DANIEL 8
8
Papasilon Daniel mạanun domba esẹ dingangu kambing esẹ
1Su taung katěllune pẹ̌paparentan Datu i Belsyazar, iạ e nakahombang papasilo karuane.#8:1: Manělạ bọu ayetẹ̌ ini sarang pěngěnsueěnge bawera kụ nipakẹ ute kai werang Ibrani (kakělla pasalẹ̌ 2:4). 2Su ral᷊ungu papasilo ene sěngkahombange watangengku e su propinsing Elam, su Susan, iněngen soam Persia. Iạ dụdarisị su rěduhu Sal᷊ụ u Ulai, 3kụ su wiwihu sal᷊ụ ene kinaěbakeng domba esẹ sěmbaụ piạ sungene rarua mananandụ, sěmbua limembong kanandune dingangu limembong kawuhune wọu apam bal᷊ine. 4Susiloku e, tangú domba esẹ ene něnunge sol᷊ong sěmběkam bahẹ, sawěnahẹ̌ dingangu timuhẹ̌. Tawẹ sarang manga binatang sěmbaụ kụ deng mẹ̌daragẹ̌ mẹ̌těngon sie arau mal᷊iwirẹ̌ bọu kawasane. I sie mẹ̌kẹ̌koạ kapulun naunge ringangu kai naobotẹ̌.
5Těntal᷊ang iạ kạpẹ̌tẹ̌tingange, nakasilọ e kambing esẹ sěmbaụ kạtal᷊ange wọu sěmběkam bahẹ timěpasu wanua. Apạe mahawesẹ̌ tatal᷊ange hakịu l᷊aede tawe mararasagu ěntana. Su tal᷊oarang matane rarua e piạ sungene sěmbaụ e matimporọ. 6Kambing esẹ e riměduhẹ̌ domba esẹ kụ kinasiloku e su wiwihu sal᷊ụ ene, mase něngalo mẹ̌tẹ̌timona si sie kụ apạ e mahasa. 7Tinganengku e i sie něněmbo domba esẹ ene. Kahiang kahasane ute timangga domba esẹ e kụ němědi sungene rarua. Domba esẹ ene e tawe makakoạ apa. I sie nahipe sol᷊ong ěntana kụ nipẹ̌tatahidang, kụ tawẹu sarang sěngkatau nakaambang.
8Kambing esẹ ene e mangkeng kakạsariane. Kaiso piạ i sie nịdatingkem pusigu kawasane, napědị e sungene ghẹ̌guwạ ene, mase su tampạ ene nituwoěngken sunge ěpạ u wua kụ matimporọ, sěmbaụ-sěmbaụ e timonane mẹ̌dẹ̌darol᷊e. 9Bọu sunge sěmbua e timuwọ e sunge kạdodọ, kụ nakoạ masaria-saria, kụ kawasane e nawěnahẹ̌ sol᷊ong sěmběkan timuhẹ̌, sěmběkan daki, ringangu sěmběkang ěntana maholẹ. 10#Pěl. 12:4 Sunge ene mangkeng kakạsěllahe kụ seng matoghasẹ̌ baugu ipěndokạ sordadon sorga kụ mangạ e wituing, hakịu piạ e pira-pira wọu e niwahunge sol᷊ong ěntana mase nipẹ̌tatahidaěnge. 11Pundangu i sie rumokạ mol᷊ensekẹu sordadon sorga, ipěngědong sasěmba ghaghěllị měllo-měllo, kụ isẹ̌sěmba su mol᷊ensekẹ ene, ringangu měhakạ wal᷊eng pẹ̌kakal᷊iomaneng baugi sie. 12Mase i sire paị sene nanětạ e nẹ̌dosa ringangu tawe měgěllịu sasěmba hinong ighěllị e.#8:12: Mase ... e: Su werang Ibrani e tawe nal᷊ahẹ. Tangú pẹ̌kakal᷊iomaneng matul᷊idẹ̌ e seng nipahị su ěntana. Sunge ene seng piạ ual᷊ine su ral᷊ungu patikụ kakanoạ e.
13Bọu ene iạ nakaringihẹ̌ piạ malạekatẹ̌ sěngkatau nẹ̌bera su malạekatẹ̌ bal᷊ine, ”Sarang kạděngụ e kěbị apang kinasilo su ral᷊ungu papasilo ene sarung mariadi tangu? Sarang tempo sude dosa masaria ene měngaweng sasěmba měllo-měllo? Sarang tempo sude sordadon sorga e ringangu wal᷊em pẹ̌kakal᷊iomanengang e tatahidaěng?”
14Iạ nakaringihẹ̌ piạko l᷊ai malạekatẹ̌ sěngkatau simimbang, ”Sarang sěhiwu mahasụ limam pul᷊o su ěllone ko l᷊ai. Karěngụ u ene e sasěmba wawěllo ringangu sasěmba mal᷊ukadẹ̌ e tawe isěmba. Bọu ene wuhụewe wal᷊eng pẹ̌kakal᷊iomanengang e sarung ipakaul᷊ị kapia.”
Malaekat Gabriel něnualagu mangal᷊eng papasilo ene
15Kutẹu piạ iạ e kapẹ̌tawakal᷊ine měngěnna mangal᷊eng papasilo ene e, sěngkianu piạ apa rụdarisị su těngoku kụ al᷊ingkai taumata. 16#Luk. 1:19, 26 Ene kinaringihe karạku piạ tingihẹ̌ paị sěmběkan Sal᷊ụ u Ulai, angkuěnge, ”Gabriel, tualageko i sie hal᷊ẹ̌ u papasilone ene.” 17Mase i Gabriel kụ dụdarisị su těngoku e riměduhẹ̌ si siạ. Iạ e měngkai apạ e natakụ, hakịu iạ e nawatang.
Angkuěng i Gabriel si siạ u, ”Ei taumata kụ tawe kakalẹ̌ e, i kau e hinong masingkạ u papasilo ene e kai mạanung hal᷊ẹ̌ u pěngěnsueěngu dunia.” 18Ene i sie kạpẹ̌bẹ̌berane e, iạ e napinsang. Kaiso i sie něngumbelẹ si siạ kụ nẹ̌tul᷊ung si siạ dimarisị kạpia. Bọu e i sie nẹ̌bera, 19”Iạ e sarung maul᷊ị u apa sarung mariadi si kamene ual᷊ingu ral᷊angehu Mawu Ruata e. U papasilonu e mělẹ̌lahẹ u pěngěnsueěngu dunia.
20Domba esẹ kụ kinasiloku e piạ sungene rarua ute kai mạmalang kararatuangu Media ringangu Persia. 21Kambing esẹ e mạnialang kararatuangu Yunani, dingangu sunge kụ tumanịu mạbodẹ su tal᷊oarang matane ruam běka e kụ kawe ratune nạung humotong. 22Sunge ěpạ siměpụ tuhụ u sunge humotonge napědi, mangal᷊ene ute kararatuangu Yunani e sarung mapahiạ makoạ ěpạ u kararatuang, kaiso tawẹ u sarang sěmbaụ sarung kere katoghasu kararatuang nạung humotonge.
23Kakạdanineng kasueěngu manga kararatuang ene, kereu karal᷊akisẹ̌ e seng mẹ̌dahenesang, tangu sarung suměpụ sěngkatau ratu kụ těmbọ e makětị dingangu pande měngakal᷊ẹ̌. 24I sie sarung matoghasẹ̌ kahěngang, kaiso wal᷊inewe ual᷊ingu katoghase hala e. I sie sarung maparěntang kawawinasa makạtatakụ, dingangu walạewe měnsang apạe koatenge kụ sarung piạ ual᷊ine mapia. I sie sarung mapakawinasang kal᷊awọu apan taumata kụ mal᷊ahasa, dingangkeweng umatʼu Mawu Ruata. 25Ual᷊ingu i sie kai taumata mal᷊iewehẹ̌, kal᷊awọu manga akal᷊e sarung piạ ual᷊ine. I sie sarung měngobotu watangenge, dingangu tawẹ paraul᷊ị e kal᷊imona, i sie sarung mapakawinasan taumata l᷊awọ. Sarang kate i sie wahani rumokạ Datu Kasěllahenge. Kaiso i sie sarung ipakagholọ u tawẹ katoghasu taumata. 26Papasilo mạanung gaghěllị bawěllo ringangu mal᷊ukadẹ̌ kụ nạung seng nitualagẹ̌ si kau ene, kahěnga-hěngang sarung mariadi. Arawe kěbị ene e sarung mariadi su tempo ramahi kụ deng marau, kụ kumbahangbe iwěke su sarang sěngkatau.”
27Bọu e iạ nakapěndang lome mase nanawo nasakị mangạe pira-pirang ěllo karěngụ e. Bọu ene nẹ̌bangungke iạ e kụ bọu e nẹ̌bal᷊ị nẹ̌koạ manga hal᷊ẹ̌ku waugu ratu. Kaiso iạ e tụtaghiawahẹ̌ měngěngěnnạ e kal᷊awọu papasilo ene, ringangu tawe nakaěnna.
Currently Selected:
DANIEL 8: SXN
Highlight
Copy
Compare
Share
Want to have your highlights saved across all your devices? Sign up or sign in
