Ínachoxü̃xü̃chiga 6

1Rü nüma ga Cori ya Tupana rü Moichéxü̃ nangãxü̃, rü ñanagürü: —Ñu̱xma rü tá nüxü̃ cudau i ngẽma Faraóü̃maxã tá chaxüxü̃. Erü cho̱xme̱x ya poranemaxã tá guxchaxü̃ naxca̱x íchananguxẽxẽ. Rü ngẽmaãcüxicatama tá nixĩ i chorü duü̃xü̃güxü̃ yangexü̃. Rü nüma rü tá nuãcü nachixü̃anewa ínanamuxü̃ —ñanagürü ga Tupana.

Tupana rü wenaxarü Moichémaxã nidexa

2-3Rü Tupana rü wena Moichémaxã nidexa rü ñanagürü: —Choma nixĩ i Cori ya Tupana chixĩxü̃. Rü Tupana ya Guxü̃étüwa Ngẽxmacü ñaxü̃maxã chaugü chango̱xẽxẽ naxca̱x ga gumá curü o̱xigü ga Abraáü̃ rü Ichaá rü Acóbu. Natürü tama namaxã nüxü̃ chixu ga chauégaxüchi ga Cori ya Tupana ñaxü̃.

4Rü naétü namaxã chanaxü ga wüxi ga uneta. Rü namaxã chanaxuegu nax choma rü tá nüxna chanaxãxü̃ i Canaáü̃arü naane ga nümagü ñuxre ga taunecü nawa namaxẽxü̃ ñoma to ga nachixü̃anecüã̱xrüxü̃

5Rü ñu̱xma nax nüxü̃ chacuáxü̃ nax ñuxãcü ngẽma Iraétanüxü̃ rü ngúxü̃ yangegüxü̃ rü ñuxãcü ngẽma Equítuanecüã̱xgü poraãcü namuxü̃ nax napuracüexü̃ca̱x rü ngẽmaca̱x nüxna chacua̱xãchi ga yema chorü uneta ga perü o̱xigümaxã nüxü̃ chixuxü̃.

6¡Rü ngẽmaca̱x i ñu̱xma rü namaxã nüxü̃ yarüxu i Iraétanüxü̃, rü choma ya Cori ya Tupana rü tá Equítuanecüã̱xme̱xẽwa íchananguxü̃xẽxẽ! Rü ngẽma yáxü̃ i puracügü i Equítuanecüã̱x naétüwa ngẽxmaxẽẽxü̃wa tá íchananguxü̃xẽxẽ. Rü tá ichanawe̱x i chorü pora, rü taxü̃ i ãũcümaxü̃gümaxã tá íchananguxü̃xẽxẽ.

7Rü pexü̃ tá chade nax chorü duü̃xü̃gü pixĩgüxü̃ca̱x. Rü choma tá nixĩ i perü Tupana chixĩxü̃. Rü ngẽmawa tá nüxü̃ pecua̱x nax choma ya perü Cori ya Tupana yixĩxü̃ i pexü̃ íchanguxü̃xẽẽxü̃ nawa ga yema puracügü i yáxü̃ i Equítuanecüã̱xgü peétü nugüxü̃.

8Rü yema naane ga Abraáü̃maxã rü Ichaámaxã rü Acóbumaxã chaxueguxü̃wa tá pexü̃ chagagü rü tá pexna chanaxã nax pexrüxüchi yixĩxü̃ca̱x i ngẽma naane. Rü choma nixĩ i Cori ya Tupana chixĩxü̃ —ñanagürü.

9Rü nüma ga Moiché rü Iraétanüxü̃maxã nüxü̃ nixu ga yema Tupana namaxã nüxü̃ ixuxü̃. Natürü nüma ga Iraétanüxü̃ rü tama naga naxĩnüe yerü tama nataãẽgü nagagu ga yema ngúxü̃ ga yangegüxü̃.

10Rü nüma ga Cori ya Tupana rü wenaxarü Moichémaxã nidexa, rü ñanagürü nüxü̃:

11—¡Ẽcü, Faraóü̃xü̃tawa naxũ rü namaxã nüxü̃ yarüxu rü ínamuxü̃ã i Equítuanewa i ngẽma Iraétanüxü̃! —ñanagürü.

12Natürü ga Moiché rü Cori ya Tupanaxü̃ nangãxü̃, rü ñanagürü: —¿Ñu̱xma nax choxü̃́ naguxchaxü̃ nax mea chidexaxü̃ rü ñuxãcü tá chauga naxĩnü i Faraóü̃ ega woo chautanüxü̃ i Iraétanüxü̃ rü tama chauga naxĩnüegu? —ñanagürü.

13Rü yexguma nüma ga Tupana rü Moichéxü̃ rü Aróü̃xü̃ namu nax Iraétanüxü̃maxã rü Faraóü̃maxã nüxü̃ yaxugüexü̃ca̱x nax Tupanaarü mu yixĩxü̃ nax paxãma Iraétanüxü̃xü̃ ínamuxü̃xü̃ca̱x ga Equítuanewa.

Ñaagü nixĩ ga naégagü ga Aróü̃arü, rü Moichéarü o̱xigü

14Rü ñaagü nixĩ ga naégagü ga yema Iraétanüxü̃arü ãẽ̱xgacügü ga natanüxü̃maxãchigü icuáxü̃. Rü Rubéü̃ ga Iraé nane ga yacü nanegü nixĩ ga Anóx, rü Farú, rü Eróü̃, rü Camí. Rü yemagü nixĩ ga Rubẽü̃tanüxü̃.

15Rü Chimeóü̃ nanegü nixĩ ga Yemué, rü Yamíü̃, rü Oáx, rü Yaquíü̃, rü Chóa, rü Chaú ga Canaáü̃anecüã̱x ngĩne ixĩcü. Rü yemagü nixĩ ga Chimeóü̃tanüxü̃.

16Rü Lebí rü 137 ga taunecü namaxü̃. Rü ñaagü nixĩ ga naégagü ga nanegü ga yamaexü̃wa inaxügü rü bumaexü̃wa nangu: Rü Guerchóü̃, rü Queáx, rü Merarí nixĩgü.

17Rü Guerchóü̃ nanegü rü Lixní, rü Chimí nixĩgü. Rü yemagü rü natanüxü̃maxã inacuáchigü.

18Rü nüma ga Queáx rü 133 ga taunecü nixĩ ga namaxü̃xü̃. Rü Queáx nanegü rü Amráü̃, rü Ichá, rü Ebróü̃, rü Uchié nixĩgü.

19Rü Merarí nanegü rü Mári, rü Muchí nixĩgü. Rü yema nixĩ ga Lebítanüxü̃ ga yamaexü̃wa inaxügü rü bumaexü̃wa nangu.

20Rü Amráü̃ rü natücü ga Yocabémaxã naxãxma̱x. Rü ngĩma ga Yocabé rü namaxã ixãxacü ga Aróü̃, rü Moiché. Rü nüma ga Amráü̃ rü 137 ga taunecü nixĩ ga namaxü̃xü̃.

21Rü Ichá nanegü rü Coré, rü Néfex, rü Chicrí nixĩgü.

22Rü Uchié nanegü rü Michaé, rü Echapáü̃, rü Chitrí nixĩgü.

23Rü nüma ga Aróü̃ rü Erichebámaxã naxãxma̱x. Rü ngĩma ga Erichebá rü Aminadáxacü iyaxĩ, rü Nachóü̃eya̱x iyaxĩ. Rü namaxã ixãxacü ga Nadáx, rü Abiú, rü Ereachá, rü ñu̱xũchi Itamá.

24Rü Coré nanegü rü Achí, rü Ercaná, rü Abiachá nixĩgü. Rü yemagü nixĩ ga Corétanüxü̃.

25Rü nüma ga Aróü̃ nane ga Ereachá rü Putiéxacümaxã naxãxma̱x. Rü ngĩma rü namaxã ixãxacü ga Fineéx. Rü yemagü nixĩ ga namaxã icua̱xgüxü̃ ga wüxichigü ga Lebítanüxü̃tücumü.

26Rü gumá Aróü̃xü̃tama rü Moichéxü̃tama nixĩ ga Cori ya Tupana nüxü̃ unetagüxü̃ nax Equítuanewa Iraétanüxü̃xü̃ ínanguxü̃xẽẽxü̃ca̱x ñoma churaragü i meama nügü inuxü̃rüxü̃ãcü.

27Rü nümatama ga Moiché rü Aróü̃ nixĩ ga Equítuarü ãẽ̱xgacü ga Faraóü̃maxã yadexagüxü̃ nax Iraétanüxü̃xü̃ ínamuxü̃xü̃ca̱x ga Equítuanewa.

Tupana rü Moichémaxã rü Aróü̃maxã nidexa

28-29Rü yema ngunexü̃ ga Equítuanewa Moichémaxã yadexaxgu ga Cori ya Tupana rü ñanagürü: —Choma nixĩ ya Tupana chixĩxü̃. Rü guxü̃ma i ngẽma tá cumaxã nüxü̃ chixuxü̃ ¡rü Equítuanearü ãẽ̱xgacü i Faraóü̃maxã nüxü̃ ixu! —ñanagürü.

30Natürü nüma ga Moiché rü nanangãxü̃ rü ñanagürü: —Pa Corix, choma nax tama mea dexaxü̃ chacuáxü̃ ¿rü ñuxãcü tá i chauga naxĩnüxü̃ i Faraóü̃? —ñanagürü.

Currently Selected:

Ínachoxü̃xü̃chiga 6: tcaP

Highlight

Copy