Ínachoxü̃xü̃chiga 38
38
Nanaxügü ga ãmarearü guruxü̃ ga bróũchenaxca̱x
(Éx. 27.1-8)
1Rü nüma ga Becharé rü acáchianaxca̱x nanaxü ga ãmarearü guruxü̃. Rü norü guruü̃cüwagü rü nawüxigumare ga norü tatachinü. Rü wüxichigü rü 2 metru rü naétü 25 chentímetru nixĩ ga norü tatachinü. Rü norü máxchane rü wüxi ga metru rü naétü 25 chentímetru nixĩ.
2Rü yema ãgümücü ga nacüwagüpe̱xe ga dauxnawaama rütonüxü̃, rü naxü̃newatama ne nadagü. Rü bróũchemaxã nitüpe̱xe.
3Rü ínanaxüxü̃ ta ga norü yemaxü̃gü ga yema ãmarearü guruxü̃. Rü yemagü nixĩ ga tanimacapáü̃gü, rü paragü, rü tacháũgü, rü choxchataü̃gü, rü ã́xwepáxü̃gü.
4Rü nanaxü ta ga wüxi ga naxta̱xmüxü̃ ga bróũchenaxca̱x. Rü yema rü ãmarearü guruü̃arü ngãxü̃wa nayaxücuchi naberaarü ñaxtüwaama.
5Rü yema naxta̱xmüxü̃ ga bróũchenaxca̱xpe̱xeca̱x nanaxü ta ga ãgümücü ga naxmachinügü nax yemawa nawe̱xpetügüxü̃ca̱x ga naxpawerugü ga norü ngetaxü̃ruxü̃.
6Rü ñu̱xũchi acáchianaxca̱x nanaxü ga naxpawerugü ga yema ãmarearü guruü̃arü ngetaxü̃ruxü̃. Rü bróũchemaxã nayatügümena̱xã.
7Rü yema ãmarearü guruü̃arü taxrecüwawa yexmagüxü̃ ga naxmachinüwa nanawe̱xcu ga guma naxpawerugü nax yemamaxã tóxnamana nangegüãxü̃ca̱x. Rü yema ãmarearü guruxü̃ rü mürapewawa nanaxü, rü ningóxpetümare.
Nanaxü ga bachía ga bróũchenaxca̱x
(Éx. 30.18)
8Rü yema ngexü̃gü ga Tupanapataã̱xwa puracüexü̃arü woruagü ga bróũchenaxca̱xwa Becharé nanaxü ga gumá bachía ga ya̱u̱xme̱xü̃páxü̃ rü yema norü ünagüchicaxü̃. Rü yema rü ta rü bróũchenaxca̱x nixĩ.
Naa̱xtü ga Tupanapata
(Éx. 27.9-19)
9Rü nüma ga Becharé rü nanaxü ga naxã̱xtü ga Tupanapata. Rü yema norü súrcüwawaama üxü̃ ga norü poxeguxü̃ rü 45 metru nüxü̃́ nayexma. Rü línutachinünaxca̱x nixĩ.
10Rü guma 20 ga norü caxtagü rü yema 20 ga nachipatügü rü bróũchenaxca̱x nixĩgü. Rü yema norü choruü̃gü rü yema naxmachinügü rü diẽrumünaxca̱x nixĩgü.
11Rü yema norü nórtecüwawaama üxü̃ ga norü poxeguxü̃ rü 45 metru nüxü̃́ nayexma. Rü línutachinünaxca̱x nixĩ. Rü guma 20 ga norü caxtagü rü yema 20 ga nachipatügü rü bróũchenaxca̱x nixĩgü. Rü yema norü choruü̃gü rü yema naxmachinügü rü diẽrumünaxca̱x nixĩgü.
12Rü yema norü éstecüwawaama üxü̃ ga poxeguxü̃táchinü rü 22 metru rü naétü ngãxü̃ ga metru nüxü̃́ nayexma. Rü nüxü̃́ nayexma ga 10 ga norü caxtagü rü 10 ga nachipatügü. Rü yema norü choruü̃gü rü naxmachinügü rü diẽrumünaxca̱x nixĩgü.
13Rü yexgumarüxü̃ ta ga yema norü éstecüwawaama üxü̃ ga poxeguxü̃táchinü, rü 22 metru rü naétü ngãxü̃ ga metru nüxü̃́ nayexma.
14Rü yema naã̱xtüarü ĩã̱x rü norü wüxicüwawa nayexma ga 7 metru naguxü̃ ga norü poxeguxü̃táchinü. Rü nüxü̃́ nayexma ga tomaepü̱x ga norü caxtagü rü tomaepü̱x ga nachipatügü.
15Rü yema norü ĩã̱xarü tocüwawa nayexma ga 7 metru naguxü̃ ga norü poxeguxü̃táchinü. Rü nüxü̃́ nayexma ga tomaepü̱x ga norü caxtagü rü tomaepü̱x ga nachipatügü.
16Rü guxü̃ma ga yema naã̱xtüarü poxeguxü̃táchinü rü línuchinaxca̱x nixĩ.
17Rü bróũchewa ínanaxüxü̃ ga nachipatügü ga guma caxtagü. Rü diẽrumüwa ínanaxüxü̃ ga yema choruxü̃gü ga caxtatape̱xewa ngucuxü̃ rü yema naxmachinügü. Rü guxü̃nema ga guma caxtagü rü nüxü̃́ nayexma ga naxmachinügü ga diẽrumünaxca̱x.
18Rü yema naã̱xtüarü tüã̱xruxü̃ rü naxpü ga waxracharaxü̃ rü naxpü ga yáuxcharaxü̃ rü naxpü ga daucharaxü̃ rü naxpü ga línuchinaxca̱x nixĩ. Rü meama nixümatütachinü norü nga̱xãẽruxü̃. Rü 9 metru nixĩ ga norü tatachinüchara rü taxre ga metru rü naétü 25 chentímetru nixĩ ga norü máchara. Rü yema naã̱xtüarü poxeguxü̃arü mácharaacütama nixüchara ga yema tüã̱xruxü̃.
19Rü yema naã̱xtüarü tüã̱xruxü̃ nüxü̃́ nayexma ga ãgümücü ga norü caxtagü rü ãgümücü ga nachipatügü ga bróũchenaxca̱x. Rü yema norü choruü̃gü rü naxmachinügü rü diẽrumünaxca̱x nixĩgü. Rü diẽrumümaxã nitütape̱xe ga guma caxtagü.
20Rü guxü̃ma ga yema Tupanapatacuna nagu ngagüxü̃ rü naã̱xtüarü poxeguü̃cunü nagu ngagüxü̃ ga tairuü̃gü rü bróũchenaxca̱x nixĩgü.
Úiru rü diẽrumü rü bróũche ga Tupanapata namaxã naxügüxü̃
21Rü nüma ga Moiché rü yema Lebítanüxü̃xü̃ namu nax yawǘgüãxü̃ca̱x nax ñuxre ga quíru yixĩxü̃ ga yema úiru rü diẽrumü rü bróũche ga Tupanapata namaxã naxügüxü̃. Rü Aróü̃ nane ga chacherdóte ga Itamá nixĩ ga yema Lebítanüxü̃maxã icuáxü̃.
22Rü nüma ga Yudátanüxü̃ ga Becharé ga Urí nane ga Úru nataxa nixĩ ga naxüxü̃ ga guxü̃ma ga yema Cori ya Tupana Moichéxü̃ muxü̃ nax naxüaxü̃.
23Rü Becharéarü ngü̃xẽẽruxü̃ nixĩ ga Dáü̃tanüxü̃ ga Aoriáx ga Aichamá nane. Rü nüma ga Aoriáx rü meama nüxü̃ nacua̱x nax úiruwa rü diẽrumüwa rü bróũchewa naxüaxü̃ ga meruü̃gü. Rü nüxü̃ nacua̱x ta nax ta̱xacü namuxü̃ rü naxümatüaxü̃ ga naxpütachinü ga waxracharaxü̃ rü yáuxcharaxü̃ rü daucharaxü̃ rü línutachinü ga mexechixü̃.
24Rü guxü̃ma ga yema úiru ga Tupanapataarü yemaxü̃gü namaxã naxügüxü̃ rü yema nixĩ duü̃xü̃gü norü ngúchaü̃maxã Tupanaca̱x ixãgüxü̃. Rü yexguma Tupanapataarü yáruü̃wa ínangugüãgu rü 965 quíru rü naétü 30 gramu nixĩ ga norü ya.
25Rü yema diẽrumü ga nayauxgüxü̃ ga yexguma Iraétanüxü̃xü̃ yaxugügügu rü 3,319 quíru rü naétü 525 gramu nixĩ ga norü ya ga yexguma Tupanapataarü yáruü̃wa ínangugüãgu.
26Rü guxü̃ma ga yema Iraétanüxü̃ ga 20 ga taunecü rüe̱xna yexera nüxü̃́ yexmagüxü̃ ga yexguma yaxugügüãgu rü 603,550 nixĩ ga norü mu. Rü wüxichigü ga yema duü̃xü̃gü rü inanaxãgü ga 5 gramu rü naétü ngãxü̃ ga gramu ga diẽrumü ga yexguma Tupanapataarü yáruü̃wa ínangugüãgu.
27Rü nayexma ta ga 3,300 quíru ga diẽrumü ga inadexẽẽgüxü̃ nax naxügüãxü̃ ga Tupanapataarü caxtagüchipatügü rü yema norü tüyemachiãruü̃arü caxtachipatügü. Rü guxü̃ma ga yema diẽrumü nixĩ ga nagu ücuxü̃ ga yema 100 ga caxtachipatügü. Rü wüxichigü ga caxtachipatügu naxücu ga tomaepü̱x quíru ga diẽrumü.
28Rü yema íyaxüxü̃ ga diẽrumü ga Iraégütanüwa nayauxgüxü̃wa nixĩ ga Becharé naxüxü̃ ga yema caxtawa nanucuxü̃ ga choruü̃gü rü yema natape̱xearü tüétüruü̃gü rü naxmachinügü.
29Rü yema bróũche ga Cori ya Tupanaxü̃ namaxã naxãmareã̱xgüxü̃ ga Iraétanüxü̃ rü 2,336 quíru rü naétü 400 gramu nixĩ.
30Rü yema bróũchewa nixĩ ga naxügüãxü̃ ga guma Tupanapataarü ĩã̱xarü caxtagüchipatügü. Rü yemawa ta nixĩ ga naxügüãxü̃ ga ãmarearü guruxü̃ ga bróũchenaxca̱x, rü yema naxta̱xmüxü̃ ga bróũchenaxca̱x, rü ñu̱xũchi guxü̃ma ga togüamachigü ga norü yemaxü̃gü ga ãmarearü guruxü̃.
31Rü yema bróũchewa ta nixĩ ga naxügüãxü̃ ga Tupanapataa̱xtüarü poxeguxü̃arü caxtachipatügü rü yema tairuü̃gü ga Tupanapataa̱xtüarü nagu ngagüxü̃ rü naã̱xtüarü ĩã̱xarü caxtachipatügü.
Currently Selected:
Ínachoxü̃xü̃chiga 38: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
