1 Chamué 11
11
Chaú rü Amóü̃tanüxü̃xü̃ narüporamae
1Rü nüma ga Amóü̃tanüxü̃arü ãẽ̱xgacü ga Naáx rü norü churaragüxü̃ nangutaque̱xexẽxẽ nax yadaiãcuãxü̃ca̱x ga Iraéanecüã̱xgüarü ĩane ga Yabé ga Garaáxanewa yexmane. Natürü ga yema duü̃xü̃gü ga Yabécüã̱xgü rü ñanagürügü: —¡Tomaxã naxü i wüxi i üga, rü ngẽxguma tá nixĩ i cuxme̱xwa togü tangexmagüxẽẽxü̃! —ñanagürügü.
2Rü nüma ga Amóü̃tanüxü̃arü ãẽ̱xgacü ga Naáx rü nanangãxü̃ rü ñanagürü: —Marü name i pemaxã ichaxüga ega chi pexü̃́ namexgu nax perü tügünexetü chayaxuxü̃ i wüxichigü i pema nax ngẽmaãcü wüxi i cugüruxü̃ pixĩgüxü̃ca̱x i guxãma i pema i Iraéanecüã̱xgü —ñanagürü.
3Rü nüma ga ĩane ga Yabéarü ãẽ̱xgacügü rü nanangãxü̃gü rü ñanagürügü: —¡Toxna naxã i 7 i ngunexü̃ nax naxca̱x tadauxü̃ca̱x i ngü̃xẽxẽ i totanüxü̃ i Iraéanegütanüwa! Rü ngẽxguma chi nataxuxguma i toxü̃ rüngü̃xẽẽxü̃, rü cuxme̱xwa tá togü tangẽxmagüxẽxẽ —ñanagürügü.
4Rü ñuxre ga yema Yabécüã̱x rü guma ĩane ga Guibeá ga Chaú nawa yexmanewa nanangegü ga yema ore. Rü duü̃xü̃gümaxã nüxü̃ nixugüe ga yema Yabéwa ngupetüxü̃. Rü yexguma nüxü̃ naxĩnüegu rü guxü̃ma ga duü̃xü̃gü rü poraãcü naxauxe.
5Rü nüma ga Chaú rü naanewa ne naxũ namaxã ga norü wocagü ga puracüruxü̃. Rü norü duü̃xü̃güna naca rü ñanagürü: —¿Ta̱xacü nüxü̃ nangupetü i duü̃xü̃gü? ¿Ta̱xacüca̱x naxauxe? —ñanagürü. Rü nüma ga norü duü̃xü̃gü rü Chaúmaxã nüxü̃ nixugüe ga yema ore ga yatügü ga Yabécüã̱x yéma ngẽgüxü̃.
6Rü yexguma yema orexü̃ naxĩnügu ga Chaú, rü Tupanaãxẽ nüxna nangu rü poraãcü nanu ga Chaú.
7Rü yexguma ga Chaú rü taxre ga woca niyaxu rü ãgümücügu nagu nanachaxcu. Rü ñu̱xũchi ñuxre ga orearü ngeruü̃gümaxã guxü̃ ga Iraéanecüã̱xgütanüwa nanamu ga yema namachigü. Rü yema orearü ngeruü̃gü rü ñaa orexü̃ nixuetanü: —Ñaatátama tümaarü wocamaxã taxü ya yíxema tama Chaúwe rü Chamuéwe rüxũxchaü̃xe —ñanagürügü. Rü nüma ga duü̃xü̃gü rü poraãcü namuü̃e rü ñoma wüxitama ga yatürüxü̃ inaxĩãchi, rü Chaúwe rü Chamuéwe narüxĩ.
8Rü yexguma Béchexwa Chaú yaxugügu ga norü duü̃xü̃gü ga yexma ngutaque̱xegüxü̃, rü nayexma ga 300,000 ga yatügü ga Iraéanecüã̱xgü rü naétü 30,000 ga Yudáwa ne ĩxü̃.
9Rü yemawena rü yema duü̃xü̃gü ga Yabécüã̱xgü ga orearü ngeruü̃güxü̃ ñanagürü: —¡Namaxã nüxü̃ pixu i duü̃xü̃gü i Yabécüã̱xgü rü moxü̃ tocuchigu tá ngéma tangugü nax ítanapoxü̃xü̃ca̱x! —ñanagürü. Rü yema duü̃xü̃gü rü natanüxü̃ ga Yabécüã̱xgümaxã nüxü̃ narüxugüe ga yema ore. Rü nümagü rü poraãcü nataãẽgüxüchi.
10Rü nüma ga yema Yabéarü ãẽ̱xgacügü rü Amóü̃tanüxü̃arü ãẽ̱xgacü ga Naxamaxã nüxü̃ nayarüxugü, rü ñanagürügü: —Moxü̃ rü tá cuxna togü tana nax cuma cunaxwa̱xexü̃ tomaxã cuxüxü̃ca̱x —ñanagürügü.
11Rü moxü̃ãcü rü nüma ga Chaú rü norü churaragüxü̃ mea ininu, rü tomaepü̱xtücumügu nayayauxye. Rü naxü̃pa ga nax yangóonexü̃ rü norü uanügü ípegüxü̃gu nachocu. Rü nanadai ga guxü̃ma ga Amóü̃tanüxü̃ ñu̱xmata tocuchiwa nangu. Rü yema maxẽxü̃, rü nügümaxã nanawoone, rü yemaca̱x taxuxü̃ma ãmücüxü̃ niña.
12Rü yemawena ga nümaxü̃ ga duü̃xü̃gü rü Chamuéxü̃ ñanagürügü: —¿Texégü tixĩ ya yíxema tama yaxõgüxe nax Chaú yixĩxü̃ ya mecü nax tórü ãẽ̱xgacü yixĩxü̃? ¡Rü toxna penamugü i ngẽma yatügü nax tanada̱i̱xü̃ca̱x! —ñanagürügü.
13Natürü nüma ga Chaú rü naétüwa nachogü rü ñanagürü: —Ñoma i ngunexü̃gu rü taxúetama tayu, erü Cori ya Tupana rü Iraéanecüã̱xgüxü̃ narüngü̃xẽxẽ nax norü uanüxü̃ naporamaegüxü̃ca̱x —ñanagürü.
14Rü nüma ga Chamué rü guxü̃ma ga Iraéanecüã̱xgüxü̃ ñanagürü: —¡Ngĩxã rü Guirigáwa taxĩ nax ngéma yanangucuchixẽxẽxü̃ca̱x ya tórü ãẽ̱xgacü! —ñanagürü.
15Rü yemaca̱x guxü̃ma ga duü̃xü̃gü ga Iraéanecüã̱xgü rü Guirigáwa naxĩ. Rü yéma Cori ya Tupanape̱xewa Chaúxü̃ ningucuchixẽẽgü nax norü ãẽ̱xgacü yixĩxü̃ca̱x. Rü yemawena rü Tupanaca̱x nayagugü ga ãmaregü ga Tupanaarü ngüxmüxẽẽruü̃gü ixĩgüxü̃. Rü nüma ga Chaú rü guxü̃ma ga nümagü ga Iraéanecüã̱xgü rü poraãcü nataãẽgü.
Currently Selected:
1 Chamué 11: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
