Rm 1

Kulosa

1Mine Pawulosi ningamutiri wa Yesu Kriste, nivitaniwiki nihlawuliwa akuva mupostola wa Ivangeli ya Xikwembu Nkulukumba,

2leyi kusunguleni ayidumbisiki hi vaprofeta vakwe amatralweni ya kuhlawuleka, 3Makongomanaka ni N'wana wakwe; lweyi a pswaliwiki hi nyama a lixakeni dra Davida, 4kambe a kombisiwiki hi ntamu leswaku, i N'wana wa Xikwembu Nkulukumba hinkonta ya Moya wa Kuxwenga, hi kupfuka kwake ku vafi, anga Yesu Kriste a Hosi Yeru. 5Kuvi hikola kwake hi yamukeliki a timpswalu ni vurumiwa, kuyisela kuyingiseteni ka kupfumela, amakari ka vhanu va-Matiko hinkwawu hinkonta ya vito drakwe. 6Ku n'wine lava vanga Roma n'wikumeka ntlaweni lowo wa lava vavitaniwiki kuva va Yesu Kriste. 7Nitralela n'wine hinkwenu, Xikwembu Nkulukumba an'wirandriki, an'wivitaniki a kuhanyela Yene.

Ingi Xikwembu Nkulukumba, Tatana weru, na Yesu Kriste Hosi yeru vangan'winyika timpswalu ni kurula.

Pawulosi anavela kuyendrela Roma

8A kusungula nitlangela Xikwembu Nkulukumba wanga ha Yesu Kriste, hinkonta yenu hinkwenu, hikusa amisaveni hinkwayu kukhaneliwa hi kupfumela kwenu. 9Hikuva Xikwembu Nkulukumba lweyi nimutirelaka a moyeni wanga ku Ivangeli ya n'wana'kwe, i mboni yanga ya leswi swaku minkama hinkwayu nan'widrimuka. 10Nikombela swikhongotweni swanga hi minkama hinkwayu, hi kurandra ka Xikwembu Nkulukumba, aninyika ndjombo ya kuta nitava na n'wine. 11Hikusa ninikunavela kun'wivona ni kun'witivisa swatinyiko ta Moya, leswaku n'witiyisiwa swinene. 12Hi leswi swaku, akuva kun'we na n'wine, mine nitiyisiwa hi kupfumela loku hinga na kone, ku n'wine ne ku mine. 13#Lavisa Mnt 19:21. Anirandri mfuri vamakweru, leswaku n'wikohla leswaku ha kanyingi niyentxi makungu ya kun'wiyendrela, akuva na kone nikuma mihandru swanga hi leswi swiyentxekaka makari ka van'wana. 14Nini nandru ku va-Girika, ni le ku va-Barbara, ku tintlhari ni le ku lava vakudrivala. 15Hikolaho, akunavela ku le ku mine, nitibekiselile akun'witivisa Ivangeli, ku n'wine lava vanga le Roma.

Ntamu wa Ivangeli

16Aninatingana hi Ivangeli ya Kriste. Hikusa kunene hi wone ntamu wa Xikwembu Nkulukumba wa kuhanyisa hinkwavu lava pfumelaka, kusungula a va-Yuda ni va-Matiko. 17Hakuva ku wone, kupfuleteliwa avululami bya Xikwembu Nkulukumba, kupfumela hikupfumela, swanga hi leswi kutraliwiki: Kambe amululami atahanya hikupfumela.

Hinkwavu vani milandru mahlweni ka Xikwembu Nkulukumba

18Hikuva amahlundru ya Xikwembu Nkulukumba matikombisa Matilweni ahenhla ka swidoho hinkwaswu ni vubihi hinkwabyu lebyi byindrulutaka xihlayelamfuri hi vubihi. 19Hikuva leswi swinga tibyiwaka swa Xikwembu Nkulukumba swikombisiwa ha vone, Hikusa ni le ku vone Xikwembu Nkulukumba atitivisile. 20Hikusa leswi swinga voniwiki swake, a kusukela akutumbuluxiweni ka misava, swanga hi ntamu wakwe lowu wunga helikiki ni vukwembu byake, swivonekisiwa switibyiwa hi mintxhumu leyi a mitumbuluxiki. Hikola ka leswo akuna ku tilandrula. 21Hikuva, loko vativile Xikwembu Nkulukumba, avamudrumisanga, nambi ka kuva kun'witlangela, vali kundruluka miyanakanyu yavu mingapfuni ntxhumu, ni timbilu tavu ta kubiha ti lahlekile amunyameni. 22Vatihlaya leswaku i tintlhari, vandruluka swimphunta. 23Vandruluta a lidrumu dra Xikwembu Nkulukumba lweyi angafikiki, vagandrela swifaniso swa mhunu lweyi a faka, vako vagandrela swifaniso swa tinyanyana, ni tinyoka ni swa swin'wana swihari. 24Hikolahu na Yene Xikwembu Nkulukumba a vanyikeli akunaveleni kwavu, vawela mintirweni ya tingana ya kusoleka a mirini yavu. 25Vandruluti a xihlayelamfuri xa Xikwembu Nkulukumba hi madrimi, Vagandrelile ni kutirela swivumbiwa matrhan'wini ya Muvumbi, Yene lweyi afanekelaka kugandreliwa hila kungahelikiki. Amen!

26Xileswo, Xikwembu Nkulukumba avatrikeli akunaveleni ka swatingana, hikusa nambi hi vavasati vavu vandruluta ntwanano wa ntumbuluku hi ntwanano wa kuhambana ni wa ntumbuluku. 27Hi ndlela yoleyo, a vavanuna vatriki a ntwanano lowu nga wone ni wansati akuva vapfura hi kunavelana a van'we ku van'wana. Vahisekela ku navelana mun'we ni mun'wana, kutani vayamukeli hakelo hikola kaswihoxo swavu. 28Na swone leswi vatrikiki kutiva Xikwembu Nkulukumba, xiswoswo Xikwembu Nkulukumba avanyikeli avutlharini bya kuhomboloka, akuva vayentxa leswi faka swingafanekeli. 29Vataliki hi vusomboloki hinkwabyu, ni kunavela, ni vubihi, ni matrhoho, ni vudlayi, ni pfilumpfilu, ni madrimi, ni mona ni kuhleva. 30Vahlevi ni valumbeti, ni vavengi va Xikwembu Nkulukumba, vakulebya, vatikulisi, vatikukumuxi, vatisi va madrimi ni lava kuka vangayingeli vapswali. 31Vakuka vangena lipfalu, vakuka vanga dumbekanga, vakupfumala lirandru ni lirere van'we ku van'wana. 32Lava vativaka leswi swinene swa Xikwembu Nkulukumba (hileswaku hinkwavu lava hanyisaka xileswi vafanekeliwa hi lifu). Avayentxi leswo ntsena kambe vakokela ni van'wana a kuyentxa swakufana

Currently Selected:

Rm 1: NTX2007

Highlight

Copy