Ité 4
4
Nangechaü̃gü ga Yudíugü yerü naxunagü ga norü daichiga
1Rü yexguma Maduquéu nüxü̃ cua̱xgu ga yema unagüxü̃ rü nügü narügáutechiru yerü poraãcü nangechaü̃. Rü yemaca̱x témüxü̃ ga naxchirugu nicu̱x rü tanimacamaxã nügü nagüeru. Rü guma ĩanegu ínayaxüegu rü tagaãcü aita naxü norü ngechaü̃maxã.
2Rü yemaacü inixũ rü ñu̱xmata ãẽ̱xgacüpataa̱xwa nangu rü yéma nayachaxãchi, yerü nachu̱xu ga ngechaü̃chirugu icúxe ãẽ̱xgacüpatagu nax ücuxü̃.
3Rü yexgumarüxü̃ ta ga wüxichigü ga ĩanewachigü ga ngextá íyanguchigüxü̃wa ga yema mu ga ãẽ̱xgacü üxü̃, rü ga Yudíugü rü poraãcü nanaxĩ̱xãchiãẽtanü. Rü poraãcü nangechaü̃gü rü tama nachibüe rü naxauxe. Rü muxü̃ma ga nümagü rü tanimacate̱xegu napegü rü naxchiru ga témüxü̃gu nicu̱xgü.
Yudíugüétüwa ichogü ga Ité
4Rü yema ngĩxü̃taxü̃gü ga Ité rü yema yatügü ga ngĩrü dauruü̃gü ixĩgüxü̃ rü ngĩmaxã nüxü̃ nixugü ga yema Maduquéuxü̃ ngupetüxü̃. Rü yemaxü̃ naxĩnügu ga ngĩmax rü yexeraãcü inaxi̱xãchiãxẽ. Rü yemaca̱x Maduquéuca̱x yéma inamu ga mexü̃ ga naxchiru nax ínacuxuchixü̃ca̱x ga yema témüxü̃ ga naxchiru ga nagu yacúxü̃. Natürü ga nümax rü tama ínacuxuchichaü̃.
5Rü ngĩma ga Ité rü naxca̱x ingema ga yema ngĩrü dauruü̃eru ga Atáx. Rü Maduquéuxü̃tawa inamu nax nüxna yaca̱xaxü̃ca̱x nax ta̱xacü ngupetüxü̃ rü ta̱xacüca̱x natémüchiruxü̃.
6Rü nüma ga Atáx rü Maduquéuna nayaca ga ĩanearü ngutaque̱xechicawa ga ãẽ̱xgacüpataarü ĩã̱xarü to̱xma̱xtawa.
7Rü nüma ga Maduquéu rü namaxã nüxü̃ nixu ga guxü̃ma ga yema ngupetüxü̃ rü ñuxre ga diẽru ngĩxü̃ nax inaxãxü̃ ga Amáü̃ nax yemaacü guxü̃ma ga Yudíugüxü̃ nada̱i̱xü̃ca̱x.
8Rü yexgumarüxü̃ ta Atáxna nanaxãpane ga yema mu ga Chúchawa ümatüxü̃ ga nüxü̃ ixuxü̃ ga Yudíugüarü daixchiga. Rü Atáxmaxã nüxü̃ nixu nax Iténa naxããxü̃ca̱x rü yemaacü nüxü̃ nacuáxü̃ca̱x ga yema ngupetüxü̃. Rü yexgumarüxü̃ ta Itéca̱x yéma namuga nax ngĩmatama ãẽ̱xgacümaxã nüxü̃ yanaxuxü̃ca̱x rü yemaacü naétüwa nachogüxü̃ca̱x ga ngĩtanüxü̃.
9Rü nüma ga Atáx rü nataegu rü Itémaxã nüxü̃ nayarüxu ga yema Maduquéu namaxã nüxü̃ ixuxü̃.
10Rü ngĩma ga Ité rü wenaxarü Maduquéuxü̃tawa inamu ga Atáx nax namaxã nüxü̃ yanaxuxü̃ca̱x ga ngĩrü dexa ga ñaxü̃:
11—Guxü̃ma i duü̃xü̃gü rü nüxü̃ nacua̱x rü ngẽxguma texé ãẽ̱xgacüxü̃tawa ũmaregu rü tama nüma tümaca̱x nangemaãcüma rü tayu ega nüma ya ãẽ̱xgacü rü tama norü úirumena̱xã nawe̱xnagügu. Rü chomax rü marü 30 i ngunexü̃ taguma cha̱u̱xca̱x nangema ya ãẽ̱xgacü —ngĩgürügü.
12-13Rü yexguma Maduquéu nüxü̃ ĩnügu ga ngĩrü ngãxü̃ ga Ité, rü ngĩxca̱x yéma namuga rü ñanagürü: —¿Ẽ̱xna cuma nagu curüxĩnügu rü taxũtáma cuyuxü̃ erü ãẽ̱xgacüpatawa cungexma woo Yudíu nax quixĩxü̃?
14Rü ñu̱xma nax ngéma cungea̱xmarexü̃ rü tama naétüwa nax cuchogüxü̃ i tatanüxü̃ i Yudíugü, rü tóxnamana tá ne naxũ i ngü̃xẽxẽ nax nawa íinguxü̃xü̃ca̱x i ngẽma guxchaxü̃, natürü i cumax rü ngẽma cunatütanüxü̃ rü tá nayue. Rü nagu charüxĩnü nax toxü̃ ícupoxü̃xü̃ca̱x nixĩ i ãẽ̱xgacüma̱xwa nax cunguxü̃ i ñu̱xmax —ñanagürü.
15Rü yexguma ga ngĩma ga Ité rü ñaãcü Maduquéuca̱x yéma imuga:
16—¡Ẽcü ngéma naxũ rü nangutaque̱xexẽxẽ i guxü̃ma i Yudíugü i Chúchawa ngẽxmagüxü̃ nax cha̱u̱xca̱x aureãcü nayumüxẽgüxü̃ca̱x! ¡Rü tomaepü̱x i ngunexü̃ rü tomaepü̱x i chütaxü̃ rü taxuxü̃táma ta̱xacü nangõ̱xgü rüe̱xna ta̱xacü nixaxgü! Rü chomax, rü namaxã i chauxü̃taxü̃gü rü ngẽmaãcü tátama tanaxügü. Rü ngẽmawena rü tá ãẽ̱xgacüxü̃tawa íchayadau woo nachu̱xu nax texé ngéma ũmarexü̃ tama tümaca̱x nangemayane. Natürü tá ngéma chaxũama rü nüetama ega woo chayu̱xgu —ngĩgürügü.
17Rü yexguma ga nüma ga Maduquéu rü nanaxü ga yema Ité namaxã nüxü̃ ixuxü̃.
Currently Selected:
Ité 4: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.