Wenaxarü naxümatü ga Tupanaarü mugü 11
11
Cori ya Tupanaarü pora
1¡Rü nüxü̃ pengechaü̃gü ya perü Cori ya Tupana! ¡Rü peyanguxẽẽgü i norü ngu̱xẽẽtaegü, rü norü ucu̱xẽgü rü norü mugü rü guxü̃ma i ngẽma pemaxã nüxü̃ yaxuxü̃!
2¡Rü ñu̱xma rü nüxna pecua̱xãchie ga yema Cori ya perü Tupana pexca̱x üxü̃ nax yemamaxã pexü̃ yanawe̱xãchixẽẽxü̃ca̱x! Rü tama pexacügü nixĩ ga nüxü̃ nadaugüxü̃ ga yema naxüxü̃, natürü pematama nixĩ ga nüxü̃ pedaugüxü̃ rü nüxü̃ pecuáxü̃ ga yema Tupana norü poramaxã naxüxü̃.
3Rü pemax nixĩ ga nüxü̃ pedaugüxü̃ ga yema cua̱xruü̃gü ga Equítuanewa nawéxü̃ ga Tupana nax namaxã napoxcuãxü̃ca̱x ga Faraóü̃ rü guxü̃ma ga norü duü̃xü̃gü.
4Rü yexguma yema Equítuanearü churaragü pewe nangegügu rü nüxü̃ pedaugü ga yema namaxã rü yema norü cowarugümaxã, rü yema norü carugü ga dairuxü̃gümaxã naxüxü̃ ga Tupana ga yexguma Már ga Dauchíüxü̃gu nayixẽẽãgu. Rü yemaacü nüma ga Cori ya Tupana rü wüxicana yexma nayanaxoxẽẽgü.
5¡Rü nüxna pecua̱xãchie ta ga guxü̃ma ga yema chianexü̃wa pexca̱x naxüxü̃ ñu̱xmata nua pengugü!
6Rü pema rü nüxü̃ pedaugü ta ga yema Tupana namaxã üxü̃ ga Datáü̃ rü Abiráü̃ ga Eriá nanegü ga Rubéü̃tanüxü̃ ga yexguma naxca̱x yange̱xgu ga waixü̃mü rü yemagu nax nayixcuxü̃ wüxigu namaxã ga naxacügü rü napatagü rü guxü̃ma ya norü yemaxü̃gü. Rü guxü̃ma ga Iraétanüxü̃pe̱xewa nixĩ ga nangupetüxü̃ ga yema.
7Rü pematama nixĩ ga nüxü̃ pedaugüxü̃ rü nüxü̃ pecua̱xgüxü̃ ga guxü̃ma ga yema mexü̃gü ga Cori ya Tupana üxü̃.
Cori ya Tupana rü tá Iraétanüxü̃na nanaxã i muxü̃ma i mexü̃gü nawa i ngẽma naane i namaxã naxueguxü̃
8¡Rü peyanguxẽxẽ̱x i guxü̃ma i ngẽma mugü i ñu̱xma pemaxã nüxü̃ chixuxü̃ nax ngẽmaãcü peporaexü̃ca̱x rü nagu pechocuxü̃ca̱x rü peyapuxü̃ca̱x i ngẽma naane i tá peyaxuxü̃!
9Rü ngẽxguma peyanguxẽẽgu i guxü̃ma i ngẽma mugü rü mucüma ya taunecü tá nawa pemaxẽ i ngẽma naane ga Cori ya Tupana nũxcümaü̃güxü̃ ga perü o̱xigümaxã rü nataagümaxã ueguxü̃ nax nüxna naxãgüãxü̃ca̱x. Rü ngẽma naanewa rü yimá lechi rü berure rü ñoma dexárüxü̃ niya̱xmare rü taguma nataxu.
10-11Rü ngẽma naane i tá peyapuxü̃ rü taxũtáma ngẽma Equítuane i nawa ípechoxü̃xü̃rüxü̃ nixĩ. Rü pema rü yéma Equítuanewa rü poraãcü pepuracüe yerü ipenato ga naxchire rü peyamegü, ñoma taã̱xtügu itoxü̃ i nanetü imegüxü̃rüxü̃. Natürü ngẽma naane i tá peyapuxü̃wa rü pucü tátama nayamegü i peanegü i mápü̱xanexü̃wa rü doxonexü̃wa ngẽxmagüxü̃.
12Ngẽma rü wüxi i naane i Cori ya Tupanatama nüxna dauxü̃ nixĩ. Nüma rü guxcüma ya taunecügu nüxna nadau.
13-14Rü ngẽxguma pema mea peyanguxẽẽ̱xgu i ñaa mugü i ñoma i ngunexü̃gu pexna chaxãxü̃, rü ngẽxguma aixcüma nüxü̃ pengechaü̃gügu ya Cori ya perü Tupana, rü ngẽxguma nüxü̃ picua̱xüü̃gügu guxü̃ne ya perü maxü̃nemaxã, rü guxü̃ i peãxẽmaxã, rü ngẽxguma i nüma ya Tupana rü tá ípetoexü̃gu nanapuxẽxẽ rü ñu̱xũchi ngẽxguma ngexwaca yaxo̱xgu i penetü rü tá wena nanapuxẽxẽ nax mea pexü̃́ nayaxü̃ca̱x rü yaxoxü̃ca̱x, rü pexü̃́ nangemaxü̃ca̱x i perü trigu, rü perü bínu, rü perü chíxü̃.
15Rü ngẽxgumarüxü̃ tá ta ya Cori ya Tupana rü nanaxügüxẽxẽ ya maxẽgü perü wocagüca̱x. Rü ngẽmaãcü tá nimu rü tagutáma pengewemü.
16Natürü name nixĩ i pexuãẽgü nax tama texé pexü̃ womüxẽẽxü̃ nax Tupanana pixĩgachixü̃ca̱x rü tomare i tupanagüxü̃ picua̱xüü̃güxü̃ca̱x rü nape̱xegu pecaxã́pü̱xügüxü̃ca̱x.
17Erü ngẽxguma tá nüxna pixĩgachigu, rü nüma ya Cori ya Tupana rü tá pemaxã nanu rü taxũtáma pexca̱x nanapuxẽxẽ. Rü ngẽma naane rü taxuxü̃táma nawa narüxü, rü pema rü tá paxaxüchi nagu peyue i ngẽma naane i mexü̃ i Cori ya Tupana tá pexna ãxü̃.
18¡Rü pegüãxẽgu namaxã penguxü̃ i ñaa ore, rü nagu perüxĩnüeecha! ¡Rü pegüchacüüwa, rü pegücatüwa peyanga̱xcuchi i ngẽma mugü nax ngẽmaãcü tama nüxü̃ iperüngümaexü̃ca̱x!
19¡Rü ñaa oremaxã penangúexẽxẽ i pexacügü, rü nachigagu namaxã pidexagü i pepatawa, rü namagüwa. Rü ngẽxgumarüxü̃ ta i ngẽxguma pepeechaü̃gu rü íperüdagügu rü ñaa oremaxã penangúexẽxẽ!
20-21Rü perü caxtagügu, rü pepataarü ĩã̱xgügu penaxümatü i ngẽma oregü, nax ngẽmaãcü i pemax rü pexacügü rü namáarü maxü̃a̱xgüxü̃ca̱x nawa i ngẽma naane i Cori ya Tupana nũxcümaü̃güxü̃ ga perü o̱xigümaxã ueguxü̃ nax tüxna naxããxü̃ca̱x. Rü ngẽmaãcü tá nama̱x i perü maxü̃, ngẽma dauxü̃wa nüxü̃ idauxü̃ rü ñoma i naaneétüwa ngẽxmagüechaxü̃rüxü̃.
22Rü ngẽxguma tá aixcüma peyanguxẽẽgu i guxü̃ma i ñaa mugü i ñu̱xma pemaxã nüxü̃ chixuxü̃ nax peyanguxẽẽxü̃ca̱x, rü ngẽxguma tá ngẽma mugügu pexĩxgu rü ngẽxguma aixcüma perü Cori ya Tupanaxü̃ pengechaü̃gügu rü aixcüma mea nawe perüxĩxgu, rü ngẽxguma namaxã pixaixcümagügu, rü nüma ya Cori ya Tupana rü tá pexü̃ narüngü̃xẽxẽ.
23Rü tá pepe̱xewa ínanawoxü̃ i guxü̃ma i ngẽma duü̃xü̃gütücumügü, rü tá nüxü̃ perüporamae i guxü̃ma i ngẽma duü̃xü̃gü i pexü̃ rümumaexü̃ rü perü yexera poraexü̃.
24Rü guxü̃ma i ngẽma naane i nawa pengugüxü̃ rü pengagüxü̃ rü pexrü tá nixĩ. Rü ngẽma perü üyeane i súrwaama rü chianexü̃wa tá inaxügü rü ñu̱xmatáta Líbanuanewa nangu i nórtewa. Rü éstewa rü natü ya Eufrátewa tá inaxügü rü ñu̱xmatáta Már i Mediteráneuwa nangu i oéstewaama.
25Rü taxúetama texé pexü̃ ítayachaxãchigüxẽxẽ. Rü yimá Cori ya perü Tupanagagu rü tá pexü̃ namuü̃e i guxü̃ma i ngẽma duü̃xü̃gü i ngextá ípechopetüetanüxü̃wa, ngẽma nüma pemaxã nüxü̃ yaxuxü̃rüxü̃.
26Rü ñoma i ngunexü̃gu rü pexna chaca rü ngexü̃rüüxü̃ nixĩ i penaxwa̱xexü̃. ¿Rü penaxwa̱xe nax mexü̃ pemaxã naxueguxü̃ ya Tupana rüe̱xna chixexü̃ pemaxã naxueguxü̃?
27Rü ngẽxguma tá naga pexĩnüegu i ngẽma Cori ya perü Tupanaarü mugü i ñu̱xma pemaxã nüxü̃ chixuxü̃, rü nüma rü tá mexü̃ pemaxã naxuegu.
28Natürü ngẽxguma tama naga pexĩnüegu i Cori ya perü Tupanaarü mugü, rü nüxü̃ perüxoegu i ngẽma ñu̱xma pemaxã nüxü̃ chixuxü̃ rü nawe perüxĩxgu i ngẽma tupananetachicüna̱xãgü ga noxri tama nüxü̃ pecuáxü̃, rü nüma ya Tupana rü tá guxchaxü̃ pemaxã naxuegu.
29Rü ngẽxguma perü Cori ya Tupana tá pexü̃ nagu chocuxẽxẽgu i ngẽma naane i tá peyapuxü̃, rü pema rü tá mexü̃ namaxã pexuegu ya yima ma̱xpǘne ya Guerichíü̃ rü tá chixexü̃ namaxã pexuegu ya yima ma̱xpǘne ya Ebá.
30Rü yima taxre ya ma̱xpǘnegü rü oéstewaama nangẽxmagü i Yudáü̃arü tocutüwa. Rü yimagü rü nawa nangẽxmagü i ngẽma doxonexü̃ i Canaáü̃tanüxü̃ nawa maxẽxü̃ i Guirigáarü to̱xma̱xtawa i Moréarü naigü i taxü̃arü ngaicamana.
31-32Pemax rü marü pichoü̃chaü̃ i ngẽma natü i Yudáü̃ nax nagu pichocuxü̃ca̱x i ngẽma naane i perü Cori ya Tupana tá pexna ãxü̃. Rü ngẽxguma tá marü peyapuxgu rü nawa pemaxẽgu i ngẽma naane, ¡rü nagu pexĩ i guxü̃ma i ngẽma mugü rü ucu̱xẽgü i ñu̱xma pexna chaxãxü̃!
Currently Selected:
Wenaxarü naxümatü ga Tupanaarü mugü 11: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
