Ínachoxü̃xü̃chiga 30

Pumarate̱xearü guruü̃chiga

(Éx. 37.25-28)

1Rü nüma ga Cori ya Tupana rü ñanagürü: —Rü ngẽxgumarüxü̃ ta acáchianaxca̱x i mürapewa naxü i pumarate̱xearü guruxü̃!

2Rü norü ma̱x rü norü tatachinü rü tá nawüxigumare, rü 45 chentímetru tá nixĩ. Rü norü máchane rü 90 chentímetru tá nixĩ. Rü ngẽma nacüwape̱xegü i ngẽma pumarate̱xearü guruxü̃ rü nawa tátama cunaxüxüchigü.

3Rü naétüwaama rü ngẽma norü ãgümücü i nacüwawa rü ngẽma norü ãgümücüpe̱xewa rü úirumaxã tá cunatü. Rü úirumaxã tá ícunaxüã́ẽgupechinü.

4¡Rü ñu̱xũchi ngẽma naberape̱xetüxü̃wa nanuxcu i naxmachinügü i úirunaxca̱x ixĩgüxü̃, rü taxrechigü i wüxicüwawa rü ñu̱xũchi taxre ta i norü tocüwawa, nax ngẽmaãcü ngéma nawe̱xpetüxü̃ca̱x ya yima naxpawerugü ya namaxã yangetaxü̃ne!

5¡Rü acáchianaxca̱x naxü ya yima naxpaweru norü ngetaxü̃ruxü̃, rü ñu̱xũchi úirumaxã yatümena̱xã!

6¡Ngẽmawena rü ngẽma tüyemachiãruxü̃ i ngéma baú i mugüchixü̃ namaxã tüyepe̱xexü̃arü düxétüguama naxü i ngẽma pumarate̱xearü guruxü̃, norü we̱xgu i ngẽma baú rü naxã́taxü̃! Rü ngéma tá nixĩ i cumaxã chidexaxü̃.

7Rü guxü̃ma i pa̱xmama i ngẽma ora i omügü nagu yamexẽẽchiraxü̃gu, rü nüma i Aróü̃ rü ngẽma pumaraarü guruü̃wa tá nayagute̱xe i pumara i yixichixü̃.

8Rü ñu̱xũchi yáuanecü ngẽma ora i omügü nagu yananaigüxẽẽxü̃gu rü ngẽmaãcü tátama nanaxü i Aróü̃. Rü ngẽma tá guxü̃gutáma gucü ya taunecügu chope̱xewa nanaxü i Aróü̃taagü.

9Rü ngẽma pumarate̱xearü guruü̃wa rü taxuxü̃táma i tomare i pumarate̱xegü nawa pigu, rü woo naxü̃nagü, rü woo trigute̱xegü, rüe̱xna bínu ngẽxma cuba.

10Rü ngẽma naxü̃nagüarü guruxü̃ i chopataarü düxétüwa ngẽxmaxü̃ rü aixcüma tá cha̱u̱xca̱xicatama nixĩ. Rü wüxichigü ya taunecügu rü wüxicanatama ngẽma norü ãgümücüpe̱xegu i ngẽma ãmarearü guruxü̃ tá yimá ãmarearü nagü ngẽxma nipiichi i Aróü̃ nax ngẽmaãcü nüxü̃́ nüxü̃ ichayarüngü̃maxü̃ca̱x i duü̃xü̃güarü pecadugü. Rü ngẽmaãcü guxcüma ya taunecügu rü wüxicanatama ngẽma ãmarearü guruü̃pe̱xegu tá ãmarearü nagü ngẽxma nipiichi i Aróü̃ nax ngẽmaãcü nüxü̃́ nüxü̃ ichayarüngü̃maxü̃ca̱x i duü̃xü̃güarü pecadugü —ñanagürü.

Diẽru i maxü̃tanü

11-12Rü nüma ga Cori ya Tupana rü ñanagürü: —Ngẽxguma cuyaxugügu i Iraétanüxü̃ rü chanaxwa̱xe i wüxichigü diẽru choxna tüxü̃ naxãgü nax ngẽmaãcü naxütanügüãxü̃ca̱x i norü maxü̃ rü ñu̱xũchi nax nataxuxü̃ca̱x i da̱xaweane i nawa iyuxü̃ nagagu nax cuyaxugüxü̃.

13Rü guxü̃ma i ngẽma iwǘgüxü̃ rü choxna tá nanaxãgü i 5 gramu naguxü̃ i diẽrumü. Rü ngẽma nixĩ i norü ngãxü̃ i natanü i a̱i̱xrüguma chopataca̱x pexütanüxü̃.

14Rü guxü̃ma i ngẽma iwǘgüxü̃ i 20 ya taunecü nüxü̃́ ngẽxmagüxü̃ rüe̱xna yexera nüxü̃́ ngẽxmagüxü̃ rü ngẽxgumaepü̱x tátama choxna naxãgü.

15Rü ngẽxguma choxna naxãgüãgu i ngẽma diẽru i norü maxü̃tanügü, rü ngẽma muarü diẽruã́xü̃ rü taxũtáma 5 gramuarü yexera naguxü̃ i diẽrumü tá inaxã. Rü woo ngẽma ngearü diẽruã́xü̃ rü taxũtáma 5 gramuxü̃ rüxíxramaexü̃ i diẽrumü inaxã.

16Rü ngẽmaãcü tá cunade i diẽrumü i Iraétanüxü̃ inaxãgüxü̃ norü maxü̃ca̱x. Rü ñu̱xũchi i cuma rü chopataarü puracüca̱x tá icunaxã. Rü ngẽmawa i choma ya Cori ya Tupana rü tá Iraétanüxü̃na chacua̱xãchi nax norü maxü̃ca̱x ngẽma diẽrumü inaxãgüxü̃ —ñanagürü.

Bachía ya bróũchenaxca̱x

(Éx. 38.8)

17Rü yexguma ga nüma ga Cori ya Tupana rü nayadaxẽxẽ ga Moichémaxã nax yadexaxü̃, rü ñanagürü nüxü̃:

18—¡Rü naxü ya wüxi ya bachía ya ya̱u̱xme̱xü̃páxü̃ i bróũchenaxca̱x! Rü ngẽma norü ünagüchicaxü̃ rü naxrüxü̃ bróũchenaxca̱x tá nixĩ. Rü yima chopata rü ngẽma ãmarearü guruü̃arü ngãxü̃gu tá cunaxǘ ya yimá bachía. Rü dexámaxã tá cunaxüãcu.

19Rü nüma ya Aróü̃ rü nanegü rü ngéma tá nixĩ i dexá tá inayauxgüxü̃ nax ngẽmawa naya̱u̱xcutügüxü̃ca̱x rü naya̱u̱xme̱xgüxü̃ca̱x.

20-21Rü ngẽxguma chopatagu nachocugu, rü ngẽxguma cha̱u̱xca̱x ínaguãgu i ãmaregü rü tá nügü naya̱u̱xcutügü rü nügü naya̱u̱xme̱xgü nax tama nayuexü̃ca̱x. Rü ngẽma nixĩ i wüxi i mu i guxü̃gutáma nagu naxĩxü̃ ya Aróü̃ rü nataagü —ñanagürü ga Tupana.

Chíxü̃ i baeruruxü̃

(Éx. 37.29)

22Rü nüma ga Cori ya Tupana rü wena Moichémaxã nidexa, rü ñanagürü nüxü̃:

23-24—¡Yadexechi i ngẽma rüpaacamaegüxü̃ i nanetügü! ¡Rü nanetü i mirawa nayaxu i 6 quíru i nagü, rü nanetü i canelawa nayaxu i 3 quíru i naxcha̱xmü, rü nanetü i dexne i paacaxü̃wa nayaxu i 3 quíru i natüxü̃, rü nanetü i cáchiawa nayaxu i 6 quíru i naxcha̱xmü! Rü chopataarü yáruxü̃maxã tá icunayá i guxü̃ma i ngẽma. ¡Rü nayaxu i 3 litruarü ngãxü̃ i oribuarü chíxü̃!

25¡Rü guxü̃ma i ngẽmawa naxü i ngẽma chíxü̃ i üünexü̃ i baeruruxü̃, ngẽma pumaraarü üruxü̃ norü pumara üxü̃ãcü! Rü ngẽma tá nixĩ i chíxü̃ i üünexü̃ i baeruruxü̃.

26-28Rü ngẽmamaxã tá nixĩ i cunabaétüxü̃ ya yima chopata ya nawa changexmane, rü ngẽma baú i chorü mugü nawa ngẽxmagüxü̃, rü ngẽma mecha namaxã i guxü̃ma i norü ngẽmaxü̃gü, rü ngẽma omüpaweru namaxã i norü ngẽmaxü̃gü, rü ngẽma pumarate̱xearü guruxü̃, rü ngẽma ãmarearü guruxü̃ namaxã i guxü̃ma i norü ngẽmaxü̃gü, rü yimá bachía namaxã i norü ünagüchicaxü̃.

29Rü ngẽmaãcü tá cuyabaétüxü̃ i ngẽma chopataarü ngẽmaxü̃gü nax yaxüünexü̃ca̱x. Rü ngẽmawena tá nixüüne. Rü ngẽxguma ngexü̃rüüxü̃mare i ta̱xacü nüxna yaxũãchigu rü ngẽma rü tá ta naxüüne.

30¡Rü ngẽxgumarüxü̃ ta rü ngẽma chíxü̃maxã tá cunabaeru i Aróü̃ rü nanegü nax ngẽmaãcü chorü chacherdótegü yixĩgüxü̃ca̱x!

31¡Rü Iraétanüxü̃maxã nüxü̃ ixu i chorü ore i ñaxü̃!: “Rü ngẽma chíxü̃ rü guxü̃gutáma chorü chíxü̃ i üünexü̃ i baeruruxü̃ tá nixĩ.

32¡Rü taxũtáma ngexü̃rüüxü̃ i duü̃xü̃xü̃mare namaxã pebaeru i ngẽma chíxü̃! ¡Rü taxũtáma penaxü i to i chíxü̃ i nangexgumaraxü̃xü̃! Erü ngẽma rü chíxü̃ i üünexü̃ nixĩ rü tama name i nagu pidauxcüraxü̃mare.

33Rü ngẽxguma texé naxü̱xgu i wüxi i chíxü̃ i nangexgumaraxü̃xü̃ rüe̱xna chíxü̃ i üünexü̃maxã ngexerüxexü̃mare tabaerugu rü tá ítamuxũchi i tümatanüxü̃tanüwa” —ñanagürü.

Pumarate̱xechiga

(Éx. 37.29)

34Rü nüma ga Cori ya Tupana rü Moichéxü̃ ñanagürü: —¡Nayaxu i míra, rü uña i paacaxü̃, rü gábanu i paacaxü̃, rü pumarate̱xexüchi! Rü wüxichigü i ngẽma rü tá nawüxigumare i norü yawa.

35¡Rü guxü̃ma i ngẽmawa naxü i ngẽma pumarate̱xe i üünexü̃! ¡Rü wüxigu nagü rü mea nügümaxã naxüexü̃ ngẽma pumaraarü üruxü̃ norü pumara üxü̃acü!

36¡Rü nayaxu i íxraxü̃ i ngẽma pumarate̱xe rü meama naxi̱xchicuxẽxẽ! ¡Rü ngẽma chopatawa ngẽxmaxü̃ i pumarate̱xearü guruü̃étügu naxütaü̃ nape̱xegu i ngẽma baú i chorü mugüchixü̃ i nawa tá cumaxã chidexaxü̃! Rü ngẽma pumarate̱xe tá nixĩ i pexca̱x Üünexüchixü̃.

37¡Rü taxũtáma pegüxü̃́ penaxü i to i pumarate̱xe i nangexgumaraxü̃xü̃! Erü ngẽma pumarate̱xe rü choxrü nixĩ rü ngẽmaca̱x cuxca̱x rü wüxi i üünexü̃ nixĩ.

38Rü ngẽxguma texé naxü̱xgu i wüxi i pumarate̱xe i nangexgumaraxü̃xü̃ nax namaxã tapaacaemaxü̃ca̱x rü tá ítamuxũchi i tümatanüxü̃tanüwa —ñanagürü ga Tupana.

Currently Selected:

Ínachoxü̃xü̃chiga 30: tcaP

Highlight

Copy

Compare