Popera ga Coróchawa yexmagüxü̃ ga yaxõgüxü̃tanüwa namuxü̃ ga Pauru 4

1Rü pemax, Pa Corigüx, rü name nixĩ i perü duü̃xü̃gümaxã pemecümagüxü̃, rü tama penawomüxẽẽxü̃. ¡Rü nüxna pecua̱xãchie nax pema rü ta pexü̃́ nangẽxmaxü̃ ya perü Cori ya daxũgucü!

2¡Rü guxü̃guma peyumüxẽgü! ¡Rü pexuãxẽgü nax tama nüxü̃ iperüngümaexü̃ca̱x nax Tupanana moxẽ pexãgüxü̃!

3¡Rü toxca̱x rü ta peyumüxẽgü nax Tupana toxü̃́ natauxchaxẽxẽxü̃ca̱x nax nüxü̃ tixuxü̃ca̱x i norü ore, rü meama duü̃xü̃güca̱x tanango̱xẽxẽxü̃ca̱x i ngẽma ore ga noxri ẽxü̃guxü̃ i Cristuchiga! Rü ngẽma oreca̱x nixĩ i ñu̱xma ichapoxcuxü̃.

4Rü chanaxwa̱xe i cha̱u̱xca̱x peyumüxẽgü nax mea duü̃xü̃güca̱x chanango̱xẽẽxü̃ i ngẽma ore, erü ngẽma nixĩ i mexü̃ nax chanaxüxü̃.

5¡Rü mea pemaxẽ nape̱xewa i ngẽma duü̃xü̃gü i tama yaxõgüxü̃! ¡Rü ñu̱xma nax pexü̃́ natauxchaxü̃, rü peyoxniẽ nax paxa penaxüxü̃ i Tupanaarü puracü! ¡Rü taxṹ i perüchomarexü̃!

6Rü ngẽxguma togü i duü̃xü̃gümaxã pidexagügu, rü name nixĩ i penataãẽxẽxẽ namaxã i ngẽma dexa i namaxã nüxü̃ pixuxü̃. ¡Rü ngẽmaãcü mea penangãxü̃ i ngẽma pexna ca̱xü̃ nachiga i perü õ!

Pauru rü wenaxarü yema duü̃xü̃güxü̃ narümoxẽ

7Rü nüma ya taenexẽ ya Tíquicu ya nüxü̃ ingechaü̃gücü rü aixcüma choxü̃ narüngü̃xẽxẽ rü wüxigu chomaxã Cori ya Tupanaaxü̃́ napuracü. Rü nüma tá pemaxã nüxü̃ nixu i chauchiga.

8Rü ñu̱xma rü petanüwa chanamu nax pexü̃ nataãẽxẽẽxü̃ca̱x rü pemaxã nüxü̃ yaxuxü̃ca̱x nax ñuxãcü choxü̃ nangupetüxü̃ i chomax.

9Rü Tíquicumaxã petanüwa chanamu i Onéchimu, ya taenexẽ ya nüxü̃ ingechaü̃gücü ya aixcüma mea Tupanaarü puracü ücü. Rü nüma rü petanüxü̃ nixĩ. Rü nümagü tá nixĩ i pemaxã nüxü̃ yaxugüxü̃ nax ta̱xacü ngupetüxü̃ i núma.

10Rü pexü̃ narümoxẽ i Aristárcu i wüxigu chomaxã poxcuxü̃. Rü ngẽxgumarüxü̃ ta pexü̃ narümoxẽ i Márcu i Bernabéenexẽ ixĩxü̃. Rü marü pemaxã nüxü̃ chixu i Márcuchiga. Rü ngẽxguma tá petanüwa nanguxgu, rü chanaxwa̱xe nax mea penayauxgüxü̃.

11Rü ngẽxgumarüxü̃ ta pexü̃ narümoxẽ ya taenexẽ ya Yechú ya Ixaixcümacügu ãégacü. Rü ngẽma tomaepü̱x i yatügü rü ngexicatama nixĩ i Yudíugü i yaxõgüxü̃ i wüxigu chomaxã puracüexü̃ i Tupanaarü puracüwa. Rü nümagü rü poraãcü choxü̃ nataãẽxẽẽgü.

12Rü ngẽxgumarüxü̃ ta pexü̃ narümoxẽ i Epáparu. Rü nüma rü petanüxü̃ nixĩ, rü aixcüma nanaxü i Cristuarü puracü. Rü nüma rü guxü̃guma norü yumüxẽwa Tupanaxü̃ naca̱xaxü̃ pexca̱x nax tama nüxna pixĩgachixü̃ca̱x i norü ore rü peyaxõgüamaxü̃ca̱x rü aixcüma penaxüxü̃ca̱x i ngẽma Tupanaarü ngúchaü̃.

13Rü choma rü marü nüxü̃ chacua̱x rü pemaxã nüxü̃ chixu i ñuxãcü Epáparu poraãcü pexca̱x naxoegaãẽ rü naxca̱x naxoegaãẽ i ngẽma taenexẽgü i Laodichéaarü ĩanewa ngẽxmagüxü̃ rü ngẽma Iráporiarü ĩanewa ngẽxmagüxü̃.

14Rü Luca ya dutúru ixĩcü ya nüxü̃ ingechaü̃gücü, rü pexü̃ narümoxẽ. Rü ngẽxgumarüxü̃ ta pexü̃ narümoxẽ i Dema.

15¡Rü chauégagu nüxü̃ perümoxẽgü i taenexẽgü i Laodichéawa ngẽxmagüxü̃! ¡Rü ngẽxgumarüxü̃ ta nüxü̃ perümoxẽgü i Nínfa rü guxü̃ma i taenexẽgü i yaxõgüxü̃ i napatawa ngutaque̱xegüxü̃!

16Rü ngẽxguma marü nüxü̃ pedaumatügu i ñaa popera, rü chanaxwa̱xe i nawena Laodichéawa penamu nax ngémacüã̱x i taenexẽgü rü ta nüxü̃ nadaumatügüxü̃ca̱x. Rü ngẽxgumarüxü̃ ta i ngẽma popera i Laodichéawa chamuxü̃, rü ngẽxguma pexü̃tawa nanguxgu rü chanaxwa̱xe i nüxü̃ pedaumatügü.

17Rü chanaxwa̱xe i Ariquípumaxã nüxü̃ pixu, rü ñapegürügü nüxü̃: “¡Mea napuracü rü yanguxẽxẽ i ngẽma puracü i tórü Cori cuxna ãxü̃!” ñapegürügü nüxü̃.

18Choma i Pauru rü cho̱xme̱xmaxãtama pexca̱x chanaxümatü i ñaa chorü moxẽ. ¡Rü nüxna pecua̱xãchie nax chapoxcuxü̃! Rü chanaxwa̱xe ya Tupana pexü̃ narüngü̃xẽxẽ.

Currently Selected:

Popera ga Coróchawa yexmagüxü̃ ga yaxõgüxü̃tanüwa namuxü̃ ga Pauru 4: tcaP

Highlight

Copy

Compare