Yochué 4
4
Gumá 12 ga nutagü ga natü ga Yudáü̃arü ngãxü̃tamawa nadeãcü
1Rü yexguma guxü̃ma ga duü̃xü̃gü ichoü̃guwena ga natü ga Yudáü̃wa, rü nüma ga Cori ya Tupana rü Yochuéxü̃ ñanagürü:
2—Ngẽma 12 i Iraétanüxü̃tücumüwa rü ¡ẽcü wüxitücumüwachigü rü nüxü̃ naxuneta ya wüxi ya yatü!
3¡Rü namaxã nüxü̃ ixu rü wüxichigü i ngẽma yatü rü wüxipüta ya nuta nayauxã i ngẽma natüarü ngãxü̃tamawa i ngẽma chacherdótegü íchigüxü̃wa ngẽxmagücü. Rü chanaxwa̱xe i ngẽma ñoma i chütaxü̃gu ínapegüxü̃gu nayanupüta! —ñanagürü.
4-5Rü yexguma ga nüma ga Yochué rü naxca̱x naca ga yema 12 ga yatü ga nüxü̃ naxunetaxü̃ rü ñanagürü nüxü̃: —¡Ẽcü, wüxichigü i pemax i 12 rü natü i Yudáü̃arü ngãxü̃tamawa pexĩ! ¡Rü ngẽma baú i Cori ya tórü Tupanaarü mugüchixü̃pe̱xewaama, rü wüxichigü i pema rü peatügu peyange ya wüxi ya nuta nax nae̱xpü̱x yixĩxü̃ca̱x i ngẽma 12 tücumügü i Iraétanüxü̃!
6-7Rü yimá nutagü rü wüxi i cua̱xruxü̃ tá nixĩ i petanüwa. Rü ngẽxguma penegü pexna caxgux, rü ñagügu: “¿Ta̱xacüchiga nixĩ ya daa nutagü?” ñagügu, rü pema rü tá penangãxü̃ rü ñapegürügü tá: “Daa nutagüwa nixĩ i Iraétanüxü̃ nüxna icua̱xãchiexü̃ ga yema ngupetüxü̃ ga yexguma natü ga Yudáü̃wa yangeetaxü̃gu ga yema baú ga Cori ya Tupanaarü mugüchixü̃, rü yema natüchiü rü taxregu niyauxye nape̱xewa ga yema baú”, ñapegürügü tá —ñanagürü ga Yochué.
8Rü nümagü ga yema 12 ga yatügü rü nanaxügü ga yema Yochué namaxã nüxü̃ ixuxü̃. Rü wüxichigü, rü wüxipüta niyauxchigü naégagu ga yema Iraétücumü ga nawa naxüxü̃. Rü yemaacü nanayauxgü ga 12 ga nutagü ga Yudáü̃tamawa. Rü yema ínapegüxü̃wa nanana, rü yexma nayanu, yema Cori ya Tupana nüxü̃ ixuxü̃rüxü̃.
9Rü yexgumarüxü̃ ta ga nüma ga Yochué rü nai ga 12 ga nuta nanayaxu rü natütamagu nayanu ga yema chacherdótegü ga baú ingetaü̃güxü̃ íchigüxü̃gu. Rü yimá nutagü rü ñu̱xmarüta ngéma nangẽxmagü.
10Rü yema chacherdótegü ga baú ga Tupanaarü mugüchixü̃ ingegüxü̃ rü natü ga Yudáü̃tamagu narücho, rü yoxni ga nüma ga Iraétanüxü̃ rü meama nayanguxẽẽgü ga guxü̃ma ga yema Yochuéwa Tupana namaxã nüxü̃ ixuxü̃. Rü guxü̃ma mea naxügü yema Moiché Yochuémaxã nüxü̃ ixuxü̃rüxü̃. Rü paxãma nichoü̃ ga duü̃xü̃gü.
11Rü yexguma guxü̃ma ga duü̃xü̃gü marü inguü̃gu, rü nichoü̃ ga yema chacherdótegü ga baú ga Tupanaarü mugüchixü̃ ingegüxü̃. Rü duü̃xü̃güpe̱xegu naxãgü.
12Rü yexgumarüxü̃ ta naxnemaxã Yudáü̃wa nichoü̃ ga yema daiwa ĩxü̃ ga Rubéü̃tanüxü̃, rü Gáxtanüxü̃, rü ngãxü̃tücumü ga Manachétanüxü̃. Rü nüma rü yema togü ga Iraétanüxü̃pe̱xe naxĩ, yema Moiché namaxã nüxü̃ ixuxü̃rüxü̃.
13Rü wixgutaa̱x 40,000 ga yatügü ga ixãxnexü̃ nixĩ ga ímemarexü̃ nax daiwa naxĩxü̃. Rü nümagü rü Cori ya Tupanape̱xegu naxĩ. Rü Yericúarü doxonexü̃waama naxĩ.
14Rü yema ngunexü̃gu rü nüma ga Cori ya Tupana rü guxü̃ma ga yema Iraétanüxü̃pe̱xewa Yochuéxü̃ nataxẽxẽ nax naga naxĩnüexü̃ca̱x rü nüxü̃ nangechaü̃güxü̃ca̱x yema Moichéxü̃ nangechaü̃güxü̃rüxü̃ ga yexguma namaxü̱̃xgu.
15-16Rü yexguma nüma ga Tupana rü Yochuéxü̃ ñanagürü: —¡Rü namaxã nüxü̃ ixu i ngẽma chacherdótegü i yangegüxü̃ i ngẽma chorü mugüchixü̃, rü ínachoõchi̱x i Yudáü̃wa! —ñanagürü.
17Rü nüma ga Yochué rü yema chacherdótegüxü̃ namu nax ínachoõchíxü̃ca̱x.
18Rü yexguma marü yanguü̃gu ga yema chacherdótegü ga Yudáü̃wa nax yachoü̃xü̃ rü paanexü̃wa nangugügu, rü yema dexá rü wenaxarü niyaxü̃chixü rü noxrirüü̃tama nanapá ga natü.
19Rü nüma ga Iraétanüxü̃ rü meama nüxíraü̃cü ga tauemacüarü 10 ga ngunexü̃gu nixĩ ga nawa yachoü̃xü̃ ga natü ga Yudáü̃. Rü ĩane ga Guirigáarü ngaicamagu nayapexgü ga Yericúarü éstewaama.
20Rü yexma nixĩ ga Yochué ga nanutaque̱xeãxü̃ ga gumá 12 ga nutagü ga natü ga Yudáü̃wa ne nanaãcü.
21-22Rü nüma ga Yochué rü Iraétanüxü̃xü̃ ñanagürü: —Rü ngẽxguma tá pexna nacagügu i pexacügü rü ñagügu: “¿Ta̱xacüchiga nixĩ ya yimá nutagü?” ñagügu. Rü namaxã tá nüxü̃ pixu nax ñuxãcü paanexü̃wa yachoü̃xü̃ ga yema Iraétanüxü̃ nawa ga yema natü ga Yudáü̃.
23Rü nüma ga Cori ya Tupana rü nayapatamaxẽxẽ ga yema natü ga Yudáü̃ ga yexguma pema pichoü̃gu, yexgumarüxü̃ ga nũxcüma nayapatamaxẽẽãxü̃ ga yema Már ga Dauchíüxü̃ ga yexguma nawa tichoxü̃gu.
24Rü yemaacü nangupetü nax guxü̃ma i ñaa naanewa ngẽxmagüxü̃ i nachixü̃anegü nüxü̃ cuáxü̃ca̱x nax ñuxãcü naporaxüchixü̃ ya Cori ya Tupana, rü pema rü guxü̃gutáma nüxü̃ pengechaxü̃güxü̃ca̱x rü naga pexĩnüexü̃ca̱x —ñanagürü.
Currently Selected:
Yochué 4: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
