Ãẽ̱xgacügü ga guxchaxü̃güarü mexẽxẽruü̃gü 20
20
Bẽyamíü̃tanüxü̃maxã nanue ga Iraétanüxü̃ naxca̱x ga Guibeágu namáetagüxü̃
1Rü guxü̃ma ga yema Iraétanüxü̃ ga duü̃xü̃gü ga Dáü̃arü naanewa inaxügü rü ñu̱xmata Bechébawa nangu, rü naétü ga Garaáxanecüã̱xgü rü nügü nanutaque̱xe rü wüxigutama narüxĩnüe, rü Mispágu nangutaque̱xegü nape̱xegu ga Cori ya Tupana.
2Rü guxü̃ma ga wüxitücumüchigü ga Iraétanüxü̃arü ãẽ̱xgacügü rü yéma nayexmagü namaxã ga 400,000 ga churaragü ga yexma ngutaque̱xexü̃.
3Rü yema Bẽyamíü̃tanüxü̃ rü nüxü̃ nacuáchigagü ga yema togü ga natanüxü̃ ga Iraétanüxü̃ rü Mispágu nax nangutaque̱xegüxü̃. Rü yexguma ga yema Iraétanüxü̃ rü yema Lebítanüxü̃na nacagüe nax ñuxãcü yixĩxü̃ ga nangupetüxü̃ ga yema máeta.
4Rü nüma ga yema Lebítanüxü̃ ga ngĩte ga yema nge ga ngĩxü̃ yama̱xgücü rü nanangãxü̃ rü ñanagürü: —Wüxi ga chütaxü̃gu rü Bẽyamíü̃tanüxü̃arü ĩane ga Guibeáwa changu ngĩmaxã ga yema nge ga ngĩmaxã chaxããrüã̱xcü nax yexma tapegüxü̃ca̱x.
5Natürü yematama chütaxü̃gu rü guma ĩpata ga nawa chayexmanewa naxĩ ga ñuxre ga guma ĩanecüã̱x, rü nüxü̃ ínachomaeguãchi nax choxü̃ yama̱xgüxü̃ca̱x. Natürü ngĩxü̃ niyauxgü ga cho̱xma̱x rü ngĩmaxã namaxẽ rü ñu̱xmata ngĩxü̃ yama̱xgü.
6Rü yexguma ga choma rü chanayaxu ga ngĩxĩne rü 12 gu ichanachexü̃gü. Rü guxü̃ma ga Iraétanüxü̃arü naanewa chanamu ga ngĩmachi nax ngẽmaãcü nüxü̃ nacua̱xgüxü̃ca̱x i guxü̃ma i Iraétanüxü̃ ga yema máeta ga poraãcü chixexü̃ ga naxügüxü̃ ga Bẽyamíü̃tanüxü̃.
7Rü ngẽmaca̱x i ñu̱xma i pema nax Iraétanüxü̃ pixĩgüxü̃ rü pewa nangẽxma nax nagu perüxĩnüexü̃ rü nüxü̃ pixuxü̃ nax ta̱xacü tá ixüexü̃ —ñanagürü.
8Rü ñoma wüxitama i duü̃xü̃ i chixü̃rüxü̃ guxü̃ma wüxigu inachigü rü ñanagürügü: —Ñu̱xmax i yixema rü taxúetama texé tümaarü düxenüca̱x rüe̱xna tümapataca̱x tataegu.
9Rü ngẽma tá ixüxü̃ nixĩ nax sortéu ixüxü̃ nax ngẽmaãcü nüxü̃ icuáxü̃ca̱x nax texétücumüxíra tá yixĩxü̃ i wixpe̱xegu ĩxü̃ nax ngẽmaãcü Guibeácüã̱xgüca̱x íyaxü̃ãchixü̃.
10Rü guxü̃ma i tórü churaragütücumüwa rü ngẽma 100 chigü i churaragütanüwa rü tá nüxü̃ taxuneta i 10 i yatügü nax õnaca̱x nadaugüxü̃ naxca̱x i churaragü. Rü ngẽma 1,000 chigü i churaragütanüwa rü tá nüxü̃ taxuneta i 100 i yatügü nax õnaca̱x nadaugüxü̃. Rü ngẽma 10,000 chigü i churaragütanüwa rü tá nüxü̃ taxuneta i 1,000 i yatügü nax õnaca̱x nadaugüxü̃. Rü ngẽma togü i churaragü rü tá inaxĩãchi nax Guibeácüã̱xü̃ yadaixü̃ naxca̱x ga yema máeta ga chixexü̃chixü̃ ga naxügüxü̃ nua Iraétanüxü̃arü naanewa —ñanagürügü.
11Rü guxü̃ma ga yema Iraétanüxü̃ rü wüxigu inaxĩãchi nax guma ĩane ga Guibeáca̱x íyaxüãchixü̃.
12Rü yema togü ga Iraétanüxü̃ rü guxü̃ma ga Bẽyamíü̃tanüxü̃arü naanewa nanamugü ga orearü ngeruü̃gü rü ñanagürügü: —¿Ta̱xacürü máeta nixĩ ga pexüxü̃ ga ñuxre ga pemax?
13-14Tanaxwa̱xe i toxna penamugü i ngẽma yatügü i máetagüxü̃ i Guibeáwa ngẽxmagüxü̃ nax tanada̱i̱xü̃ca̱x rü ngẽmaãcü Tupanape̱xewa tanamexẽẽxü̃ca̱x i ngẽma chixexü̃ i Iraétanüxü̃guachixü̃ —ñanagürügü. Natürü nüma ga Bẽyamíü̃tanüxü̃ rü tama natanüxü̃ ga Iraétanüxü̃ga naxĩnüe. Rü guxü̃ma ga yema Bẽyamíü̃tanüxü̃ ga guxü̃nema ga norü ĩanegüwa maxẽxü̃ rü Guibeágu naxĩtaque̱xe nax yema togü ga Iraétanüxü̃maxã nügü nada̱i̱xü̃ca̱x.
15Rü norü mu ga Bẽyamíü̃tanüxü̃arü churaragü ga naigü ga ĩanewa ne ĩxü̃ rü 26,000 nixĩ rü naétü ga Guibeáwatama yexmagüxü̃ ga 700 ga churaragü ga yadexechigüxü̃.
16Rü yemaétüwa rü nayexmagü ta ga to ga 700 ga churaragü ga ito̱xoxwechacüüxü̃ rü taguma guxchinügüxü̃ namaxã ga norü maxgütaeruü̃gü, woo ga wüxinüta i nayae rü tama namaxã naguxchinügü.
17Rü nüma ga Iraétanüxü̃ rü nananutaque̱xe ga 400,000 ga churaragü ga meama daixü̃ icuáxü̃.
Bẽyamíü̃tanüxü̃maxã nügü nadai ga Iraétanüxü̃
18Rü yexguma nüma ga Iraétanüxü̃ rü Betéwa naxĩ rü yéma Tupanamaxã nidexagü nax yemaacü nüxü̃ nacua̱xgüxü̃ca̱x nax texétücumüxíra tá yixĩxü̃ i Bẽyamíü̃tanüxü̃maxã nügü daixü̃. Rü nümax ga Cori ya Tupana nanangãxü̃ rü ñanagürü: —Ngẽma inaxügüxü̃ nax namaxã nügü nada̱i̱xü̃ rü Yudátanüxü̃xíra tá nixĩ —ñanagürü.
19Rü yemaca̱x ga Iraétanüxü̃ rü moxü̃ãcü pa̱xmama ínarüdagü rü inaxĩãchi rü Guibeáarü tocutügu nayapexgü.
20Rü moxü̃ãcü rü inaxĩãchi nax Bẽyamíü̃tanüxü̃maxã nügü nada̱i̱xü̃ca̱x. Rü meama Guibeáarü to̱xma̱xtawa nayachaxãchitanü rü yéma nügü namexẽẽgü rü mea nügü ininu.
21Natürü nüma ga Bẽyamíü̃tanüxü̃ rü ínachoxü̃ ga Guibeáwa rü natanüxü̃ ga Iraétanüxü̃xü̃ nadai. Rü yema ngunexü̃gu rü 22,000 ga Iraétanüxü̃ nayue.
22-23Rü yemaca̱x ga Iraétanüxü̃ rü Betéca̱x nawoegu rü yéma Tupanape̱xewa naxauxe ñu̱xmata nachüta. Rü yéma Tupanana nacagüe rü ñanagürügü: —Pa Tórü Tupanax, ¿namexü̃ nax wenaxarü namaxã togü tadaixü̃ i toenexẽgü i Bẽyamíü̃tanüxü̃? —ñanagürügü. Rü nüma ga Cori ya Tupana rü nanangãxü̃gü rü ñanagürü: —¡Ẽcü wenaxarü pegü pedaix! —ñanagürü.
24Rü yexguma ga Iraétanüxü̃ rü wenaxarü nayaporaãchitanü rü nügü namexẽẽgü nax wenaxarü nügü nada̱i̱xü̃ca̱x yematama nachica ga nüxíra nagu nügü nada̱i̱xü̃gu.
25Natürü nüma ga Bẽyamíü̃tanüxü̃ rü wenaxarü ínachoxü̃ ga Guibeáwa rü Iraétanüxü̃ca̱x inayayi rü 18,000 ga Iraétanüxü̃arü churaragü ga taramaxã ixãxnexü̃ nayue.
26Rü yemaca̱x ga Iraétanüxü̃ rü wenaxarü Betéca̱x nawoegu rü yéma nayaxauxe nape̱xewa ga Tupana. Rü yema ngunexü̃ rü tama nachibüeãcü yéma nayumüxẽgü ñu̱xmata nachüta. Rü yéma Tupanaca̱x ínanagugü ga naeü̃gü rü ãmaregü Tupanaarü ngüxmüxẽẽruxü̃.
27-28Rü yexgumaü̃cüxü rü yema baú ga Tupanaarü mugüchixü̃ rü Betéwa nayexma. Rü Fineéx ga Ereachá nane ga Aróü̃ nataxa nixĩ ga chacherdóte ixĩcü. Rü nüma ga Iraétanüxü̃ rü Tupanana nacagüe rü ñanagürügü: —Pa Tórü Tupana, ¿namexü̃ nax wenaxarü namaxã togü tadaixü̃ i toenexẽgü i Bẽyamíü̃tanüxü̃, rüe̱xna cunaxwa̱xe nax nüxü̃ tarüchauxü̃ nax namaxã togü tadaixü̃? —ñanagürügü. Rü nüma ga Cori ya Tupana nanangãxü̃gü rü ñanagürü nüxü̃: —¡Ẽcü, wena pegü pedai! Rü moxü̃ tá choma pexü̃ charüporamaegüxẽxẽ —ñanagürü.
29-30Rü yexguma rü ñuxre ga Iraétanüxü̃ ga churaragü rü Guibeáxü̃ ínachomaeguãchi rü yexma nicu̱xgü. Rü yema togü rü norü tomaepü̱x ga ngunexü̃gu rü inaxĩ rü inaxĩãchi naxca̱x ga Bẽyamíü̃tanüxü̃. Rü mea yexma nügü ninu ga noxrigurüxü̃.
31-32Rü yexguma nüma ga Bẽyamíü̃tanüxü̃ rü wenaxarü ĩane ya Guibeáwa inayayi rü Iraétanüxü̃we nangẽgü. Rü yemaacü norü ĩanena niyáxü̃guetanü. Rü yexguma rü 30 tüxü̃ nadai nagu ga yema namagü ga Betéwa rü Guibeáwa nadaxü̃ rü nagu ga yema naanegü ga namacüwawa yexmagüxü̃. Rü Bẽyamíü̃tanüxü̃ nagu rüxĩnüegu ga Iraétanüxü̃ rü marü nibuxmü yerü noxrirüxü̃ marü nüxü̃ narüporamaegü. Natürü nüma ga Iraétanüxü̃ rü nibuxmüneta nax yemaacü nawe nangegüxü̃ca̱x rü norü ĩanena nayáxü̃guxẽẽgüãxü̃ca̱x ga Bẽyamíü̃tanüxü̃ ñu̱xmata namagüwa namaxã nangugü.
33Rü yexguma Baá-tamáwa nangugügu ga yema Iraétanüxü̃arü churaragü ga ibuxmünetaxü̃ rü yéma mea nügü ininu nax Bẽyamíü̃tanüxü̃maxã nügü nada̱i̱xü̃ca̱x. Rü yoxni ga yema Iraétanüxü̃arü churaragü ga Guibeápemagu icu̱xgüxü̃ rü nichoxü̃ ga yema íyacu̱xgüxü̃wa rü naxca̱x ínayaxüãchi ga guma ĩane.
34Rü 10,000 ga yema Iraétanüxü̃arü churaragü ga nüxü̃ icua̱xüchixü̃ ga daiwa rü yemagü nixĩ ga Guibeáca̱x íyaxüãchixü̃. Rü poraãcüma natai ga yema dai. Rü nüma ga Bẽyamíü̃tanüxü̃ rü tama nüxü̃ nacua̱xgü ga Iraétanüxü̃ tá nüxü̃ rüporamaegüxü̃.
35Rü Tupana Iraétanüxü̃xü̃ narüngü̃xẽxẽ nax Bẽyamíü̃tanüxü̃xü̃ narüporamaegüxü̃ca̱x. Rü yema ngunexü̃ nayue ga 25,100 ga Bẽyamíü̃tanüxü̃arü churaragü.
36Rü yexguma nüma ga Bẽyamíü̃tanüxü̃ rü nüxü̃ nicua̱xãchitanü nax Iraétanüxü̃ nüxü̃ rüporamaegüxü̃. Rü yema Iraétanüxü̃arü churaragü rü noxri yema Bẽyamíü̃tanüxü̃cha̱xwa nibuxmüetanü, yerü nüxna narüyoü̃ ga yema norü churaragü ga ĩane ga Guibeápemagu icu̱xgüxü̃.
37Rü yema Iraétanüxü̃arü churaragü rü ngürüãchimare Guibeáca̱x ínayaxüãchi rü taramaxã nanadai ga guxü̃ma ga yema duü̃xü̃gü ga guma ĩanewa maxẽxü̃.
38Rü yema churaragü ga Guibeápechinügu icu̱xgüxü̃ rü marü yema togü ga Iraétanüxü̃arü churaragümaxã nüxü̃ nixugü nax wüxi i taxü̃ i üxüema i caixnagüxü̃wa tá nüxü̃ nacua̱xgüxü̃ nax marü Guibeágu nachocuxü̃.
39Rü noxri ga yema Bẽyamíü̃tanüxü̃ rü 30 ga Iraétanüxü̃xü̃ nadai rü yemaca̱x nüma nagu naxĩnüegu rü marü Iraétanüxü̃xü̃ narüporamaegü yema nüxíra nügü nadaixgurüxü̃. Natürü yexguma yema Iraétanüxü̃arü churaragü ga ibuxmünetachigüxü̃ nüxü̃ daugügu ga yema üxüema ga Guibeáarü ĩanewa caixnagüxü̃ rü nügü nawoeguãchitanü rü Bẽyamíü̃tanüxü̃maxã nügü nadai.
40Rü yexguma yema üxüema ixügügu nax nacaixnagüxü̃ rü nüma ga Bẽyamíü̃tanüxü̃ nügü íyadaugü, rü nüxü̃ nadaugü ga yema üxüema nax guxü̃ma ga Guibeáétüwa nacaixnagüxü̃ rü dauxü̃wa nanguxü̃.
41Rü nüma ga Iraétanüxü̃ rü Bẽyamíü̃tanüxü̃ca̱x nibuxmü. Rü nüma ga Bẽyamíü̃tanüxü̃ rü ínayamuü̃ãchitanü ga yexguma nüxü̃ yacua̱xãchitanügu nax marü Iraétanüxü̃ nüxü̃ rüporamaegüxü̃.
42Rü Iraétanüxü̃cha̱xwa nibuxmü nagu ga yema nama ga ínachianexü̃waama nadaxü̃. Natürü yema Iraétanüxü̃arü churaragü ga guma ĩane ga Guibeáwa ne ĩxü̃ rü yexma nanadai.
43Rü nüma ga Iraétanüxü̃ rü yema Bẽyamíü̃tanüxü̃xü̃ ínachoeguãchi rü nawe nangẽgü. Rü Menuáwa inanaxügüe nax nadaiaxü̃ rü ñu̱xmata Guibeáarü éstewa nangugü.
44Rü yemaacü nayue ga 18,000 ga churaragü ga Bẽyamíü̃tanüxü̃.
45Rü yema togü rü nügü ínibuxmü rü naxĩgü. Rü chianexü̃waama naxĩ. Rü guma nuta ga Rimóü̃gu ãégacüwaama naxĩ. Natürü 5,000 ga natanüxü̃ nixĩ ga namagu yuexü̃. Rü nüma ga Iraétanüxü̃ rü nawe nangegü, rü 2,000 ga yatügü nadai.
46Rü guxü̃wama ga yema ngunexü̃gu rü nayue ga 25,000 ga Bẽyamíü̃tanüxü̃arü churaragü ga rümemaegüxü̃.
47Natürü 600 ga Bẽyamíü̃tanüxü̃ rü nibuxmü rü naxĩgü rü ínachianexü̃waama naxĩ. Rü ãgümücü ga tauemacü yéma nuta ga Rimóü̃wa nayexmagü.
48Rü yemawena ga Iraétanüxü̃ rü naxca̱x ínayaxüãchi ga yema togü ga Bẽyamíü̃tanüxü̃ ga íyaxügüxü̃. Rü guxü̃nema ga ĩanewa rü taramaxã nanadai ga yema Bẽyamíü̃tanüxü̃. Rü nanadai ga naxü̃nagü rü guxü̃ma ga yema nüxü̃ yangaugüxü̃. Rü guma ĩanegü ga nawa nachopetüne rü ínanagu.
Currently Selected:
Ãẽ̱xgacügü ga guxchaxü̃güarü mexẽxẽruü̃gü 20: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
