Amúx 2
2
1Rü nüma ya Cori ya Tupana rü ñanagürü: —Ngẽma Moácüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü nümagü rü guma Edóü̃arü ãẽ̱xgacüchina̱xã ínagu rü ñu̱xmata tanimacamare yixĩ.
2Rü ngẽmaca̱x tá üxümaxã chayagu i Moáane. Rü ngẽma üxüema tá nixĩ i yima norü ãẽ̱xgacü ya Querióxpatagüwa nguxü̃. Rü ngẽxguma yacuegügu ya cornéta rü duü̃xü̃gü tagaãcü nixáicha nax nügü nada̱i̱xü̃, rü ngẽma Moátanüxü̃ rü ngẽxma tá nayue.
3Rü norü duü̃xü̃güpe̱xewa tá íchanata̱xüchi i ngẽma norü ãẽ̱xgacü. Rü wüxigu norü ngü̃xẽẽruü̃gümaxã tá chanadai —ñanagürü ya Cori ya Tupana.
4Rü ñanagürü ta ya Cori ya Tupana: —Ngẽma Yudáanecüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü nüma rü tama nanayaugü ga yema chorü ucu̱xẽgü, rü ñu̱xũchi tama naga naxĩnüe ga yema chorü mugü. Rü nüxü̃ nicua̱xüü̃gü ga yematama naxchicüna̱xãgü ga norü o̱xigü nüxü̃ icua̱xüü̃güxü̃.
5Rü ngẽmaca̱x tá üxümaxã chayagu i Yudáane. Rü ngẽma üxüema tá nixĩ i yima Yerucharéü̃arü ãẽ̱xgacüpatagü iguxü̃ —ñanagürü ga Cori ya Tupana.
Iraétanüxü̃arü poxcuchiga
6Rü ñanagürü ya Cori ya Tupana: —Pema i Iraétanüxü̃ rü poraãcü chixexü̃ pexügü. Rü tümamaxã petaxe ya yíxema taxuxü̃ma i chixexü̃ üchiréxe. Rü ngẽxgumarüxü̃ ta wüxi i chapatutanüxexpü̱x tümamaxã petaxe ya yíxema ngearü diẽruã́xẽ. Rü ngẽmaca̱x taxũtáma íchayachaxãchi nax pexü̃ chapoxcuxü̃, Pa Iraétanüxü̃x.
7Rü chixri namaxã pecua̱xgü i ngẽma chixeparagüxü̃. Rü tama tümaétüwa pidexagü ya yíxema taxuxü̃ma tüxü̃́ ngẽxmagüxe. Rü ngẽma papa rü ngẽma nane rü wüxitama i ngexü̃maxã namaxẽ. Rü ngẽmaãcü penaxãũãchixẽxẽ i chauéga i üünexü̃.
8Rü ngexü̃rüüxü̃ i ãmarearü guruü̃cüwawa nagu pecagü i tümachirugü ya yixema pexü̃́ tangetanüxü̃ca̱x tüxna peyaxuxü̃. Rü penangõ̱x i ngẽma õnagü i tupananetachicüna̱xãgüxü̃ namaxã picua̱xüü̃güxü̃. Rü naxca̱x petaxe ya bínu ngĩmaxã i ngẽma diẽru i womüxẽẽãcüma duü̃xü̃güxü̃tawa ngĩxü̃ peyaucü nax perü tupananetagüpatawa peyaxaxgüxü̃ca̱x ya yima bínu.
9Natürü ga choma rü chanadaixichi ga yema Amoréutanüxü̃ ga ñoma ocayiwagürüxü̃ imáchanexü̃ rü ñoma castañagürüxü̃ iporaexü̃. Rü yemaacü chanaxü nax pexü̃́ chanatauchaxẽẽxü̃ca̱x nax nagu pechocuxü̃ca̱x i ñaa naane.
10Rü choma nixĩ ga Equítuanewa pexü̃ íchagaxü̃xü̃, rü 40 ga taunecü ínachianexü̃gu pexü̃ chigagü nax pexna chanaxãxü̃ca̱x ga Amoréutanüxü̃arü naane.
11Rü pemax, Pa Iraétanüxü̃x, rü taxuacüma ipeyacu̱x nax petanüwa nüxü̃ chaxunetaxü̃ ga chorü orearü uruü̃gü rü chaugüca̱x chanade ga ñuxre ga perü ngextü̱xücügü nax Nacharéugü i tama bínu yaxaxgüxü̃ yixĩgüxü̃ca̱x —ñanagürü ya Cori ya Tupana.
12Rü ñanagürü ta: —Natürü ga pema rü penamu ga yema Nacharéugü nax bínu yaxaxgüãxü̃ca̱x. Rü yema chorü orearü uruü̃gü rü nüxna penachu̱xu nax chorü orexü̃ yaxugüexü̃.
13Rü ngẽmaca̱x i chomax rü tá ngúxü̃ pexü̃ chingegüxẽxẽ rü ngẽmamaxã tá pixãĩnetanücüxü ñoma wüxi i caretíya i trigumaxã ããcuxü̃ rü norü yamaxã ãgaxü̃rüxü̃.
14Rü woo yíxema ibuxmüxẽ rü taxuacüma ngẽma poxcucha̱xwa tibuxmü. Rü yíxema rüporamaechiréxe rü tá tangearü poraã̱x rü taxúetama tügü ítapoxü̃ woo ya yíxema tama muü̃xe.
15Rü ngẽma würaarü ma̱xruxü̃ rü taxũtáma yáxna chomaxã naxĩnü. Rü woo i ngẽma paxa iñaxü̃ rü taxucürüwa cha̱u̱xcha̱xwa niña, rü bai i tá namaxü̃ i ngẽma cowarumaxã iñaxü̃.
16Rü ngẽma ngunexü̃gu rü ngẽma yexeraãcü nügü írüporaxü̃ rü tá ngexchiruãcüma niña —ñanagürü ya Cori ya Tupana.
Currently Selected:
Amúx 2: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
