Yesus 'ai so-soma'a 23

1Paulus 'o tatamo i'a toma Mahkamah 'Agama re 'o kanau, “Ioronongoḏu ngowa'a Yahudi, singadolo 'orasa nena-ne ngoi to mabasono tala 'ari 'akala re sinyingara ma kanau re tari 'ahu ma dara to 'a'a rapu nyangu ra Ma Jou'ongu Madutu 'ai momina.” 2Wakutu 'a Paulus 'o kanau so'o gena, 'imam 'agung Ananias 'o soma'a ngowa'a ga'a 'aḏi made-de'oso ra Paulus 'ai gagoro 'u sata Paulus 'ai madanga. 3Ḏua Paulus 'o kanau toma 'imam 'agung gena-ge, “Ma Jou'ongu Madutu 'o sata ngana sababu ngana no matuhu ngowa'a loasa re banari, momongolo ua ngana ngowa'a sa-sakala. Ngana no tegoro no sijuruhakimi ngoi mete'e 'a Musa 'ai hukumu, momongolo ua ngana masiretene na sito'u hukumu gena-ge sababu no soma'a ngowa'a 'aḏi sata ngoi!”#Mat. 23:27-28

4'Age rema ngowa'a ga'a te'oso ra Paulus 'ai gagoro 'aḏi kanau ra Paulus, “Ngana no sije-jengere Ma Jou'ongu Madutu 'ai 'imam 'agung!”

5Paulus 'a sangoro, “Oh, ngoi ta waro ua unanga gena-ge 'o 'imam 'agung. Tero mode'e, sababu toma Boku 'Ofi-'Ofi ma dara 'i silefo ḏua: ‘Awa ngini na sije-jengere ninga bangsa ma sae'e.’ ”#Sup. 22:28

6Paulus 'a oḏi'i toma Mahkamah 'Agama manga sigolona 'age rema ngowa'a Saduki, 'age ḏi'i ngowa'a Farisi. Sababu gena-ge, Paulus 'o kanau i'a ra ananga, “Ioronongoḏu ngowa'a Yahudi, ngoi ngowa'a Farisi re 'ari ḇaḇa ngowa'a Farisi ḏi'i. Ngini ni sijuruhakimi ngoi sababu ngoi to ngaku ngowa'a senge-sengene dadunu 'aḏi 'ahu moju.”#Som. 26:5; Flp. 3:5 7Wakutu unanga 'o kanau so'o gena, ngowa'a Farisi re ngowa'a Saduki 'aḏi ma'u tolabe singadolo manga lo-lomu 'i pia'olo 'i dadi balangu romoḏiḏi. 8(Sababu ngowa'a Saduki manga wo-waro 'aḏi 'ahu riwara na'o ngowa'a raḏi sengene re mala'ekata 'o cua, roh-roh mai cua. Mada'a, gena-ge mo-moini ngowa'a Farisi ya ngaku.)#Mat. 22:23; Mrk. 12:18; Luk. 20:27

9Ḏua ananga 'aḏi ma'u rubutu mode-mode'e singadolo 'i dadi kaco. 'Age rema ngowa'a Farisi nga muḏuo i'a, 'aḏi dadi guru 'agama, ananga 'aḏi te'oso re ya lawana mode-mode'e 'aḏi kanau, “Ngomi ma waro unanga nena-ne kai sala ua. Wari'a ḏa ma roh bolo mala'ekata matengo ro siajele ra unanga!” 10Ananga ganapu 'aḏi ma'u rubutu singadolo sordado la-lamo'o 'o mojongo awa-awa ananga 'u taba-taba'a singadolo 'u sisengene Paulus. Dadi sordado la-lamo'o gena-ge 'o soma'a 'ai sordado 'u 'oro unanga tamanga sigolona re 'aḏi gasa unanga toma sordado manga ngi'i.

11Ma ḇiḇini ino ma lobi'i tala, Ma Jou Yesus 'o made-de'oso ra Paulus 'ai gagoro re 'o kanau, “Na site'e tala 'ani 'akala re sinyingara, sababu ma tero sa'olo ngana masiretene no pula'a sakisi mangale Ngoi toma limau Yerusalem, so'o gena ḏi'i ḏuanga i'a, ngana no pula'a sakisi toma limau Roma.”

Ngowa'a 'aḏi mafakati mau sisengene 'a Paulus

12Ma ḇiḇini ino da-daini i'a moju, ngowa-ngowa'a Yahudi 'aḏi masigaro'o re ananga 'aḏi masisasi na'o 'aḏi sisengene 'a Paulus nyangu, ananga 'aḏi ka'e re 'aḏi oromo ua. 13Ananga nga nyagi rata pai'i 'aḏi ma'u fakati. 14Ananga 'aḏi tagi toma 'imam-'imam ma sae'e re ngowa'a Yahudi manga sae'e re 'aḏi kanau, “Ngomi mo-moini mi masisasi pasala ḏua, na'o mi sisengene 'a Paulus nyangu, ngomi mi oromo re mi ka'e ua. 15Sababu gena-ge, nange-ne ngomi mi golo'o ra ngini re Mahkamah 'Agama ni siḏingoto surata toma Roma manga sordado la-lamo'o la unanga 'o soma'a 'a Paulus 'u sitalaḏi ra Mahkamah 'Agama di'a dadunu mu 'urusu Paulus. Mada'a mi masa-sakala ḇato. Ngomi mi totoma unanga toma ngo'omo ma golona di'a mu sisengene.”

16Mada'a 'a Paulus 'ai biḏanga mi ngowa'a nau'u 'o 'isene ananga manga maksudu gena-ge. Dadi unanga 'o tagi toma sordado manga ngi'i re 'o siajele ra Paulus.

17Ḏua Paulus 'o 'aro'o sordado ma sae'e matengo re 'o kanau i'a ra unanga, “Gasa ino tubaie gena-ge toma sordado la-lamo'o sababu unanga 'o mau siajele 'ori i'a ra unanga.” 18Sordado ma sae'e gena-ge 'u gasa tubaie gena-ge ra sordado la-lamo'o re sordado ma sae'e 'o kanau ra unanga, “Paulus, ngowa'a bui gena-ge, 'o 'aro'o ngoi re 'o golo'o ngoi to gasa tubaie ra Tuanga sababu unanga mau 'o siajele 'ori i'a ra ngana.”

19Sordado la-lamo'o 'u gu'u tubaie gena-ge 'ai giama re 'aḏi masai i'a, kara 'u sano, “Ngana mau no siajele 'oru ra ngoi?”

20Tubaie gena-ge 'a sangoro, “Ngowa-ngowa'a Yahudi 'aḏi masigaro'o di'a 'aḏi golo'o Tuanga da-daini nu gasa Paulus sitalaḏi toma Mahkamah 'Agama sababu 'aḏi masa-sakala 'aḏi mau dadunu sano unanga mangale manga da'awa. 21Na'o nyengara, Tuanga na mete'e awa manga go-golo'o, sababu ḏa nga nyagi rata pai'i ananga 'aḏi magogono, 'aḏi totoma Paulus toma ngo'omo ma golona. Ananga mo-moini 'aḏi masisasi pasala ḏua, na'o 'aḏi sisengene 'a Paulus nyangu, 'aḏi oromo re 'aḏi ka'e ua. Ananga 'orasa nena-ne re 'aḏi ḏu-ḏuanga ḏua pa'i totoma Tuanga 'ani demo, na'o Tuanga no nyengara.”

22Sordado la-lamo'o gena-ge 'o kanau, “Ngana no siajele awa ra guna ḇato mangale 'oru ga'a ngana no siajele ḏua ra ngoi mangale manga 'akala ma jira.” Gena ḏua, unanga 'u soma'a tubaie gena-ge 'o maḏibo.

'U siḏingoto 'a Paulus ra gubernur Feliks

23Pasala i'a, sordado la-lamo'o gena-ge 'o 'aro'o sordado ma sae'e nga muḏiḏi re 'o kanau i'a 'o soma'a ananga, “Ngini ni sidodahe sordado biasa nga latu ḏiḏi, sordado remanga jarana nga nyagi tumudingi re sordado remanga kalawi nga latu ḏiḏi la sordado-sordado gena-ge 'aḏi tagi toma limau Kaisarea, nange-ne ḏua ca'olo siworo lobi'i. 24Sidodahe ḏi'i jarana di'a Paulus re ngini ni gasa unanga rema salamata re sipula'a ra gubernur Feliks.” 25Ḏua sordado la-lamo'o gena-ge 'o lefo surata ma betongo so'o ne: 26“Ra gubernur Feliks ga'a ngomi mi silamo'o, tabea ra Klaudius Lisias ino.

27Unanga nena-ne, ngowa-ngowa'a Yahudi ya'u cako'o ḏua re sa'i 'u sisengene. Sababu ngoi to 'isene ḏua unanga 'o ngowa'a Roma, ngoi re 'ari sordado-sordado mi sapolo re mi sisalamata unanga tamanga sigolona. 28Sababu ngoi to mau ta disa waro ma sababu 'oru ananga 'aḏi kalaki unanga, dadi ngoi tu gasa unanga ra ananga manga Mahkamah 'Agama. 29Ananga 'aḏi kalaki unanga sababu 'ai do-doto'o 'i ma'u rapu reo ananga manga 'agama ma hukumu. Mada'a unanga 'ai sala ma lelegu 'i cua, dadi wo sihukumu reo hukumu sengene bolo wo singosama bui unanga, 'i yoḏu'u.” 30Ngowa'a matengo 'o siajele ra ngoi, “ 'Age ḏi'i, rema ngowa'a Yahudi toropo moi ga'a manga 'akala re sinyingara 'i cira re 'aḏi mau 'u sisengene unanga. Wakutu gena-ge ḏua, ngoi tu siḏingoto i'a ra Tuanga gubernur. Re ngoi ḏi'i to soma'a ananga ga'a 'aḏi kalaki unanga, gasa ananga manga da'awa ra Tuanga.”

31Dadi sordado-sordado gena-ge ya siḏagi ananga manga munara. Ananga 'aḏi 'oro 'a Paulus re 'aḏi gasa unanga. Ma lobi'i gena-ge ḏua ananga 'aḏi ngadolo toma limau Antipatris. 32Ma ḇiḇini ino, sordado remanga jarana re 'a Paulus ya dowanga manga ḏo-ḏagi re sordado mamuni'a 'aḏi maḏibo tamanga ngi'i. 33Wakutu ananga 'aḏi ngadolo toma limau Kaisarea, ananga sipula'a surata gena-ge ra gubernur re 'aḏi pula'a 'a Paulus ra unanga. 34Gubernur 'o baca surata gena-ge togumu i'a, unanga 'o sano ra Paulus, “Ngana ni 'asala le'a ino?”

Paulus 'a sangoro, “Ngoi 'ari 'asala toma daeraha Kilikia ino.”

35Gubernur 'o kanau, “Rousu! Ngoi to 'urusu ngana 'ani hali na'o ngowa-ngowa'a ga'a 'aḏi kalaki ngana 'aḏi sapolo 'ane.” Ḏua unanga 'o soma'a sordado-sordado 'aḏi jaga 'a Paulus ra Herodes 'ai kadato ma dara.

Currently Selected:

Yesus 'ai so-soma'a 23: SNT

Highlight

Copy