yahiwango okaoli. O röehe o lungunoka gënanga ganga o röehe yakunu imel̄a, mä o röehe ihiwangookaoli, ganga o röehe iyakunua iwedere. 43Maöraha o röehe gënanga yalungunoka, o röehe gënanga itorou de ibole; mä maöraha ënanga ihiwangookaoli, ënanga ganga o röehe irahai deʼ ikuata. 44Maöraha yalungunoka, o röehe gënanga o röehe o duniaino; mä i paha iwango okali, o röehe gënanga o röehe ma Jou Madutu ai Womaha ihidöaka. Naga o röehe o duniaino, naga ö o röehe ma Jou Madutuino. 45#Kej. 2:7 Ma Jou Ai Demo ma Buku magoronaka i tulihi hoko nënanga, ”O nyawa madodihiraka, enagënanga o Adam, wodadi o dodadi iwango-wango,” mä o Adam mabobahaka ganga o Womaha ihidöaka o ngango. 46Iböa iholoi ihira ganga o röehe, o rohaniua. O rohani iböa ituruino. 47O Adam wohira-hira iwihidadi o tonakino, mä o Adam mahinotoka Ai ahali o horogauku. 48O nyawa o duniaino nënanga ganga hokä o Adam wohira-hira, iwihidadi o tonakino, mä o horoga manyawa ganga hokä Unanga woböa-böa o horogauku. 49Hokä sarakia ngone öraha nënanga ganga hokä o Adam iwihidadadi o tonakino, ma damä ngone aha hodadi hokä Unanga o horogauku gënanga.
50Ahi dungutu ngohi, o Roriadodoto, enagënanga: o röehe ihi dadi o awunu deʼ o akemino, yakunua iwohama ma Jou Madutu ai Dunia ma Hungika; deʼ o röehe yakunu ihonenge iyakunua idadi ikakali.
51 #
1Tes. 4:15-17
Niohohininga o rahasia nënanga: Mata-mataua ngone aha hohonenge, mä ngone mata-mata aha inangali. 52O hali gënanga aha itodokanino idadi holako dadawi, maöraha o trompet yawuwu duruhe mabobahaka. Hababu maöraha yoihene o trompet mailingi gënanga, o nyawa yohonengoka aha yahiwangookaoli de o röehe i kokakali, deʼ ngone mata-mata aha inangali. 53Tongone nanga röehe yakunu ihonenge nënanga, kiani itagali de o röehe iyakunua ihonenge, deʼ o röehe o duniaino kiani yatagali de o röehe o horogauku. 54#Yes. 25:8 Nako o röehe yakunu ihonenge yatagalioka de o röehe yakunua ihonenge, deʼ o röehe o duniaino yatagalioka de o röehe o horogauku, örahagënanga dahao idadi okia itulihoka Ma Jou Ai Demo ma Buku magoronaka, ”O honenge ihohihangoka; o utumu yadonoka!”
55 #
Hos. 13:14
”Hei, honenge, kiaka ani utumu?
Hei honenge, kiaka ani biha?”
56O honenge mabiha enagënanga o baradoha, deʼ o baradoha ma kuaha ihidagi yanïki o agama matita. 57Mä sukur ma Jou Madutuika; Unanga wonahidöakoka ngoneino o utumu itilakuru o Yesus Kristus tongone nanga Jou!
58Hababu gënanga, o Roriadodoto tinihohininga, kiani ngini nikuata deʼ nibitumu. Nimanarama hoko genangika mangale ma Jou de nia gou-goungu, hababu ngini nihi öriki mata-mata ngini nia momanaramoka mangale ma Jou, aha kaparahajaua.
Currently Selected:
O KORINTUS MADODIHIRAKA 15: TLB
Highlight
Copy
Compare
Share
Want to have your highlights saved across all your devices? Sign up or sign in
