Popera ga Pirípuwa yexmagüxü̃ ga yaxõgüxü̃tanüwa namuxü̃ ga Pauru 2

Cristu rü ñoma taxuxü̃ma yixĩxü̃rüxü̃ nügü nixĩxẽxẽ

1Rü ngẽmaca̱x, Pa Chauenexẽgüx, rü ñu̱xma nax Cristuarü duü̃xü̃gü pixĩgüxü̃, ¿rü aixcüma yixĩxü̃ i nüma pexü̃ nataãẽxẽẽxü̃? ¿Rü aixcüma yixĩxü̃ i ngẽma taãẽmaxã togüxü̃ petaãxẽxẽxẽxü̃? ¿Rü aixcüma yixĩxü̃ i Tupanaãxẽ ya Üünecü pexü̃tawa ngẽxmaxü̃? ¿Rü aixcüma yixĩxü̃ i pegüxü̃́ pengechaü̃tümüxü̃güxü̃?

2Rü ngẽxguma chi ngẽmaãcü yixĩxgu, rü chanaxwa̱xe i guxãma wüxigu perüxĩnüe, rü aixcüma guxãma pegü pengechaü̃gü, rü guxãma wüxitama i ĩnü pexü̃́ nangẽxma, rü guxãma wüxitama i ngúchaü̃ca̱x pedau. Rü ngẽxguma ngẽmaãcü pemaxẽgu rü wüxi i chorü taãxẽ tá nixĩ.

3Rü tama name nax togüarü yexera pegü pixĩgüxẽẽxü̃ rü pegü picua̱xüü̃güxü̃. Rü narümemae nixĩ i wüxichigü nagu perüxĩnüe nax ngẽma togü rü perü yexera yixĩgüxü̃.

4¡Rü tama pegüguxicatama perüxĩnüe, natürü name nax ngẽma togügu perüxĩnüexü̃ rü pegü perüngü̃xẽxẽgüxü̃!

5Rü name nixĩ ga yema Ngechuchu ya Cristu nagu rüxĩnüxü̃gu nax perüxĩnüexü̃ i pemax.

6Yerü nüma ga Cristu rü woo Tupanaxü̃chi nax yixĩxü̃, natürü tama nügü yéma ninuxũ.

7-8Rü yemaca̱x yéma nanata̱x ga norü mexü̃gü ga daxũguxü̃ ga naanewa. Rü wüxi i mugüruxü̃ nügü nixĩxẽxẽ. Rü ñoma wüxi i duü̃xü̃rüxü̃ ñoma ga naanegu nabu. Rü yexguma marü duü̃xü̃ yixĩxgu ga nümax, rü ñoma taxuxü̃ma yixĩxü̃rüxü̃ nügü nixĩxẽxẽ. Rü Tupanaga naxĩnü ñu̱xmata curuchagu nayu.

9Rü yemaca̱x ga Tupana rü guxü̃étüwa nanangexmaxẽxẽ rü nayangucuchixẽxẽ nax guxü̃ma i naégaétüwa nangẽxmaxü̃ca̱x.

10Rü yemaacü nanaxü ga Tupana nax Ngechuchupe̱xegu tacaxã́pü̱xügüxü̃ca̱x rü nüxü̃ ticua̱xüü̃güxü̃ca̱x ya guxãma ya texé ya daxũguxü̃ i naanewa ngẽxmagüxe, rü guxãma i ñoma i naanewa ngẽxmagüxe, rü guxãma ya marü yuexe.

11Rü yemaacü Tupana ãẽ̱xgacüxü̃ nayaxĩxẽxẽ nax guxãma nüxü̃ ixuxü̃ca̱x nax tórü Cori yixĩxü̃ ya Ngechuchu ya Cristu rü ngẽmaãcü guxãma nüxü̃ icua̱xüü̃güxü̃ca̱x ya Tanatü ya Tupana.

Cristuarü duü̃xü̃gü rü ñoma omügürüxü̃ nixĩgü i natanüwa i ngẽma duü̃xü̃gü i tama yaxõgüxü̃

12Rü ngẽmaca̱x chanaxwa̱xe i chauga pexĩnüe, Pa Chauenexẽgü ya Pexü̃ Changechaü̃güxe. Rü yéma petanüwa chayexmagu chauga nax pexĩnüexü̃arü yexera chanaxwa̱xe i chauga pexĩnüe i ñu̱xma nax tama petanüwa changexmaxü̃. Rü chanaxwa̱xe i Tupanaxü̃ pemuü̃ẽãcüma pegü peporaexẽxẽ nax nawe perüxĩxü̃ i ngẽma ore i maxü̃ tüxna ãxü̃.

13Erü Tupana nixĩ ya perü maxü̃wa puracücü nax mexü̃gu perüxĩnüexü̃ca̱x. Rü nüma nixĩ i pexü̃ nangü̃xẽẽxü̃ nax naga pexĩnüexü̃ca̱x rü peyanguxẽẽxü̃ca̱x i ngẽma norü ngúchaü̃.

14Rü guxü̃ma i ngẽma Tupanaca̱x pexüxü̃wa rü tama name i oõcü penaxü rü tama name nax pegü naxca̱x pechoxü̃gagüxü̃.

15-16Rü name i ngẽmaãcü mea pemaxẽ nax taxúema ta̱xacürü chixexü̃xü̃ pewa iyanga̱u̱xü̃ca̱x. Rü penaxwa̱xe i Tupanaxacügü i mea maxẽxü̃ pixĩgü i natanüwa i ngẽma duü̃xü̃gü i chixexü̃ rü chixeãẽgümarexü̃. Rü ngẽxguma ngẽma duü̃xü̃gümaxã nüxü̃ pixugüyane i ngẽma ore i mexü̃ i tüxü̃ maxẽxẽẽxü̃, rü natanüwa rü ñoma woramacurigü ya ẽanexü̃wa ibáixgücürüxü̃ tá pixĩgü. Rü ngẽmaãcü i ngẽxguma wena núma naxũxgu ya Cristu rü choma rü tá chataãxẽ, erü tá nüxü̃ chadau nax tama natüca̱xmamare yixĩxü̃ ga yema puracü ga petanüwa chaxüxü̃.

17Rü ñu̱xma nax mea peyaxõgüxü̃, rü ngẽma nixĩ i perü ãmare i Tupanana pexãxü̃. Rü ngẽma nax mea yanguxü̃ca̱x i ngẽma perü ãmare i Tupanape̱xewa, rü choma rü íchamemare nax Tupanaca̱x ichanaxãxü̃ i chorü maxü̃ rü chayuxü̃. Rü ngẽmaca̱x woo chayu̱xgu rü wüxi i taãxẽ tá nixĩ i cha̱u̱xca̱x. Rü chanaxwa̱xe i pemax rü ta wüxigu chomaxã petaãẽgü.

18Rü ngẽmaca̱x chanaxwa̱xe nax pema rü ta wüxigu chomaxã petaãẽgüxü̃.

Timutéu rü Epaporudítu

19Rü ngẽxguma tórü Cori ya Ngechuchu naxwa̱xegu rü paxa petanüwa chanamuxchaü̃ ya taenexẽ ya Timutéu nax nüma pexü̃ íyadauxü̃ca̱x rü choma rü chataãẽxü̃ca̱x i ngẽxguma núma nangeãgu i pechiga.

20Rü aixcüma nataxuma i to i chorü ngü̃xẽẽruxü̃ i Timutéurüxü̃ aixcüma pegu rüxĩnüxü̃ rü pexü̃ rüngü̃xẽẽchaü̃xü̃.

21Erü guxü̃ma i togü rü naxca̱x nadaugü i noxrütama ngúchaü̃gü, rü tama aixcüma nagu narüxĩnüe i ngẽma Ngechuchu ya Cristuarü ngúchaü̃.

22Natürü i pema rü marü nüxü̃ pecua̱x nax ñuxãcü mea namaxü̃xü̃ i Timutéu, rü ñuxãcü choxü̃ nangü̃xẽẽxü̃ i Tupanaarü orearü uchigawa, ñoma wüxi i nane i nanatüxü̃ rüngü̃xẽẽxü̃rüxü̃.

23Rü ngẽmaca̱x i ngẽxguma nüxü̃ chacua̱xgu nax ta̱xacü tá choxü̃ üpetüxü̃ i núma, rü ñu̱xũchi ngéma petanüwa chanamuxchaü̃ i Timutéu nax pexü̃ íyadauxü̃ca̱x.

24Rü ngẽxgumarüxü̃ ta chayaxõ nax nüma ya tórü Cori rü tá choxü̃ nangü̃xẽẽxü̃ nax chomatama ngéma petanüwa chaxũxü̃ca̱x.

25Rü ngẽxgumarüxü̃ ta cha̱u̱xca̱x name nixĩ i ngéma petanüwa chanamuxü̃ i taenexẽ i Epaporudítu. Rü nüma nixĩ ga pematama cha̱u̱xca̱x núma penamuxü̃ nax choxü̃ nangü̃xẽẽxü̃ca̱x. Rü nüma rü chomücü nixĩ i Tupanaarü puracüwa, rü poraãcü choxü̃ narüngü̃xẽxẽ i ta̱xacü choxü̃́ taxuxü̃wa.

26Rü poraãcü nüxü̃́ nangúchaü̃ nax pexü̃ íyadauxü̃ i guxãma i pemax. Rü poraãcü naxoegaãẽ, yerü pema rü nüxü̃ pecuáchiga nax yada̱xawexü̃ ga nümax.

27Rü aixcüma nixĩ ga nax yada̱xawexü̃, rü wixguxüchi taa̱x nayu. Natürü Tupanaaxü̃́ nangechaü̃tümüxü̃ rü nüxü̃́ changechaü̃tümüxü̃ rü naxca̱x nayataanexẽxẽ nax tama yexeraãcü changechaü̃xü̃ca̱x.

28Rü ngẽmaca̱x rü yexeraãcü chanaxwa̱xe nax paxa petanüwa chanamuxü̃ i Epaporudítu, nax pema rü petaãẽgüxü̃ca̱x i ngẽxguma wena nüxü̃ pedaugügu rü choma rü tama pexca̱x chaxoegaãxẽxü̃ca̱x.

29Rü chanaxwa̱xe i tórü Coriégagu petaãẽgüãcüma mea penayaxu. Rü name nixĩ i nüxü̃ pengechaü̃gü i ngẽma duü̃xü̃gü i Epaporudíturüxü̃ ixĩgüxü̃.

30Yerü nüma ga Epaporudítu rü yema nax poraãcü Cristuarü puracüwa napuracüxü̃ rü wixguxüchi taa̱x nayu. Rü ãũcümaxü̃wa nügü nayexmaxẽxẽ nax pechicüxü choxü̃ nangü̃xẽẽxü̃ca̱x.

Currently Selected:

Popera ga Pirípuwa yexmagüxü̃ ga yaxõgüxü̃tanüwa namuxü̃ ga Pauru 2: tcaP

Highlight

Copy

Compare