1 Chamué 15

Cori ya Tupana rü Chaúxü̃ naxo

1Rü wüxi ga ngunexü̃gu rü Chamué rü Chaúxü̃ ñanagürü: —Nüma ga Cori ya Tupana nixĩ ga choxü̃ namuxü̃ nax chíxü̃maxã cuxü̃ chabaeruxü̃ca̱x nax yemaacü Iraéanecüã̱xgüarü ãẽ̱xgacü quixĩxü̃ca̱x. ¡Rü ngẽmaca̱x irüxĩnü i ngẽma Cori ya Tupana cumaxã nüxü̃ ixuxü̃!

2Rü ñanagürü ya Cori ya Tupana ya Guxãétüwa Ngẽxmacü: “Chanapoxcu tá i ngẽma Amaréxtanüxü̃ naxca̱x ga yema Iraétanüxü̃maxã naxügüxü̃, yerü yexguma Equítuanewa ínachoxü̃gu rü tama norü naanewa nanachopetüxẽẽchaü̃.

3Rü ngẽmaca̱x ¡ngéma naxũ rü nadai i guxü̃ma i ngẽma Amaréxtanüxü̃ guxü̃ma i norü ngẽmaxü̃maxã, rü taxũtáma cuxü̃́ nangechaütümüxü̃gü! ¡Rü nadai i yatüxü̃gü, rü ngexü̃gü, rü buxü̃gü, rü õxchanagü! ¡Rü ngẽxgumarüxü̃ ta nadai i norü wocagü, rü carnérugü, rü caméyugü, rü búrugü! ¡Rü bai tá i wüxi ícuyaxüxẽẽxü̃!” ñanagürü ga Cori ya Tupana —ñanagürü ga Chamué.

4Rü nüma ga Chaú rü guxü̃ma ga duü̃xü̃güca̱x nangema rü Teraíü̃gu nanangutaque̱xexẽxẽ. Rü 200,000 ga churaragü nixĩ ga ixĩmarexü̃. Rü yemaétüwa nayexma ga 10,000 ga yatügü ga Yudátanüxü̃ ixĩgüxü̃ ga yexma ngutaque̱xegüxü̃.

5-6Yexguma ga Chaú rü Amaréxarü ĩane ya taxü̃newa naxũ, rü guma ĩanearü doxonexü̃wa nangu. Rü yéma nicu̱xgü nax naxca̱x íyaxü̃ãchixü̃ca̱x. Rü Quenéutanüxü̃xü̃ ñanagürü: —¡Pixĩgachitanü, rü ípechoxü̃ natanüwa i ngẽma Amaréxtanüxü̃ nax tama wüxigu namaxã pexü̃ tadaixü̃ca̱x yerü ga pema rü mea penayaxu ga yema Iraétanüxü̃ ga yexguma Equítuanewa ínachoxü̃gu! —ñanagürü. Rü nüma ga Quenéutanüxü̃ rü nüxna nixĩgachitanü ga yema Amaréxtanüxü̃.

7Rü yexguma ga Chaú rü yema Amaréxtanüxü̃xü̃ nadai. Rü nüma ga Chaú rü Abiráwa inaxügü nax nadaiaxü̃ ñu̱xmata Chúxanewa nangu ga Equítuanearü üyeanewa.

8Rü nayayauxgü ga gumá norü ãẽ̱xgacü ga Agáx. Rü norü taramaxã nanadai ga guxü̃ma ga norü churaragü.

9Natürü nüma ga Chaú rü yema norü churaragü rü tama nayama̱xgü ga gumá Amaréxtanüxü̃arü ãẽ̱xgacü ga Agáx. Rü tama nanadai ga yema rümemaegüxü̃ ga carnérugü, rü wocagü, rü wocaxacügü. Rü tama ínanagu ga yema Amaréxtanüxü̃arü yemaxü̃gü ga itatanüxü̃. Rü yema yemaxü̃gü ga taxuwama imexü̃xicatama nixĩ ga yema ínaguxü̃.

10Rü yemawena ga Cori ya Tupana rü Chamuémaxã nidexa rü ñanagürü:

11—Choxü̃́ nangu̱x ya Chaú nax ãẽ̱xgacüxü̃ nüxü̃ chaxunetaxü̃ erü choxna nixũgachi rü tama nayanguxẽxẽ i ngẽma chanamuxü̃ —ñanagürü. Rü nüma ga Chamué rü poraãcü naãxẽwa nangu̱x ga yema. Rü Cori ya Tupanaxü̃ nachixewe ga guxü̃ma ga yema chütaxü̃gu.

12Rü moxü̃ãcü pa̱xmama ga tauta yangóonegu, rü nüma ga Chamué rü inaxũãchi nax Chaúca̱x yadauxü̃. Natürü ga duü̃xü̃gü rü Chamuémaxã nüxü̃ nixugüe ga Chaú rü ĩane ga Carméxwa naxũxü̃ nax yéma íyanadaxẽẽãxü̃ca̱x ga wüxi ga nutapüta ga norü poramaearü cua̱xruxü̃, rü ñu̱xũchi Guirigáwa naxũxü̃.

13Rü yexguma yemaxü̃ nacua̱xgu ga Chamué rü Chaúca̱x nayadau rü düxwa yema ínayexmaxü̃wa nangu. Rü nüma ga Chaú rü nüxü̃ narümoxẽ rü ñanagürü nüxü̃: —¡Cori ya Tupana cuxü̃ rüngü̃xẽxẽ! Rü marü chayanguxẽxẽ i ngẽma Cori choxü̃ muxü̃ —ñanagürü.

14Rü nüma ga Chamué nanangãxü̃ rü ñanagürü: —¿Texéarü nixĩ i ngẽma carnérugü i ngéma iwáichaxü̃, rü ngẽma wocagü i ngéma icagüxü̃ i nüxü̃ chaxĩnüxü̃? —ñanagürü.

15Rü nüma ga Chaú rü nanangãxü̃ rü ñanagürü: —Ngẽma chorü churaragü rü ínayaxügüxẽxẽ i ngẽma rümemaexü̃ i carnérugü, rü wocagü. Natürü Cori ya curü Tupanaca̱x tá tanadai. Rü guxü̃ma i ngẽma togü i naxü̃nagü i Amaréxtanüxü̃arü rü marü tanadai —ñanagürü.

16Rü nüma ga Chamué rü Chaúxü̃ ñanagürü: —¡Dücax, irüxĩnü i ngẽma ngewa̱x chütacü Tupana chomaxã nüxü̃ ixuxü̃! —ñanagürü. Rü nüma ga Chaú rü ínaca rü ñanagürü: —¿Ñuxũ ñaxü̃ cuxü̃? —ñanagürü.

17Rü nüma ga Chamué rü nanangãxü̃ rü ñanagürü: —Yexguma cugügu curüxĩnügu ga taxuwama nax cumexü̃, rü nüma ga Tupana rü cuxü̃ nayaxu ga Iraéanecüã̱xgüarü ãẽ̱xgacü nax quixĩxü̃ca̱x.

18Rü yexguma rü cuxca̱x choxna naxãga nax cuyada̱i̱xü̃ca̱x i guxü̃ma i ngẽma Amaréxtanüxü̃ i chixexü̃gu imaxẽxü̃ rü taxuxü̃táma nax ícuyaxüxẽẽxü̃ca̱x.

19¿Rü ñu̱xma ta̱xacüca̱x tama Tupanaga cuxĩnü? ¿Rü tü̱xcüü̃ cuñuxãẽ nax cunadexü̃ i ngẽma ngẽmaxü̃gü ya Tupana cuxna chu̱xuxü̃ rü tama cunaxü i ngẽma cuxü̃ namuxü̃? —ñanagürü.

20Rü nüma ga Chaú rü nanangãxü̃ rü ñanagürü: —Choma rü Cori ya Tupanaga chaxĩnü, rü chayanguxẽxẽ ga guxü̃ma ga yema choxü̃ namuxü̃. Rü gumá Agáx ga Amaréxtanüxü̃arü ãẽ̱xgacü ga chiyaxucü rü nua chanaga, rü marü chanadai ga guxü̃ma ga yema togü ga Amaréxtanüxü̃.

21Rü yema churaragü nixĩ ga nadexü̃ ga yema rümemaegüxü̃ ga carnérugü rü wocagü rü yemaxü̃gü nax Guirigáwa Tupanaca̱x ínaguaxü̃ca̱x —ñanagürü.

22Rü nüma ga Chamué rü ínaca rü ñanagürü: —¿Ta̱xacü nixĩ i ngẽma rümemaexü̃ cuxca̱x? ¿Rü cuxca̱x rü ngẽma naxü̃nagü Tupanaca̱x iguxü̃ rüe̱xna Tupanaga nax ixĩnüexü̃? Rü dücax rü ngẽma Tupana yexera namaxã taãẽxü̃ nixĩ nax naga ixĩnüexü̃, rü tama carnérugüarü chíxü̃ naxca̱x nax iguxü̃.

23Rü yíxema tama Tupanaga ĩnüxe rü ñomatama tayuüxü̃rüxü̃ poraãcü chixexü̃ taxü i Tupanape̱xewa. Rü yíxema chixri Tupanaga ĩnüxe rü ñomatama tupananetaxü̃ ticua̱xüü̃rüxü̃ chixexü̃ taxü. Rü dücax, rü ñu̱xma nax nüxü̃ cuxoxü̃ i norü mugü, rü nüma ya Tupana rü cuxü̃ naxo nax Iraéanecüã̱xgüarü ãẽ̱xgacü quixĩxü̃ —ñanagürü ga Chamué.

24Yexguma ga Chaú rü Chamuéxü̃ ñanagürü: —Rü aixcüma pecadu chaxü. Rü tama naga chaxĩnü i ngẽma Cori ya Tupanaarü mu rü curü ucu̱xẽgü, yerü nüxü̃ chamuü̃ ga duü̃xü̃gü rü yemaca̱x naga chaxĩnü rü chanaxü ga yema nüma choxna naxca̱x nacagüxü̃.

25Natürü i choma rü cuxna naxca̱x chaca nax choxü̃́ nüxü̃ icurüngümaxü̃ca̱x i ngẽma chixexü̃ i chaxüxü̃. Rü chanaxwa̱xe i chomaxã cutaegu nax Cori ya Tupanaxü̃ yarücua̱xüü̃güxü̃ca̱x —ñanagürü.

26Rü Chamué nanangãxü̃ rü ñanagürü: —Taxũtáma cuwe chataegu erü cuma rü nüxü̃ cuxo i Cori ya Tupanaarü mu, rü ñu̱xma i nüma rü ta cuxü̃ naxo nax Iraétanüxü̃arü ãẽ̱xgacü quixĩxü̃ —ñanagürü.

27Rü Chamué rü nadaueguãchi nax íyaxũxü̃, natürü ga Chaú rü naxchirupechinüwa nichü̱xüxü rü nanagáuxchiruxẽxẽ.

28Rü yexguma ga Chamué rü Chaúxü̃ ñanagürü: —Ñu̱xmatatama nixĩ i cuxna naya̱u̱xãxü̃ nax Iraétanüxü̃arü ãẽ̱xgacü quixĩxü̃, rü tá to i Iraétanüxü̃ i cuxü̃ rü yexera rümemaexü̃na nanaxã.

29Erü yimá Tupana ya Iraétanüxü̃maxã poracü rü tama nidora, rü taguma nanaxüchicüxü i ngẽma nagu naxĩnüxü̃ erü tama wüxi i duü̃xü̃marerüxü̃ nixĩ —ñanagürü.

30Rü Chaú rü Chamuéxü̃ ñanagürü: —Nüxü̃ chacua̱x nax choma rü chixexü̃ chaxüxü̃, natürü cuxü̃ chachixewe nax ngẽma Iraéanearü ãẽ̱xgacügüpe̱xewa rü ñu̱xũchi guxü̃ma i duü̃xü̃güpe̱xewa choxü̃ cucuáxü̃ nax Iraéanearü ãẽ̱xgacü chixĩxü̃. ¡Rü ngẽmaca̱x chowe rüxũ nax nüxü̃ yarücua̱xüü̃güxü̃ca̱x i curü Cori ya Tupana! —ñanagürü.

31Rü nüma ga Chamué rü nanayaxu nax Chaúwe naxũxü̃. Rü yemaacü ga Chaú rü Tupanaxü̃ nicua̱xüxü̃.

32Rü yemawena rü nüma ga Chamué rü ñanagürü: —¡Chauxü̃tawa penaga i Agáx i Amaréxtanüxü̃arü ãẽ̱xgacü! —ñanagürü. Rü yexguma Chamuépe̱xewa nagagüã̱xgu, rü nüma ga Agáx rü taãẽãcü yéma naxũ yerü nagu naxĩnügu rü marü nangupetü nax yama̱xgüchaü̃ãxü̃.

33Natürü nüma ga Chamué rü ñanagürü: —Cuma rü curü taramaxã muxẽma ga ngexegü tüxü̃ cugu̱xacüxẽxẽ, rü ngẽma ngexü̃gürüxü̃ tá tixĩ ya cué —ñanagürü ga Chamué. Rü yexgumatama Guirigágu Tupanape̱xegu ãgümücügu Agáxü̃ nachexü̃gü ga Chamué.

34Rü yemawena ga Chamué rü norü ĩane ga Ramáwa naxũ. Rü nüma ga Chaú rü nachiü̃ca̱x nataegu ga Guibeáwa.

35Rü nüma ga Chamué rü taguma wena Chaúxü̃ nadau, natürü naxca̱x naxauxecha, yerü Tupanaaxü̃́ nangu̱x nax Chaúxü̃ Iraéanecüã̱xgüarü ãẽ̱xgacüwa nanguxẽẽxü̃.

Currently Selected:

1 Chamué 15: tcaP

Highlight

Copy

Compare