DANIEL 10
10
Papasilon Daniel su Sal᷊ụ u Tigris
1Su taung katěllune su parentan Datu i Koresh su Persia piạ tatanata sěmbaụ nilahẹ si Daniel nisunggahị si Beltsazar. Tatanata ene kahěngang, kaiso kawe matědụ pěngěnnaěnge.#10:1: Kaiso kawe matědụ pěngěnnaěnge arau: kụ kai mạanung pẹ̌sasekẹ masaria. Piạ e mẹ̌tẹ̌tawakal᷊i mědeạu makahěngang ene e i Daniel něnarimạ u tatualagu mạanung mangal᷊eng tatanata ene su ral᷊ungu sěmbaụ papasilo.
2Su tempo ene iạ e kạpẹ̌ngẹ̌ngamal᷊e ghěnnangu těllung kamisa tinalung. 3Karěngụ u tempo ene iạ e tawe kumakaěng masasědapẹ̌ e arau tawe kumakinạ ghěsing binatang; iạ e tawe měnganginung anggorẹ̌, dingangu tawe měnanaụ utạ.
4Su tanggalẹ̌ duam pul᷊o ěpạ bul᷊ang humotong taung ene, iạ e rụdarisị su wiwihu Sal᷊ụ u Tigris kụ gẹ̌guwạ ene. 5#Pěl. 1:13-15, 2:18, 19:12 Iạ e rimal᷊ingara, bọu e takụ nikasilo piạ sěngkatau kụ mělẹ̌luheng pakeang bọu leneng dingangu papehẹ e wọu wul᷊aeng sahị. 6Badange apạ e kụkerong kere paramata, gatine katualage kere tualagu kilạ, dingangu matane rụděllị kere putung. Takiahe ringangu laede kụkerong kere tambaga kẹ̌kisoěng, dingangu tingihe ikẹ̌karingihẹ̌ kere tingihu taumata l᷊awọ.
7Kětạeng iạ sẹ̌saku nakasilo papasilo ene. Taumata apan dingangku e tawe nakasilo, kaiso i sire něngkatakụ hakịu nahuntal᷊ang dingangu nẹ̌kěmbuni. 8Iạ e nitěntang sẹ̌saku tudẹ sene, apidu kạtingange papasilo kụ nakal᷊ahěkosẹ̌ ene. Iạ e semben tawe nakakoạ apa ringangu ghatiku e měngkate apa nẹ̌těngkawilosẹ̌. 9Piạ e iạ nakaringihẹ̌ tingihe, naěnsạ e kụ napinsang iạ hakịu nakararěmmạ su ěntana. 10Bọu e piạ e lima něnenggehẹ̌ si siạ kụ nakawangungke iạ apidu nakapẹ̌těkingu l᷊imaku ringangu wukuku.
11Malạekatẹ̌ e nẹ̌bera si siạ, ”Daniel, i kau e ikẹ̌kěndagu Ruata. Pẹ̌bangungke kụ darisị bọu e raringiheko manga waweraku ini e pakapia-pia. Iạ ini e seng nirolohẹ̌ sol᷊ong anunu.” Piạ i sie nẹ̌berang hal᷊ẹ̌ ene e, dimarisị e iạ kụ kạgěguhe.
12Mase angkuěnge si siạ e, ”Daniel, abe katakụ. Duata e seng dimaringihẹ̌ kakal᷊iomanengu deng bọu ěllo humotong i kau něngal᷊ạ putusang baugu mapakasanạu watangengu mědeạu makoạ pelesa. Iạ e seng diměnta kere sasimbahu kakal᷊iomanengu. 13#Pěl. 12:7 Malạekatẹ̌ měngangěllung kararatuangu Persia e rimokạ si siạ karěngụu ruam pul᷊o ěsa su ěllone. Bọu e i Mikhael, sěngkatau wọu manga pangahạ u malạekatẹ̌ e riměnta nẹ̌tul᷊ungu iạ. Takụ nitěntang i sie paị sene su Persia. 14Iạ e riměnta waugu i kau tadeạu makahěngang apa sarung mariadi su manga wansanu. Papasilo ini e mạanung ěllo ramahi.”
15Piạ i sie naul᷊ị u hal᷊ẹ̌ ene, iạ e kimakurung kụ tawe nakawera. 16Bọu e malạekatẹ̌ kụ mạngawẹ taumata ene, něngul᷊uhu l᷊imane kụ něněnggehẹ̌ biwihẹ̌ku. Iạ nẹ̌bera si sie, ”Tuang, papasilo ini e nakawěhạ si siạ e hakịu iạ e tawe nakakoạ manga apa-apa. 17Iạ e mẹ̌sul᷊ungu sěngkatau ěllang kụ dụdarisị su těngom mawune. Kụ kereapa wue iạ e mẹ̌bisara ringangi Tuang? Katoghasẹ̌ku e seng nasue ringangu singongoku e nasěsẹ.”
18Tangu sěnsul᷊ẹko l᷊ai i sie něnenggehẹ̌ si siạ, bọu e pěndangengku toghasẹ̌ku e nahuntinamba. 19I sie nẹ̌bera, ”Duata e kiměndagʼi kau, ual᷊ingu ene kumbahangbe rěnděnganeng dingangu matakụ, kụ pakatoghasẹ̌ bue!”
Těntal᷊ang i sie měbẹ̌berang hal᷊ẹ̌ ene, iạ e nakapěndang lai limembong katoghase kụ nẹ̌bera, ”Pẹ̌berạe i Tuang. I Tuang seng něnamba katoghasẹ̌ku.”
20-21Mase i sie simimbang, ”Masingkạ ngae i kau unụe iạ e riměnta su anunu? Timonane ute waugu maul᷊ị si kamene u kai apa mạbawohẹ su ral᷊ungu Bukẹ̌ u Katul᷊idẹ̌ e. Ini e iạ harusẹ̌ mẹ̌sul᷊e kapia waugu mẹ̌sekẹ dumokạ malạekatẹ̌ měngangěllung#10:20-21: Kasariange mangal᷊ene: Malạekatẹ̌ měngangěllung. Su Ibrani malạekatẹ̌ měngẹ̌ngěllung. Dingangu iạ, su taung humotong su pẹ̌paparentang Darius tau Media ene. Persia. Bọu ene malạekatẹ̌ měngangěllung Yunani e sarung duměnta. Tawẹ u sarung mẹ̌tul᷊ungu iạ e tabeạu katewe i Mikhael, malạekatẹ̌ měngangěllung Israel, wansanu.
Currently Selected:
DANIEL 10: SXN
Highlight
Copy
Compare
Share
Want to have your highlights saved across all your devices? Sign up or sign in
