AMOS 8
8
Papasiloʼm mạanun patangam bua-bua
1Iạ nakahombang lai sěmbaụ papasilo wọu Mawu Kasěllahenge. Iạ nakasilo patanga sěmbaụ lohoʼm bua-bua masasasạ. 2Mawu e nakiwal᷊o, ”Kai nakasiloa i kau Amos?”
Iạ simimbang, ”Patanga sěmbaụ lohoʼm bua-bua masasasạ.”
Mawu e něhengetang, ”Tempone seng naghanapẹ̌ baugu umatẹ̌-Ku Israel. Iạ semben tawe lai měmal᷊ui karaki-Ku ringangu nal᷊ahẹ u sarung měhukung i sire. 3Su ěllo ene manga kakantarị su istana e sarung makoạ kakiạ. Suapan tampạ měngkate rụdal᷊iwatedẹ̌ kal᷊awọu maietẹ̌ kụ irědẹ̌mmẹ marěmasẹ̌.”
Israel nihukung
4Pẹ̌daringihẹ̌ko, ei kamene apang měmpạnědạ taumata kasiang su wanua ini hakịu i sire mạbinasa! 5I kamene němpẹ̌bera su watangeng i kamene hala, ”Bal᷊inewe kal᷊oa karěngụ u ělloʼm pěmamantugẹ̌ e. I kitẹ deng mapulu lighạko saụ mẹ̌bal᷊ụ u gandung i kitẹ, kutẹu sal᷊iwang e mamben tawẹ banạu maědo. Kai angerẹ ěllon Sabatẹ̌ e mal᷊iu, mědeạu i kitẹ e reng saụ měnětạ makapẹ̌bal᷊ụ tangu? I kitẹ e rem mapulu-pulu měmul᷊inạ, měngakal᷊ẹ̌ su sasupane, ringangu mẹ̌konti su timbangeng. 6Gandung kụ seng bahi e botonge ikawal᷊ụ i kitẹ dingangu arěgane mal᷊ěgadẹ̌. I kitẹ e mẹ̌dẹ̌deạ tau kasiang kụ tawe makaumal᷊ẹ̌ měmaehẹ̌ utange, maningbe utang ene kětạeng kere arěgang sapatu sěmparẹ̌, dingangu i kitẹ e měmělli si sie makoạ ěllang i kitẹ.”
7 Mawu Ruatan tau Israelẹ̌ e, seng nẹ̌salu, ”Iạ mamben sarung tawe miwul᷊eng kakanoạ i sire ral᷊akisẹ̌ e. 8Banua e sarung guminuẹ̌, dingangu kěbị taumata e sarung měngkasusa naunge. Kasěllahu wanua e sarung kumiọ dingangu ipẹ̌nanalange kere Sal᷊ụ u Nil. 9Sarung mịdating tempone Iạ mapakasědạu matangěllo su tempong ěllo mal᷊ětu ringangu wanua e makoạ marěndung su tempong ěllo. Iạ e kai Mawu Kasěllahenge, kụ seng něhengetang. 10Kal᷊awọu parahul᷊iagi kamene e sarung Takụ bal᷊uiang makoạ sasangị dingangu manga kakantarị i kamene makoạ dal᷊ungkang. Iạ e sarung mapakariading kamene měmpěngul᷊ụ utạ i kamene ringangu měmpěluheng pakeang i kamene karong tatialang naung masusa. I kamene sarung makoạ kere inang-iamang kụ lụl᷊ungkang u papateng anạ mang sěmbaụ. Ěllo e sarung mapaghohẹ̌ kụ mambeng makạtatompẹ ěllo mata.”
11 Mawu Kasěllahenge něhengetang, ”Sarung mịdating tempone Iạ maparěntang hombang u karal᷊unusẹ̌ su wanua ini. Taumata e sarung měngkahutung, kaiso wal᷊inewe mạhutung u kaěng. Taumata e mạdou, kaiso wal᷊inewe mạdoung akẹ. I sire e kai mạhutung dingangu mạdoun tita-Ku. 12Taumata e sarung mẹ̌papalilị bọu sěmběkan sawěnahẹ̌ sarang sěmběkan timuhẹ̌ dingangu sěmběkan dakị sarang sěmběkam bahẹ baugu makahombang tatanata-Ku, kaiso i sire tawe makahombang. 13Su ěllo ene sarang lai manga rariọ mangangudạ mal᷊ahuweka e sarung měngkapinsang ual᷊ingu nahanga. 14Taumata apam němpẹ̌salu su arengu mahang duatan Samaria kụ něbera, ’Su arengu mahang duataʼn tau Dan’, arau ’Su arengu mahang duataʼn tau Bersyeba’, – sarung měngkanawo kụ semben tawe saụ makapẹ̌bangung kapia.”
Currently Selected:
AMOS 8: SXN
Highlight
Copy
Compare
Share
Want to have your highlights saved across all your devices? Sign up or sign in
