2 Chamué 15
15
Acharóü̃ rü nanatü ga Dabíxü̃ ínata̱xüchichaü̃
1Wüxi ga ngunexü̃ rü nüma ga Dabí nane ga Acharóü̃ rü naxca̱x nataxe ga wüxi ga naweü̃ ga dairuxü̃ ga cowarugü itúxü̃ne. Rü naxca̱x nadau ga 50 ga norü churaragü.
2-3Rü pa̱xmama írüdaüüxü̃ rü namacüwagu nayachiixü̃ ga duü̃xü̃gü ĩaneca̱x íchocuxü̃wa. Rü guxãma ga guxema ãẽ̱xgacüxü̃ dauxchaü̃güxe nax tümaarü guxchaxü̃ tayamexẽẽgüxü̃ca̱x, rü nüma ga Acharóü̃ rü tümaca̱x naca rü ñu̱xũchi tüxna naca ga ngexnerüxüne ga ĩanewa nax ne taxuxü̃. Rü guxema tügü ixuxe nax wüxi ga Iraéanecüã̱xgütücumüwa nax taxüxü̃, rü nüma ga Acharóü̃ rü ñanagürü tüxü̃: —Aixcüma nixĩ i ngẽma nüxü̃ quixuxü̃, natürü nataxuma i ãẽ̱xgacüarü ngü̃xẽẽruü̃gü i cuxü̃ rüngü̃xẽẽxü̃ —ñanagürü.
4Rü ñanagürü ta: —Chierüx ñaa nachixü̃anewa ãẽ̱xgacü i guxchaxü̃arü mexẽẽruxü̃ chixĩxgu i choma nax ngẽmaãcü guxãma chauxü̃tawa naxĩxü̃ca̱x ya yíxema guxchaxü̃gü tüxü̃́ ngẽxmaxe nax tüxü̃́ chanamexẽẽxü̃ca̱x —ñanagürü.
5Rü yexguma texé nape̱xegu yacaxã́pü̱xügu, rü nüma ga Acharóü̃ rü tama nanaxwa̱xe ga yemaacü nüxü̃ nax tarümoxẽgüxü̃, rü tümame̱xẽgu nayayauxãchi rü tüxna nana̱i̱xãchi rü tüxü̃ nachúxu.
6Rü yemaacü ga nüma ga Acharóü̃ rü tümamaxã nügü namecümaxẽxẽ ga guxãma ga Iraéanecüã̱xgü ga ãẽ̱xgacüxü̃tawa ũxẽ nax namexẽẽãxü̃ca̱x ga tümaarü guxchaxü̃gü. Rü yemaacü nixĩ ga nügüna tüxü̃ yapuexẽẽxü̃ ga guxema Iraéanecüã̱xgü.
7Rü yexguma 4 ga taunecü ngupetügu, rü nüma ga Acharóü̃ rü nanatü ga ãẽ̱xgacüxü̃ ñanagürü: —Cuxna chaca, Pa Ãẽ̱xgacüx ¿rü marü curü me yixĩxü̃ nax Ebróü̃wa chaxũxü̃ nax chayanguxẽxẽxü̃ca̱x ga yema uneta ga Cori ya Tupanamaxã nüxü̃ chixuxü̃?
8Rü yexguma Chíriaanegu chaxãchiü̃gu ga Yechúxarü ĩanewa, rü choma nax curü duü̃xü̃ chixĩxü̃, rü yéma Cori ya Tupanamaxã nüxü̃ chixu rü ngẽxguma chi nüma choxü̃́ natauxchaxẽẽãgu ga Yerucharéü̃ca̱x nax chataeguxü̃ rü chi nüxü̃ chayarücua̱xüxü̃ namaxã i wüxi i chorü ãmare i naxca̱x chiguxü̃ —ñanagürü.
9Rü nüma ga ãẽ̱xgacü rü nanangãxü̃ rü ñanagürü: —¡Marü name rü mea ngéma naxũ! —ñanagürü. Rü yexguma ga nüma ga Acharóü̃ rü Ebróü̃wa naxũ.
10Rü yexguma Ebróü̃wa nayexmayane ga Acharóü̃ rü ñuxre ga norü duü̃xü̃güxü̃ namu nax guxü̃ ga Iraéanecüã̱xgütücumüwa naxĩxü̃ca̱x rü nüxü̃ nax yanaxugüxü̃ca̱x ga norü ore ga ñaxü̃: —Ngẽxguma nüxü̃ pexĩnüegu i cornétaga, rü ngẽmawa tá nüxü̃ pecua̱x nax Ebróü̃wa yangucuchixü̃ ya Acharóü̃ nax Iraéanecüã̱xgüarü ãẽ̱xgacü yixĩxü̃ca̱x —ñaxü̃.
11Rü ñu̱xũchi ga nüma ga Acharóü̃ rü nüxna naxu ga 200 ga yatügü ga Yerucharéü̃cüã̱x. Rü tama chixexü̃gu naxĩnüeãcüma nawe narüxĩ. Natürü tama nüxü̃ nacua̱xgü ga ta̱xacü nax yixĩxü̃ ga yema Acharóü̃arü ĩnü.
12Rü yexgumarüxü̃ ta ga nüma ga Acharóü̃ rü naxca̱x nangema ga wüxi ga Dabíarü ucu̱xẽruxü̃ ga Aitópegu ãégacü ga ĩane ga Guirógu ãchiü̃cü. Rü namaxã nüxü̃ nixu nax naxümücüãxü̃ca̱x ga yexguma Tupanaca̱x naxü̃na nadaixgu rü ínaguãgu. Rü yemaacü ga yema Acharóü̃arü ĩnüwaama ügüxü̃ ga yatügü rü nimuetanü ga yema nawe rüxĩxü̃.
Dabí rü Yerucharéü̃wa niña
13Rü wüxi ga duü̃xü̃ rü Dabímaxã nüxü̃ nayarüxu rü ga Iraéanecüã̱xgü rü Acharóü̃weama nax naxĩxü̃.
14Rü yexguma nüma ga Dabí rü nanamu ga guxü̃ma ga norü churaragüeru ga namaxã Yerucharéü̃wa yexmagüxü̃, rü ñanagürü: —¡Ngĩxã ñu̱xmatama tibuxmü! Erü yixcama rü taxucürüwatama Acharóü̃cha̱xwa tibuxmü. ¡Ngĩxã, rü peporaãxẽgü! Erü ngürüãchi tá tüxü̃ nayangau rü chixexü̃ tá tamaxã naxü, rü taramaxã tá tüxü̃ nadai ya guxãma ya ĩanecüã̱x —ñanagürü.
15Rü nümagü ãẽ̱xgacüxü̃ nangãxü̃gagü rü ñanagürügü: —Toma rü ítamemare nax tanaxüxü̃ i ngẽma cuma toxü̃ cumuxü̃, Pa Ãẽ̱xgacüx —ñanagürügü.
16Rü yemaacü ga Dabí rü ínaxũxũ guxü̃ma ga naxma̱xgümaxã rü naxacügümaxã. Rü 10 icatama ga norü ngegü yéma tüxü̃ nawogü nax nüxna tadaugüxü̃ca̱x ga napata.
17Nawena ga nax yaxũxü̃ ga ãẽ̱xgacü guxü̃ma ga natanüxü̃maxã, rü nawa nangugü ga wüxi ga nachica ga ĩanearü yáxü̃wa yexmaxü̃.
18Rü naxü̃tawa nayexmagü ga guxü̃ma ga norü churaragüerugü. Rü yoxni ga yema Queretéugü rü Peretéugü ga ãẽ̱xgacüarü dauruü̃gü ixĩgüxü̃ rü yema 600 ga Yetéugü ga ĩane ga Gáxwa nawe rüxĩxü̃, rü ãẽ̱xgacüpe̱xewa nachopetü.
19Rü nüma ga ãẽ̱xgacü ga Dabí rü Itái ga Gáxcüã̱xü̃ ñanagürü: —¿Tü̱xcüü̃ towe curüxũ i cuma? Rü name nixĩ i cutaegu rü ngẽma ngexwaca̱xü̃xü̃ i ãẽ̱xgacümaxã cungexma. Erü cumax rü to i nachixü̃anecüã̱x quixĩ rü cuchixü̃anewa cuxü̃ ínata̱xüchigü.
20Cuma rü ĩnetama nua cungu ¿Rü ñuxãcü chi i cuxna naxca̱x chacaxü̃ nax towe curüxũxü̃ca̱x ega woo i choma rü tama nüxü̃ chacua̱xgu nax ngextá chaxũxü̃? Rü ngẽmaca̱x narümemae nax cutaeguxü̃ rü ícuyagagüxü̃ i ngẽma cutanüxü̃. ¡Rü Tupana cuxü̃ rüngü̃xẽxẽ̱x rü guxü̃guma cuxü̃tawa nangẽxma! —ñanagürü.
21Rü nüma ga Itái rü ãẽ̱xgacüxü̃ nangãxü̃ rü ñanagürü: —Cori ya Tupanaégagu rü cuégagu, Pa Ãẽ̱xgacüx, nüxü̃ chixu rü ngextá cumax, Pa Ãẽ̱xgacüx, ícungexmaxü̃wa rü woo chamaxü̃gu rüe̱xna ngẽxma chayu̱xgu rü ngéma tá changexma i choma nax curü duü̃xü̃ chixĩxü̃ —ñanagürü.
22Rü yemaxü̃ naxĩnügu ga Dabí rü ñanagürü nüxü̃: —¡Ẽcü towe rüxũ! —ñanagürü. Rü nüma ga Itái rü Dabíwe narüxũ wüxigu namaxã ga guxü̃ma ga noxrü churaragü rü norü duü̃xü̃gü ga íyaxümücügüxü̃.
23Guxü̃ma ga duü̃xü̃gü rü poraãcü naxauxe. Rü nichoü̃ ga yema natüxacü ga Chedróü̃, rü yemawena rü nixüe ga nüma ga ãẽ̱xgacü. Rü guxü̃ma ga duü̃xü̃gü rü nape̱xegu naxĩ nagu ga yema nama ga chianexü̃wa nadaxü̃.
24Rü yexgumarüxü̃ ta ga chacherdóte ga Chadóx rü guxü̃ma ga Lebítanüxü̃maxã ãẽ̱xgacüwe narüxĩ. Rü nayangegü ga yema baú ga Tupanaarü mugüchixü̃. Rü yema baú rü Abiatáxü̃tagu nanaxǘgü, rü nüma rü Tupanaca̱x ãmare nigu ñu̱xmata ínachoxü̃ ga guxü̃ma ga duü̃xü̃gü nawa ga guma ĩane.
25Natürü nüma ga ãẽ̱xgacü rü Chadóxü̃ ñanagürü: —¡Ĩaneca̱x nataegu rü íyange i ngẽma Tupanaarü mugüchixü̃ i baú! Rü ngẽxguma Cori ya Tupana choxü̃ rüngü̃xẽẽgu, rü tá choxü̃ natáeguxẽxẽ, rü wena tá nüxü̃ chadau i ngẽma baú rü ngẽma nachica i nagu naxüxü̃.
26Natürü ngẽxguma tá chomaxã nüxü̃ yaxugu nax tama chomaxã nataãẽxü̃, rü nua tátama changexma. Rü name i ngẽma nüma nanaxwa̱xexü̃ chomaxã naxü —ñanagürü.
27Rü nüma ga ãẽ̱xgacü rü chacherdóte ga Chadóxü̃ ñanagürü: —¡Dücax, cuma rü ñu̱xũchi Abiatá rü mea ĩaneca̱x pewoegu namaxã i ngẽma taxre i penegü, rü cuma namaxã i cune i Aimaá, rü Abiatá namaxã i nane i Yonatáü̃!
28Natürü i choma rü yoxni chianexü̃arü doxonexü̃wa tá changexma ñu̱xmata tá pechigaxü̃ chacuá —ñanagürü.
29Rü nüma ga Chadóx rü ñu̱xũchi Abiatá rü Yerucharéü̃waarü nanangegü ga yema Tupanaarü baú rü ñu̱xũchi yexma narüxcho.
30Dabí rü nawa ínaxüãchi ga guma ma̱xpǘne ga Oribunecügu ãégane rü nangearü chapatuã̱x rü nixaxünechigü rü nügü natüeru yerü ngúxü̃ ninge. Rü guxü̃ma ga yema duü̃xü̃gü ga íyaxümücügüxü̃ rü ta nügü nidüxgüeru, rü naxauxeãcüma ínachoõchi nawa ga guma ma̱xpǘne.
31Rü yexguma Dabímaxã nüxü̃ yaxugüegu ga Aitópe rü Acharóü̃arü ĩnüwaama üxü̃, rü nüma ga Dabí rü Cori ya Tupanana naca nax nagu yanachixexẽẽãxü̃ca̱x ga yema Aitópe nagu rüxĩnüxü̃.
32Rü yexguma Dabí nachitaeruwa nguxgu ga guma ma̱xpǘne ga ngextá Tupanaxü̃ íyacua̱xüü̃güxü̃wa, rü yéma naxca̱x inayago ga Uchái ga Arquítanüxü̃ ga nügü rügáutechiruxü̃ rü waixü̃mümaxã buxeruxü̃.
33Rü nüma ga Dabí rü ñanagürü nüxü̃: —Ngẽxguma chowe curüxũxgu rü choxü̃́ wüxi i guxchaxü̃ tá quixĩ.
34Natürü chanaxwa̱xe i Yerucharéü̃ca̱x cutaegu rü Acharóü̃maxã nüxü̃ quixu rü ñacurügü nüxü̃: “Pa Ãẽ̱xgacüx, choma i curü duü̃xü̃ rü cuxü̃́ chapuracüchaü̃ ü̃parüü̃tama yema curü papaaxü̃́ chapuracüxü̃rüxü̃”, ñacurügü. Rü ngẽxguma ngẽmaãcü namaxã nüxü̃ quixuxgu rü tá choxü̃ curüngü̃xẽxẽ nax yanaxoxü̃ca̱x i ngẽma Aitópearü ucu̱xẽ.
35Rü ngéma nangẽxmagü i chacherdótegü i Chadóx rü Abiatá. Rü ngẽmaca̱x chanaxwa̱xe i guxü̃guma namaxã nüxü̃ quixu i guxü̃ma i dexa i nüxü̃ cuxĩnüxü̃ i ãẽ̱xgacüpatawa nüxü̃ yaxugüxü̃.
36Rü ngéma nangẽxmagü ta i ngẽma chacherdótegü nanegü i Aimaá rü ñu̱xũchi Yonatáü̃. Rü chanaxwa̱xe i ngẽmagümaxã ta nüxü̃ quixu nax ngẽmagü nüxí chomaxã nüxü̃ yarüxugüxü̃ca̱x —ñanagürü ga Dabí.
37Rü nüma ga Uchái ga Dabímücü rü Yerucharéü̃wa nangu. Rü yematama oragu nixĩ ga Acharóü̃ rü ta nagu naxücuxü̃ ga guma ĩane.
Currently Selected:
2 Chamué 15: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
