O KORINTUS MADODIHIRAKA 11
11
1 #
1Kor. 4:16; Plp. 3:17 Nianïki tongohi ahidulada, hokä ngohiö tanïki o Kristus ai dulada.
Mangale yapake o häeke makokudu maöraha yopuji
2Ngohi tinihigiriri ngini, hababu ngini hokogenangika nihihininga ngohi deʼ niamoteke o dodötoko ngohi tinihidöaka nginika. 3Mä ngohi toigo ngini nihiöriki o hali moioli, enagënanga yodadi o häeke o nau-naurika ganga o Kristus; yodadi o häeke o hekatika ganga o rokata, deʼ idadi o häeke o Kristusika ganga ma Jou Madutu. 4Nako o nauru womatëngo maöraha womaniata ekola maöraha wohingahu o abari ma Jou Madutuino o nyawa yowöe-wöe manga himangoka, aihäeke wakokuduku, o nyawa gënanga wihi kauku o Kristus. 5Deʼ nako o ngoheka momatëngo maöraha moma niata ekola maöraha mohi ngahu o abari ma Jou Madutuino o nyawa yowöe-wöe manga himangoka, dema päkeua amihäeke makokudu, o ngoheka gënanga mihikauku amirokata wodadi o häeke amidirika. Gënanga kaimadäene matero-tero o ngoheka gënanga amihäeke makorioka. 6Hababu nako o ngoheka momatëngo moluku mapäke amihäeke makokudu iholoi yaoa amitadauru igutioka. Mä nako o ngoheka momatëngo yakori amihäeke ekola yaguti amitadauru, munangika gënanga o hikauku moi. Hababu gënanga iholoiyaoa münanga mapäke o häeke mokokudu. 7#Kej. 1:26-27 O nau-nauru paraluua yapäke o häeke makokudu, hababu ünanga o kahinä ma Jou Madutu aidulada deʼ Ai mulia. Mä o ngoheka dadi kahinä o nau-nauru manga mulia, 8#Kej. 2:18-19 hababu o nau-nauru yahidadiua o ngohekaino, mä o ngoheka yahidadi o naurino. 9O nau-nauru koyahidadiua mangale o ngoheka manga paralu, ma o ngoheka yahidadi mangale o nau-nauru manga paralu. 10Hababu gënanga, mangale yahisanangi o malaekat-malaekat, o ngoheka momatëngo kiani mapäke amihäeke makokudu hokä o nonako münanga amirokata aikuaha matimioka. 11Ngaro hokogënanga ngone nanga wowango magoronaka hokä o Haranioka manyawa, o ngoheka momaoko mahireteua, moma tingaka de o nauru, deʼ o nau-nauruö womaoko mahireteua, womatingaka de o ngoheka. 12Karana ngaroka o ngoheka madodihiraka imihidadi o naurino, mä ipaha de gënanga o nau-nauru ima kil̄au o ngohekaino; deʼ hagala moi-moi ma Jou Madutuino ma ahali.
13Abeika Roriadodoto mahirete niatibanga o hali nënanga: Boteka yaoa o ngoheka momatëngo momaniata ma Jou Madutuika o nyawa yowöe-wöe manga himangoka, de mapäkeua amihäeke makokudu? 14O nyawa yowöe-wöeino manga ganäko, ngini ini dotokoka nako o nau-nauru manga tadauru ikurutu, gënanga okia naga moi ikuranga ipatutu. 15Mä mangale o ngoheka, o tadauru imihi döakoka munangika mangale mohikokudu ami häeke deʼ ami tadauru ikurutu ganga amimulia. 16Aa, nako naga yomau imateke ributu mangale o hali nënanga, kamoidika ngohi yakunu totemo genangala yaoa ngone, yaoa ma Jou Madutu aijemaat-jemaat mahomoahi, mangöe-ngöe gënanga duga-duga kamoi toönanga manga biaha o jemaat magoronaka gënanga; mahomoa de gënanga koiwa.
Ma Jou wohitita o ngol̄omo de o ngokere i tebi-tebini madoomu
17Mangale nenangohi, ngohi tini higiririua ngini. Nia puji madoomu mahasili maoa-oaua, mä kaitotorou. 18Madodihiraka ngohi toihene, niadoomu-doomu magoronaka naga niregu-reguoka daha nimateke ributu. Deʼ ngohi tatakihiri ihutulu de ilamoko o abari gënanga itiai. 19Igoungu kiani hokogënanga ipuda o gitingaka niahidogoronaka, hupaya aha hamäke o nagona o Haranioka madutu. 20Mä maöraha ngini nimatoomu, ngini niadiai gënanga ma Jouua ai Ngol̄omo ma Debi-debini. 21Hababu maöraha niol̄omo, ngini moi-moi nimateke jai-jai nima l̄ë niainomo mahirete, hiädono utu naga okia-kiaua imamäke, mä mahomoa yädaluku. 22Yadodoa hoko gënanga? Tatobote Riadodoto de niatau? Riadodoto yakunu niol̄omo deʼ niokere genangoka! Ekola Riadodoto nimau nihikauku ma Jou Madutu aijemaat deʼ niahimal̄eke o nyawa yomomihikini? Okia ngohi kiani totemo nginika? Kiani ngohi tinihigiriri ngini? Kowali! Hakali-kali ngohi aha tinihigiririua ngini.
23Hababu ngohi tinidotokoka nginika, gënanga ngohi tatarima ma Jouino mahirete: mahutu gënanga maöraha o Yesus, tongone nanga Jou iwidiai o dorou, Unanga wal̄ë o roti, 24deʼ Unanga wotemo wotarima kasi iböto ma Jou Madutuika mangale o roti gënanga, Unanga wabëla-bëlaka o roti gënanga de Ai giama, daha wotemo, ”Nënanga Ahi röehe ihilapahioka mangale ngini. Niadiai nënanga mangale nihihininga Ngohi.” 25#Kel. 24:6-8; Yer. 31:31-34 Hoko gënangoli yol̄omo kadeiböto, Unanga wal̄ë o angguru magalahi daha wotemo, ”O angguru nënanga ganga ma Jou Madutu ai jaji mahungi, ihitatapuoka de Ahi awunu. Nihigeto-getongo ngini niaokere nënanga, niadiai nënanga mangale nihihininga Ngohi.” 26Igoungu nihi geto-getongo ngini niaol̄omo o roti deʼ niaokere o angguru nënanga, ngini nihi abari ma Jou aihonenge, hiädono Unanga woböa.
27Karana gënanga, o nyawa yaol̄omo ma Jou airoti ekola yaokere ma Jou aiangguru de madodagi ipatutua, o nyawa gënanga yobaradoha ma Jouika wohihubaoka Ai röehe deʼ Ai awunu. 28Hoʼ, o nyawa moi-moi kiani ihira yatailako okahi manga diri, daha önanga yakunu yol̄omo o roti deʼ yokere o angguru gënanga. 29Hababu nako o nyawa yol̄omo o roti deʼ yokere o angguru de koihi baragunaikaua o ngol̄omo itebi-tebini gënanga madulada de ma Jou ai röehe, o nyawa gënanga yaol̄omo de yaokere mangale yatarima ma Jou Madutu aihukumanga manga diriuku mahirete. 30Hababu gënanga manga ngöe niahidogoronaka ngini yopanyake deʼ koimasikaua, deʼ nagaö yohonenge. 31Mä nako ngone iholoi ihira hatailako tongone nangadiri, ma Jou Madutu aha wonahukumua ngone. 32Mä nako ma Jou Madutu wonahukumu ngone, Unanga aha wonagohara ngone, hupaya ngone uha inadäene hukumanga homa kinïki de o dunia nënanga.
33Mahababu gënanga, ahi Roriadodoto nako ngini nimatoomu mangale niol̄omo ma Jou aingol̄omo madebi-debinoka, ngini kiani nimatekedamä. 34Nako naga yahahini, ünanga kiani wol̄omo ihira aitauoka. Nako ngini nihibaraguna ohali nënanga, niapuji madoomu-madoomu aha ini gaoua o hukumanga ma Jou Madutuino niadirika mahirete. Imakorona ohali-ohali mahomoa, ngohi aha tohitararono nginika, nako damä ngohi toböa.
Currently Selected:
O KORINTUS MADODIHIRAKA 11: TLB
Highlight
Copy
Compare
Share
Want to have your highlights saved across all your devices? Sign up or sign in
