Yochué 21
21
Lebítanüxü̃arü ĩanegü
(1 Cr. 6.54-81)
1-2Rü yema ãẽ̱xgacügü ga Lebítanüxü̃maxã icua̱xgüxü̃ rü Canaáü̃anewa yexmane ga ĩane ga Chilówa naxĩ nax chacherdóte ga Ereachámaxã, rü Yochuémaxã, rü Iraétanüxü̃arü ãẽ̱xgacügümaxã yanadexagüxü̃ca̱x. Rü yema Lebítanüxü̃ rü ñanagürügü: —Nüma ga Cori ya Tupana rü Moichéxü̃ namu nax toxna penaxãxü̃ ya ĩanegü nax nawa tamaxẽxü̃ca̱x, wüxigu namaxã i torü wocachitaü̃gü —ñanagürügü.
3Rü yexguma ga yema Iraétanüxü̃arü ãẽ̱xgacügü rü Lebítanüxü̃na nanaxãgü ga ĩanegü rü norü wocachitaü̃gü, yema Cori ya Tupana nüxü̃ ixuxü̃ãcü.
4Rü nanaxügü ga wüxi ga sortéu. Rü yema Lebítanüxü̃ ga Queáxtaagü nixĩ ga nüxíra sortéuãcü nayauxgüxü̃ ga norü ĩanegü. Rü yema Queáxtaagü rü chacherdóte ga Aróü̃tanüxü̃ nixĩgü. Rü nüxna nanaxã ga 13 ga ĩanegü. Rü guma ĩanegü rü Yudátanüxü̃arü naanewa, rü Chimeóü̃tanüxü̃arü naanewa, rü Bẽyamíü̃tanüxü̃arü naanewa nayexmagü.
5Rü yema togü ga Queáxtanüxü̃na nanaxãgü ga 10 ya ĩanegü. Rü guma ĩanegü rü Efraíü̃tanüxü̃arü naanewa, rü Dáü̃tanüxü̃arü naanewa, rü yema ngãxü̃tücumü ga Manachétanüxü̃arü naanewa nayexmagü.
6Rü yemawena rü yema Lebítanüxü̃ ga Guerchóü̃taagü rü sortéuãcü nüxna nanaxãgü ga 13 ya ĩanegü. Rü guma ĩanegü rü Ichacátanüxü̃arü naanewa, rü Achétanüxü̃arü naanewa, rü Netarítanüxü̃arü naanewa, rü yema ngãxü̃ ga Manachétanüxü̃ ga Bacháü̃wa yexmagüxü̃arü naanewa nayexmagü.
7Rü yema Lebítanüxü̃ ga Merarítaagü rü 12 ga ĩanegü nixĩ ga nüxna naxãgüne. Rü guma ĩanegü rü Rubéü̃tanüxü̃arü naanewa, rü Gáxtanüxü̃arü naanewa, rü ñu̱xũchi Chaburóü̃tanüxü̃arü naanewa nayexmagü.
8Rü yemaacü ga nüma ga Iraétanüxü̃ rü sortéuãcü Lebítanüxü̃xü̃ nayanu ga guma ĩanegü namaxã ga norü wocachitaü̃gü, yema Cori ya Tupana Moichémaxã nüxü̃ yaxuxü̃rüxü̃.
9Rü nüma ga Yudátanüxü̃ rü Chimeóü̃tanüxü̃ rü yema Lebítanüxü̃na nanaxã ga ñuxre ga ĩanegü.
10Rü yema Lebítanüxü̃ ga Aróü̃taagü ga Queáxtanüxü̃ nixĩ ga nüxíra nayauxgüxü̃ ga ĩanegü yerü sortéuãcü nagu nangu.
11Yema Yudátanüxü̃arü naane ga ínamáxpü̱xanexü̃wa nüxna nanaxã ga guma ĩane ga Quiriáx-abá guxü̃ma ga norü wocachitaü̃gümaxã. Rü guma ĩane nixĩ ga tachanexü̃ ga yatü ga Anáxtaagüarü ĩane ga taxü̃ne. (Rü Ebróü̃ nixĩ ga to ga naéga.)
12Natürü guma ĩanexacügü rü norü naanegü ga Ebróü̃na ngaicamagüxü̃ rü tama yema Lebítanüxü̃na nanaxã, yerü marü Caréx ga Yeponé nanena nanaxãgü.
13-16Rü chacherdóte ga Aróü̃ nanegüna nanaxãgü ga Ebróü̃ namaxã ga norü wocachitaü̃gü. Rü guma ĩane rü cu̱xchicaruxü̃ nixĩ naxca̱x ga yema duü̃xü̃ ga toguexü̃ ima̱xcüraxü̃xü̃. Rü yexgumarüxü̃ ta yema Lebítanüxü̃na nanaxã ga ĩane ga Lixná namaxã ga norü wocachitaü̃gü, rü Yatíx namaxã ga norü wocachitaü̃gü, rü Etemóa namaxã ga norü wocachitaü̃gü, rü Oróü̃ namaxã ga norü wocachitaü̃gü, rü Debíx namaxã ga norü wocachitaü̃gü, rü Aíü̃ namaxã ga norü wocachitaü̃gü, rü Yutá namaxã ga norü wocachitaü̃gü, rü Bex-chemé namaxã ga norü wocachitaü̃gü. Rü guma 9 ga ĩanegü rü Yúdatanüxü̃anewa rü Chimeóü̃tanüxü̃anewa nayexmagü.
17-18Rü Bẽyamíü̃tanüxü̃arü ĩanegüwa rü nüxna nanaxãgü ga ĩanegü ga Gabaóü̃, rü Guéba, rü Anató rü Armóü̃. Rü yemaacü 4 nixĩ ga guma ĩanegü ga nüxna naxãgüne norü wocachitaü̃gümaxãchigü.
19Rü guxü̃wama 13 nixĩ ga norü mu ga guma ĩanegü ga chacherdóte ga Aróü̃taagüna naxãgüne norü wocachitaü̃gümaxãchigü.
20Rü yema togü ga Lebítanüxü̃ ga Queáxtaagü ixĩgüxü̃ rü Efraíü̃tanüxü̃arü ĩanegüwa nüxna ne naxãgü.
21-22Rü Efraíü̃arü naanearü ma̱xpǘneanexü̃wa yexmagüne ga ĩanegüwa rü nüxna ne naxãgü ga ĩane ga Chiquéü̃ namaxã ga norü wocachitaü̃gü. Rü guma ĩane rü cu̱xchicaruxü̃ nixĩ naxca̱x ga yema togue tüxü̃ ima̱xcüraxü̃xü̃. Rü naigü ga ĩanegü ga nüxna naxãgüne rü daagü nixĩ: Guéche namaxã ga norü wocachitaü̃gü, rü Quixchaíü̃ namaxã ga norü wocachitaü̃gü, rü Bex-oróü̃ namaxã ga norü wocachitaü̃gü. Rü guxü̃wama rü 4 ga ĩanegü nixĩ ga nüxna naxãgüne norü wocachitaü̃maxãchigü.
23-24Rü Dáü̃tanüxü̃arü ĩanegüwa rü nüxna nanaxãgü ga daa ĩanegü: Etequé rü Guibetóü̃, rü Ayaróü̃, rü Gax-rimóü̃. Rü yemaacü 4 ga ĩanegü nixĩ ga nüxna naxãgüne norü wocachitaü̃gümaxãchigü.
25-26Rü yema ngãxü̃ ga Manachétücumüarü ĩanegüwa rü ne nayauxgü ga taxre ga ĩane. Rü guma rü daagü nixĩ: Taanáx, rü Gax-rimóü̃, norü wocachitaü̃maxã. Rü yemaacü yema togü ga Queáxtaagüarü ĩanegü rü guxü̃wama 10 nixĩ rü naétü ga norü wocachitaü̃chigü.
27Rü ngãxü̃tücumü ga Manachétanüxü̃arü ĩanegüwa rü yema Lebítanüxü̃ ga Guerchóü̃taagüna nanaxã ga taxre ga norü ĩanegü namaxã ga norü wocachitaü̃güchigü. Rü daagü nixĩ: Goráü̃ ga ĩane ga Bacháü̃anewa ngẽxmane ga cu̱xchicaruxü̃ ixĩxü̃ne, rü ñu̱xũchi Beeterá.
28-29Rü Ichacátanüxü̃arü ĩanegütanüwa rü nüxna nanaxãgü ga daa ĩanegü: Quichióü̃, rü Daberáx, rü Yamúx, rü En-ganíü̃. Rü 4 ga ĩanegü nixĩ ga nüxna naxãgüne norü wocachitaü̃gümaachigü.
30-31Rü Achétanüxü̃arü ĩanegütanüwa rü nüxna nanaxãgü ga ĩanegü ga Michaé, rü Axdóü̃, rü Ecáx, rü Reóx. Rü yemaacü 4 ga ĩanegü nixĩ ga nüxna naxãgüne norü wocachitaü̃gümaxãchigü.
32Rü Netarítanüxü̃arü ĩanetanüwa rü tomaepü̱x ga ĩanegü nixĩ ga nüxna naxãgüne noxrütama wocachitaü̃gümaxãchigü. Rü guma ĩanegü rü daagü nixĩ: Quédex ga ĩane ga cu̱xchicaruxü̃ ixĩxü̃ne ga Gariréaanewa yexmane, rü ñu̱xũchi Amó-dox, rü Catáü̃.
33Rü yemaacü ga Guerchóü̃taagüarü ĩanegü rü guxü̃wama 13 nixĩ norü wocachitaü̃gümaxãchigü.
34-35Rü yema Lebítanüxü̃ ga íyaxügüxü̃, ga Merarítaagü rü Chaburóü̃tanüxü̃arü ĩanegütanüwa nüxna ne naxãgü ga ĩanegü ga Yoxneáü̃, rü Catá, rü Dináx, rü Naará. Rü guxü̃wama rü 4 ga ĩanegü nixĩ ga nüxna naxãgüne norü wocachitaü̃gümaxãchigü.
36-37Rü Rubéü̃tanüxü̃arü ĩanegütanüwa rü nüxna nanaxãgü ga daa ĩanegü: Béche norü wocachitaü̃gümaxã, rü Yaácha norü wocachitaü̃gümaxã, rü Caremóx norü wocachitaü̃gümaxã, rü Mepáax norü wocachitaü̃gümaxã. Rü guxü̃wama rü 4 ga ĩanegü nixĩ ga nüxna naxãgüne norü wocachitaü̃gümaxãchigü.
38-39Rü Gáxtanüxü̃arü ĩanegütanüwa rü nüxna nanaxãgü ga daa ĩanegü: Ramóx ga ĩane ga cu̱xchicaruxü̃ ixĩxü̃ne ga Garaáxanewa yexmane, rü ñu̱xũchi Maanaíü̃, rü Ebóü̃, rü Yachéx. Rü 4 ga ĩanegü nixĩ ga nüxna naxãgüne norü wocachitaü̃gümaxãchigü.
40Rü yemaacü guxü̃wama 12 nixĩ ga guma ĩanegü ga nüxna ügüne ga yema Lebítanüxü̃ ga íyaxügüxü̃ ga Merarítaagü.
41Rü yemaacü ga yema Lebítanüxü̃arü ĩanegü ga Iraéanewa yexmagüne, rü guxü̃wama 48 nixĩ norü wocachitaü̃gü.
42Rü guxü̃nema ga guma ĩanegü rü wocachitaü̃maxã ínixüegugü.
Cori ya Tupana rü nayanguxẽxẽ ga norü uneta
43Rü yemaacü nixĩ ga Cori ya Tupana ga Iraétanüxü̃na naxãxü̃ ga guxü̃ma ga yema naane ga norü o̱xigümaxã naxueguxü̃. Rü nümagü ga Iraétanüxü̃ rü nagu naxãchiü̃güxü̃ rü nawa namaxẽ.
44Cori ya Tupana rü nayanguxẽxẽ ga norü uneta, rü taãxẽwa nanayexmagüxẽxẽ ga guxü̃wama ga yema naanewa. Rü norü uanügü rü taxuxü̃ma ga ta̱xacürü chixexü̃ namaxã naxüe, yerü Cori ya Tupana rü Iraétanüxü̃me̱xẽgu nanayixẽxẽ ga guxü̃ma ga yema norü uanügü.
45Rü guxü̃ma ga yema ore ga Cori ya Tupana Iraétanüxü̃maxã ueguxü̃ rü ningu, rü bai ga wüxi ga tama inguxü̃, rü guxü̃ma ningu.
Currently Selected:
Yochué 21: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
