Wenaxarü naxümatü ga Tupanaarü mugü 33
33
Moiché rü wüxitücumüchigü i Iraétanüxü̃maxã mexü̃ naxuegu
1Rü naxü̃pa ga nax nayuxü̃ ga Moiché ga Tupanaarü duü̃ ixĩcü, rü Iraétanüxü̃maxã mexü̃ naxuegu, rü ñanagürü ga Moiché:
2—Cori ya Tupana rü ma̱xpǘne i Chinaíwa ne naxũ. Rü yexguma máxpü̱xanexü̃ i Cheíwa tachopetügu rü tüxü̃ nibáixmaxü̃. Rü yema norü nangóonexü̃ rü máxpüxanexü̃ i Paráü̃wa nanguema, rü ñu̱xmata Meribá-cadéwa nangu. Rü norü tügüneme̱xẽgu nayange i norü mugü i ya̱u̱xracüüxü̃. Rü 10,000 i dauxü̃cüã̱x i norü duü̃xü̃gümaxã ngéma ne naxũ.
3Rü nüma ya Cori ya Tupana rü norü duü̃xü̃güxü̃ nangechaxü̃, rü nüxna nadau i ngẽma naga ĩnüexü̃. Rü nümagü rü nape̱xegu nacaxã́pü̱xügü rü ínanangu̱xuxẽẽgü i norü ucu̱xẽgü.
4Rü choma i Moiché rü pexna chanaxã i Tupanaarü mugü nax perü meruxü̃ yixĩxü̃ca̱x, Pa Acóbutanüxü̃x.
5Rü yexguma Iraétanüxü̃ norü ãẽ̱xgacügümaxã nangutaque̱xegügu rü Tupana nixĩ ga namaxã icuácü —ñanagürü ga Moiché.
6Rü Moiché rü Rubéü̃tanüxü̃chiga nidexa rü ñanagürü: —¡Namaxẽ i Rubéü̃tanüxü̃! ¡Rü tagutáma inarüxo woo noxretama i yatügü nixĩgü! —ñanagürü.
7Rü Yudátanüxü̃chiga nidexa rü ñanagürü: —¡Pa Cori ya Tupanax, nüxü̃ naxĩnü i Yudátanüxü̃arü yumüxẽ i ngẽxguma curü ngü̃xẽxẽgüca̱x ínacagügu! ¡Rü nüxü̃́ natauxchaxẽxẽ nax wüxiwa naxĩxü̃ rü ngẽmaãcü namücügü i Iraétanüxü̃xü̃ nangü̃xẽẽgüxü̃ca̱x! ¡Rü curü poramaxã ínapoxü̃ i norü uanügüme̱xẽwa! —ñanagürü.
8Rü Lebítanüxü̃chiga nidexa rü ñanagürü: —Pa Cori Pa Tupanax, cuma rü Lebítanüxü̃xü̃ cungechaxü̃ rü naxme̱xwa cunangẽxmagüxẽxẽ ga gumá nutagü ga ixüünecü ga Tumíü̃ rü Uríü̃ ga nawa nüxü̃ nacua̱xgücü i curü ngúchaü̃. Rü cuma rü Macháwa nüxü̃ cuxü i ngẽma Lebítanüxü̃, rü Meribáarü dexáwa namaxã cuporaga.
9Rü ngẽma Lebítanüxü̃ rü nanatüxü̃ rü naéxü̃ nangechaxü̃güarü yexera cuga naxĩnüe rü nayanguxẽxẽ i curü uneta. Rü naenexẽgüxü̃ rü naxacügüxü̃ nangechaxü̃güarü yexera cuga naxĩnüe rü nayanguxẽxẽ i curü uneta.
10Rü nümagü ga Lebítanüxü̃ nixĩ ga mea Iraétanüxü̃xü̃ ga Acóbutanüxü̃xü̃ nangúexẽẽxü̃ i curü mugü rü ucu̱xẽgü. Rü nümagü nixĩ i cupe̱xewa curü ãmarearü guruü̃wa yagugüãxü̃ i naxü̃nagü i duü̃xü̃gü cuxna ãmaregüxü̃ rü ñu̱xũchi yagugüãxü̃ i pumarate̱xegü.
11Rü cuxna chaca, Pa Cori Pa Tupanax nax taãẽxãcü cunayaxuxü̃ i ngẽma puracü i cuxca̱x naxügüxü̃ i ngẽma Lebítanüxü̃. ¡Rü yanaxoxẽxẽ i norü uanügü nax ngẽmaãcü tama wena naxca̱x íyaxü̃ãchixü̃ca̱x i ngẽma naxchi aiexü̃! —ñanagürü.
12Rü nüma ga Moiché rü Bẽyamíü̃tanüxü̃chiga nidexa rü ñanagürü: —Cori ya Tupana pexü̃ nangechaxü̃ rü ngẽmaca̱x taãẽãcüma pemaxẽ. Rü nüma rü guxü̃guma pexna nadau rü guxü̃gutáma naxme̱xtüü̃wa pengẽxmagü —ñanagürü.
13Rü Moiché rü Yúchetanüxü̃chiga nidexa rü ñanagürü: —Cori ya Tupana tá pexü̃ narüngü̃xẽxẽ, rü ngẽma perü naanegu tá nananguxẽxẽ i cherena i daxũguxü̃ i naanewa ne ũxü̃. Rü ñu̱xũchi tá pexna nanaxã i ngẽma dexá i waixü̃mütüü̃wa ngẽxmaxü̃.
14Rü ngẽmaãcü wüxichigü ya taunecügu rü tá namu i penetüarü o i pebuxuxü̃ rü wüxichigü ya tauemacügu rü tá namu i ngẽma rümemaexü̃ i penetüarü o.
15Rü ngẽma nũxcüma yexmaxü̃ i máxpü̱xanexü̃wa rü Tupana tá pexna nanaxã i ngẽma rümemaexü̃ i penetügüarü o.
16Rü nüma ya Cori ya Tupana ya chuchuxü̃ ga iya̱u̱xraxétaxü̃étüwa ngócü pexü̃ nangechaxü̃ rü tá pexna nanaxã i ngẽma ñoma i naanewa rümemaexü̃ i nanetüarü o. Rü Yúche ga naenexẽtanüwa Tupana nüxü̃ unetacü, rü yimátanüxü̃ca̱x tá ínangu i guxü̃ma i ngẽma mexü̃gü.
17Rü ngẽma Yúchetanüxü̃ rü tá namexẽchi ñoma woca i yatüxü̃xacü i nüxíra buxü̃rüxü̃. Rü tá naporaxüchi ñoma wüxi i búfalorüxü̃. Rü guxü̃ma i duü̃xü̃gütücumügü i ñoma i naanewa ngẽxmagüxü̃maxã tá napora. Rü ngẽmaãcü tá nixĩ i ngẽma muxũchixü̃ i Efraíü̃tanüxü̃ rü ngẽma muxü̃ i Manachétanüxü̃ —ñanagürü.
18Rü Moiché rü Chaburóü̃tanüxü̃chiga rü Ichacátanüxü̃chiga nidexa rü ñanagürü: —Pemax, Pa Chaburóü̃tanüxü̃x, rü tá petaãẽgü i ngẽxguma perü puracüwa pexĩxgu. Rü pemax, Pa Ichacátanüxü̃x, rü tá petaãẽgü i ngẽxguma pepatagü i naxchirunaxca̱xwa pengẽxmagügu.
19Rü pema rü tá naxca̱x pengẽma i ngẽma togü i duü̃xü̃gütücumügü nax perü máxpü̱xanexü̃wa Cori ya Tupanaca̱x nadaiaxü̃ rü yagugüãxü̃ i norü ãmaregü ya Tupana naxwa̱xexü̃. Rü pexme̱xwa tá nangẽxmagü i ngẽma ngẽmaxü̃gü i márwa ngẽxmagüxü̃ rü ñu̱xũchi ngẽma mexü̃gü i to i nachixü̃anegüarü türegüwa naxca̱x petaxexü̃ —ñanagürü.
20Rü Moiché rü Gáxtanüxü̃chiga nidexa rü ñanagürü: —Namexẽchi ya Cori ya Tupana ya taxü̃ i naane pexna ãcü. Rü ngẽma naanewa rü pema i Gáxtanüxü̃ rü ñoma leóü̃ i iyauxexü̃ i naeru íwaexü̃ rü nachacüügü íwaexü̃rüxü̃ pixĩgü.
21Rü pema i Gáxtanüxü̃ rü penayaxu i ngẽma naane i rümemaexü̃ ñoma duü̃xü̃güarü ãẽ̱xgacüna ixãxü̃rüxü̃. Rü yexguma nangutaque̱xegügu ga Iraétanüxü̃arü ãẽ̱xgacügü rü pema rü Tupanaga pexĩnüe rü peyangu̱xẽxẽ ga norü mugü rü ucu̱xẽgü ga norü duü̃xü̃güna naxãxü̃ —ñanagürü.
22Rü nüma ga Moiché rü Dáü̃tanüxü̃chiga nidexa rü ñanagürü: —Dáü̃tanüxü̃ rü ñoma wüxi i leóü̃xacü i Bacháü̃anewa ne yuxuxü̃rüxü̃ nixĩgü —ñanagürü.
23Rü Netarítanüxü̃chiga nidexa rü ñanagürü: —Rü pemax, Pa Netarítanüxü̃x, rü Cori ya Tupana poraãcü pexü̃ narüngü̃xẽxẽ rü pemaxã nataãxẽ. Rü nüma rü pexna nanaxã i ngẽma naane ya nataxa ya Gariréawa ixügüxü̃ ñu̱xmata yimaarü súrgu yacuá —ñanagürü.
24Rü Moiché rü Achétanüxü̃chiga nidexa rü ñanagürü: —Pa Achétanüxü̃x, Cori ya Tupana rü guxü̃ma i Iraétanüxü̃arü yexera tá pexü̃ rüngü̃xẽxẽ, rü guxü̃ma i nümagü rü tá pexü̃ nangechaü̃gü. Rü tagutáma pexü̃́ nataxu i perü oribuarü chíxü̃.
25Rü perü ĩanegüarü poxeguxü̃arü chotaruxü̃gü rü fierunaxca̱x rü bróũchenaxca̱x tá nixĩgü. Rü ngẽma perü pora i pexü̃́ ngẽxmaxü̃ rü tá natai i guxü̃ma i ngẽma ngunexü̃gü i nagu pemaxẽxü̃gu —ñanagürü.
26Rü yema namaxã yagúexẽẽãxü̃ ga norü dexa ga Moiché rü ñanagürü: —Pa Iraétanüxü̃x, rü nataxuma i to i perü Tupanamaxã wüxiguxü̃. Rü nüma rü norü poramaxã dauxü̃guxü̃ i caixanexü̃gu nixũ nax perü ngü̃xẽẽwa naxũxü̃ca̱x.
27Rü yimá Cori ya Tupana ya guxü̃guma ngẽxmacü, rü nüma nixĩ i perü poxü̃ruxü̃ yixĩxü̃. Rü ngẽma norü pora i guxü̃guma nüxü̃́ ngẽxmaxü̃ rü perü ngü̃xẽẽruxü̃ nixĩ. Rü nüma nixĩ i pexna yabuxmüxẽẽãxü̃ i perü uanügü, rü nüma nixĩ i pexü̃ namuxü̃ nax penada̱i̱xü̃ca̱x.
28Rü pemax, Pa Iraétanüxü̃x, rü taxuxü̃táma pexü̃ nachixewe i perü naanewa. Rü petaagü rü taãẽãcüma tá nawa namaxẽ. Rü perü naanewa rü tá pexü̃́ nangẽxma i perü triguchitaü̃gü rü úbachitaxü̃gü. Rü tagutáma pexü̃́ nataxu ya pucü ya dauxü̃wa ne ũcü.
29¡Pa Iraétanüxü̃x, petaãxẽgü! Pema rü taxúema pemaxã tawüxigu erü nümatama ya Cori ya Tupana nixĩ i pexü̃ ínapoxü̃xü̃, rü pexü̃ nangü̃xẽẽxü̃. Rü nüma nixĩ i perü tara i namaxã perü uanügüxü̃ pedaixü̃. Rü perü uanügü rü pepe̱xegu tá nacaxã́pü̱xügü. Rü pema rü tá penaxãnexẽxẽ rü penapu̱xcuchigüama —ñanagürü ga Moiché.
Currently Selected:
Wenaxarü naxümatü ga Tupanaarü mugü 33: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
