DANIEL 1
1
BĚKEN DANIEL DINGANGU MANGA HAPỊ E
1:1–6:29
Manga kal᷊endesangu Yahudi su istanang Nebukadnesar
1 #
2Rat. 24:1; 2Kar. 36:5-7 Těllu taung samurin Datung Yoyakim mẹ̌pẹ̌parenta Yehuda, i Nebukadnesar datum Babelẹ̌ e něngalo sol᷊ong soan Yerusalem kụ nihěbage. 2#2Rat. 20:17-18, 24:10-16; 2Kar. 36:10; Yes. 39:7-8 Mawu e napakawalan sie němatạ Datu i Yoyakim dingangu něhampasẹ̌ sěmbahageang bọu manga apal᷊iwụ mal᷊aarěga su Wal᷊em Mawu. Taumata apan nitawenge, niwawane sol᷊ong bal᷊eng pẹ̌tahamawuang mahang duatane su Babelẹ̌, dingangu manga apal᷊iwụ mal᷊aarěga kụ nihampase; mase niresọ e su ral᷊ungu manga gudangu wal᷊e ene.
3Bọu e ratu e nẹ̌parenta si Aspenas, matimadu wal᷊eng istana, baugu ipěmile wọu tal᷊oarang apan tau Israel nitaweng pirang katau mal᷊ahinsẹ pal᷊ahiten datu e arau piạ dahang mapapangkatẹ̌. 4I sire e harusẹ̌be manga kal᷊endesang tawẹ turạ e. I sire harusẹ̌be maral᷊epatẹ̌, piạ sikol᷊ane marangẹ, pelesa, ringangu piạ kasingkạ e mal᷊awọ ore lai matuhụ su munara su ral᷊ungu istana. I Aspenas harusẹ̌ maněntiro si sire mẹ̌basa ringangu měmohẹ berang Babel. 5Datu e mal᷊aing nanilakehu kaěng dingangu inumang baugʼi sire hinong mẹ̌sul᷊ung dingangu apan seng nịdariahi waugu ral᷊ohom bal᷊en datu. Sarangke wọu ninarang karěngụ u těllu taung, i sire harusẹ̌ mẹ̌těngon datu waugu měmunara su istana. 6Bọu tal᷊oarang manga kal᷊endesang ene e mạdal᷊aụ lai i Daniel, i Hananya, i Misael dingangu i Azarya, kěbị e wọu hěnton Yehuda. 7Matimadu ral᷊ohom bal᷊eng istana e němal᷊ui manga areng i sire e nakoạ: i Beltsazar, i Sadrakh, i Mesakh dingangu i Abednego.
8-9Ual᷊ingu tul᷊umang u Ruata e, i Daniel itẹ̌tal᷊ěntụ dingangu ikẹ̌kěndagʼi Aspenas. I Daniel mẹ̌kẹ̌karaki tadeạu tawe mẹ̌těngkal᷊amuhụ u watangenge ringangu kaěng dingangu inumang anggorẹ̌ e wọu istanan datu e, ual᷊ingu ene i sie mẹ̌dẹ̌dorong si Aspenas tadeạu wotonge makaěbạ kaěng bal᷊ine. 10Ual᷊ingu matakụ u ratu, i Aspenas nẹ̌bera, ”Datu e hala seng něnilakehu kaěng dingangu inumangu e, kụ kereu tumuhụ tingirange i kau e al᷊ingkai mahunsakị bọu tal᷊oarang manga kal᷊endesang bal᷊ine, nal᷊ahẹ u iạ e sarung pateěng.”
11Bọu i Daniel mẹ̌dẹ̌dal᷊ahintaung hal᷊ẹ̌ ene ringangu manga lukadẹ̌ niapěmunara kahiang Aspenas baugu ipěngurusẹ̌ si Daniel dingangu manga hapị e i sire těllu. Ungkuěng i Daniel, 12”Banikateko i kami karěngụu mapul᷊o ěllo; pianẹete i kami ghěllireng dukụ dingangu akẹ mědeạu kanengang dingangu inungang i kami e. 13Mal᷊iung mapul᷊o su ěllone, kěnangko pẹ̌sihingu ghahị i kami e ringangu ghahị u manga l᷊aumbaseng kụ kụkaěng tuhụ atoru ratu e, wọu ene pěngal᷊ạ e putusange kụ dasagewe su silong matanu e.” 14Lukadẹ̌ ene e akorẹ̌ bue ringangu nẹ̌koạ bue sasal᷊ukạ ene e karěngụ e mapul᷊o ěllo. 15Bọu ene tempo e nasuẹ e, kụ i sire kẹ̌kasilo limembong mahuweka ringangu matoghasẹ̌ bọu kal᷊awọu apang mangangudạ kụ seng nakaěbạ kaěng i sire wọu medang ratu e. 16Bọu ene tangú lukadẹ̌ e selain tawe něnadiang kaěng dingangu inumang si sire, kere niatoru ratu e, kaiso tumbạeng dukụ dingangu akẹ e matagẹ̌.
17Duata e nẹ̌gěllị su manga kal᷊endesang ene ěpạ u katau, kapelesa ringangu katatahuěnna su ral᷊ungu manga hundugu wawera e ringangu kasingkạ. Su l᷊iung ene e waugʼi Daniel nionggoʼE lai kapande baugu makapěněbal᷊u papasilo ringangu ipi.
18Su pěngěnsueěnge těllu taung tempong pẹ̌sasikol᷊a kụ seng nitilakehu ratu ene, i Aspenas němaringang kal᷊awọu apang mangangudạ e ipẹ̌těngon Datu i Nebukadnesar. 19Bọuten nẹ̌dudaton sire kěbị e tangú ratu e nakaěbạ e u i Daniel, i Hananya, i Misael dingangu i Azarya e něngalembo wọu i sire wal᷊ine e su patikụ munara e. Tangú nanětạ e i sire němpěmunara su ral᷊ung u wanalan datu. 20Balạewe suapan datu e měngukahu sangkural᷊ange kụ mẹ̌gausewe tatualagẹ̌ dingangu timbangeng, i sie nakasilo u sasasa ringangu sasimbangu mangangudạ i sire ěpạ e kawe mapul᷊o su sul᷊ene limembong kapiane wọu sasasa ringangu sasimbangu kěbị měnaněbal᷊ẹ̌ dingangu apang masasingkạ u l᷊ahopa su kasěllahu kararatuange.
21I Daniel tatapẹ̌ měmẹ̌munara su istana sarang Datu i Koresh bọu Persia e namatạ Babel.
Currently Selected:
DANIEL 1: SXN
Highlight
Copy
Compare
Share
Want to have your highlights saved across all your devices? Sign up or sign in
