Popera ga Pirípuwa yexmagüxü̃ ga yaxõgüxü̃tanüwa namuxü̃ ga Pauru 1

Pauru rü nüxü̃ narümoxẽ ga yema yaxõgüxü̃ ga Pirípuwa yexmagüxü̃

1Pa Toenexẽgü ya Pirípuwa Ngẽxmagüxex, choma i Pauru rü namaxã i taenexẽ i Timutéu nixĩ i pexca̱x tanaxümatüxü̃ i ñaa popera. Rü toma rü Ngechuchu ya Cristuarü puracütanüxü̃ tixĩgü. Rü pexca̱x tanaxümatü i pema i yaxõgüxü̃arü ãẽ̱xgacügü nax pixĩgüxü̃, rü pema i Tupanapatawa ngü̃xẽẽruü̃gü nax pixĩgüxü̃, rü guxãma i pema ya Ngechuchu ya Cristuaxü̃́ yaxõgüxe.

2Rü chanaxwa̱xe i Tanatü ya Tupana rü tórü Cori ya Ngechuchu ya Cristu poraãcü pexü̃ nangechaxü̃ rü pexü̃ nataãẽxẽxẽ.

Pauru rü yema yaxõgüxü̃ca̱x nayumüxẽ

3Rü guxü̃guma i ngẽxguma pexna chacua̱xãchigu rü chorü Tupanana moxẽ chaxã.

4Rü ngẽxguma chayumüxẽgux, rü guxü̃guma chataãẽãcüma pexca̱x chayumüxẽ i guxãma i pemax.

5Erü pema rü noxritama Tupanaarü orexü̃ pexĩnüegumama rü poraãcü choxü̃ perüngü̃xẽxẽ nax nüxü̃ chixuxü̃ca̱x i norü ore i mexü̃. Rü ñu̱xma rü ta choxü̃ perüngü̃xẽẽgüecha.

6Rü Tupana rü marü inanaxügü i wüxi i mexü̃ i puracü i perü maxü̃wa. Rü nüxü̃ chacua̱x rü nüma rü guxü̃gutáma nanaxüecha i ngẽma puracü ñu̱xmatáta yanguxẽẽã i ngẽxguma ínanguxgu ya Ngechuchu ya Cristu.

7Rü aixcüma name nax ngẽmaãcü pemaxã nagu charüxĩnüxü̃ i guxãma i pemax, erü poraãcü pexü̃ changechaü̃ rü Tupana rü wüxigu tüxü̃ narüngü̃xẽxẽ i guxãma i yixema. Rü woo ñu̱xma nax chapoxcuxü̃ rüe̱xna ega ãẽ̱xgacügüpe̱xewa choxü̃ nagagügu, rü Tupana choxü̃ narüngü̃xẽxẽ i ngẽxguma norü oreétüwa chidexagu rü ãẽ̱xgacügümaxã nüxü̃ chixuxgu nax ngẽma orewa yixĩxü̃ i nüxü̃ iyarünga̱u̱xü̃ i tórü maxü̃ i taguma gúxü̃. Rü nüxü̃ chacua̱x rü ngẽma choxü̃ nangü̃xẽẽxü̃ãcüma, rü pexü̃ rü ta narüngü̃xẽxẽ.

8Rü Tupana nüxü̃ nacua̱x nax poraãcü pexü̃ chadauxchaü̃xü̃ rü pexü̃ nax changechaü̃xü̃ i guxãma i pemax, ngẽma Ngechuchu ya Cristu pexü̃ nax ngechaü̃xü̃rüxü̃.

9Rü chorü yumüxẽwa naxca̱x íchaca nax yexeraãcü pegü pengechaü̃güxü̃ca̱x nax yexeraãcü Tupanaxü̃ pecuáxü̃ca̱x rü nüma yexeraãcü cua̱x pexna naxãxü̃ nax nüxü̃ pecuáxü̃ca̱x nax mea naxca̱x pemaxẽxü̃.

10Rü ngẽmaãcü pexca̱x chayumüxẽ erü chanaxwa̱xe nax mea penangugüxü̃ i ta̱xacü nixĩ i aixcüma mexü̃ i Tupanape̱xewa. Rü chanaxwa̱xe nax aixcüma namexü̃ i perü maxü̃ nax taxuca̱xma ta̱xacüca̱x Tupana pexna caxü̃ca̱x i ngẽxguma ínanguxgu ya Cristu.

11Rü naxca̱x íchaca nax Ngechuchu ya Cristu pexü̃ rüngü̃xẽẽxü̃ca̱x nax aixcüma namexü̃ca̱x i perü maxü̃ rü aixcüma penaxüxü̃ca̱x i ngẽma Tupanape̱xewa mexü̃ nax ngẽmaãcü Tupanaga pexĩnüexü̃ca̱x rü nüxü̃ picua̱xüü̃güxü̃ca̱x.

Cristugagu nixĩ i chamaxü̃xü̃

12Pa Chauenexẽgüx, chanaxwa̱xe i nüxü̃ pecua̱x rü guxü̃ma i ngẽma choxü̃ üpetüxü̃, rü aixcüma ngẽmaãcü choxü̃ naxüpetü nax yexeraãcü natachigaxü̃ca̱x i Tupanaarü ore i mexü̃.

13Rü ñu̱xma rü guxü̃ma i ngẽma churaragü i ãẽ̱xgacüpataarü dauruü̃gü rü guxü̃ma i ngẽma togü i ngéma ngẽxmagüxü̃ nüxü̃ nacua̱xgü nax Cristuca̱x nixĩ nax chapoxcuxü̃.

14Rü ñu̱xma nax chapoxcuxü̃ rü ngẽma rümumaexü̃ i taenexẽgü i yaxõgüxü̃ rü nüxü̃́ nangúchaü̃ nax tama namuü̃eãcüma nüxü̃ yaxugüxü̃ i Tupanaarü ore.

15Rü aixcüma nixĩ i ñuxre i duü̃xü̃gü rü togüxü̃ nax yaxãũxãchixẽẽxü̃ca̱xmare nüxü̃ nixugüexü̃ i Cristuchiga, erü togüxü̃ narüyexerachaü̃. Natürü nangẽxma i togü i duü̃xü̃gü i aixcüma mexü̃gu naxĩnüeãcüma mea nüxü̃ ixugüexü̃ i ngẽma ore.

16Rü ñuxre i duü̃xü̃gü rü Cristuchigaxü̃ nixugüe erü choxü̃ nangechaü̃gü rü nüxü̃ nacua̱xgü nax Tupana nuxma choxü̃ muxü̃ nax íchanapoxü̃xü̃ca̱x i norü ore.

17Natürü nangẽxma i togü i noxrütama ngúchaü̃ca̱x daugüxü̃ rü ngẽmaca̱x nüxü̃ ixugüexü̃ i ngẽma ore. Rü nümagü rü tama mexü̃gu narüxĩnüe, rü naxca̱x nadaugü nax yexeraãcü choxü̃́ naguxchaxẽẽgüãxü̃ i ñu̱xma nax chapoxcuxü̃.

18-19Natürü nüetama nixĩ ega woo ngẽmaãcü yixĩxgu. Erü woo mexü̃ i norü ngúchaü̃maxã yixĩxgu rü ẽ̱xna tama, natürü Cristuchigaxü̃ nixugüe. Rü ngẽma rü wüxi i taãxẽ nixĩ i cha̱u̱xca̱x. Rü guxü̃gutáma chataãẽecha erü nüxü̃ chacua̱x rü guxü̃ma i ngẽma rü chorü mexü̃ca̱x tá nixĩ. Erü cha̱u̱xca̱x peyumüxẽgü rü choxü̃ narüngü̃xẽxẽ ya Ngechuchu ya Cristuãxẽ.

20Rü ngẽma poraãcü chanaxwa̱xexü̃ nixĩ nax taguma ta̱xacürü chixexü̃ chaxüxü̃ nax taxuca̱xma chaugüca̱x chaxãnexü̃ca̱x. Rü chanaxwa̱xe i guxü̃guma íchamemare nax guxãpe̱xewa tama chamuü̃ãcüma Cristuchigaxü̃ chixuxü̃. Rü ñu̱xma nax chamaxü̃xü̃ rü woo chayu̱xgu rü chanaxwa̱xe i guxü̃guma aixrügumarüü̃tama chaugagu Cristuxü̃ nicua̱xüü̃gü i duü̃xü̃gü.

21Erü cha̱u̱xca̱x rü Cristuarü ngúchaü̃ nax chaxüxü̃ca̱x nixĩ nax chamaxü̃xü̃. Natürü ngẽxguma chayu̱xgu rü ngẽma rü ta name, erü Cristuxü̃tawa tá changexma i ngẽxguma.

22Rü ñu̱xma nax chamaxü̃xü̃ rü choxü̃́ natauxcha nax chanaxüxü̃ i tórü Coriarü puracü. Rü ngẽmaca̱x tama nüxü̃ chacua̱x i ta̱xacü nixĩ i rümemaexü̃ i cha̱u̱xca̱x, ngẽma nax chayuxü̃ rü ẽ̱xna nax chamaxü̃xü̃.

23Rü ngẽmaca̱x tama nüxü̃ chacua̱x nax ta̱xacü yixĩxü̃ i cha̱u̱xca̱x rümemaexü̃ i ngẽma taxrewa. Erü ñuxguacü rü chanaxwa̱xe nax chayuxü̃ nax Cristuxü̃tawa changexmaxü̃ca̱x. Rü ngẽma nixĩ i aixcüma yexera rümemaexü̃ i cha̱u̱xca̱x.

24Natürü nagu charüxĩnü rü narümemae nixĩ nax pexca̱x rü ñoma i chaxunemaxãtama nax chamaxü̃xü̃ nax ngẽmaãcü pexü̃ charüngü̃xẽẽxü̃ca̱x.

25Rü ñu̱xma nax mea nüxü̃ chacuáxü̃ nax pechoxwa̱xexü̃, rü ngẽmawa nüxü̃ chacua̱x nax taxũtáma paxa chayuxü̃. Rü ngẽmaãcü tá chamaxãma nax pexü̃ charüngü̃xẽxẽxü̃ca̱x nax yexeraãcü Cristuca̱x pemaxẽxü̃ca̱x rü yexeraãcü taãẽãcüma nüxü̃́ peyaxõgüxü̃ca̱x.

26Rü ngẽmaãcü wena táxarü petanüwa changexma. Rü ngẽxguma wena choxü̃ pedaugügu rü aixcüma tá petaãẽgü, erü tá pexü̃́ nangẽxma nax ta̱xacüca̱x Ngechuchu ya Cristuxü̃ picua̱xüü̃güxü̃.

27Rü ngẽma guxü̃arü yexera rümemaexü̃ nixĩ nax naxca̱x pedauxü̃ nax mea pemaxẽxü̃, ngẽma Cristuarü ore pemaxã nüxü̃ ixuxü̃rüxü̃. Rü ngẽxguma petanüwa chaxũxgu rü ẽ̱xna woo tama ngéma chaxũxgu, natürü nüxü̃ chaxĩnüchaü̃ nax guxãma wüxigu pegü peporaexẽẽxü̃ nax taguma nüxü̃ perüchauxü̃ca̱x nax peyaxõgüxü̃, rü ngẽmaãcü Tupanaaxü̃́ pepuracüexü̃ nax yexeraãcü yaxũchigüxü̃ca̱x i norü ore.

28¡Rü taxũtáma perü uanügüxü̃ pemuü̃e nax nüxü̃ pixuxü̃ i ngẽma ore! Rü ngẽma nax tama nüxü̃ pemuü̃exü̃ rü ngẽma rü wüxi i cua̱xruxü̃ tá nixĩ nüxü̃́ i perü uanügü. Rü ngẽmawa tá nüxü̃ nacua̱xgü nax yuwa tá naxĩxü̃ i nümagü natürü i pema rü tá maxü̃wa nax pexĩxü̃. Rü Tupana tá nixĩ ya pexü̃ rüngü̃xẽxẽcü nax tama nüxü̃ pemuü̃exü̃ca̱x i ngẽma perü uanügü.

29Rü ñu̱xma nax Tupana pexü̃ natauxchaxẽẽxü̃ nax Cristuaxü̃́ peyaxõgüxü̃, rü ngẽxgumarüxü̃ tá ta pexna nanaxã i pora nax Cristuca̱x ngúxü̃ pingegüxü̃.

30Pema rü choma rü wüxigu Tupanaarü puracüwa tangexmagü, rü tanaxüama i ngẽma puracü woo texé tüxü̃́ naguxchaxẽẽgux. Rü ü̃pa rü marü choxü̃ pedau ga woo guxchaxü̃ cha̱u̱xca̱x ínguxgu chanaxüamaxü̃ i ngẽma puracü. Rü ñu̱xma rü ta nüxü̃ picuáchiga nax chanaxüamaxü̃ woo guxchaxü̃gü nax cha̱u̱xca̱x íngugüxü̃.

Currently Selected:

Popera ga Pirípuwa yexmagüxü̃ ga yaxõgüxü̃tanüwa namuxü̃ ga Pauru 1: tcaP

Highlight

Copy

Compare