Ínachoxü̃xü̃chiga 39
39
Chacherdótegüchiru
(Éx. 28.1-43)
1Rü yema naxchiru ga Tupanapataarü puracütanüxü̃ca̱x nangaixgüxü̃ rü carnéruta̱xa ga waxracharaxü̃wa rü yáuxcharaxü̃wa rü dauxcharaxü̃wa nixĩ ga nanga̱i̱xgüaxü̃. Rü nanaxügü ta ga yema naxchiru ga Aróü̃ca̱xicatama ixĩxü̃, yema Cori ya Tupana Moichémaxã nüxü̃ ixuxü̃ãcüma.
2-3Rü yema efóx nawa naxügüxü̃ rü carnéruta̱xa ga waxracharaxü̃ rü yáuxcharaxü̃ rü daucharaxü̃ rü línuchi nixĩ ga nawa nanga̱i̱xgüaxü̃. Rü ñu̱xũchi martiyumaxã nayapomütachinügü ga úiru rü tünütaãcü inanawícu nax yemamaxã nanga̱xãẽpechinüaxü̃ca̱x ga yema naxpü ga waxracharaxü̃ rü yáuxcharaxü̃ rü daucharaxü̃ rü naxpü ga línuchinaxca̱x.
4Rü yema efóx rü taxre ga natü̱xü nüxü̃́ nayexma nax naatüwa nachopetügüxü̃ca̱x. Rü yema natü̱xügüpe̱xegü rü efóxwa ninga̱i̱xcuchi.
5Rü yema efóxarü tairuxü̃ ga goyexü̃, rü naxpü ga waxracharaxü̃wa rü yáuxcharaxü̃wa rü dauxcharaxü̃wa rü naxpü ga línuchinaxca̱xwa nixĩ ga naxüxü̃. Rü úirumaxã nananga̱xãxẽ yema Cori ya Tupana Moichémaxã nüxü̃ ixuxü̃ãcüma.
6Rü guma nutagü ga cornalina rü tairuü̃gü ga úirunaxca̱xwa nanucu. Rü guma nutagügu nanaxümatü ga naégagü ga yema Iraé nanegü ñoma wüxi ga cua̱xruxü̃gu naxümatüxü̃rüxü̃.
7Rü ñu̱xũchi nüma ga Becharé rü yema efóxtü̱xüwa nananucu ga guma nutagü nax yemawa duü̃xü̃gü nüxna cua̱xãchiexü̃ca̱x ga yema 12 ga Iraé nanegü, yema Cori ya Tupana Moichémaxã nüxü̃ ixuãcüma.
8Rü norü türemüxü̃ rü yema efóxrüxü̃ úirumaxã nanga̱xãẽpechinü. Rü naxpü ga waxracharaxü̃wa rü yáuxcharaxü̃wa rü dauxcharaxü̃wa rü naxpü ga línuchinaxca̱xwa nixĩ ga naxüxü̃.
9Rü ínanapoxõchi, rü nawüxigumare ga nacüwagü. Rü yema wüxicüwachigü rü 22 chentímetru nüxü̃́ nayexma.
10Rü yema türemüxü̃ rü ãgümücüchimüxü̃ ga nutaxacügü ga imexẽchicümaxã nanga̱xãẽ. Rü yema nüxíraxü̃xü̃ ga itoxchimüü̃wa rü nutaxacügü ga rubí rü crichólitu rü esmeráda nixĩ.
11Rü yema norü taxrechimüü̃wa rü nutaxacügü ga granate rü zafíru rü yáde nixĩ.
12Rü yema norü tomaepü̱xchimüü̃wa rü nutaxacügü ya yachĩ́tu rü ágata rü amatísta nixĩ.
13Rü yema norü ãgümücüchimüü̃wa rü nutaxacügü ga topáchiu rü cornalina rü yáspe nixĩ. Rü guma nutaxacüarü tairuü̃gü rü úirunaxca̱x nixĩ.
14Rü guma nutaxacügü rü 12 nixĩ, naxẽ̱xpü̱x ga yema 12 ga yema Iraé nanegü. Rü wüxichigü ya nutaxacügu ñoma wüxi ga cua̱xruxü̃gu ümatüxü̃rüxü̃ naxümatü ga wüxichigü ga naéga ga yema 12 tücumü ga Iraétanüxü̃.
15Rü yema türemüxü̃ca̱x nanamunütagü ga taxre ga cadénaxacü ga úirunaxca̱x.
16Rü ñu̱xũchi nanaxügü ta ga taxre ga cadénaarü taixruxü̃gü ga úirunaxca̱x. Rü yexgumarüxü̃ ta nanaxü ga taxre ga naxmachinügü ga úirunaxca̱x. Rü yema naxmachinügü ga úirunaxca̱x rü yema türemüxü̃pe̱xegü ga dauxü̃waama ügüxü̃wa nananucu.
17Rü guma cadénaxacügü ga úirunaxca̱x rü yema türemüxü̃arü naxmachinügügu nanachogü.
18Rü yema norü tope̱xe ga guma taxre ga cadénaxacügü rü yema efóxtü̱xügü ga nape̱xewa yexmagüxü̃ ga tairuü̃gügu nanachogü.
19Rü nanaxü ta ga to ga taxre ga naxmachinügü ga úirunaxca̱x rü yema türemüxü̃pe̱xe ga ñaxtüwaama ügüxü̃wa nananucu. Rü yema napechinügü ga aixepewaama ügüxü̃ ga efóxna íyaxũxü̃waama nananucu ga yema naxmachinügü.
20Rü nanaxü ta ga to ga taxre ga naxmachinügü ga úirunaxca̱x. Rü yema efóxtü̱xüpe̱xearü ñaxtüwaama nananucu ga yema naxmachinügü, naxü̃tawa ga norü nga̱i̱x ga efóxarü goyexü̃arü dauxü̃waamaxüra.
21Rü wüxi ga tünüta ga yáuxranütane ga carnéruta̱xanaxca̱xmaxã nügüwa nayana̱i̱xgü ga yema naxmachinügü ga türemüxü̃wa yexmaxü̃ namaxã ga yema naxmachinügü ga efóxwa yexmaxü̃ nax tama efóxna yachü̱xüxãchixü̃ca̱x ga yema türemüxü̃. Rü yemaacü nixĩ ga Cori ya Tupana Moichémaxã nüxü̃ yaxuxü̃.
22Rü yema mámüxü̃ ga naxchiru ga efóxtüü̃waama üxü̃ rü yauracharaxü̃ ga naxpüwa naxü.
23Rü meama norü ngãxü̃müwa nayango̱xnaxẽxẽ naeruchica. Rü yema nanaxãpechinü rü meama nanangáixpechinü nax tama nagáuxü̃ca̱x.
24Rü yema mámüxü̃ ga naxchiru rü nananga̱xãẽpechinü namaxã ga ibopüxüxü̃gü ga waxracharaxü̃ rü yáuxcharaxü̃ rü daucharaxü̃ ga naxpünaxca̱x rü línuchinaxca̱x.
25-26Rü ñu̱xũchi úiruwa campanaxacügü naxügü. Rü yema campanaxacügü rü ibopüxüxü̃gümaxã nayaxümücüchigü. Rü yemamaxã nananga̱xãẽpechinü ga yema mámüxü̃ ga naxchiru ga nagu yacúxü̃ ga chacherdóte ga yexguma Tupanaarü puracü naxü̱xgu, yema Cori ya Tupana Moichémaxã nüxü̃ ixuxü̃ãcüma.
27Rü yema Aróü̃chiru rü ñu̱xũchi yema nanegüchiru ga línuchinaxca̱x, rü wüxi ga duü̃xü̃ ga naxchiruarü muxü̃ cuáxü̃ nixĩ ga ínaxüxü̃ãxü̃.
28Rü yexgumarüxü̃ ta ga yema napate̱xe rü yema norü goyecatüruü̃gü rü natüü̃chiruparagü, rü línuchiwa nixĩ ga ínaxüxü̃ãxü̃.
29Rü yema norü goyexü̃ rü línuchinaxca̱x nixĩ. Rü tü ga waxranütanemaxã rü yauxnütanemaxã, rü daunütanemaxã nananga̱xãẽ, yema Cori ya Tupana Moichémaxã nüxü̃ ixuxü̃ãcüma.
30Rü yexgumarüxü̃ ta nanaxügü ga yema úirutachinü ga üünexü̃. Rü ñoma wüxi ga cua̱xruxü̃gu naxümatüxü̃rüxü̃ yemagu nanaxümatü ga ore ga ñaxü̃: Tupana Nüxü̃ Unetacü ñaxü̃.
31Yemawena rü wüxi ga waxranütane ga tünütamaxã nanaxütü̱xü ga yema úirutachinü nax yemaacü yema napate̱xecatüwaama yangacuchixãxü̃ca̱x, yema Cori ya Tupana Moichémaxã nüxü̃ ixuxü̃ãcüma.
Ningu ga Tupanapata
(Éx. 35.10-19)
32Rü marü ningu nax naxügüãxü̃ ga guma Tupanapata ga nawa Tupanaca̱x naxĩĩxü̃ne. Yema Iraétanüxü̃ rü meama nanaxügü ga guxü̃ma, yema Cori ya Tupana Moichémaxã nüxü̃ ixuxü̃ãcüma.
33-34Rü ñu̱xũchi Moichéna nanana ga guxü̃ma ga yemaxü̃gü ga namaxã tá naxüxü̃ ga guma Tupanapata ga naã̱xtüwa Tupanaca̱x naxĩĩxü̃ne. Rü ñaagü nixĩ ga norü taixruxü̃gü, rü mürapewagü, rü mürapewapawerugü, rü caxtagü, rü caxtachipatügü, rü naaxü̃gü ga carnérucha̱xmüxü̃ ga idautáchinüxü̃, rü naaxü̃ ga imexẽchixü̃ ga naxcha̱xmüü̃naxca̱x, rü yema norü tüyemachiãruxü̃ ga natüpe̱xexü̃ ga yema baú ga Tupanaarü mugüchixü̃.
35Rü yexgumarüxü̃ ta Moichéna nanaxãgü ga yema Tupanaarü mugüchixü̃ ga baú namaxã ga naxpawerugü rü naxã́taxü̃.
36Rü nüxna nanaxãgü ta ga yema mecha ga paũ nagu nuxü̃ namaxã ga guxü̃ma ga norü yemaxü̃gü, rü yema paũ ga Tupanaca̱x íxüxüchixü̃.
37Rü yexgumarüxü̃ ta nüxna nanaxãgü ga yema úirunaxca̱x ga omüpaweru rü norü omügü ga meama ínuxü̃ rü guxü̃ma ga norü yemaxü̃gü rü norü chíxü̃ nax yana̱i̱xgüxü̃ca̱x.
38Rü nüxna nanaxã ta ga yema úirunaxca̱x ga mecha ga pumaraarü guruxü̃ rü ñu̱xũchi yema chíxü̃ ga baeruruxü̃ rü yema pumarate̱xe ga paacaxüchixü̃ rü yema Tupanapataarü ĩã̱xarü tüã̱xruxü̃.
39Rü ñu̱xũchi nüxna nanaxãgü ta ga yema ãmarearü guruxü̃ ga bróũchenaxca̱x namaxã ga norü ünagüchicaxü̃ ga bróũchenaxca̱x rü naxpawerugü rü guxü̃ma ga yema ãmarearü guruü̃arü yemaxü̃gü rü gumá bachía namaxã ga norü ünagüchicaxü̃.
40Rü ñu̱xũchi nüxna nanana ga yema naxpütachinügü ga ĩã̱xtüarü poxeguruxü̃ rü norü caxtagü rü norü caxtachipatügü rü norü ĩã̱xarü türuxü̃ rü yema nacunagü ga guma ĩã̱xtüarü caxtagü rü norü tairuü̃gü. Rü yexgumarüxü̃ ta nüxna nanana ga guxü̃ma ga toomachigü ga norü yemaxü̃gü ga guma Tupanapata ga nawa Tupanaca̱x naxĩĩxü̃ne.
41Rü nüxna nanana ta ga yema naxchirugü ga chacherdótegü nagu icu̱xgüxü̃ ga yexguma naxügüãgu ga yema puracü ga Tupana nagu namugüxü̃ ga napatawa, rü yema naxchiru ga chacherdóte ga Aróü̃xicatama nagu icúxü̃, rü yema naxchiru ga nagu yacu̱xgüxü̃ ga nanegü ga yexguma naxügüãgu ga yema puracü ga Tupana nagu namugüxü̃.
42Rü nüma ga Iraétanüxü̃ rü nanaxügü ga guxü̃ma ga yema Cori ya Tupana Moichémaxã nüxü̃ ixuxü̃.
43Rü yexguma Moiché nüxü̃ da̱u̱xgu nax meama yanguxẽẽgüãxü̃ ga yema Tupana namaxã nüxü̃ ixuxü̃, rü nüma ga Moiché rü duü̃xü̃gümaxã mexü̃ naxuegu.
Currently Selected:
Ínachoxü̃xü̃chiga 39: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
