Miquéa 5
5
1¡Rü ñu̱xma, Pa Yerucharéü̃x, ínamexẽxẽ i curü poxü̃ruxü̃! Erü marü cuxü̃ ínachomaeguãchi i curü uanügü. Rü poraãcü tá ngúxü̃ nüxü̃ ningexẽẽgü ya yimá Iraétanüxü̃arü ãẽ̱xgacü.
Tupana rü Beréü̃wa tá nanango̱xẽxẽ i wüxi ya ãẽ̱xgacü
2Rü cumax, Pa Beréü̃ i Efráta, rü woo wüxi ya ĩane ya íxrane quixĩ natanüwa ya guxü̃nema ya Yudáanecüã̱x ya ĩanegü, natürü cugu tá nixĩ i nabuxü̃ ya yimá Iraéanecüã̱xgüarü ãẽ̱xgacü ya woetama marü ngẽxmaechacü.
3Rü ñu̱xma ya Cori ya Tupana rü norü duü̃xü̃güna nixũgachi nax norü uanügü namaxã icuáxü̃ca̱x ñu̱xmatáta naxíxraxacü i ngẽma nge i wüxi ya ngĩne tá ngĩxü̃́ ngẽxmacü. Rü ngẽxguma tá nixĩ i ngẽma Iraétanüxü̃ i to i nachixü̃anegügu woonexü̃ rü tá nachixü̃aneca̱x nawoeguxü̃ nax wüxiwa nangẽxmagüxü̃ca̱x namaxã i natanüxü̃ ga nachixü̃anewatama yaxǘgüxü̃.
4Rü nüma ya yimá Iraétanüxü̃arü ãẽ̱xgacü ya ínguxchaü̃cü rü Cori ya Tupanaarü poramaxã rü norü üünemaxã tá ngẽma norü duü̃xü̃gümaxã inacua̱x. Rü ngẽma norü duü̃xü̃gü rü taxuca̱xtama namuü̃e erü norü pora ya yima ãẽ̱xgacü rü guxü̃ i naanewa tá nangu.
5Rü nüma ya yimá ãẽ̱xgacü rü tá nanangüxmüexẽxẽ i duü̃xü̃gü. Rü ngẽxguma ngẽma Achíriaanecüã̱xgü tachixü̃anegu chocuxgu nax nagu napogüexü̃ca̱x i tórü ĩanegü ya ípoxegugüne rü yima tórü ãẽ̱xgacü tá naxca̱x inanamuãchitanü i 7 i duü̃xü̃güarü dauruü̃gü rü 8 i Iraétanüxü̃arü ãẽ̱xgacügü.
6Rü nümagü tá nixĩ i norü taramaxã Nimróxchixü̃ane i Achíriaanemaxã inacua̱xgüxü̃. Rü tá tüxü̃ ínanguxü̃xẽxẽ naxme̱xwa i ngẽma Achíriaanecüã̱xgü i tórü naanearü üyexü̃ chopetüxü̃ nax tüxna napugüãxü̃ca̱x i tórü naane.
Iraétanüxü̃ i íyaxügüxü̃chiga
7Rü ngẽxguma i ngẽma Iraétanüxü̃ i íyaxügüxü̃ i ñu̱xma togü i nachixü̃anegütanüwa ngẽxmagüxü̃, rü Tupana rü tá namaxã inacua̱x ñoma cherenamaxã rü pucü i maxẽétügu puxü̃maxã inacuáxü̃rüxü̃. Rü taxũtáma nanaxwa̱xegü nax duü̃xü̃güarü ngü̃xẽẽca̱x nadaugüxü̃ erü Tupana tá nixĩ i nüxü̃ rüngü̃xẽẽcü.
8Rü ngẽxguma i ngẽma Iraéanecüã̱xgü i íyaxügüxü̃ i ñu̱xma togü i nachixü̃anegütanüwa ngẽxmagüxü̃, rü tá ngẽma togü i nachixü̃anegüxü̃ narüporamae ñoma leóü̃ rü togü i naeü̃güxü̃ rüporamaexü̃rüxü̃. Rü ñoma leóü̃acü i carnérutanüwa ngẽxmaxü̃ rü carnérugüxü̃ íyauxü̃xü̃ rü taxúema tüxü̃ iñaxẽẽxü̃rüxü̃ tá nixĩgü i ngẽma Iraétanüxü̃.
9Rü ngẽmaãcü i cumax, Pa Chorü Corix, rü tá cunadai i guxü̃ma i curü uanügü.
10Rü Cori ya Tupana rü Iraétanüxü̃xü̃ ñanagürü: —Ngẽma ngunexü̃gu rü tá chanadai i perü cowarugü, rü ñu̱xũchi tá nagu chipogügü ya perü carugü ya daiwexü̃.
11Rü tá nagu chipogügü ya yima perü ĩanegü, rü guxü̃táma ya yima ĩanegüarü poxeguxü̃ rü tá chayawa̱xgüxẽxẽ.
12Rü tá chanadai i ngẽma perü yuüexü̃ rü taxuxü̃táma i yuüxü̃ íchayaxüxẽxẽ.
13Rü tá nagu chapogü i perü tupananetachicüna̱xãgü rü perü nutapütagü i pexca̱x üünexü̃ nax taguma wena nüxü̃ picua̱xüü̃güxü̃ca̱x i ngẽma tupananetachicüna̱xãgü i pematama pexügüxü̃.
14Rü tá chanapuxü̃ i ngẽma perü naigü i namaxã petupanã̱xgüxü̃ rü ñu̱xũchi wüxicana tá ichayanaxoxẽxẽ ya yima perü ĩanegü ya nawa ngẽxmagüne i perü tupananetagü.
15Rü chorü numaxã tá chanapoxcue i ngẽma togü i nachixü̃anegüarü duü̃xü̃gü i tama chauga ĩnüechaü̃xü̃ —ñanagürü ya Cori ya Tupana.
Currently Selected:
Miquéa 5: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
