MIKHA 2
2
Kakakoạ u taumata kụ měnědạ tau kasiang
1Kạěngkěhang taumata kụ mělẹ̌hingidẹ̌ karal᷊akisẹ̌ těntal᷊ang kạdal᷊okane su katatikilang su tempong hěbi, bọu e mẹ̌koạ ene mal᷊ukadẹ̌ ual᷊ingu si sire kai piạ katoghasẹ̌ baugu mẹ̌koạ ene. 2Kereu i sire lụěnning u rahami sěmbaụ, i sire tangu měmpamul᷊aho. Kereu i sire měnningu wal᷊e sěmbaụ, i sire rumal᷊ambage. Baewe arětạ arau walagẹ̌ e tawẹ apa lenehe.
3Ual᷊ingu ene Mawu e něhengetang, ”Iạ e mělẹ̌hingidu hombang masaria si kamene, hakịu i kamene tawe mal᷊iwirẹ̌. Su tempo kụ soe ene ute i kamene tawe relaing makakaral᷊engu kai piạ obote. 4Kakakoạ u pẹ̌bawiahu e sarung paketang u taumata kere su wuang mohongu pělaheghesẹ̌, dingangu i sire sarung mělangingu kakantarị u pělahampugẹ̌ ini e,
’Mawu e seng něngul᷊e wanuang kami ini e,
ringangu seng něngonggọ si saing něnaweng si kami.
I kami e seng nagholang marasai.’ ”
5Ual᷊ingu ene, kereu midatingu tempone wanua ini e isul᷊e kapia su manga umatʼU Mawu, tawẹu sarang sěngkatau wọu i kamene makatarimạ bahageange.
6Taumata e měnẹ̌nasẹ̌ si siạ angkuěng, ”Abe pěnasẹ̌ si kami. Abe pěnasẹ̌ u kěbị tamai ene. I kami e tawe makahombang mea. 7Abe pěngiral᷊ingu umatu Israelẹ̌ seng nianeng Mawu! Mawu e tawe sarung mẹ̌koạ hal᷊ẹ̌ kere tamai ene. I Sie tawẹ běke kinailangengu sabarʼE. Kai i Sie mẹ̌bẹ̌bisara ringangu kal᷊ahimumu su patikụ taumata kụ mẹ̌kẹ̌koạ katul᷊idẹ̌ e tangu?”
8 Mawu e simimbang, ”Seng i kamene e něngalo umatẹ̌-Ku kere sědụ. Taumata e nẹ̌sul᷊e wọu pẹ̌sasekẹ mělẹ̌harapu sarung makapěndang mal᷊enehẹ̌ su wal᷊ene, sumbal᷊iau paị sene i kamene mundangu mạngampal᷊ẹ̌ mědeạu měmul᷊aho wal᷊ene. 9Manga wawine sutal᷊oarang umatẹ̌-Ku e tẹ̌tokol᷊ang i kamene wọu wal᷊e lẹ̌lahimpuluange, dingangu nipul᷊ahong kamene sarang marěngụ-děngụ al᷊amatẹ̌ Takụ nionggọ su manga anạ i sire. 10Pẹ̌pětị e ringangu tamaị e; sini e selain tawẹ lenehe. Kal᷊awọu rosanu e seng nakakarěntang wasagiạ makạl᷊ahiasẹ̌ su tampạ ini.
11I kamene lụol᷊angu nabi puluang mẹ̌konti ringangu měngakal᷊ẹ̌ dingangu mạněbal᷊u i kamene sarung managhuang anggorẹ̌ dingangu inumang makětị mẹ̌dẹ̌dahenesang.”
Dianding kasasal᷊amatẹ̌
12 Mawu e něhengetang kapia, ”Ei umatu Israel kụ bědang nal᷊ěmbe! I kamene nal᷊ahẹu sarung Takụ tampungang dingangu pakasěmbaụ kere domba kụ mẹ̌sul᷊e kapia su těndạ e. Mẹ̌sul᷊ungu wimbaengu rěmpugẹ̌ kụ napenẹ u domba, kerene lai wanuanu e sarung mapenẹ u lai taumata.
13Iạ e sarung měmuka ral᷊eng dingangu měngahạ si kamene apasěbang bọu pěmamembangeng. I kamene e sarung měnuhudẹ̌ manga tukadu pasěllangeng mase makapěllọ. Iạ e Mawu hala, kai Ratunu, ringangu Iạ e sarung měngahạ i kamene apasěbang.”
Currently Selected:
MIKHA 2: SXN
Highlight
Copy
Compare
Share
Want to have your highlights saved across all your devices? Sign up or sign in
