2 Chamué 5

Dabí rü Iraéanearü ãẽ̱xgacüxü̃ ningucuchi

(1 Cr. 11.1-3)

1Rü to ga ngunexü̃gu rü guxü̃ma ga Iraéanecüã̱xgütücumüarü ãẽ̱xgacügü rü Ebróü̃wa naxĩ nax Dabímaxã yanadexagüxü̃ca̱x, rü ñanagürügü: —Toma rü cutanüxü̃xü̃chi tixĩgü.

2Rü woo yexguma Chaú Iraéanearü ãẽ̱xgacü ixĩxgu, rü cuma nixĩ ga aixcüma daiwa tomaxã icucuáxü̃. Rü ñu̱xũchi nüma ga Cori ya Tupana rü nüxü̃ nixu nax cuma tá quixĩxü̃ i tomaxã icucuáxü̃ rü guxü̃ma i Iraéanecüã̱xgüarü ãẽ̱xgacü tá quixĩxü̃ —ñanagürügü.

3Rü yemaacü ga yema duü̃xü̃gü rü Dabímaxã nidexagü ga Ebróü̃wa. Rü nüma ga Dabí rü Cori ya Tupanape̱xewa yema duü̃xü̃gümaxã inaxüga. Rü nüma ga yema duü̃xü̃gü rü Dabíxü̃ chíxü̃maxã nabaerugü rü yemaacü guxü̃ma ga Iraéanecüã̱xgüarü ãẽ̱xgacü nixĩ.

4Rü nüma ga Dabí rü nüxü̃́ nayexma ga 30 ga taunecü ga yexguma ãẽ̱xgacüxü̃ yangucuchigu. Rü 40 ga taunecü nixĩ ga ãẽ̱xgacü yixĩxü̃.

5Rü Ebróü̃wa rü 7 ga taunecüarü ngãxü̃ nixĩ ga Yudáanearü ãẽ̱xgacü yixĩxü̃. Rü ñu̱xũchi Yerucharéü̃wa rü guxü̃ma ga Iraéane rü Yudáanearü ãẽ̱xgacü nixĩ ga 33 ga taunecü.

Dabí nayapu ga Yerucharéü̃

(1 Cr. 11.4-9)

6Rü nüma ga ãẽ̱xgacü ga Dabí rü norü churaragümaxã Yerucharéü̃wa naxĩ nax naxca̱x íyaxü̃ãchixü̃ca̱x ga yema Yebuchéutanüxü̃ ga yema naanegu ãchiü̃güxü̃. Rü nüma ga Yebuchéutanüxü̃ rü nagu narüxĩnüe nax taxũtáma Dabíaxü̃́ natauxchaxü̃ ga guma ĩanegu nax naxücuxü̃. Rü yemaca̱x ñanagürügü nüxü̃: —Cuma rü taxũtáma nuxã cuxücu erü woo ngẽma ingexetüxü̃ rü ichixeparaxü̃ rü ningu nax ínapoxü̃güãxü̃ ya daa ĩane nax tama nagu cuxücuxü̃ca̱x —ñanagürügü.

7Natürü nüma ga Dabí rü norü churaragümaxã nagu naxĩgüama ga guma ma̱xpǘne ga Chióü̃ ga yema ĩanecüã̱xarü churaragü nagu ãchiü̃güne rü nüxna nayapu. Rü ngẽmaca̱x nixĩ i ñu̱xma i Dabíarü Ĩane ñaãcü naxugüãxü̃.

8Rü yexguma Dabí nüxü̃ ĩnügu ga yema Yebuchéutanüxü̃ ga nüxü̃ nax nacugüexü̃, rü norü churaragüxü̃ ñanagürü: —Ngẽma Yebuchéutanüxü̃ i chixri tachiga idexagüxü̃ rü naxchi chaxai. ¡Rü yima ĩanearü dexá nagu iyaxü̃wa pichocu rü penadaix i ngẽma ĩanecüã̱xgü i Yebuchéutanüxü̃ i nügütama ixugüexü̃ nax yangexetüxü̃ rü yachixeparaxü̃! —ñanagürü. Rü ngéma nixĩ i ne naxũxü̃ i ngẽma dexa i ñaxü̃: “Tama chanaxwa̱xe i ngẽma ingexetüxü̃ rü ichixeparaxü̃ nax chopatagu nachocuxü̃”, ñaxü̃.

9Rü yemawena ga Dabí rü guma ma̱xpǘne ga Chióü̃wa ngẽxmane ga ĩanegu nanaxü ga napata nax yéma norü churaragümaxã nayexmaxü̃ca̱x. Rü guma ĩane rü Dabíarü Ĩanegu nanaxüéga. Rü nanaxütapü̱xgü ga guxü̃wama. Rü yema toxṍõneacü ínamexẽẽgüãxü̃wa inaxügü ga naxtapü̱x, rü ĩanewaama nanadaxẽxẽ rü ñu̱xmata ãẽ̱xgacüpatawa nangu.

Tíruarü ãẽ̱xgacü ga Iráü̃ rü Dabíxü̃tawa nanamu ga norü puracütanüxü̃

(1 Cr. 14.1-2)

10Rü nüma ga Dabí rü yexeraãcü niporachigü. Rü nüma ga Cori ya Tupana ya Guxü̃étüwa Ngẽxmacü rü nüxü̃ narüngü̃xẽxẽ.

11Rü Iráü̃ ga ĩane ga Tíruarü ãẽ̱xgacü ixĩcü rü Dabíxü̃tawa nanamugü ga ñuxre ga norü ngü̃xẽẽruü̃gü nax Dabímaxã yanadexagüxü̃ca̱x. Rü ñu̱xũchi yéma nanamugü ta ga yatügü ga nüxü̃ icuáxü̃ ga nutaarü mexẽẽcüwagü rü corapinagü. Rü yema duü̃xü̃gü rü yéma nanana ga mürapewagü ga ocayiwanaxca̱x nax yemamaxã naxügüã̱xü̃ca̱x ga guma Dabípata.

12Rü yemawa nüxü̃ nacua̱x ga Dabí nax Cori ya Tupana yixĩxü̃ ga nüxü̃ unetacü nax Iraéanearü ãẽ̱xgacü nax yixĩxü̃ca̱x, yerü Tupana nüxü̃ narüngü̃xẽxẽ nax mea yaxũxü̃ca̱x nax ãẽ̱xgacü yixĩxü̃ rü aixcüma norü duü̃xü̃gü ga Iraétanüxü̃maxã mea inacuáxü̃.

Dabí nanegü ga Yerucharéü̃gu buexü̃

(1 Cr. 3.5-9; 14.3-7)

13Rü yemawena rü Ebróü̃wa ínaxũxũ ga Dabí rü Yerucharéü̃wa naxũ. Rü yéma Yerucharéü̃wa toguxe ga ngexagümaxã naxãxma̱x. Rü nüxü̃́ nayexma ta ga toguxe ga norü naxma̱xabagü. Rü guxemagü rü nüxü̃́ tiyatüxacü rü tingexacü.

14-16Rü yema nanegü ga Yerucharéü̃gu buexü̃ rü ñaagü nixĩ: Chamúa, rü Chobáx, rü Natáü̃ rü Charomóü̃, rü Ibá rü Erichúa, rü Néfex, rü Yapía, rü Erichamá, rü Eriadá rü Eriférex.

Dabí rü Firitéugüxü̃ narüporamae

(1 Cr. 14.8-17)

17Rü yexguma Firitéugü nüxü̃ cua̱xgügu nax Dabíxü̃ nabaerugüxü̃ nax Iraéarü ãẽ̱xgacü yixĩxü̃ca̱x rü guxü̃ma ga yema Firitéugü rü Dabíca̱x inaxĩãchi rü naxca̱x nayadaugü nax yama̱xgüãxü̃ca̱x. Natürü nüma ga Dabí rü nüxü̃ nacuáchiga rü nixũgachi rü wüxi ga norü cu̱xchicaxü̃gu nayarücu̱x.

18Rü yexguma ga nüma ga Firitéugü rü Refaíü̃arü doxonexü̃wa nangugü rü yexma nügü ninu.

19Rü yemaca̱x nüma ga Dabí rü Tupanana naca rü ñanagürü: —¿Namexü̃ nax chanadaixü̃ i Firitéugü? ¿Rü nüxü̃ chi choxü̃ curüporamaexẽxẽxü̃? —ñanagürü. Rü nüma ga Cori ya Tupana rü Dabíxü̃ nangãxü̃ rü ñanagürü: —¡Ẽcü nadai! Rü choma rü tá nüxü̃ cuxü̃ charüporamaexẽxẽ —ñanagürü.

20Rü nüma ga Dabí rü Baá-perachíü̃wa nangu rü yexma nügü nadai rü Firitéugüxü̃ narüporamae. Rü yemaca̱x ñanagürü ga Dabí: —Tupana rü ñoma wüxi i dexá i poraü̃chíüxü̃rüxü̃ rü choxü̃́ nanatauxchaxẽxẽ nax nüxü̃ charüporamaexü̃ca̱x i chorü uanügü —ñanagürü. Rü yemaca̱x Baá-perachíü̃gu nanaxüéga ga yema nachica.

21Rü nüma ga Firitéugü rü yéma nüxna nibuxmü ga norü tupanachicüna̱xãgü. Rü nüma ga Dabí rü norü churaragümaxã nanade ga yema naxchicüna̱xãgü.

22Natürü nüma ga Firitéugü rü wenaxarü Refaíü̃arü doxonexü̃wa nangugü rü yexma nügü ninu.

23Rü yemaca̱x nüma ga Dabí rü wenaxarü Cori ya Tupanana naca. Rü nüma ga Tupana rü Dabíxü̃ nangãxü̃ rü ñanagürü: —¡Taxṹ i nape̱xewaama naxca̱x ípeyaxüãchixü̃! ¡Rü nüxü̃ ípechoegu rü naweama tá naxca̱x ípeyaxüãchi i ngẽxguma ngẽma bálsamunecüwa pengugügu!

24Rü ngẽxguma bálsamunecüwa nüxü̃ cuxĩnügu i churaragücutüga ¡rü naxca̱x íyagoõchi erü ngẽma nixĩ i cua̱xruxü̃ nax choma rü cupe̱xegu chixũxü̃ nax chanadaixü̃ca̱x i ngẽma Firitéugüarü churaragü! —ñanagürü.

25Rü nüma ga Dabí rü yema Tupana namuxü̃ãcü nanaxü, rü yemaacü Firitéugüxü̃ narüporamae. Rü Gabaóü̃wa inaxügü rü ñu̱xmata Guéchewa nangu nax namaxã nügü nada̱i̱xü̃.

Currently Selected:

2 Chamué 5: tcaP

Highlight

Copy

Compare