Yochué 24
24
Yochué rü duü̃xü̃güxü̃ nixucu̱xẽgü
1-2Rü nüma ga Yochué rü Chiquéü̃gu nanangutaque̱xexẽxẽ ga guxü̃ma ga duü̃xü̃gü ga Iraétanüxü̃, wüxigu namaxã ga yema natücumüchigüarü ãẽ̱xgacügü, rü ãẽ̱xgacügü ga guxchaxü̃arü mexẽẽruü̃gü, rü yema churaragüarü ãẽ̱xgacügü. Rü yéma Tupanape̱xewa ñanagürü: —Yimá tórü Tupana i yixema i Iraétanüxü̃ rü ñanagürü: “Nũxcüma ga nüma ga Téra rü nanegü ga Abraáü̃ rü Nacóx ga perü o̱xigü ixĩgücü, rü taxtü ga Eufrátecutügu naxãchiü̃gü. Rü yéma nixĩ ga tupananetagüxü̃ yacua̱xüü̃güxü̃.
3Natürü ga choma ya Tupana rü yéma taxtü ga Eufrátecutüwa chanayaxu ga Abraáü̃, rü Canaáü̃anegu chayaxũgüchigüxẽxẽ. Rü yéma nixĩ ga nane ga Ichaá nüxna chanamuxü̃ nax yemaacü yamuxü̃ca̱x ga nataagü.
4Rü Ichaána chanamugü ga taxre ga nane ga Acóbu rü Echaú. Rü Echaúna chanaxã ga naane ga máxpü̱xanexü̃ ga Cheígu ãégaxü̃. Natürü ga Acóbu rü nanegü rü Equítuanewa naxĩ.
5Rü yexguma ga choma ga Tupana rü Equítuanewa chanamu ga Moiché rü Aróü̃. Rü chanadai ga yema Equítuanecüã̱xgü rü ñu̱xmata naxme̱xwa pexü̃ íchanguxü̃xẽxẽ.
6Rü yexguma perü o̱xigü Equítuanewa íchoxü̃gu rü nüma ga Equítuanecüã̱xgüarü churaragü rü tümawe nangẽgü namaxã ga norü cowarugü, rü naweü̃gü ga cowaru itúgüne, rü ñu̱xmata Már ga Dauchíüxü̃wa nangugü.
7Rü nüma ga perü o̱xigü rü cha̱u̱xca̱x nacagü, rü yemaca̱x ga naweama rü chanaxẽanexẽxẽ naxcha̱xwa ga Equítuanecüã̱xgü. Rü yexgumarüxü̃ ta chanaxü nax már arü dexá naétügu iñaxü̃chiüxü̃ca̱x ga yema Equítuanecüã̱xgü nax yexma nayi̱xixü̃ca̱x. Rü pematama nixĩ i nüxü̃ pedauxü̃ ga yema chaxüxü̃ ga yexguma. Rü ñu̱xũchi ga pemax ga Iraétanüxü̃ rü yema ínanaxnücüanexü̃wa ga taxúema íxãpataxü̃wa peyexmagü mucüma ga taunecü.
8Rü yemawena nixĩ ga pexü̃ chichocuxẽẽxü̃ nawa ga yema naane ga Amoréutanüxü̃ nawa yexmagüxü̃ ga natü ga Yudáü̃arü tocutüwa. Rü nüma ga Amoréutanüxü̃ rü pemaxã nügü nadai, natürü ga choma rü pexü̃ charüngü̃xẽẽxü̃ nax nüxü̃ perüporamaegüxü̃ca̱x rü pexme̱xẽgu nayi̱xixü̃ca̱x. Rü yemaacü penayaxu ga yema naane.
9Rü nüma ga Baláx ga Chipóx nane ga gumá Moáanearü ãẽ̱xgacü rü pemaxã nügü nadai. Rü naxca̱x nangema ga Balaáü̃ ga Beúx nane nax chixexü̃ pemaxã naxueguxü̃ca̱x.
10Natürü ga choma ya perü Tupana rü Balaáü̃na chanachu̱xu nax chixexü̃ pemaxã naxueguxü̃, rü yemaca̱x mexü̃ pemaxã nixueguchigüama. Rü yemaacü pexü̃ íchapoxü̃.
11Rü yemawena ga pema rü pichoü̃ nawa ga natü ga Yudáü̃ ñu̱xmata Yericúarü ĩanewa pengugü. Rü yema duü̃xü̃gü ga guma ĩanegu ãchiü̃güxü̃ rü pemaxã nügü nadai. Rü yexgumarüxü̃ ta ga yema duü̃xü̃gü ga Amoréutanüxü̃, rü Ferechéutanüxü̃, rü Canaáü̃tanüxü̃, rü Itítanüxü̃, rü Guerguechéutanüxü̃, rü Ebéutanüxü̃, rü Yebuchéutanüxü̃ rü pemaxã nügü nadai. Natürü ga chomax, rü pexü̃ charüngü̃xẽẽxü̃ nax nüxü̃ perüporamaegüxü̃ca̱x.
12Rü tama pema nixĩ ga perü taragümaxã rü perü würagümaxã nüxü̃ perüporamaexü̃ ga yema taxre ga ãẽ̱xgacügü ga Amoréutanüxü̃arü. Natürü choma nixĩ ga muü̃ naxca̱x íchanguxẽẽxü̃ nax pecha̱xwa yabuxmüxü̃ca̱x naxü̃pa nax yéma pengugüxü̃.
13Rü choma rü marü pexna chanaxã ga naanegü ga tama pema pexüxü̃, rü ĩanegü ga tama pema pexügüne. Rü ñu̱xma rü yimagu pexãchiü̃gü, rü penangõ̱xgü i úbagü rü oribugü ga tama pema ipetogüxü̃”, ñanagürü ga Tupana —ñanagürü ga Yochué.
14Rü nüma ga Yochué rü ñanagürü ta: —Rü ñu̱xma rü name i aixcüma Cori ya Tupanaxü̃ pengechaxü̃gü rü naga pexĩnüe rü norü ngúchaü̃ pexü. Rü name nixĩ i nüxna pexĩgachixü̃ i ngẽma nũxcüma ga perü o̱xigüarü tupananetagü ga taxtü ga Eufrátecutüwa rü Equítuanewa nüxü̃ yacua̱xüü̃güxü̃.
15Natürü ngẽxguma tama Cori ya Tupanawe perüxĩxchaü̃gu ¡rü ñu̱xmatama nüxü̃ pixu i ta̱xacürü tupanawe tá perüxĩxü̃, rüe̱xna ngẽma tupananetagü ga nũxcüma ga perü o̱xigü nüxü̃ icua̱xüü̃güxü̃ ga taxtü ga Eufrátecutüwa, rüe̱xna ngẽma norü tupananetagü i Amoréutanüxü̃ i ñaa naanegu ãchiü̃güxü̃! Natürü i chomax rü chauxacügü rü Cori ya Tupanawe tá nixĩ i tarüxĩxü̃ —ñanagürü ga Yochué.
16Rü yexguma ga nüma ga duü̃xü̃gü rü ñanagürügü: —Tagutáma nüxna tixĩgachi ya tórü Cori ya Tupana, rü bai i ñuxgu tá ta̱xacürü tupananetagüwe tarüxĩxü̃.
17Yerü nüma nixĩ ya tórü Cori ya Tupana ga tüxü̃ ínanguxü̃xẽẽxü̃ naxme̱xwa ga yema Equítuanecüã̱xgü ga chixri tamaxã icuáxü̃. Rü nüma ga Cori ya Tupana nixĩ ga tape̱xewa naxüaxü̃ ga yema muxü̃ma ga mexü̃gü ga noxrütama poramaxã naxüxü̃. Rü nüma nixĩ ga tüxna nadauxü̃ rü tüxü̃ ínapoxü̃xü̃ nüxna ga tórü uanügü ga yexguma norü naanewa ichopetügu.
18Rü nüma ga Cori ya Tupana nixĩ ga tape̱xewa ínawoxü̃ãxü̃ ga Amoréutanüxü̃ rü yema togü ga duü̃xü̃gütücumü ga ñaa naanegu ãchiü̃güxü̃. Rü ngẽmaca̱x tá nawe tarüxĩ, erü nüma nixĩ i tórü Tupana yixĩxü̃ —ñanagürügü.
19Natürü ga nüma ga Yochué rü duü̃xü̃güxü̃ nangãxü̃ rü ñanagürü: —Pema rü taxũtáma pexü̃́ natauxcha nax Cori ya Tupanaarü ngúchaü̃ pexügüxü̃, erü nüma ya Tupana rü naxüüne rü poraãcü nüxü̃́ tachu̱xu. Rü taxũtáma pemaxã yáxna naxĩnü ega tama naga pexĩnüegu rü chixexü̃ pexügügu.
20Rü ngẽxguma tá nüxna pixĩgachigu rü ta̱xacü i tupananetagüwe perüxĩxgu, rü nüma ya Cori ya Tupana rü tá pemaxã nanu rü tá pexü̃ napoxcue rü tá pexü̃ nayarüxoxẽxẽ woo mucüma ga taunecügu mea pexna nax nadauxü̃ —ñanagürü ga Yochué.
21Rü nüma ga duü̃xü̃gü rü nanangãxü̃ rü ñanagürügü: —Toma rü tagutáma nüxna tixĩgachi ya Cori ya Tupana, rü aixcüma norü ngúchaü̃ tá taxügü —ñanagürügü.
22Rü yexguma ga nüma ga Yochué rü ñanagürü: —Ñu̱xma rü pematama nixĩ i nüxü̃ pixuxü̃ nax aixcüma tá norü ngúchaü̃ pexügüxü̃ ya Cori ya Tupana —ñanagürü. Rü nüma ga duü̃xü̃gü rü nanangãxü̃ rü ñanagürügü: —Ngẽmáacüx, tomatama nixĩ i nüxü̃ tixuxü̃ rü nagu tarüxĩnüexü̃ nax aixcüma Coriwe tarüxĩxü̃ —ñanagürügü.
23Rü yexguma ga nüma ga Yochué rü ñanagürü: —¡Ẽcü ípenawogü i ngẽma tupananetachicüna̱xãgü i petanüwa ngẽxmagüxü̃, rü aixcüma naxca̱x pewoegu ya yimá Cori ya tórü Tupana ya yixema i Iraétanüxü̃! —ñanagürü.
24Rü nüma ga duü̃xü̃gü rü nanangãxü̃ rü ñanagürügü: —Toma rü aixcüma tórü Cori ya Tupanaarü ngúchaü̃ tá taxügü, rü ngẽma tomaxã nüxü̃ yaxuxü̃ rü tá tanaxü —ñanagürügü.
25Rü yema ngunexü̃gutama rü Chiquéü̃arü ĩanewa, rü nüma ga Yochué rü wüxigu duü̃xü̃gümaxã wenaxarü Tupanamaxã inaxügae nax guxü̃gutáma naga naxĩnüexü̃ i norü mugü. Rü ñu̱xũchi nüma ga Yochué rü yema duü̃xü̃güna nanaxã ga Tupanaarü mugü rü norü ucu̱xẽgü.
26Rü nüma ga Yochué rü nanaxümatü ga guxü̃ma ga yema mugü nagu ga Tupanaarü mugüpane. Rü yemawena ga Yochué rü nanayaxu ga wüxi ga tacü ga nuta rü yema castaña ga Tupanapatacüwawa rüxüxü̃tüü̃gu nayaxǘ.
27Rü yexguma nüma ga Yochué rü duü̃xü̃güxü̃ ñanagürü: —Daa nuta tá nixĩ ya tórü cua̱xruxü̃ ixĩcü nax marü nüxü̃ ixĩnüexü̃ i guxü̃ma i ngẽma Cori ya Tupana tamaxã nüxü̃ ixuxü̃. Natürü daa nuta tá nixĩ ya pexü̃ ixugücü ega taxũtáma peyanguxẽẽ̱xgu i ngẽma Tupana pemaxã nüxü̃ ixuxü̃ —ñanagürü ga Yochué.
28Rü yemawena rü nüma ga Yochué rü ínayamugü ga yema duü̃xü̃gü nax wüxichigü norü naaneca̱x nawoeguxü̃ca̱x.
Yochuéarü yuxchiga
(Jue. 2.6-10)
29Rü yemawena rü noxre ga ngunexü̃ namaxü̃ ga Yochué ga Núü̃ nane ga Tupanaarü duü̃. Rü nayu ga yexguma 110 ga taunecü nüxü̃́ yexmagu.
30Rü norü naanegutama nayata̱xgü ga Tináx-chéraarü ĩanegu. Rü guma ĩane rü Efraíü̃arü naanearü máxpü̱xanexü̃wa nayexma, rü Gaáxarü ma̱xpǘnearü nórtewa naxǘ.
31Rü yexguma Yochué maxü̱̃xgu rü nüma ga yema Iraétanüxü̃ rü mea Cori ya Tupanaga naxĩnüe. Rü woo ga Yochuéwena rü mea naga naxĩnüe ga yexguma taxũta nayuegu ga yema Iraétanüxü̃arü yaxguã̱xgü ga nüxü̃ icuáxü̃ ga guxü̃ma ga yema Cori ya Tupana nũxcüma naxca̱x üxü̃.
Iraétanüxü̃ rü Yúchexü̃ inata̱xgü
32Rü gumá Yúchechina̱xãgü ga Iraétanüxü̃ Equítuanewa ne naxü̃ne rü Chiquéü̃anegu nayata̱xgü nagu ga yema naane ga Acóbu, Amóx nanegüxü̃tawa 100 tachinü ga diẽrugu naxca̱x taxexü̃. Rü nüma ga Amóx rü Chiquéü̃natü nixĩ. Rü yixcama ga yema naane rü Yúchetaagüna naxǘ.
Ereacháarü yuxchiga
33Rü yexguma nayu̱xgu ga Ereachá ga Aróü̃ nane rü ĩane ga Guibeá ga Efraíü̃anearü ma̱xpǘneanexü̃gu nayata̱xgü. Rü guma ĩane rü Ereachá nane ga Fineéxarü nixĩ.
Currently Selected:
Yochué 24: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
