NAHUM 2
2
Kananawong Niniwe
1Ei Niniwe, raringihẹ̌ko!
I saing mapulu měnggolang si kau e seng narěnta!
Diagateko manga těndạ bal᷊oarị e!
Tatingane wue ral᷊eng!
Pẹ̌dariahị e waugu mẹ̌sekẹ.
(2Těngadẹ̌, Mawu sarung měngul᷊ị kapia karal᷊esạu Israel, tadeạu makoạ kere nạung kal᷊imonang nihampasu manga sědụ e.)
3Kěllungu rokạ e awạ e mahamụ,
dingangu pakeang i sire mẹ̌sul᷊unge kere awạu raha.
Dokạ e seng sadia měngalo.
Tabidạu putung, uaseng karetane kụkerong.
Kal᷊awọu kawal᷊one e#2:3: Kasariange mangal᷊ene: Manga kawal᷊one; Ibrani e: kalun sanobar. měmpẹ̌bẹ̌bakangkang.
4Su ral᷊eng, manga kareta e nahuntondo marampasẹ̌.
Su ěntana mal᷊oahẹ̌ e, i sire ene e měmpẹ̌sẹ̌sasahusu.
Su pandaěngu mata e al᷊ingkai oborẹ̌, kụ měngkai apa riměllau,
mẹ̌tẹ̌tanung kasahawụ e kere rěllụ.
5Manga pěrwira e kẹ̌kuiang tamai;
i sire e mạtangga-mạtangga kereu měmpěngalo.#2:5: Manga pěrwira ... měmpěngalo; Winohẹ u Ibrani e: tawe nal᷊ahẹ.
Isẹ̌sal᷊iaputange i sire mẹ̌timona meselu soa,
apal᷊iwụ u tatěnehẹ̌ e niapatindagẹ̌ pinakarol᷊ạ.
6Sasuěkangu akẹ u patikụ sal᷊ụ e seng natope,
kụ nẹ̌gěgahe kasěllahu istana e!
7Ratu wawine nariadi kinasamẹ,
měmaměbẹ̌ manga sloyore mạhunggunggui ringangu mahunsangị,
i sire e makịkasiang kere manga manụ paluma,
kụ měmpẹ̌měpelẹ̌ sěbạ, kahiang susa naung.
8Kawanuang Niniwe nahuntal᷊ang nẹ̌sawuhẹ̌,
kere akẹ siměbang bọu ěntana tatěndạ akẹ natěnehẹ̌ e.#2:8: Kasariange mangal᷊ene: Kawanuang ... natěnehẹ̌.
Piạ e wansagẹ̌, ”Pěngědọ e, pěngědọ e!”
kaiso tawẹ u reng mapulu mẹ̌sul᷊e.
9Pul᷊ahọ e kal᷊awọu wul᷊aeng dingangu sal᷊akane!
Arětạ su soa ini e mambeng mạhěmpal᷊iu!
10Soan Niniwe e seng nagholọ, marěmasẹ̌ dingangu mahusụ.
Naung seng nakedọ ual᷊ingu takụ.
Buku e seng nělome ringangu kụkende.
Gating kěbị taumata e seng nawilosẹ̌.
11Suapa soa ene ini e?
Soa kụ kere liang tampạ pẹ̌sal᷊ehangu singa?
Tampạ u manga pěgol᷊u singa e iapakaěng,
tampạ pẹ̌tẹ̌timonaěngu singa esẹ dingangu wawine,
tampạ kụ tạ konsange waugu manga anạ e?
12Kal᷊imona paị sene singa e tụtěmbo kinaěnge,
ringangu měngangědụ gěsine waugu singa wawine ringangu manga anạe.
I sie mạpakapenẹ u sal᷊ehe,
ringangu manga kodọu ghěsi sinamẹ e.
13”Iạ ini e sědụu,” angkuěngu Mawu Kụ Limembong Kawasa e. ”Manga karetanu e sarung Takụ tutungang pakasue. Sordadonu e sarung mawihua su pẹ̌seketang, dingangu Iạ e sarung měngal᷊ạ kal᷊awọu sạbarang kụ seng nial᷊ạ u wọu taumata wal᷊ine. Tatětul᷊u manga rarolohangu sen tawe lai ikararingihẹ̌ kapia.”
Currently Selected:
NAHUM 2: SXN
Highlight
Copy
Compare
Share
Want to have your highlights saved across all your devices? Sign up or sign in
