Ichaía 2
2
Cori ya Tupana rü tá nügümaxã inanangüxmüexẽxẽ i nachixü̃anegü
(Mi. 4.1-3)
1Ñaa nixĩ ga ore ga Amú nane ga Ichaíaãẽwa Tupana ínguxẽẽxü̃ nachiga ga Yudáanecüã̱x rü ĩane ga Yerucharéü̃cüã̱x.
2Ngẽma ngunexü̃gü i nawa iyacua̱xgüxü̃gu, rü yima ma̱xpǘne i Cori ya Tupanapata ya taxü̃ne íngẽxmaxü̃wa rü guxü̃ne ya naigü ya ma̱xpǘnearü yexera tá poraãcü natachiga. Rü guxü̃ i nachixü̃anecüã̱x i duü̃xü̃güaxü̃́ tá nangúchaü̃ nax íyadaugüãxü̃. Rü guxü̃ma i nachixü̃anegücüã̱x i duü̃xü̃gü rü tá ngéma naxĩ.
3Rü muxü̃tama i duü̃xü̃gü tá ínangugü rü ñanagürügü tá: —¡Ngĩxã, rü yima ma̱xpǘne i Cori ya Tupana íngexmaxü̃gu taxĩgü rü yima Acóbuarü Tupanapata ya taxü̃nena tangaicamagü nax nüma ngéma tüxü̃ nangúexẽẽxü̃ca̱x i norü ngúchaü̃ rü ngẽmaãcü nüma nanaxwa̱xexü̃ãcüma imaxẽxü̃ca̱x! —ñanagürügü tá. Erü yima ma̱xpǘne ya Chióü̃wa tá nango̱x i Cori ya Tupanaarü ngu̱xẽẽtae rü Yerucharéü̃wa tá ínaxũxũ i norü ore.
4Rü nüma ya Cori ya Tupana rü tá nanamexẽxẽ i guxü̃ma i nachixü̃anegüarü guxchaxü̃gü. Rü ngẽma nachixü̃anegü i nügümaxã nuexü̃ rü Cori ya Tupana rü tá nügümaxã nanangüxmüexẽxẽ. Rü ngẽma naxnegü i namaxã nügü nada̱i̱xü̃ rü norü puracüruxü̃ tá nayaxĩgüxẽxẽ. Rü taxuxü̃táma i ĩanegü daigu nügümaxã narüxĩnüe rü bai tá i daica̱x nügü nax nangúexẽẽxü̃.
5Pa Acóbutanüxü̃x i Duü̃xü̃güx, ¡Ngĩxã, Cori ya Tupanaga taxĩnüe rü nüma nanaxwa̱xexü̃ãcüma nagu tamaxẽ i norü ore!
Tupana rü tá nanaxãnexẽxẽ i ngẽma nügü icua̱xüü̃güxü̃
6Ichaía rü yumüxẽwa ñanagürü: —Pa Corix, marü nüxna quixũgachi i curü duü̃xü̃gü i Acóbutanüxü̃. Rü natanüwa nangugü rü ngéma namu i duü̃xü̃gü i ẽxü̃guxü̃xü̃ icuáxü̃ i éstewa ne ĩxü̃, rü duü̃xü̃gü i yuüxü̃ ñoma Firitéugütanüwarüxü̃. Rü curü duü̃xü̃gü rü togü i nachixü̃anecüã̱x i tama Tupanaxü̃ cua̱xgüxü̃maxã nügümaxã nanamexẽxẽ nax nügüarü ngẽmaxü̃ca̱x nataxegüxü̃ca̱x.
7Rü ñaa nachixü̃anewa rü namuxũchi i úiru rü diẽru rü ngẽmaxü̃gü. Rü ñu̱xũchi namuxũchi i cowarugü, rü ngẽma carugü i daiwexü̃ rü taxucürüwa tayaxugü erü namuxũchi.
8Natürü ñaa nachixü̃anewa rü ta namu i ngẽma tupananetachicüna̱xãgü. Rü duü̃xü̃gü rü nümagütama naxme̱xmaxã naxüxgüxü̃ i tupananetachicüna̱xãgüxü̃ nicua̱xüü̃gü.
9Rü nügütama ãne ningexẽẽgü. Rü taxuwama nügü namexẽẽgü. Rü ngẽmaca̱x, Pa Tupanax, ¡taxṹ i nüxü̃ curüngü̃maxü̃ i ngẽma duü̃xü̃güarü chixexü̃! —ñanagürü ga Ichaía ga norü yumüxẽwa.
10Rü ngẽma duü̃xü̃gü i chixexü̃ ügüxü̃ rü nutatanügu rü waixü̃müarü ãxmaxü̃gu tá nügü nicu̱xgü na̱xcha̱xwa ya Cori ya Tupana ya üünecü rü poraãcü ãũcümacü.
11Rü ngẽma ngunexü̃ i nagu ínanguxü̃ ya Cori ya Tupana, rü ngẽma nügü icua̱xüü̃güxü̃ rü nape̱xewa tá naxãnee, rü ngẽma nügü írütagüxü̃ rü nape̱xewa rü tá taxuwama nime. Rü nüxicatama ya Cori ya Tupana rü tá inanawe̱x i norü pora i ngẽma ngunexü̃gu.
12Rü ngẽma ngunexü̃gu rü nüma ya Cori ya Tupana rü tá nanaxãneexẽxẽ i guxü̃ma i ngẽma nügü icua̱xüü̃güxü̃ rü ngẽma nügü írütagüxü̃ rü ngẽma togüétüwa nügü ngẽxmagüxẽẽxü̃.
13Rü ngẽma ngunexü̃gu rü nüma ya Cori ya Tupana rü tá nanaxãneexẽxẽ i ngẽma duü̃xü̃gü i nügügu rüxĩnüexü̃ nax ñoma Líbanuanearü ocayiwarüxü̃ rü ñoma Bacháü̃anearü naigü i roblerüxü̃ naporaexü̃ rü natachigagüxü̃.
14Rü tá nanaxãneexẽxẽ i ngẽma nügügu rüxĩnüexü̃ nax ñoma ma̱xpǘnegü ya máchanegünerüxü̃ rü ñoma ngüchitaeruxü̃ ya máchanegünerüxü̃ natachigagüxü̃.
15Rü tá nanaxãneexẽxẽ i ngẽma nügügu rüxĩnüexü̃ nax ñoma torregü imáchanecürüxü̃ poraexü̃ rü ñoma ĩanearü poxeguxü̃tápü̱xgü i taixü̃rüxü̃ poraexü̃.
16Rü Tupana rü taxũtáma namaxã nataãxẽ i ngẽma nügü icua̱xüü̃güxü̃ rü nügügu rüxĩnüexü̃ nax ñoma Tárchixarü wapurugürüxü̃ yaporaxü̃ rü naigü ya wapurugü ya imexẽchínerüxü̃ yaporaxü̃.
17Natürü wüxi i ngunexü̃gu rü tá poraãcü naxãnee i ngẽma nügü icua̱xüü̃güxü̃ rü ngẽma nügü írütagüxü̃. Rü ngẽma ngunexü̃gu rü duü̃xü̃gü rü tá Cori ya Tupanaxü̃xicatama nicua̱xüü̃gü.
18Rü nüma rü tá inayanaxoxẽxẽ i guxü̃ma i ngẽma tupananetachicüna̱xãgü.
19Rü ngẽxguma Cori ya Tupana inaxügügu nax yaxĩã̱xcüüxẽẽãxü̃ i ñoma i naane, rü ngẽma duü̃xü̃gü i chixexü̃ ügüxü̃ rü norü muü̃maxã tá nutaarü ãxmaxü̃gu rü waixü̃müarü ãxmaxü̃gu nicu̱xgü na̱xcha̱xwa ya Cori ya Tupana ya üünecü rü poraãcü ãũcümacü.
20Rü ngẽma ngunexü̃gu rü duü̃xü̃gü rü tá ü̃cagüna rü chü̱xürigüna nanawoxochitanü i norü tupananetachicüna̱xãgü i úirunaxca̱x rü diẽrumünaxca̱x i nümatama ínaxüxüxü̃ nax nüxü̃ yacua̱xüü̃güxü̃ca̱x.
21Rü ngẽxguma Cori ya Tupana inaxügügu nax yaxĩã̱xcüüxẽẽãxü̃ i ñoma i naane, rü ngẽma duü̃xü̃gü i chixexü̃ ügüxü̃ rü norü muü̃maxã tá nutaarü ãxmaxü̃gu rü nutamachate̱xegu nicu̱xgü naxcha̱xwa ya Cori ya Tupana ya üünecü rü poraãcü ãũcümacü.
22Rü ngẽmaca̱x tama name i perüxü̃ i duü̃xü̃gügu peyaxõgü, erü duü̃xü̃güarü maxü̃ rü ñoma yáxna rüngü̱̃xü̃rüü̃mare nixĩ nax paxa iyacuáxü̃.
© 2022, Wycliffe Bible Translators, Inc. All rights reserved.