Iraétanüxü̃arü muxchiga 12
12
María rü Aróü̃ rü Moichéchiga nidexagü
1Rü María rü Aróü̃ rü inanaxügüe nax chixri Moichéchiga yadexagüxü̃ yerü Moiché rü wüxi ga ngecü ga Etiopíaanecüã̱xmaxã naxãxma̱x.
2Rü ñanagürügü: —Cori ya Tupana rü tama nixĩ ga Moichémaxãxicatama yadexaxü̃ rü tamaxã rü ta nixĩ ga yadexaxü̃ —ñanagürügü. Rü yema nax yemaacü yadexagüxü̃ rü nüma ga Cori ya Tupana rü nüxü̃ naxĩnü.
3Rü aixcüma nixĩ ga Moiché rü guxü̃ i duü̃xü̃güarü yexera tama nügü irütacü yixĩxü̃ i ñoma i naanewa.
4Rü yemaca̱x ga Cori ya Tupana rü Mochéxü̃, rü Aróü̃xü̃ rü Maríaxü̃ ñanagürü: —Chanaxwa̱xe i pema tomaepü̱x nax chopatawa pexĩxü̃ —ñanagürü.
5Rü yexguma ga nüma ga Cori ya Tupana rü caixanexü̃gu ínarüxĩ napataarü ĩã̱xgu, rü Aróü̃ca̱x rü Maríaca̱x naca. Rü nümagü rü nape̱xewa naxĩ.
6Rü nüma ga Cori ya Tupana rü ñanagürü: —¡Choxü̃ iperüxĩnüe i ñaa pemaxã tá nüxü̃ chixuxü̃! Rü ngẽxguma petanüwa nangẽxmagu i wüxi i chorü orearü uruxü̃, rü choma nixĩ i chanango̱xetüxẽẽxü̃ rü nanegüwa namaxã chidexaxü̃.
7Natürü chorü duü̃ ya Moichémaxã rü tama ngẽmaãcü chidexa. Erü guxü̃ma i chorü duü̃xü̃gütanüwa rü Moiché nixĩ ya chorü duü̃ ya yexera chauga ĩnücü.
8Rü choma rü ngóxü̃wama Moichémaxã chidexa nawa i wüxi i naga i nüma meama nüxü̃ nacuáxü̃. ¿Rü ngẽmaca̱x i pema rü tü̱xcüü̃ tama pemuü̃e nax chixri nachiga pidexagüxü̃? —ñanagürü.
9Rü nüma ga Cori ya Tupana rü poraãcüxüchima Aróü̃maxã rü Maríamaxã nanu, rü nüxna nixũ.
10Rü yexguma Tupanapataétüna yaxũgachigu ga caixanexü̃, rü Maríawa narügo ga chaxüne. Rü ngĩrü guxü̃xü̃newa icho̱x. Rü yexguma Aróü̃ Maríaca̱x íyada̱u̱xgu rü ngĩxü̃ nadau nax chaxüne ngĩxü̃newa rügoxü̃.
11Rü yexguma ga Aróü̃ rü Moichéxü̃ ñanagürü: —Pa Chorü Corix, ¡taxṹ i toxü̃ cupoxcuexü̃ naxca̱x i ngẽma chixexü̃ i toechitamare taxügüxü̃!
12¡Rü tama cunaxwa̱xe i María rü ngẽma ngĩmachi rü ñoma wüxi ya buxe ya tümaéanügu yuxerüxü̃ yayixixü̃! —ñanagürü.
13Rü yexguma ga Moiché rü Cori ya Tupanana naca rü ñanagürü: —Pa Corix, Pa Tupanax, cuxna naxca̱x chaca nax ngĩxca̱x cuyataanexẽẽxü̃ i María —ñanagürü.
14Rü Cori ya Tupana nanangãxü̃ rü ñanagürü: —Yexguma chi ngĩnatü ngĩchiwewa cuaxigu, rü ngĩma rü chi 7 i ngunexü̃ ngĩgümaxã iyaxãũxãchi. Rü ngẽmaca̱x i ñu̱xma rü 7 i ngunexü̃ tá nixĩ nax ngĩxü̃ ípeta̱xüchixü̃ i ngéma duü̃xü̃gü íxãpataxü̃wa. Rü ngẽxguma marü yanguxgu i ngẽma 7 i ngunexü̃ rü name nixĩ nax wenaxarü duü̃xü̃gü íxãpataxü̃wa naxũxü̃ —ñanagürü.
15Rü yemaacü ga María rü 7 ga ngunexü̃ duü̃xü̃gü íxãpataxü̃wa ngĩxü̃ ínata̱xüchigü. Rü yemaca̱x ga Iraétanüxü̃ rü yema nachicawatama nayexmagü.
16Rü yexguma María wena natanüwa ũxgu, rü inaxĩãchi ga Acheróxwa. Rü chianexü̃ ga Paráü̃gu nayapexgü.
Currently Selected:
Iraétanüxü̃arü muxchiga 12: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
