Ínachoxü̃xü̃chiga 7
7
1Rü yexguma ga Cori ya Tupana rü Moichéxü̃ ñanagürü: —Dücax, choma chanaxwa̱xe nax cuma chauxchicüü Faraóü̃xü̃tawa cuxũxü̃, natürü cuenexẽ ya Aróü̃ tá nixĩ ya yimá cuchicüxü Faraóü̃maxã idexacü.
2Rü cuma tá nixĩ i Aróü̃maxã nüxü̃ quixuxü̃ i guxü̃ma i ngẽma ore i cumaxã nüxü̃ chixuxü̃. Rü ñu̱xũchi nüma i Aróü̃ tá nixĩ i Faraóü̃maxã idexaxü̃ nax Equítuanewa ínamuxü̃ãxü̃ca̱x i Iraétanüxü̃.
3Natürü choma rü tá Faraóü̃xü̃ íchayataiãchiãẽxẽxẽ rü taxũtáma pexü̃́ nayaxõ. Rü Equítuanewa rü muxü̃tama i cua̱xruü̃gü i ãũcümaxü̃ tá ichawe̱x.
4Rü Faraóü̃ rü taxũtáma pega naxĩnü. Natürü choma rü chorü poramaxã tá Equítuanewa íchananguxẽxẽ i taxü̃ i ãũcümaxü̃gü. Rü ngẽmaãcü taxü̃ i chorü ngü̃xẽẽmaxã tá Equítuanewa íchanagaxü̃ i chorü duü̃xü̃gü i Iraétanüxü̃ i chorü churaragü ixĩgüxü̃.
5Rü ngẽxguma Equítuanecüã̱xgüxü̃ chanawe̱xgu i chorü pora rü marü íchanagaxü̃gu i Iraétanüxü̃, rü ñu̱xũchi nüma i Equítuanecüã̱xgü rü tá nüxü̃ nicua̱xãchitanü nax aixcüma choma yixĩxü̃ ya Cori ya Tupana —ñanagürü.
6Rü nümagü ga Moiché rü Aróü̃, rü yema Cori ya Tupana namuxü̃ãcü nayanguxẽxẽ.
7Rü yexguma Faraóü̃maxã yanadexagügu ga Moiché rü nüxü̃́ nayexma ga 80 ga taunecü, rü Aróü̃ rü nüxü̃́ nayexma ga 83 ga taunecü.
Aróü̃arü naixmena̱xã
8Rü nüma ga Tupana rü Moichéxü̃ rü Aróü̃xü̃ ñanagürü:
9—Ngẽxguma Faraóü̃ pexna naxca̱x caxgux nax penaxüxü̃ i wüxi i mexü̃ i chorü poramaxã üxü̃, rü tá Aróü̃maxã nüxü̃ quixu nax Faraóü̃pe̱xegu nañaaxü̃ca̱x ya norü naixmena̱xã nax ãxtapexü̃ nanguxuchixü̃ca̱x —ñanagürü.
10Rü yexguma ga Moiché rü Aróü̃ rü Faraóü̃xü̃tawa naxĩ, rü nanaxü ga yema Cori ya Tupana namuxü̃. Rü nüma ga Aróü̃ rü Faraóü̃pe̱xegu rü norü ngü̃xẽẽruü̃güpe̱xegu nanaña ga guma norü naixmena̱xã rü ãxtapexü̃ nananguxuchi.
11Rü nüma ga Faraóü̃, rü norü duü̃xü̃gü ga nüxü̃ icua̱xüchixü̃ca̱x rü norü yuüxü̃güca̱x nangema. Rü nümagü ga yema norü duü̃xü̃gü rü norü yuüxü̃gümaxã nanaxügüama ta ga yema Aróü̃ üxü̃.
12Rü wüxichigü ga yema yuüxü̃ rü ñaxtüanegu nanaña ga norü naixmena̱xã. Rü wüxichigü ga guma norü naixmena̱xã rü ãxtapexü̃ nananguxuchi. Natürü guma Aróü̃arü naixmena̱xã, rü yema iyuüxü̃arü naixmena̱xãxü̃ ínagagü.
13Natürü woo yemaxü̃ nax nadauxü̃ ga Faraóü̃, rü tama inaxĩnüchaü̃, yema Cori ya Tupana nüxü̃ ixuxü̃rüxü̃.
Nagüxü̃ nayanguxuchi ga dexá
14Rü yemawena rü nüma ga Cori ya Tupana rü ñanagürü Moichéxü̃: —Nüma i Faraóü̃ rü tama inaxĩnüchaü̃, rü taxũtáma Iraétanüxü̃xü̃ ínamuxü̃chaü̃.
15¡Natürü moxü̃ pa̱xmamaxü̃chi rü naxü̃tawa íyadau! ¡Rü ngẽxguma tá türewa yanaxüegu, rü ngéma taxtüanacüwa tá cunangu̱xẽxẽ! ¡Rü íyange ya yima naixmena̱xã ya ãxtapexü̃ yanguxuchine!
16Rü ñacugürü tá nüxü̃: “Rü yimá Cori ya Iraétanüxü̃arü Tupana rü choxü̃ namu nax wena cumaxã nüxü̃ chixuxü̃ca̱x nax cuyange̱xgüxü̃ca̱x i norü duü̃xü̃gü nax nüxü̃ yanacua̱xüü̃güxü̃ca̱x i ngextá ínachianexü̃wa. Natürü i ñu̱xma rü ta tama naga cuxĩnüchaü̃.
17Rü ngẽmaca̱x ya Cori ya Tupana rü ñanagürü cuxü̃: ‘Ñu̱xma rü tá nüxü̃ cudau nax aixcüma Cori ya Tupana chixĩxü̃. Erü Moichéxü̃ chamu nax norü naixmena̱xã yanangexü̃nemaxã ñaa taxtüchíüwa nacua̱i̱xcaãxü̃ca̱x nax ngẽma dexá rü nagüxü̃ yanguxuchixü̃ca̱x.
18Rü ngẽma choxnigü rü tá nayue. Rü ngẽmaãcü i ngẽma dexá rü poraãcü tá nayixchixü. Rü ngẽmaca̱x taxũtáma nawa naxaxegüchaü̃ i ngẽma Equítuanecüã̱xgü’ ” —ñanagürü cuxü̃ ya Tupana.
19Rü yexguma ga Cori ya Tupana rü Moichéxü̃ ñanagürü: —¡Aróü̃maxã nüxü̃ ixu rü nayauxã ya norü naixmena̱xã rü namaxã naxunagü naétügu i natügü rü natüxacügü rü naxtaagü rü dexáchiü̃gü i Equítuanewa ngẽxmagüxü̃ rü guxü̃ma i ta̱xacü i dexá nawa ngẽxmaxü̃ nax nagüxü̃ yanguxuchigüxü̃ca̱x i guxü̃ma i ngẽma dexágü! Rü ngẽma dexápaü̃ i nainaxca̱x rü nutanaxca̱x i dexámaxã ixããcuxü̃ rü tá nagüxü̃ nayanguxuchi —ñanagürü ga Tupana.
20Rü nüma ga Moiché rü Aróü̃, rü yema Cori ya Tupana namuxü̃ãcü nanaxügü. Rü nüma ga Aróü̃ rü nanayaxu ga norü naixmena̱xã rü Faraóü̃pe̱xewa dexáchiüwa namaxã nanacua̱i̱xca. Rü yexgumatama ga dexá rü nagüxü̃ nayanguxuchi.
21Rü nayue ga choxni. Rü poraãcü nanayixãchichixü ga dexá. Rü yemaca̱x ga yema Equítuanecüã̱xgü rü taxuacüma nawa naxaxegü. Rü guxü̃ma ga Equítuanewa rü nagüxü̃ nananguxuchi ga dexá.
22Natürü ga yema Faraóü̃arü duü̃xü̃gü ga iyuüxü̃, rü yexgumarüü̃tama norü yuümaxã nanaxügü. Rü yemaacü yema Cori ya Tupana nüxü̃ ixuxü̃rüxü̃ rü nüma ga Faraóü̃ rü nanuama rü nügü ínanataiãchiarü maxü̃ã̱xẽxẽ rü tama inaxĩnüchaü̃ ga yema Moiché rü Aróü̃ namaxã nüxü̃ ixuxü̃.
23Rü nüma ga Faraóü̃ rü nüxü̃́ nanataxuraxü̃mare ga yema ngupetüxü̃, rü napataca̱x nataegu.
24Rü yema nax taxucürüwa taxtüxü̃chíüwa nax naxaxegüxü̃ca̱x, rü guxü̃ma ga Equítuanecüã̱xgü rü norü puchune ínanaxüxü̃ ga taxtüanacüwa nax yéma naxaxegüxü̃ca̱x.
Tupana rü Faraóü̃ca̱x cururugü ínangugüxẽxẽ
25Rü nawena nax Cori ya Tupana nayaduãchichiüxẽẽãxü̃ ga taxtü ga Níru, rü 7 ga ngunexü̃ nangupetü.
Currently Selected:
Ínachoxü̃xü̃chiga 7: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
