2 Chamué 14
14
Yoá rü Acharóü̃xü̃ nataeguxẽxẽ
1-2Yoá ga Cheruiá nane rü nüxü̃ nacua̱x nax poraãcü Dabíaxü̃́ natauxchicaxü̃ ga nane ga Acharóü̃. Rü yemaca̱x ga nüma ga Yoá rü ngĩxca̱x nangema ga wüxi ga ngecü ga Tecóacüã̱x ga womüxẽẽxü̃ cua̱xüchicü. Rü ngĩxü̃ ñanagürü: —¡Rü cugü nangechaxü̃xẽxẽneta rü naxchiru i waxü̃gu icu̱x, rü ngexrüma i pumaramaxã cugü cuyixemaxü̃! ¡Rü ñoma ñuxgumama ngechaü̃ cuxü̃́ ngúxü̃rüxü̃ cugü ixĩxẽxẽ!
3¡Rü ñu̱xũchi ãẽ̱xgacüxü̃tawa naxũ, rü namaxã nüxü̃ rüxu i ngẽma ñu̱xma tá cumaxã nüxü̃ chixuxü̃rüü̃tama! —ñanagürü ngĩxü̃. Rü Yoá rü ngĩxca̱x nüxü̃ naxǘ ga yema ãẽ̱xgacümaxã tá nüxü̃ yaxuxü̃.
4Rü ngĩma ga ngecü ga Tecóacüã̱x rü ãẽ̱xgacü ga Dabíxü̃tawa ixũ rü nape̱xegu iyangücuchi ñu̱xmata waixü̃müwa yaxũcatü. Rü yemaacü nüxü̃ inawe̱x nax aixcüma naga naxĩnüxü̃. Rü nüxü̃ ngĩgürügü: —¡Choxü̃ rüngü̃xẽxẽ, Pa Ãẽ̱xgacüx! —ngĩgürügü.
5-6Rü nüma ga ãẽ̱xgacü rü ngĩxna naca rü ñanagürü ngĩxü̃: —¿Ta̱xacü cuxü̃ nangupetü? —ñanagürü ngĩxü̃. Rü ngĩma rü inangãxü̃ rü ngĩgürügü: —Choma rü ngecü i yutecü chixĩ erü chaute rü marü nayu. Rü yema taxre ga chaunegü ga choxü̃́ yexmaxü̃ i choma nax curü puracütanüxü̃ chixĩxü̃, Pa Ãẽ̱xgacüx, rü naanegu nügü nadai. Rü tataxuma ga texé nax nüxna chogüxü̃ rü yemaacü ga wüxi rü naenexẽxü̃ nayapi̱xẽxẽ rü nayama̱xü̃chi.
7Rü ngẽmaca̱x i ñu̱xma i guxü̃ma i chautanüxü̃ rü chauxchi naxaixe rü nanaxwa̱xegü nax nüxna chanamuxü̃ ya yimá naenexẽxü̃ imácü, nax ngẽmaãcü yama̱xgüãxü̃ca̱x rü yangutanüxü̃ca̱x ga gumá naenexẽ ga yamáãcü. Rü ngẽmaãcü nayama̱xgüchaü̃ ya yimá chaune ya nügümaxã wüxicacü ya nüxna naxücü i guxü̃ma i chorü ngẽmaxü̃gü. Rü ngẽmaãcü inayanaxoxẽẽgüchaü̃ ya yimá chaune ya nüxicatama choxü̃́ íyaxücü. Rü ngẽxguma ya chaute rü tá nangetaxa rü tá inayarüxo i nape̱xexéga i ñoma i naanewa —ngĩgürügü nüxü̃.
8Rü yexguma ga ãẽ̱xgacü rü ngĩxü̃ nangãxü̃ ga yema nge rü ñanagürü: —¡Cupataca̱x nataegu! Rü choma rü tá chanamu nax cuxü̃ nangü̃xẽẽgüxü̃ca̱x —ñanagürü.
9Rü ngĩma ga ngecü rü inangãxü̃ rü ngĩgürügü: —Pa Chorü Ãẽ̱xgacüx, Pa Chorü Corix, rü ngẽxguma texé yacuguãchixẽẽgu i ngẽma guxchaxü̃, rü name nixĩ i chauétügu rü chautanüxü̃étügu nangu rü tama cuétügu rü tama curü duü̃xü̃güétügu nangu, Pa Ãẽ̱xgacüx —ngĩgürügü.
10Rü nüma ga ãẽ̱xgacü rü ngĩxü̃ nangãxü̃ rü ñanagürü: —Ngẽma duü̃xü̃ i cuxü̃ ãxũnexü̃, ¡rü nua chauxü̃tawa naga nax ngẽmaãcü tama wena cuxü̃ nachiewexü̃ca̱x! —ñanagürü.
11Natürü ga ngĩma rü nüxna iyacachigüama rü ngĩgürügü: —Cuxna naxca̱x chaca, Pa Ãẽ̱xgacüx, nax curü Cori ya Tupanana cucaxü̃ nax tama chaunexü̃ yamáxü̃ i ngẽma chautanüxü̃ i naxütanüchaü̃xü̃ ya yimá chaune ya yucü. Erü ngẽxguma yamáagu ya yimá nai ya chaune rü tá nayexera i ngẽma guxchaxü̃ —ngĩgürügü. Rü nüma ga ãẽ̱xgacü rü aixcüma ngĩmaxã nüxü̃ nixu rü ñanagürü: —Cori ya Tupanape̱xewa cumaxã nüxü̃ chixu rü bai tá i wüxi i nayae i waixü̃mügu nguxü̃ ya yima cune —ñanagürü.
12Natürü ga ngĩma ga yema nge rü iyadexachigüama rü ngĩgürügü: —¡Choxü̃ naxüchica, Pa Ãẽ̱xgacüx, i choma nax curü puracütanüxü̃ chixĩxü̃! Rü ñuxica wüxi i dexaxü̃ cumaxã chixuxchaü̃ —ngĩgürügü. Rü nüma ga ãẽ̱xgacü rü ngĩxü̃ ñanagürü: —¡Ẽcü, idexa! —ñanagürü.
13Rü yexguma ga yema nge rü íica rü ngĩgürügü: —Pa Ãẽ̱xgacüx, ¿Tü̱xcüü̃ nagu curüxĩnü nax cunaxüxü̃ i ngẽmatama guxchaxü̃ nape̱xewa i Tupanaarü duü̃xü̃gü i Iraétanüxü̃? Cugünatama nixĩ i guxchaxü̃ cuxãxü̃ erü nüxna cunachu̱xu nax nataeguxü̃ ya yimá cune ya to i naanewa ngẽxmacü.
14Rü aixcüma nixĩ nax guxãtáma yuexü̃. Erü tórü maxü̃ rü ñoma dexá i waixü̃müanegu baxü̃rüxü̃ nixĩ nax taxucürüwama wena nayaxuxü̃. Natürü nüma ya Tupana rü taxúenama nanayaxu i maxü̃, natürü tüxü̃́ nanatauxchaxẽxẽ nax tataeguxü̃ca̱x ya yíxema nüxna yáxü̃guxe.
15Ñu̱xma nax nua cuxü̃tawa chaxũxü̃ rü cumaxã nüxü̃ chayarüxu, Pa Ãẽ̱xgacüx Pa Chorü Corix, erü ngẽma duü̃xü̃gü rü choxü̃ namuü̃xẽẽgü. Rü ngẽmaca̱x i chomax nax curü duü̃xü̃ chixĩxü̃ rü cumaxã chayarüdexa, erü ngürüãchi tá choxü̃́ cunayaxu i ngẽma cuxna naxca̱x chacaxü̃.
16Rü ngẽxguma, Pa Ãẽ̱xgacüx, cuma choxü̃ curüngü̃xẽẽgu, rü tá naxme̱xwa toxü̃ ícunguxü̃xẽxẽ i ngẽma chaunexü̃ rü choxü̃ rüxoxẽẽchaü̃xü̃ i ñaa Tupanaarü naanewa.
17Rü chomax nax curü duü̃xü̃ chixĩxü̃ rü íchayanguxẽxẽ i ngẽma curü ngãxü̃, Pa Ãẽ̱xgacüx, nax choxü̃ nataãẽxẽẽxü̃ca̱x, erü cumax, Pa Ãẽ̱xgacüx, rü ñoma wüxi i daxũcüã̱x i Tupanaarü orearü ngeruxü̃rüxü̃ nüxü̃ cucua̱x nax ngexü̃rüüxü̃ yixĩxü̃ i mexü̃ rü chixexü̃. ¡Rü Cori ya Tupana cuxü̃tawa ngexma̱x, Pa Ãẽ̱xgacü! —ngĩgürügü.
18Rü nüma ga ãẽ̱xgacü rü yema ngecüxü̃ nangãxü̃ rü ñanagürü: —Chanaxwa̱xe nax taxuxü̃táma iquicúxü̃ i ngẽma cuxna naxca̱x chacaxü̃ —ñanagürü. Rü ngĩma ga yema nge rü inangãxü̃ rü: —¡Idexa Pa Ãẽ̱xgacüx! —ngĩgürügü.
19Rü yexguma ga nüma ga ãẽ̱xgacü rü ngĩxna naca rü ñanagürü: —¿Aixcüma yixĩxü̃ nax Yoá cuxü̃ muxü̃ nax cunaxüxü̃ca̱x i guxü̃ma i ñaa? —ñanagürü. Rü ngĩma ga yema nge rü inangãxü̃ rü ngĩgürügü: —Cupe̱xewa nüxü̃ chixu, Pa Ãẽ̱xgacüx, rü aixcüma nixĩ i ngẽma cuma nüxü̃ quixuxü̃. Rü Yoá i curü churaragüeru nixĩ i choxü̃ muxü̃ nax nua chaxũxü̃. Rü nüma nixĩ i chomaxã nüxü̃ yaxuxü̃ i guxü̃ma i ñaa ore i cumaxã nüxü̃ chixuxü̃.
20Natürü ngẽma naxü erü nanaxwa̱xe nax iyanawe̱xãchixü̃ i guxchaxü̃gü. Rü cumax, Pa Ãẽ̱xgacüx, rü cua̱x cuxü̃́ nangẽxma, rü ñoma wüxi i Tupanaarü orearü ngeruxü̃ i daxũcüã̱xrüxü̃ nüxü̃ cucua̱x i ngẽma ñaa nachixü̃anewa ngupetüxü̃ —ngĩgürügü.
21Rü ñu̱xũchi nüma ga ãẽ̱xgacü rü Yoáca̱x naca rü ñanagürü: —Dücax, marü chanamexẽxẽ i ngẽma guxchaxü̃. ¡Rü inaxũãchi rü íyadau ya ngextü̱xücü ya Acharóü̃ rü nataeguxẽxẽ! —ñanagürü.
22Rü yexguma ga nüma ga Yoá rü ãẽ̱xgacüpe̱xegu nayangücuchi ñu̱xmata waixü̃müwa yaxũcatü yerü ãẽ̱xgacüga naxĩnü. Rü mexü̃ ãẽ̱xgacümaxã naxuegu rü ñanagürü nüxü̃: —Ñu̱xmawaxi nixĩ i nüxü̃ chacuáxü̃ nax ãẽ̱xgacüarü ngü̃xẽxẽ choxü̃́ ngẽxmaxü̃, erü nüma ya ãẽ̱xgacü rü marü nayanguxẽxẽ i ngẽma daa norü ngü̃xẽẽruxü̃ nüxna naxca̱x ca̱a̱xü̃ —ñanagürü nüxü̃.
23Rü yexgumatama inachi ga Yoá rü inaxũãchi nax Yechúxwa naxũxü̃ nax Acharóü̃xü̃ yagaxü̃ca̱x nax Yerucharéü̃wa nagaãxü̃ca̱x.
24Natürü nüma ga ãẽ̱xgacü rü Yoáxü̃ namu nax noxtacüma napatawatama nangu̱xẽẽãxü̃ca̱x ga Acharóü̃. Rü tama nanaxwa̱xe nax ãẽ̱xgacüpatawa nangu̱xẽẽãxü̃. Rü yemaca̱x wüxicana napatawatama nangu rü tama ãẽ̱xgacüxü̃ nadau.
25Rü guxü̃ma ga Iraéanecüã̱xgütanüwa rü nataxuma ga wüxi ga yatü ga Acharóü̃rüxü̃ norü meca̱x duü̃xü̃gü nüxü̃ yacua̱xüü̃güxü̃. Rü nacutügüwa inaxügü rü ñu̱xmata naeruwa nangu nax taxuwama ngextá nachixexü̃.
26Rü wüxichigü ga taunecüarü gu̱xgu rü nügü niyoeru yerü nanachixewe ga nayae. Rü yema nayae rü taxre ga quíruarü yexera naya ga yexguma ãẽ̱xgacüarü ngugüruxü̃wa inayaxgu.
27Rü nüma ga Acharóü̃ rü nüxü̃́ nayexma ga tomaepü̱x ga nanegü, rü wüxi ga naxacü. Rü Tamára nixĩ ga ngĩéga rü imechametüxüchi.
28-29Rü Acharóü̃ rü taxre ga taunecü Yerucharéü̃wa nayexma, natürü taguma nüxü̃́ natauxcha nax ãẽ̱xgacüxü̃tawa naxũxü̃. Rü yemaca̱x Yoána naca nax ãẽ̱xgacüna naca̱xü̃ca̱x nax naxü̃tagu naxũaneãxü̃ca̱x, natürü nüma ga Yoá rü tama yéma naxũxchaü̃. Rü nüma ga Acharóü̃ rü wena norü taxree̱xpü̱xcüna Yoána naxca̱x naca nax yéma naxũxü̃ca̱x, natürü nüma ga Yoá rü yexguma rü ta tama yéma naxũxchaü̃.
30Rü yemaca̱x ga Acharóü̃ rü norü puracütanüxü̃xü̃ namu rü ñanagürü: —Ngẽma Yoáarü naane rü chorü naanearü ngaicamana nangẽxma, rü chebádamaxã nanato ¡Rü ngéma pexĩ rü nüxü̃́ nawa penangĩxichi! —ñanagürü. Rü Acharóü̃arü puracütanüxü̃ rü inaxĩãchi rü Yoáarü naanewa nayangĩxichigü.
31Rü nüma ga Yoá rü yexgumatama Acharóü̃patawa naxũ rü nüxna nayaca rü ñanagürü: —¿Ta̱xacüca̱x chauane nigugü i curü puracütanüxü̃? —ñanagürü.
32Rü nüma ga Acharóü̃ rü nanangãxü̃ rü ñanagürü: —Chorü duü̃xü̃güxü̃ cumaxã nüxü̃ charüxuxẽxẽ nax nua chauxü̃tawa cuxũxü̃ca̱x nax ngẽmaãcü ãẽ̱xgacüxü̃tawa cuxü̃ chamuxü̃ca̱x, rü namaxã nüxü̃ cuyarüxuxü̃ca̱x i ñaa chorü ore nax ta̱xacüca̱x yixĩxü̃ nax Yechúxwa cha̱u̱xca̱x ínaxũxü̃ nax nua choxü̃ naxũxẽẽxü̃. Rü ngẽma rümemaexü̃chixü̃ nixĩ nax Yechúxwatama changexmaxü̃. Choma rü ãẽ̱xgacüxü̃ chadauxchaü̃. Rü ngẽxguma chi ta̱xacürü chixexü̃ chauétüwa ngẽxmagu, rü name nixĩ i choxü̃ nima̱x —ñanagürü.
33Rü yexguma ga Yoá rü ãẽ̱xgacüxü̃tawa naxũ rü nüxü̃ narüxu ga Acharóü̃arü dexa. Rü nüma ga ãẽ̱xgacü rü Acharóü̃ca̱x nangema. Rü yexguma ãẽ̱xgacüpe̱xewa nanguxgu ga Acharóü̃ rü ãẽ̱xgacüpe̱xegu nayangücuchi ñu̱xmata waixü̃müwa yaxũcatü. Rü nüma ga ãẽ̱xgacü rü wüxi ga chúxumaxã nanayaxu.
Currently Selected:
2 Chamué 14: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
