ZABUR 66
66
Nyanyian pujian dait syukur
1Umaq pemimpin kor. Sopoq nyanyian.
Pade besurak-surak bagi Allah,
hai seantéro gumi!
2Pade benyanyi dait agungang peséngan-Ne,
mulieang Ie siq puji-pujian.
3Ucapang tipaq Allah,
“Tetu-tetu miaq takjub perbuatan Deside!
Musuh takluk léq Deside siq rase takut,
séngaq beléq gati kuase Deside.
4Seantéro gumi sujut nyembah Deside,
ie pade benyanyi memuji peséngan Deside.”
5Pade dateng dait pade serioq perbuatan Allah,
tetu-tetu miaq takjub karye-karye-Ne léq antare manusie!
6 #
Kel. 14:21; Yus. 3:14-17 Segare Ie robah jari tanaq gero,
leluhur tiang pade lampaq mbelat segare nike.
Make tiang pade cemoh lantaran perbuatan-Ne.
7Ie mréntah siq perkase
selaéq-laéqne.
Ie ngawasin bangse-bangse,
adéq dengan saq gen ngelawan ndéq bau sombong léq Ie.
8Pade puji Allah tiang pade, hai bangse-bangse,
nyanyiang keras-keras pujiande tipaq Ie!
9Ie sampun jagaq tiang pade adéq tetep idup,
dait nénten menengang tiang pade geriq.
10Ya Allah, Deside sampun nguji kaji pade
maraq dengan saq murniang perak léq dalem api.
11Deside menengang kaji pade geriq ojok dalem perangkep,
dait Deside icanin bandean saq berat gati.
12Deside menengang kaji pade teicaq-icaq siq musuh;
kaji pade liwatin belabur dait api.
Laguq mangkin Deside sampun gadingang kaji pade
ojok taoq saq makmur.
13Kaji gen jauq kurban tunuqan ojok Gedéng Deside
dait bayah sesangi kaji léq Deside,
14saq kaji ucapang
waktu kaji susah.
15Kaji ngaturang persembahan léq Deside
kurban tunuqan léman binatang piléqan,
bémbéq dombe dait sampi mame,
pendetne taék jangke dateng langit.
16Silaq dateng dait dengah, hai selapuq dengan saq takut léq Allah,
gen tiang ceriteang napi saq telaksaneang siq Allah léq tiang.
17Tiang sampun bekuih nunas tulung léq Ie;
mangkin tiang nyanyiang Ie pujian.
18Seandéne tiang demen mikirang kejahatan,
pasti Junjungan Saq Mulie nénten kayun mirengang.
19Laguq Allah sampun mirengang tiang,
Ie merhatiang petunasan tiang.
20Tiang memuji Allah séngaq Ie nénten nolaq do'e tiang,
dait tetep ngasihin tiang.
Currently Selected:
ZABUR 66: LAISAS
Highlight
Share
Copy
Want to have your highlights saved across all your devices? Sign up or sign in
