1 Korintus 4

Yesus 'ai so-soma'a

1Sababu gena-ge ngomi Yesus 'ai so-soma'a, ngini balasu ni fikiri sa'olo Kristus 'ai falalomu-falalomu. Ngomi minga haku di'a mi singadolo ra ngini mangale Ma Jou'ongu Madutu 'ai 'akala ma sanga ga'a manusia ya waro nyangu, singadolo 'orasa nange-ne. 2Sidogo ḏi'i, siḏa-siḏa ngowa'a 'aḏi disa waro mangale falalomu-falalomu 'aḏi cufala bolo siḏagi ua manga tugasa. 3Mangale ngoi masiretene, na'o ngini ni sijuruhakimi ngoi 'ari munara bolo ni gasa ngoi sitalaḏi toma kamara juruhakimi, 'oru ua! Ngoi masiretene mai ta sijuruhakimi ua 'ari munara. 4Ngoi ta sibasono tala to 'a'a sala ua, mada'a gena-ge ma bukiti cua mangale ngoi to 'a'a sala ua! Ma Jou'ongu Madutu 'a waro re 'a sijuruhakimi ngoi rari sala bolo ua. 5Sababu gena-ge ma wakutu ngadolo nyangu, awa ngini cautu i'a ni sijuruhakimi matengo i'a unanga rai sala bolo ua, mada'a totoma ḇato singadolo Ma Jou dadunu 'O sapolo moju. Unanga gena-ge ḏuanga i'a 'a welanga rahasia mo-moini ga'a nange-ne 'i go-gogono toma hafu-hafu ma dara moju. Unanga ḏi'i 'a sisupu manusia manga 'ulungu tamanga 'akala ma dara. Toma 'orasa gena-ge ḏi'i, Ma Jou'ongu Madutu ḏuanga i'a 'o sitoro ngowa'a mo-moini 'i mete'e manga munara ra Unanga.

6Ioronongoḏu ngo-ngaku rimoi, mo-moini gena-ge ngoi aro siajele ra ngini mangale 'a Apolos re ngoi, ngoi to golo'o ngini ni mete'e ngomi sa'olo nana'o rimoi. Dadi ngini ni sitoro ua Ma Jou'ongu Madutu 'ai falalomu, bolo ni sipula'a mara'a ua ḏi'i Ma Jou'ongu Madutu 'ai falalomu. Na'o ngini ni 'a'a so'o gena, ngini ni mete'e Ma Jou'ongu Madutu 'ai demo ga'a 'i silefo toma Boku 'Ofi-'Ofi: 7'A guna lebe la-lamo'o i'a reo ngowa'a lelegu?! Sidogo ḏi'i 'oru ḇato ga'a ta ngini, gena-ge 'o cocatu ra Ma Jou'ongu Madutu tala. Sababu mo-moini gena-ge 'o cocatu, i'a sa'olo ni momole re ni magoro ino sa'olo ninga galasau'u ma duduala masiretene?!

8Toma 'orasa nange-ne, ngini ni fikiri mode-mode'e ngini ninga paralu kama kuranga cocatu rimoi i'a mai riwara! Mada'a so'o gena ua! Ngini ni ta'ajiri mode-mode'e ngini ḏi'i reni dadi 'olana, re ngomi so'o gena ua! Mada'a so'o gena ua! Bara'utungu masala na'o mode-mode'e ngini ni gu'u parenta, la ngini re ngomi ngene wo marimoi wa siḏagi parenta gena-ge. 9Ta sibasono tala Ma Jou'ongu Madutu 'o si'a'a ngomi 'Ai so-soma'a lebe toma 'aḏu reo manusia mo-moini. Re Unanga 'o sijumu ngomi ma tero sa'olo ngowa-ngowa'a ga'a sanga hukumu sengene ga'a ngowa-ngowa'a biasa re mala'ekata-mala'ekata 'aḏi uningi ngomi mi tola'a i'a. 10Ngowa-ngowa'a 'aḏi ta'ajiri ngomi ngowa'a haga, sababu ngomi mi munara di'a Kristus. Mada'a ananga 'aḏi ta'ajiri ngini ni dadi ngowa'a pahe sababu ni marimoi ra Kristus. Ananga 'aḏi ta'ajiri ngomi minga de-de'e cua, mada'a ngini lani te'e. Ngini, ngowa'a 'aḏi silamo'o mada'a ngomi, ngowa'a 'aḏi je-jengere! 11Singadolo wangere nange-ne, ngomi mi basono sawini re minga camala dudungu, minga pakeanga soi 'i sitero i'a taminga lese. Ngowa'a 'aḏi sikisa ngomi. Ngomi mi tegoro malage-lage ngi'i. 12Ngomi mi disa minga 'ahu reminga galasau'u ma duduala masiretene. Ngomi mi sibarakati ngowa'a na'o ngowa'a 'aḏi sisasi ngomi. Wakutu ngowa'a 'aḏi sisikisa ngomi, Ngomi mi tahana sikisa gena-ge reminga 'akala ḇanyo.#Som. 18:3 13Wakutu ngowa'a 'aḏi sikanau ngomi ci-cira, ngomi mi balasa ra ananga mi kanau la-la. Singadolo 'orasa nange-ne ngowa'a 'aḏi 'a'a ngomi ma tero sa'olo ngomi mi dadi jeremoto ga'a 'aḏi upa'a toma di'anga. Ananga 'aḏi ta'ajiri ngomi sa'olo ngowa'a ga'a sifaja 'o dungia.

14Ngoi to lefo surata nena-ne di'a tini sipula'a mara'a ngini ua, mada'a di'a to ḇangata ngini ma tero sa'olo ngoi 'ari ngowa'a masiretene. 15Kalaha taninga 'ahu, guru manga repe ḏua 'aḏi sijumu duhu sa'olo ni mete'e 'a Kristus, mada'a ngini ninga ḇaḇa, pa'i matengo ḇato. Mangale ninga 'ahu marimoi ra Kristus, ngoi nena-ne to dadi sa'olo ngini ninga ḇaḇa sababu ngoi ma siḏa to singadolo Habari Roanga ra ngini, ga'a ngini reni ngaku. 16Sababu gena-ge, ngoi to babata ngini ni mete'e re ni cuḏuḏu'u 'ari de'oso re ḏegoro#1Kor. 11:1; Flp. 3:17 17Sababu gena-ge, ngoi to soma'a 'a Timotius 'o sapolo ra ngini di'a 'o riono ngini ni mete'e re ni cuḏuḏu'u 'ari de'oso re ḏegoro. Timotius ma tero sa'olo ngoi 'ari ngowa'a tu dadalara, re unanga 'o cufala masala tai munara di'a Ma Jou'ongu Madutu. Unanga 'o si'elingi ngini mangale 'ari de'oso re ḏegoro sa'olo ngowa'a matengo ga'a ro ngaku Kristus. Enanga gena-ge ma tero ngoi reto doto'o toma jama'ata ngi'i le'a ḇato.

18Nga muḏuo i'a taninga sigolona ga'a 'aḏi aje ngoi to ngadolo ra ngini riwara. Dadi ananga raḏi momole. 19Mada'a na'o Ma Jou'ongu Madutu 'o pula'a loasa, ti'ara riwara ngoi to sapolo ra ngini. Wakutu gena-ge ngoi ta waro ngowa'a momole gena-ge, na'o ananga remanga kuasa ra Ma Jou'ongu Madutu bolo pa'i demo ḇato. 20Ma Jou'ongu Madutu 'ai kuasa toma ngowa'a manga 'ahu 'i sijumu mete'e ananga manga ga'a, mete'e manga demo ua. 21Ngini pili 'oru ga'a ngini lebe nyanyaḏi: Na'o ngini momole moju, ngoi ḏuanga i'a to sapolo tini sihukumu ngini; bolo na'o ngini masiretene ni maholo, ngoi ḏuanga i'a to sapolo to doto'o ngini rari dadalara re 'akala re sinyingara mereoso.

Currently Selected:

1 Korintus 4: SNT

Highlight

Copy