Ore i mexü̃ ga Márcu ümatüxü̃ 4

Ore ga toecügu ixuxü̃

(Mt. 13.1-9; Lc. 8.4-8)

1Rü wenaxarü inanaxügü ga Ngechuchu ga nax nangúexẽẽãxü̃ ga duü̃xü̃gü ga gumá naxtaxaanacüwa. Rü muxü̃ma ga duü̃xü̃gü yexma naxca̱x nangutaque̱xegü. Rü yemaca̱x düxwa wüxi ga ngue ga yéma naxtaxawa yexmanegu nixüe ga Ngechuchu, rü gumáwa narüto. Rü yema duü̃xü̃gü rü naxtaxaanacügu narücho.

2-3Rü yexguma ga Ngechuchu rü inanaxügü ga muxü̃ma ga ore ga cua̱xruü̃wa nax nangúexẽẽãxü̃ ga duü̃xü̃gü. Rü norü ngu̱xẽẽtaewa rü ñanagürü: —¡Dücax, iperüxĩnüe i ñaa ore! Wüxi ga yatü ga toecü rü tríguarü towa naxũ.

4Rü yexguma triguchiremaxã natoegu, rü namaxã nanagüane. Rü ñuxre ga triguchire rü namacüwagu nayi. Rü ínangugü ga werigü, rü nanawecu.

5Rü náigü ga triguchire rü nutatanügu nayi ga ngextá ínachicaxü̃wa ga waixü̃mü. Rü paxa narüxügü ga gumá triguchire, yerü ga waixü̃mü rü tama nayaxcü.

6Natürü yexguma nangunagügu ga üa̱xcü, rü narüñexgü ga yema trigu Rü nayue, yerü tama poraãcü nixãma̱xã.

7Rü náigü ga triguchire rü chuchuxü̃necügu nayi. Rü yexguma nayaegu ga chuxchuxü̃, rü gumá triguxü̃ inawocu, rü yemaca̱x tama nixo.

8Natürü náigü ga triguchire rü mexü̃ ga waixü̃mügu nayi. Rü meama nayae, rü muxü̃ma ga trigu nawa ínanguxuchi. Rü nümaxü̃neya̱xawa rü 30 pü̱xü ínanguxuchi ga norü o, rü náigüya̱xawa rü 60 pü̱xü ínanguxuchi ga norü o, rü náigüya̱xawa rü 100 pü̱xü ínanguxuchi —ñanagürü.

9Rü ñu̱xũchi ñanagürü ta: —Rü yíxema ãchi̱xẽgüxe, ¡rü nüxü̃ taxĩnüe i ñaa ore! —ñanagürü.

Ta̱xacüchiga nixĩ ga yema ore ga cua̱xruü̃gügu ixuxü̃

(Mt. 13.10-17; Lc. 8.9-10)

10Rü yemawena ga yexguma nanüxĩca yéma yaxüãchigu ga Ngechuchu, rü yema duü̃xü̃gü ga norü ngaicamawa yexmagüxü̃ wüxigu namaxã ga norü ngúexü̃gü, rü nüxna nacagüe nax ta̱xacüchiga yixĩxü̃ ga yema ore ga cua̱xruü̃gu ixuxü̃.

11-12Rü nüma nanangãxü̃ rü ñanagürü nüxü̃: —Tupana rü pexü̃xicatama nüxü̃ nacua̱xẽxẽ i ngẽma ẽxü̃guxü̃ nax ñuxãcü ãẽ̱xgacü nax yixĩxü̃ i nümax. Natürü ngẽma togü i duü̃xü̃gü rü cua̱xruü̃gu chayaxuãcüma namaxã nüxü̃ chixu i ngẽma ore, erü woo nüxü̃ nadaugügu rü ñoma tama nüxü̃ nadaugüxü̃rüxü̃ nixĩgü, rü woo nüxü̃ naxĩnüegu rü ñoma tama nüxü̃ naxĩnüexü̃rüxü̃ nixĩgü. Rü ngẽmaca̱x cua̱xruxü̃gu namaxã nüxü̃ chixu i ore erü tama nüxü̃ narüxoechaü̃ i nacüma i chixexü̃ nax Tupana nüxü̃́ nüxü̃ rüngü̃maxü̃ca̱x i norü pecadugü —ñanagürü.

Ngechuchu rü mea nanango̱xẽxẽ ga yema ore ga cua̱xruxü̃ ga toecüchigagu ixuxü̃

(Mt. 13.18-23; Lc. 8.11-15)

13Rü Ngechuchu ñanagürü nüxü̃: —¿Ẽ̱xna, pema rü ta tama nüxü̃ pecua̱xgü nax ta̱xacüchiga yixĩxü̃ i ngẽma ore i cua̱xruxü̃gu ixuxü̃? ¿Rü ñuxãcü tá nüxü̃ pecua̱xgü i guxü̃ma i ngẽma togü i ore i cua̱xruxü̃gügu ixuxü̃?

14Rü yíxema toexe, rü yíxema tixĩ ya nüxü̃ ixuxe i ore i mexü̃.

15Rü nangẽxma i duü̃xü̃gü i yima triguchire ga namacüwagu yixü̃nerüxü̃ ixĩgüxü̃. Rü ngẽmagü nixĩ i nüxü̃ ĩnüexü̃ i ore i mexü̃, natürü yixcama marü nüxü̃ naxĩnüeguwena, rü ngéma nangu i Chataná rü nüxna nanapu i ngẽma ore i mexü̃ i marü yaxõgüchiréxü̃.

16Rü togü i duü̃xü̃gü rü yima triguchire ga nutatanügu yixü̃nerüxü̃ nixĩgü. Rü ngẽmagü nixĩ i nüxü̃ ĩnüexü̃ i ore i mexü̃, rü taãẽãcüma nayauxgüxü̃.

17Natürü tama aixcüma nagu narüxĩnüe i ngẽma ore, rü paxaãchitama nayaxõgü. Rü ngẽmaca̱x ngẽxguma ngẽma oregagu guxchaxü̃gü naxca̱x ínguxgu rüe̱xna duü̃xü̃gü naxchi aiegu, rü nüxü̃ narüxoe i ngẽma ore i noxri yaxõgüxü̃.

18-19Rü togü i duü̃xü̃gü rü ñoma triguchire ga chuchuxü̃necügu yixü̃nerüxü̃ nixĩgü. Ngẽmagü rü nüxü̃ naxĩnüe i ngẽma ore i mexü̃, natürü ñoma i naanearü ngẽmaxü̃güca̱x naxoegaãẽgü rü norü diẽruguama narüxĩnüe rü ngẽma nanawomüxẽẽgü. Rü nanaxwa̱xegü nax nüxü̃́ nangẽxmaxü̃ i muxü̃ma i to i norü ngẽmaxü̃gü. Rü guxü̃ma i ngẽma rü nüxü̃ nüxü̃ inayarüngümaexẽxẽ i ngẽma ore i mexü̃ rü nüxü̃ nüxü̃ narüxoexẽxẽ nax tama naxügüã̱xü̃ca̱x i ngẽma mexü̃ ya Tupana nüxü̃́ naxwa̱xexü̃.

20Natürü nangẽxma i togü i duü̃xü̃gü i yimá triguchire i mexü̃ i waixü̃mügu yixü̃nerüxü̃ ixĩgüxü̃. Ngẽmagü nixĩ i nüxü̃ ĩnüexü̃ i ore i mexü̃ rü nayauxgüxü̃ rü Tupana naxwa̱xexü̃ãcüma mea maxẽxü̃. Rü tümaxe rü gumá trigu ga 30 pü̱xü nawa ínguxuchinerüxü̃ tixĩgü. Rü tümaxe rü gumá 60 pü̱xü nawa ínguxuchinerüxü̃ tixĩgü. Rü tümaxe rü gumá 100 pü̱xü nawa ínguxuchinerüxü̃ tixĩgü —ñanagürü.

Ore ga Omügu ixuxü̃

(Lc. 8.16-18)

21Rü yexgumarüxü̃ ta ñanagürü nüxü̃: —¿Ẽ̱xna nawa tanangixichi i wüxi i omü nax wüxi i caichaũtüü̃gu rü ẽ̱xna wüxi i pechicatüü̃gu yaxǘcuchixü̃ca̱x? Tama ngẽmaãcü nixĩ, erü wüxi i omü rü dauxnagu tanaxǘnagü nax ngéma inabaxixü̃ca̱x.

22Rü ngẽxgumarüxü̃ ta i guxü̃ma i ta̱xacü i cúxü̃, rü yixcüra rü duü̃xü̃gü rü tá nüxü̃ nacua̱xgüama. Rü guxü̃ma i ngẽma ñu̱xma duü̃xü̃güca̱x ẽxü̃guxü̃ rü tá nango̱xoma i yixcüra.

23Rü yíxema ãchi̱xẽgüxe, ¡rü nüxü̃ taxĩnüe i ngẽma ore! —ñanagürü.

24Rü ñanagürü ta nüxü̃: —¡Mea naga pexĩnüe i ngẽma nüxü̃ pexĩnüexü̃! Rü ngẽxguma pema aixcüma naga pexĩnüegu i ngẽma nüxü̃ pexĩnüexü̃ rü Tupana rü tá aixcüma pexna nanaxã i cua̱x. Rü yexera i cua̱x tá pexna naxã.

25Rü pemaxã nüxü̃ chixu, rü texé ya aixcüma naga ĩnüxẽ i ñaa ore i mexü̃ rü Tupana rü yexeraãcü tá tüxü̃ nüxü̃ nacua̱xẽxẽ. Natürü yíxema tama naga ĩnüxe i ñaa ore rü Tupana rü tá tüxna nanayaxu i ngẽma íxraxü̃ i cua̱x i tüxü̃́ ngẽxmachiréxü̃ —ñanagürü.

Ore ga triguchire ga rüxüxü̃gu ixuxü̃

26Rü Ngechuchu rü ñanagürü ta: —Pemaxã tá nüxü̃ chixu i wüxi i ore i cua̱xruxü̃ nax nüxü̃ pecuáxü̃ca̱x nax ñuxãcü ãẽ̱xgacü nax yixĩxü̃ ya Tupana. Rü wüxi ya yatü rü waixü̃mügu nanato ya triguchire.

27Rü nüma ya yatü rü chütacü nape rü moxü̃ãcü ínarüda, rü yoxni ya yima triguchire rü narüxü rü niyachigü. Natürü nüma ya yatü rü tama nüxü̃ nacua̱x i ñuxãcü nax naxüxü̃ rü nax nayaxü̃.

28Rü ngẽmaãcü i ngẽma waixü̃mü rü nüechamatama nanaxüxẽxẽ ya yimá triguchire. Rü naatügüxíra narüxügü, rü yixcama i nachacu, rü ngẽmawena nachacuwa nango̱x i norü o.

29Rü ngẽxguma marü yadauxgu i ngẽma norü o, rü nanabuxu erü marü nawa nangu i norü buxgü —ñanagürü.

Ore ga motachachiregu ixuxü̃

(Mt. 13.31-32; Lc. 13.18-19)

30Rü ñanagürü ta ga Ngechuchu: —Tupana ãẽ̱xgacü íyixĩxü̃wa ¿rü nanata̱xacüraxü̃? ¿Rü ta̱xacügu tá tanangu?

31-32Rü ñoma wüxi ya motachachire ya waixü̃mügu itoxü̃nerüxü̃ nixĩ. Rü woo guxü̃nema ya nanetüchirexü̃ narüxíramae, natürü ngẽxguma inatoxgu, rü narüxü rü naya ñu̱xmata guxü̃ma i togü i nanetüxü̃ i íxraxü̃xü̃ narüyexera. Rü nachacüxü rü nita, rü woo werigü rü natanügu nixüachiãü̃ —ñanagürü.

Cua̱xruü̃gu ixuxü̃ ga oremaxã nidexa ga Ngechuchu

(Mt. 13.34-35)

33Rü Ngechuchu rü yemaacü nanangúexẽxẽ ga muxü̃ma ga cua̱xruü̃gü ga ñaarüxü̃ ixĩgüxü̃ ñu̱xmata nüxü̃ yacua̱xãchitanü ga duü̃xü̃gü nax ta̱xacüchiga yixĩgüxü̃.

34Rü ore ga cua̱xruü̃gu ixuxü̃xicatama nixĩ ga norü ngu̱xẽẽtae. Rü yixcama ga yexguma nanüxicagügu, rü norü ngúexü̃güca̱x meama nanango̱xẽxẽ ga guxü̃ma.

Ngechuchu rü buanecüxü̃ rü yuapexü̃ ínayachaxãchixẽxẽ

(Mt. 8.23-27; Lc. 8.22-25)

35Rü yematama ngunexü̃gu ga marü nachütachaü̃gu, rü Ngechuchu rü ñanagürü nüxü̃ ga norü ngúexü̃gü: —¡Ngĩxã rü naxtaxaarü tocutüwa taxĩ! —ñanagürü.

36Rü yéma yema duü̃xü̃güna inaxĩãchi. Rü norü ngúexü̃gü rü Ngechuchuxü̃ nigagü nagu ga guma ngue ga marü nawa nayexmane. Rü yexgumarüxü̃ ta ga togü ga duü̃xü̃gü rü naigü ga nguegügu ínayaxümücügü.

37Rü yexguma yaxãü̃yane rü inaxǘ ga wüxi ga buanecü ga taxüchicü, rü yemaca̱x nataxüchi ga yuape. Rü gumá nguegu niyauxcuchi ga dexá, rü yexma nabaxü̃güchaü̃.

38Natürü ga Ngechuchu rü guma nguechinüwa wüxi ga cüxeruü̃gu naca, rü yéma nape. Rü ínanaba̱i̱xgügü, rü ñanagürügü nüxü̃: —Pa Ngúexẽxẽruxü̃x, ¿ẽ̱xna cuxü̃́ nanataxuraxü̃ma nax nuxma ibaxü̃güxü̃? —ñanagürügü.

39Rü yexguma ínarüda ga Ngechuchu. Rü buanecüna nachogü rü ñanagürü nüxü̃ ga guma naxtaxa: —¡Iyarüchiane rü íyachaxãchi! —ñanagürü. Rü ínayachaxãchi ga buanecü rü guxü̃wama ínachaxanemare.

40Rü yemawena ga Ngechuchu rü norü ngúexü̃güxü̃ ñanagürü: —¿Tü̱xcüü̃ ngẽmaãcü poraãcü pemuü̃ẽ? ¿Ẽ̱xna ñu̱xma rü ta tama aixcüma peyaxõgü? —ñanagürü.

41Natürü nümagü ga norü ngúexü̃gü rü poraãcü namuü̃e. Rü nügüna nacagüe rü ñanagürügü: “¿Texé nixĩ ya daa rü a̱i̱xrücü ya buanecü rü yuape rü naga naxĩnüexü̃?” ñanagürügü.

Currently Selected:

Ore i mexü̃ ga Márcu ümatüxü̃ 4: tcaP

Highlight

Compare

Copy