Ore i mexü̃ ga Márcu ümatüxü̃ 3

Wüxi ga yatü ga yumécüchiga

(Mt. 12.9-14; Lc. 6.6-11)

1Rü wenaxarü ngutaque̱xepataü̃gu naxücu ga Ngechuchu. Rü yéma nayexma ga wüxi ga yatü ga norü wüxichacüüwa yumécü.

2Rü Parichéugü, rü Ngechuchuxü̃ nangugügü rü tá namexẽxẽã ga ngü̃xchigaarü ngunexü̃gu, nax yemaacü nüxü̃́ nayexmaxü̃ca̱x ga ta̱xacüca̱x nax ínaxuaxü̃güãxü̃.

3Rü yexguma ga Ngechuchu rü ñanagürü nüxü̃ ga gumá yumécü: —¡Írüda, rü nuxã ngãxü̃tanügu yachi! —ñanagürü.

4Rü yexguma ga Ngechuchu rü yema togü ga yéma yexmagüxü̃na naca, rü ñanagürü nüxü̃: —¿Ta̱xacü nixĩ i mexü̃ nax naxüxü̃ i ngü̃xchigaarü ngunexü̃gu? ¿Namexü̃ nax naxüxü̃ i mexü̃ rü ẽ̱xna chixexü̃? ¿Rü namexü̃ nax namaxẽxẽxü̃ rü ẽ̱xna yamáxü̃? —ñanagürü. Natürü ga nümagü rü yexma nayarüngea̱xgümare.

5Rü nüma ga Ngechuchu rü nuchametüãcüma nüxü̃ nadauwenü ga yema nüxü̃ íchomaeguãchixü̃. Rü nangechaü̃ yerü tama inaxĩnüechaü̃ ga yema duü̃xü̃gü. Rü gumá yatüxü̃ ñanagürü: —¡Iyanawe̱xãchixẽxẽ ya cuxme̱x! —ñanagürü. Rü yexguma ga gumá yatü rü nügü inayarüwe̱xãchime̱xẽxẽxẽ. Rü yexgumatama rü narümexme̱x.

6Natürü nüma ga Parichéugü rü ínachoxü̃ rü Eródetanüxü̃maxã inanaxügüe nax naxca̱x nadaugüxü̃ nax ñuxãcü tá Ngechuchuxü̃ yama̱xgüxü̃.

Naxtaxacutüwa Ngechuchuca̱x nangutaque̱xegü ga muxü̃ma ga duü̃xü̃gü

7Rü Ngechuchu rü norü ngúexü̃gümaxã naxtaxacutüwa naxũ. Rü muxü̃ma ga duü̃xü̃gü ga Gariréaanecüã̱x rü nawe narüxĩ.

8Rü yexguma nüxü̃ nacuáchigagügu ga guxü̃ma ga yema mexü̃gü ga naxüxü̃ ga Ngechuchu, rü naxca̱x naxĩtaque̱xe ga muxü̃ma ga duü̃xü̃gü ga Yudéaanecüã̱x, rü Yerucharéü̃cüã̱x, rü Iduméaanecüã̱x, rü Yudáü̃arü tocutücüã̱x rü Tíruanecüã̱x rü Chidóü̃anecüã̱x.

9Rü yemaca̱x ga Ngechuchu rü norü ngúexü̃güxü̃ namu nax wüxi ga ngue naxca̱x namexẽẽgüxü̃ca̱x nax tama yéma yaxũxtügüãxü̃ca̱x ga yema muxü̃ma ga duü̃xü̃gü.

10Yerü nüma rü nanameexẽxẽ ga muxü̃ma, rü yemaca̱x guxü̃ma ga yema ida̱xaweexü̃ rü naxca̱x naxĩ nax Ngechuchuxü̃ yangógügüxü̃ca̱x.

11Rü yexguma yema ngo̱xoã̱xgüxü̃ ga duü̃xü̃gü Ngechuchuxü̃ daugügu, rü nape̱xegu nacaxã́pü̱xügü rü tagaãcü ñanagürügü: —Cuma nixĩ ya Tupana Nane quixĩxü̃ —ñanagürügü.

12Natürü nüma ga Ngechuchu rü poraãcü nayaxucu̱xẽgü nax tama duü̃xü̃gümaxã nüxü̃ yaxugüexü̃ca̱x nax texé yixĩxü̃ ga nümax.

Ngechuchu nanade ga 12 ga norü ngúexü̃gü nax tóxnamana namugüãxü̃ca̱x

(Mt. 10.1-4; Lc. 6.12-16)

13Rü yemawena ga Ngechuchu rü wüxi ga ma̱xpǘnewa ínaxü̃ãchi. Rü yéma naxca̱x naca ga yema ngúexü̃gü ga nüma nanaxwa̱xexü̃. Rü naxü̃tagu naxĩtaque̱xegü.

14Rü yematanüwa nayadexechi ga 12 ga norü ngúexü̃gü nax namücügü yaxĩgüxü̃ca̱x rü norü orearü uwa namugüãxü̃ca̱x. Rü yemagü rü imugüxü̃gu nanaxüéga.

15Rü pora nüxna naxã nax Tupanaarü poramaxã ínawoxü̃ãxü̃ca̱x ga ngo̱xogü.

16Rü ñaagü nixĩ ga naéga ga yema 12 ga norü ngúexü̃gü ga nadexü̃. Rü wüxi nixĩ ga Chimóü̃ ga Pedrugu naxüégaxü̃.

17Rü togü nixĩ ga Chantiágu rü naenexẽ ga Cuáü̃. Rü nümagü rü Chebedéu nanegü nixĩgü. Rü Ngechuchu rü Boanéregu nanaxüéga. Rü ngẽma naéga rü “Duruanexü̃ Nanegü”, ñaxü̃chiga nixĩ.

18Rü togü nixĩ ga André, rü Ferípe, rü Barturumé, rü Matéu, rü Tumáchi, rü Chantiágu ga Arupéu nane, rü Tadéu, rü Chimóü̃ ga Poraãẽxü̃.

19Rü to nixĩ ga Yúda ga Icharióte ga bexma Ngechuchuxü̃ íxuaxü̃xü̃.

Ngechuchuxü̃ nixugüe nax ngo̱xoarü poramaxã napuracüxü̃

(Mt. 12.22-32; Lc. 11.14-23; 12.10)

20Rü yemawena rü wüxi ga ĩpatagu naxücu ga Ngechuchu. Rü wenaxarü yexma nangutaque̱xegü ga muxü̃ma ga duü̃xü̃gü. Rü yemaca̱x woo nax nachibüexü̃ca̱x rü nangechicagü ga nüma rü norü ngúexü̃gü.

21Rü yexguma yemaxü̃ nacua̱xgügu ga natanüxü̃ ga Ngechuchu, rü ínayadaugü nax yagagüãxü̃ca̱x, yerü nüxü̃ nixugügü rü: —Naxãũãẽmare —ñanagürügü.

22Rü yexgumarüxü̃ ta ga yema ngúexẽẽruü̃gü ga Moichéarü mugüwa ngu̱xẽẽtaegüxü̃ ga Yerucharéü̃wa ne ĩxü̃, rü ñanagürügü: —Ñaa yatü i Ngechuchu, rü ngo̱xogünatü i Beechebúarü poramaxã nixĩ i ínawoxü̃ãxü̃ i ngo̱xogü —ñanagürügü.

23Natürü ga Ngechuchu rü naxca̱x naca ga yema ngúexẽẽruü̃gü. Rü wüxi ga ore ga cua̱xruü̃xü̃ namaxã nixu, rü ñanagürü: —¿Rü ñuxãcü i Chataná i nügütama ínata̱xüchixü̃?

24Rü ngẽxguma chi wüxi i nachixü̃anecüã̱x i duü̃xü̃gü rü nügü yatoyegu rü nügütanüxü̃watama nügü nadaixgu, rü taxuacüma natai i ngẽma nachixü̃ane.

25Rü ngẽxguma chi wüxi ya ĩpatacüã̱x nügüchi aiegu rü nügü nadaixgu, rü taxuacüma wüxiwa nangẽxmagü.

26Rü ngẽxgumarüxü̃ chi ta nixĩ i Chataná ega nügümaxã nanuxgu rü nügü yama̱xgu, rü taxuacü chima natai i nümax, rü chi ngẽxma narüxo.

27Rü taxuacüma texé wüxi ya yatü ya poracüpatagu taxücu nax nüxna tanapuxü̃xü̃ca̱x i norü ngẽmaxü̃gü, ega tama tayana̱i̱xíragu. Erü ngẽmaãcüxica tá nixĩ i tüxü̃ nanguxü̃xü̃ nax tanapuxü̃xü̃ i norü ngẽmaxü̃gü.

28Rü aixcüma pemaxã nüxü̃ chixu rü Tupana tá duü̃xü̃güaxü̃́ nüxü̃ narüngüma i guxü̃ma i norü pecadugü rü guxü̃ma i chixexü̃ i namaxã yadexagüxü̃.

29Natürü texé ya chixexü̃ namaxã ixugüxe i Tupanaãxẽ ya Üünecü, rü Tupana rü tagutáma tüxü̃́ nüxü̃ narüngüma i ngẽma chixexü̃. Rü guxü̃gutáma chixexü̃wa tangexma —ñanagürü.

30Rü yema ñanagürü ga Ngechuchu, yerü yema ngúexẽẽruü̃gü ga Moichéarü mugüwa ngu̱xẽẽtaegüxü̃ rü: “Nango̱xoã̱x”, ñanagürügü nüxü̃.

Ngechuchuarü mama rü naenexẽgüchiga

(Mt. 12.46-50; Lc. 8.19-21)

31Rü yexgumayane rü ítangugü ga Ngechuchuarü mama rü naenexẽgü. Natürü ĩpataa̱xtügu tarücho, rü naxca̱x yéma tangemagü.

32Rü yema duü̃xü̃gü ga Ngechuchuxü̃ íchomaeguãchixü̃, rü ñanagürügü nüxü̃: —Curü mama rü cuenexẽgü rü cueya̱xgü, rü yea düxétüwa tangexmagü, rü cuxca̱x tadaugü —ñanagürügü.

33Rü nüma nanangãxü̃, rü ñanagürü: —¿Texé tixĩ ya chaué rü chauenexẽgü? —ñanagürü.

34Rü yema nüxü̃ íchomaeguãchixü̃xü̃ nadawenüãcüma ñanagürü: —Daxegü tixĩ ya chaué rü chauenexẽgü.

35Erü guxãma ya texé ya naxǘxe i Tupanaarü ngúchaü̃, rü yíxema tixĩ ya chauenexẽ rü chaueya̱x rü chaué —ñanagürü.

Currently Selected:

Ore i mexü̃ ga Márcu ümatüxü̃ 3: tcaP

Highlight

Compare

Copy