Ité 9
9
Yudíugü rü narüporamaegü
1Rü yema ãẽ̱xgacüarü mu ga Yudíugüétüwa chogüxü̃ rü meama norü 12 ga tauemacü ga Adáguarü 13 ga ngunexü̃gu nangu.#9.1 13 febréru. Rü yematama ngunexü̃ nixĩ ga nanguxchaü̃chiréxü̃ ga Amáü̃arü mu ga Yudíugüarü daixchigaxü̃ ixuxü̃. Natürü tama yema Amáü̃ nagu rüxĩnüxü̃rüxü̃ ínanguxuchi, yerü yema ngunexü̃gu nixĩ ga Yudíugü norü uanügüxü̃ naporamaegüxü̃.
2Rü guxü̃ma ga Achuéruarü naanegüwa rü nüma ga Yudíugü rü guma norü ĩanegüwa nügü ninutaque̱xegüchigü nax naxca̱x itaxüãchixü̃ca̱x ga norü uanügü ga nadaixchaü̃xü̃. Natürü nataxuma ga ngexü̃rüüxü̃ ga norü uanü ga naxca̱x yéma ĩxü̃ nax nadaiaxü̃ca̱x, yerü guxü̃nema ga ĩanewa rü Yudíugüxü̃ namuü̃e.
3Rü ñu̱xũchi yema togü ga nachixü̃anegüarü ãẽ̱xgacügü rü Yudíugüxü̃ narüngü̃xẽẽgü yerü Maduquéuxü̃ namuü̃e.
4Rü nüma ga Maduquéu rü ãẽ̱xgacüpatawa rü ãẽ̱xgacüarü ngü̃xẽẽruxü̃ ga mecü nixĩ. Rü guxü̃ma ga Achuéruchixü̃anegüwa rü nüxü̃ nacuáchigagü. Rü yemaacü wüxichigü ga ngunexü̃gu rü yexeraãcü napora.
5Rü nüma ga Yudíugü rü taramaxã norü uanügüxü̃ nadai, ñu̱xmata nayue ga guxü̃ma ga norü uanügü. Rü nüma nanaxwa̱xegüxü̃ norü uanügümaxã naxügü.
6Rü ĩane ga Chúchawaxicatama rü nanadai ga 500 ga yatügü.
7-9Rü yexma nadai ga yema 10 ga Amáü̃ nanegü ga Pachandáta, rü Darfóü̃, rü Apáta, rü Poráta, rü Adaría, rü Aridáta, rü Parmáta, rü Arichái, rü Aridái, rü ñu̱xũchi Baicháta.
10Rü guxü̃ma ga yemagü rü Amáü̃ ga Yudíugüarü uanü nanegü nixĩgü. Natürü nüma ga Yudíugü rü tama nanade ga yema Amáü̃ nanegüarü yemaxü̃gü. Rü nüma ga Amáü̃ rü Amedáta nane nixĩ.
11-12Rü yexguma ãẽ̱xgacü ga Achuéru nüxü̃ cua̱xgu nax 500 ga Yudíugüarü uanügü nayuexü̃ ga ĩane ga Chúchawa, rü yematama ga ngunexü̃gu rü naxma̱x ga Itémaxã nüxü̃ nixu rü ñanagürü: —Yudíugü rü daa ĩane ya Chúchagu nanadai i 500 i norü uanügü. Rü ngẽxgumarüxü̃ ta nanadai i 10 i Amáü̃ nanegü. Rü ngẽmaétüwa tama nüxü̃ tacua̱x nax ñuxre nada̱i̱xü̃ i ngẽma togü i naanegü i choma namaxã ichacuáxü̃wa. ¿Rü ñu̱xma ta̱xacü i to i cunaxwa̱xexü̃ nax cuxca̱x chanaxüxü̃? ¡Rü choxna naxca̱x naca i ngẽma cuma cunaxwa̱xexü̃ rü choma tá cuxna chanaxã! —ñanagürü.
13Rü yexguma ga ngĩma ga Ité inangãxü̃ rü ngĩgürügü: —Pa Ãẽ̱xgacüx, ngẽxguma marü cuxca̱x namexgu, rü chanaxwa̱xe i moxü̃ rü ngẽma curü mu nüxü̃ ixuxü̃rüxü̃ nanaxügü i ngẽma Yudíugü i Chúchawa maxẽxü̃. Rü chanaxwa̱xe i ngẽma 10 i Amáü̃ nanegü wẽxnaxãruü̃wa natúgüxẽẽãxü̃ i naxü̃negü —ngĩgürügü.
14Rü yexguma nüma ga ãẽ̱xgacü ga Achuéru rü yema naxü. Rü Chúchawa nanaxunagü ga wüxi ga mu nax yemaacü naxügüãxü̃ca̱x. Rü yema 10 ga naxü̃negü ga Amáü̃ nanegü rü wẽxnaxãruü̃wa nanatugüxẽxẽ.
15Rü yema Yudíugü ga Chúchawa maxẽxü̃ rü meama norü 14 ga ngunexü̃gu ga Adáarü tauemacügu rü wenaxarü naxĩtaque̱xe rü yexguma nanadai ga to ga 300 ga norü uanügü, natürü tama nanade ga norü yemaxü̃gü.
16-17Rü yema togü ga Yudíugü ga togü ga Achuéruchixü̃anegüwa yexmagüxü̃ rü tauemacü ga Adáarü 13 ga ngunexü̃gu naxĩtaque̱xe nax yemaacü nügü ínapoxü̃güxü̃ca̱x rü norü uanügüxü̃ nada̱i̱xü̃ca̱x. Rü yema ga ngunexü̃gu rü nanadai ga 75,000 ga norü uanügü, natürü tama nanade ga norü yemaxü̃gü. Rü norü 14 ga ngunexü̃gu rü narüngü̃gü rü taãẽãcüma napetaegü, yerü norü uanügüxü̃ narüporamaegü.
18Natürü ga yema Yudíugü ga ĩane ya Chúchawa yexmagüxü̃ rü naxĩtaque̱xe ga norü 13 rü 14 ga ngunexü̃gu. Rü norü 15 ga ngunexü̃gu narüngü̃gü rü napetaegü rü nataãẽgü.
19Natürü ngẽma Yudíugü i togü i ĩanegüwa rü ĩanexacügüwa maxẽxü̃ rü ñu̱xma rü ta tauemacü i Adáarü 14 i ngunexü̃gu nanaxüchigagü rü nataãẽgü rü ãmare nügüna naxãgü.
20Rü nüma ga Maduquéu rü nanaxümatü nachiga ga yema ngupetüxü̃. Rü ñu̱xũchi guxü̃ma ga Yudíugü ga ngaicamagüxü̃ rü yáxü̃gugüxü̃ ga Achuéruchixü̃anegüwa yexmagüxü̃ca̱x nayamugü ga yema popera.
21-22Rü yema poperawa rü Yudíugümaxã nüxü̃ nixu nax gucü ya taunecügu ga Adáü̃arü tauemacüarü 14 rü 15 ga ngunexü̃gu#9.21-22 14 rü 15 febréru. naxüchigagüãxü̃ca̱x nax yemaacü nüxna nacua̱xãchiexü̃ca̱x ga yema ngunexü̃gü ga nagu norü uanügüme̱xẽwa ínanguxü̃xü̃ ga nümagü ga Yudíugü rü yemaacü ga norü ngechaü̃gü rü norü axu rü taãẽxü̃ yanguxuchixü̃ca̱x. Rü yema poperawa nüxü̃ nixu rü ngẽxguma naxüchigagüãgu rü name nax nügümaxã nataãẽgüxü̃ rü nügümaxã nachibüexü̃ rü ãmare nügüna naxãgüxü̃ rü diẽru ngĩxü̃ nanutaque̱xegüxü̃ tümaca̱x ya guxema ngearü diẽruã̱xgüxe.
23Rü nüma ga Yudíugü rü nayanguxẽẽgü ga yema Maduquéu ümatüxü̃, rü nacümaxü̃ nayaxĩxẽẽgü.
24Rü nüma ga Amáü̃ ga Agátanüxü̃ ga Amedáta nane rü Yudíugüarü uanü nixĩ rü nagu narüxĩnü nax Yudíugüxü̃ iyanaxoxẽẽxü̃. Rü sortéu naxü nax yemaacü nüxü̃ nacuáxü̃ca̱x nax ta̱xacürü ngunexü̃ tá yixĩxü̃ ga Yudíugüxü̃ nada̱i̱xü̃.
25Natürü yexguma ngĩma ga Ité rü ãẽ̱xgacü ga Achuérumaxã nüxü̃ iyarüxu ga yema Amáü̃ nagu rüxĩnüxü̃ nax Yudíugüxü̃ nada̱i̱xü̃ca̱x, rü nüma ga ãẽ̱xgacü rü wüxi ga poperagu nanaxümatü nax Amáü̃xü̃ yama̱xgüxü̃ca̱x naxca̱x ga yema chixexü̃ ga nagu naxĩnüxü̃. Rü yemaacü Amáü̃xü̃ rü nanegüxü̃ nawẽxnaxãgü.
26Rü yema Maduquéu ümatüxü̃ãcü nanaxüchigagü ga yema ngunexü̃gü. Rü yema guxchaxü̃ ga nüxü̃ nadaugüxü̃chiga rü nüxü̃ ngupetüxü̃chiga, rü nüma ga Yudíugü rü Puríü̃gu nanaxüégagü ga yema ngunexü̃gü. Rü ngẽma Puríü̃ ñaxü̃ i dexa, rü Pur ñaxü̃wa ne naxũ. Rü ngẽma dexa i Pur rü sortéu ñaxü̃chiga nixĩ.
27Rü nüma ga Yudíugü rü yema Maduquéu naxümatüxü̃ãcü nüxü̃ naxunetagü ga yema taxre ga ngunexü̃ nax guxcüma ga taunecü Puríü̃ naxüchigagüxü̃ca̱x ga nümagü rü nanegü rü nataagü rü guxü̃ma ga yema duü̃xü̃gü ga Yudíugücümaca̱x dauxü̃taegüxü̃.
28Rü yema taxre ga ngunexü̃ rü nanaxwa̱xegü nax guxü̃guma naxüchigagüãxü̃ ga Puríü̃ ga wüxichigü ga Yudíugütücumüwa rü wüxichigü ga naanewa rü wüxichigü ga ĩanegüwa nax yemaacü taguma iyanaxoxü̃ca̱x nax nüxna nacua̱xãchiexü̃ca̱x ga nüma ga Yudíugü rü nataagü.
29Rü ngĩma ga ãẽ̱xgacü naxma̱x ga Ité ga Abiyáixacü rü ñu̱xũchi nüma ga Maduquéu ga Yudíu ixĩcü rü ãẽ̱xgacüarü mumaxã nanaxümatügü ga norü taxre ga popera nachiga ga yema Puríü̃arü peta. Rü yemawa nüxü̃ nixu nax aixcüma ãẽ̱xgacüarü mumaxã yixĩxü̃ ga naxümatüxü̃ ga yema nüxíraxü̃xü̃ ga popera.
30Rü yema popera rü naxü̃tawa nayamugü ga guxü̃ma ga Yudíugü ga nawa maxẽxü̃ ga yema 127 ga naanegü ga ãẽ̱xgacü ga Achuéru namaxã icuáxü̃. Rü yema poperawa nanaxucu̱xẽ nax nügümaxã nangüxmüexü̃ca̱x rü nügü nangechaü̃güxü̃ca̱x.
31Nüma ga Maduquéu rü ngĩma ga Ité rü guxü̃ma ga Yudíugüxü̃ rü nanegüxü̃ rü nataagüxü̃ namu nax naxüchigagüãxü̃ca̱x ga yema Puríü̃ ga yexguma nawa nanguxgu ga yema ngunexü̃gü ga nagu naxunetagüxü̃. Rü yexgumarüxü̃ ta nanaxümatügü ga ucu̱xẽgü nax ñuxãcü tá naxaureãcü nayumüxẽgüxü̃ rü Tupanape̱xewa nüxü̃ yaxugüxü̃ i norü guxchaxü̃gü.
32Rü ngĩma ga Itéarü ucu̱xẽ nax ñuxãcü tá naxüchigagüãxü̃ ga yema Puríü̃, rü wüxi ga poperagu nixĩ ga naxümatüxü̃.
© 2022, Wycliffe Bible Translators, Inc. All rights reserved.