Yochué 17
17
Manachétanüxü̃na üxü̃ ga naane
1Rü ñaa nixĩ ga yema naane ga Yúche nane ga yacü ga Manachéarü duü̃xü̃gü yauxgüxü̃. Rü yexguma namaxü̃gu ga Moiché rü Manaché nane ga yacü ga Maquítanüxü̃na nanaxã ga Garaáxane rü Bacháü̃ane ga natü ga Yudáü̃arü éstewaama yexmaxü̃. Rü nüma ga Maquí rü Garaáxnatü nixĩ rü daiwa napora.
2Rü yema togü ga Manachétanüxü̃ rü Yudáü̃arü oéstewaama nanayauxgü ga norü naane. Rü ñaa nixĩ ga Manachétanüxü̃ ga sortéuãcü nayauxgüxü̃ ga norü naane: Abiéche, rü Élex, rü Arié, rü Chiquéü̃, rü Éfe, rü Chemidá. Rü yemagü nixĩ ga Manaché nanegü ga Yúchetaagü ixĩgüxü̃.
3Natürü nüma ga Éfe nane ga Cherofáx tama nanayaxu ga naane yerü nüxü̃́ nataxuma ga nanegü rü naxacügüxicatama nüxü̃́ iyexma.#17.3 Rü Éfe rü Garaáx nane nixĩ rü Garaáx rü Maquí nane nixĩ rü Maquí rü Manaché nane nixĩ. Rü Cherofáx rü wüxime̱e̱xpü̱x ga naxacü nüxü̃́ iyexma: Maará, rü Noá, rü Oxlá, rü Milcá, rü Tirchá.
4Rü yemaca̱x ga ngĩmagü rü naxü̃tawa ixĩ ga chacherdóte ga Ereachá rü Yochué rü ĩanegüarü ãẽ̱xgacügü rü namaxã nüxü̃ iyarüxugüe i ñaa ore, rü ngĩgürügügü: —Nüma ga Cori ya Tupana rü Moichémaxã nüxü̃ nixu nax toxna penaxãxü̃ i naane ngẽma totanüxü̃na penaxãxü̃rüxü̃ —ngĩgürügügü. Rü yexguma ga nüma ga Yochué rü ngĩxna tanaxã ga naane yema ngĩnatütanüxü̃na naxããxü̃rüxü̃. Yerü yema nixĩ ga Cori ya Tupanaarü mu.
5Rü yemaacü ga yema Manachétanüxü̃ rü nanayauxgü ga 10 ga naanegü naétü ga yema naanegü ga Garaáx, rü Bacháü̃ ga natü ga Yudáü̃arü éstewaama yexmagüxü̃.
6Yerü naxacügü ga Manachétanüxü̃ rü ngĩxna nanaxãgü ga naane yema iyatüxü̃rüxü̃tama. Rü yema Garaáxarü naane rü yema togü ga Manachétaagüca̱x nixĩ.
7Rü yema naane ga Manachétanüxü̃ yauxgüxü̃ rü Achéwa inaxügü ñu̱xmata Mixmetáxwa nangu. Rü Mixmetáx rü ĩane ga Chiquéü̃arü to̱xma̱xtawa nayexma. Rü yéma rü súrwaama nada ñu̱xmata natüxacü ga Tapúawa yexmaxü̃wa nangu.
8Rü woo ga yema Tapúaarü naane rü Manachétanüxü̃arü nixĩ, natürü nüma ga guma ĩane ga Tapúa ga Manachéarü naane íxüyéxü̃wa yexmane, rü Efraíü̃tanüxü̃güna naxǘ.
9Rü yéma rü narüdae, rü súrwaama nada ga norü üyeane ñu̱xmata natüxacü ga Canáwa nangu. Rü yemaacü ga guma Efraíü̃arü ĩanegü rü Manachéarü ĩanetanüwa nayexmagü rü woo ga yema üyeane ga yema natüxacüarü nórtewaama üxü̃ rü Manachéarü nixĩ ñu̱xmata Már Mediteráneuwa nangu.
10Rü yema Efraíü̃arü naane rü natüxacüarü súrwaama naxǘ, rü yema Manachéarü naane rü natüxacüarü nórtewaama naxǘ. Rü yema norü üyeane rü Már Mediteráneugu nayacua̱x. Rü to ga naanegü ga Manachéanemaxã yaxüyexü̃ nixĩ ga Achétanüxü̃arü naane ga nórtewaama, rü Ichacátanüxü̃arü naane ga éstewaama.
11Rü yexgumarüxü̃ ta Ichacáarü naanewa rü Achéarü naanewa Manachéna naxǘ ga ñuxre ga ĩanegü norü ĩanexacügümaxã. Rü daagü nixĩ: Bex-cheáü̃, rü Ibeáü̃, rü Dóx, rü Endóx, rü Taanáx, rü Meguídu, rü ñu̱xũchi guma tomaepü̱x ga ma̱xpǘnegü.
12Natürü ga Manachétücumüarü duü̃xü̃gü rü taxucürüwama nanayauxgü ga guma ĩanegü, yerü yema Canaáü̃cüã̱xgü rü yéma nügü ninuxũgü rü tama yéma ínachoxü̃chaü̃. Rü ñu̱xmarüta ngéma nangẽxmagü.
13Natürü yexguma yixcüra yexera naporaegu ga Iraétanüxü̃ rü Canaáü̃cüã̱xgümaxã inacua̱xgü rü nüxü̃ nanaxütanüxẽẽgü nax yéma nayexmagüxü̃ca̱x. Natürü tama ínanawoxü̃.
Yúchetanüxü̃ nanayauxgü ga naane ga naixnecüã́xü̃
14Rü yema Yúchetaagü rü Yochuéxü̃ ñanagürügü: —Tupana rü poraãcü toxü̃ narüngü̃xẽxẽ rü ñu̱xma rü tamu. ¿Rü tü̱xcüü̃ toxna cunaxã i wüxitama i naane? —ñanagürügü.
15Rü nüma ga Yochué rü nanangãxü̃ rü ñanagürü: —Dücax, pemax nax pemuxü̃ rü tama nagu peme i ngẽma máxpü̱xanexü̃ i Efraíü̃arü ixĩxü̃. Rü ngẽmaca̱x name i ngẽma naixnecüã́xü̃ i naanewa pexĩ, rü ngẽxma pexüanegü nagu i ngẽma naane i Ferechéugüarü, rü Refátanüxü̃arü ixĩxü̃ —ñanagürü.
16Rü yexguma ga nümagü rü ñanagürügü: —Aixcüma nixĩ i tama nagu imexü̃ i ñaa torü naane i máxpü̱xanexü̃. Natürü ngẽma Canaáü̃cüã̱xgü i ngẽma ínadoxonexü̃wa maxẽxü̃ rü nüxü̃́ nangẽxma ya carugü ya fierunaxca̱x. Rü ngẽxgumarüxü̃ ta i ngẽma duü̃xü̃gü i Bex-cheáü̃wa rü norü ĩanexacügüwa rü Yereéarü doxonexü̃wa maxẽxü̃ rü nüxü̃́ nangẽxma ya carugü ya fierunaxca̱x —ñanagürügü.
17-18Rü yexguma nüma ga Yochué rü yema Yúchetaagüxü̃ ga Efraíü̃tanüxü̃xü̃, rü Manachétanüxü̃xü̃ nangãxü̃ rü ñanagürü: —Pema nax pemuxü̃ rü peporae rü taxũtáma wüxiwa tátama naane pexna naxǘ. Natürü ngẽma máxpü̱xanexü̃ i naixnecüã́xü̃ rü tá ta pexrü nixĩ. ¡Rü nagu pexüanegü! Rü ngẽma Canaáü̃cüã̱xgü rü tá ípenawoxü̃ nawa i ngẽma naane woo i nümagü rü naporae rü nüxü̃́ nangẽxma i carugü i fierunaxca̱x —ñanagürü.
Currently Selected:
Yochué 17: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
