1 Chamué 10
10
Chamué rü chíxü̃maxã Chaúxü̃ nabaeru nax Iraéanecüã̱xgüarü ãẽ̱xgacü yixĩxü̃ca̱x
1Rü yexguma ga nüma ga Chamué rü wüxiwexü̃ ga chíxü̃ nayaxu, rü Chaúxü̃ namaxã nabaeru. Rü ñu̱xũchi nüxü̃ nachúxu rü ñanagürü nüxü̃: —Cori ya Tupana cuxü̃ nayaxu i ñu̱xma nax norü duü̃xü̃gü i Iraéanecüã̱xgüarü ãẽ̱xgacü quixĩxü̃ca̱x. Rü cuma tá namaxã icucua̱x rü norü uanügü i nüxü̃ íchomaeguãchixü̃me̱xẽwa tá ícunanguxü̃xẽxẽ. Rü ngẽma cua̱xruü̃gü i nawa tá nüxü̃ cucuáxü̃ nax aixcüma Cori ya Tupana cuxü̃ unetaxü̃ nax norü duü̃xü̃gü i Iraéanecüã̱xgüarü ãẽ̱xgacü nax quixĩxü̃, rü ñaagü tá nixĩ.
2Rü ñu̱xma nax choxna íquixũxü̃ rü Bẽyamíü̃anewa i ĩane i Chéchawa tá nüxü̃ icuyangau i taxre i yatügü i Raquéchique̱xearü ngaicamagu chigüxü̃. Rü nümagü rü tá cumaxã nüxü̃ nixugü rü ñanagürügü tá: “Ngẽma búrugü i naxca̱x cudauxü̃ rü marü nüxü̃ inayangaugü. Rü cunatü rü marü tama naxca̱x taxoegaãxẽ i ngẽma búrugü, natürü cuxca̱x nixĩ i taxoegaãẽxü̃ i ñu̱xmax, erü nagu tarüxĩnü nax ñuxãcü tá cuxü̃ itayangauxü̃”, ñanagürügü tá cumaxã.
3Rü ngéma nax cuxüpetüxü̃ rü ngẽxguma Tabóxarü castaña íngẽxmaxü̃wa cunguxgu, rü ngẽxma tá cuxü̃ nangaugü i tomaepü̱x ya yatü i ĩane i Betéwa ĩxü̃ nax Tupanaxü̃ yanacua̱xüü̃güxü̃ca̱x. Rü ngẽma wüxi rü tomaepü̱x i chíbu niga, rü ngẽma to rü tomaepü̱x i paũ ninge, rü ngẽma to rü wüxipüxü̃ ya bínu ninge.
4Rü nümagü rü tá cuxü̃ narümoxẽgü, rü tá cumaxã nangau i taxre i paũ. Rü name nixĩ i nüxü̃́ cunayaxu.
5Rü ngẽmawena rü tá Guibeá ya Tupanaarü Ma̱xpǘnegu ãéganewa cungu i Firitéugüarü dauxü̃taechica íngẽxmaxü̃wa. Rü ngẽxguma yima ĩanegu cuxücuxgux, rü ngẽxma tá nüxü̃ cungau i ñuxre i Tupanaarü orearü uruü̃gü i Tupanaãxẽ ya Üünecü namaxã icuáxü̃ i Tupanaarü cua̱xüü̃wa ne ĩxü̃. Rü ngẽmape̱xegu tá naxĩ i duü̃xü̃gü i paxetatanüxü̃ i norü árpamaxã, rü árpaxacümaxã, rü paü̃derumaxã rü wowerumaxã.
6Rü ngẽxguma tátama cuxna nangu i Tupanaãxẽ ya Üünecü, rü tá cumaxã inacua̱x naxrüxü̃ i ngẽma togü i Tupanaarü orearü uruü̃gü. Rü tá Tupanaarü oremaxã quidexa rü to i ĩnü tá cuxü̃́ nangẽxma.
7Rü ngẽxguma ngẽma cuxna nguxgu ¡rü naxü i ngẽma cuxca̱x mexü̃! Erü Tupana tá cuxü̃ narüngü̃xẽxẽ.
8¡Rü yoxni Guirigáwa naxũ! Erü ngéma tá cumaxã changutaque̱xe nax ngéma Cori ya Tupanaca̱x naxü̃na íchayaguxü̃ca̱x, rü ãmaregü nüxna chayanaxü̃ca̱x nax nangüxmüxü̃ca̱x. ¡Rü 7 i ngunexü̃ ngéma choxü̃ nanguxẽxẽ ñu̱xmatáta ngéma changu! Rü ngéma tá nixĩ i cumaxã nüxü̃ chixuxü̃ nax ta̱xacü tá cuxüxü̃ —ñanagürü.
9Rü nüma ga Chaú rü Chamuéxü̃ narümoxẽ nax íyaxũxü̃ca̱x. Rü yemawena rü Tupana rü ngexwaca̱xü̃xü̃ ga ĩnü nüxna naxã. Rü guxü̃ma ga yema ore ga Chamué namaxã nüxü̃ ixuxü̃, rü ningu ga yema ngunexü̃gutama.
10Rü yexguma Chaú rü yema norü duü̃xü̃maxã Guibeáwa nangugügu, rü nüxü̃ nadaugü ga yema orearü uruü̃gü ga yexma nügü namaxã nangauxü̃. Rü Tupanaãxẽ rü Chaúna nangu, rü nüma rü ta inanaxügü ga Tupanaarü oremaxã nax yadexaxü̃.
11Natürü ga guxü̃ma ga yema duü̃xü̃gü ga ü̃paacü Chaúxü̃ cua̱xgüxü̃, rü yexguma nüxü̃ nadaugügu nax Tupanaãxẽ yadexaxẽẽxü̃ natanüwa ga orearü uruü̃gü, rü nügüna nacagüe rü ñanarügügü: —¿Ta̱xacü nüxü̃ nangupetü ya Chíx nane? ¿Ẽ̱xna Chaú rü ta wüxi i orearü uruxü̃ nixĩ? —ñanagürügü.
12Rü wüxi ga yéma yexmaxü̃ rü ñanagürü: —¿Texé tixĩ ya nanatü i ngẽmagü? —ñanagürü. Rü ngéma ne naxũ i ngẽma ore i ñaxü̃: “¿Chaú rü tá ẽ̱xna wüxi i orearü uruxü̃ nixĩ?” ñaxü̃.
13Rü yexguma Chaúna iyachü̱xüxãchigu ga Tupanaãxẽ ga yadexaxẽẽxü̃, rü nüma ga Chaú rü nawa nangu ga guma ma̱xpǘne ga Tupanaarü cua̱xüxü̃chica.
14Rü nanepü rü nüxna naca rü ñanagürü: —¿Ngextá nixĩ ga pexĩxü̃? —ñanagürü. Rü nüma ga Chaú rü nanangãxü̃ rü ñanagürü: —Naxca̱x tayadaugü ga yema búrugü. Natürü yexguma tama nüxü̃ itayangaugügu rü Chamuéxü̃tawa ítayadaugü —ñanagürü.
15Rü nüma ga nanepü rü nüxna nacaama rü ñanagürü: —¿Rü ñuxũ ñaxü̃ pexü̃ ga Chamué? ¡Rü mea chomaxã nüxü̃ ixu! —ñanagürü.
16Rü nüma ga Chaú rü nanepüxü̃ nangãxü̃ rü ñanagürü: —Meama tomaxã nüxü̃ nixu ga marü nüxü̃ nax iyangaugüxü̃ ga búrugü —ñanagürü. Natürü tama nüxü̃ nixu ga Chamué nax chíxü̃maxã nabaeruxü̃ nax Iraéanecüã̱xgüarü ãẽ̱xgacü i réi yixĩxü̃ca̱x.
17Rü yemawena ga Chamué rü Iraéanecüã̱xgüca̱x nangema nax Mispáwa naxĩxü̃ca̱x rü yéma Cori ya Tupanaxü̃ yanacua̱xüü̃güxü̃ca̱x.
18Rü yexguma yéma nangugügu rü nüma ga Chamué rü yema Iraéanecüã̱xgüxü̃ ñanagürü: —Nüma ya Cori ya tórü Tupana rü ñanagürü: “Choma nixĩ ga Equítuanewa pexü̃ íchagaxü̃xü̃, Pa Iraéanecüã̱xgüx. Rü choma nixĩ ga naxme̱xwa pexü̃ íchanguxü̃xẽẽxü̃ ga yema Equítuanecüã̱xgü rü guxü̃ma ga yema togü ga ãẽ̱xgacügü ga pexü̃ chixeãẽgüxü̃”, ñanagürü ga Cori ya tórü Tupana.
19Natürü i ñu̱xma i pemax rü nüxü̃ pexo ya yimá perü Tupana ga guxü̃ma ga perü guxchaxü̃güwa rü perü ĩ̱xãchiãẽgüwa pexü̃ ínguxü̃xẽẽcü. Rü ñu̱xma nax nüxü̃ pexoxü̃ ya perü Tupana, rü ngẽmaca̱x wüxi i perü ãẽ̱xgacü i réica̱x ípeca nax pemaxã inacuáxü̃ca̱x. Rü ngẽmaca̱x i ñu̱xma rü chanaxwa̱xe i Cori ya Tupanape̱xewa ípengugü ya wüxitücumüchigü rü tügütanüxü̃chigü —ñanagürü ga Chamué.
20Rü yemawena ga nüma ga Chamué rü guxü̃ma ga Iraéanecüã̱xgütücumüca̱x naca nax naxü̃tagu nangutaque̱xegüxü̃ca̱x nax naxca̱x nadaugüxü̃ca̱x ga ngexü̃rüüxü̃tücumüwa tá ne naxũxü̃ ga norü ãẽ̱xgacü. Rü Bẽyamíü̃tücumügu nangu.
21Rü yexguma ga Chamué rü Bẽyamíü̃tücumüca̱x naca nax naxü̃tawa naxĩxü̃ca̱x, rü yema Bẽyamíü̃tücumüwa rü Matítanüxü̃gu nangu. Rü yematanüwa rü Chaú ga gumá Chíx nane ixĩcügu nangu nax Iraéanecüã̱xgüarü ãẽ̱xgacü yixĩxü̃. Natürü yexguma naxca̱x nadaugügu ga Chaú, rü tama nüxü̃ inayangaugü.
22Rü yemaca̱x wenaxarü Cori ya Tupanana nacagüe ga nüxü̃ nax nacua̱xgüxü̃ca̱x rü aixcüma nayexma ga Chaú. Rü nüma ga Cori ya Tupana rü nüxü̃ nixu ga yéma nax nayexmaxü̃, rü Iraéanecüã̱xgüarü yemaxü̃tanügu nax yacúxü̃.
23Rü yexgumatama naxca̱x nayadaugü rü nayagagü ga yema íyacúxü̃wa. Rü nüma ga Chaú rü yexguma duü̃xü̃güpe̱xewa nanguxgu, rü nüxü̃ nadaugü ga Iraéanecüã̱xgütanüwa rü taxúema naãtüxü̃ ngupetüxü̃ ga tümaarü máchanewa.
24Rü nüma ga Chamué rü guxãna naca rü ñanagürü: —¿Marü nüxü̃ pedauxü̃ ya yimá Cori ya Tupana nüxü̃ unetacü nax perü ãẽ̱xgacü i réi yixĩxü̃ca̱x? Rü nataxuma i wüxi i Iraéanecüã̱x i namaxã wüxiguxü̃ —ñanagürü. Rü nüma ga duü̃xü̃gü rü: —¡Namaxü̃x ya tórü ãẽ̱xgacü ya réi! —ñaxü̃maxã nanangãxü̃gü.
25Rü yexguma ga nüma ga Chamué rü duü̃xü̃gümaxã nüxü̃ nixu ga yema mugü ga nagu tá yaxũxü̃ ga gumá ãẽ̱xgacü norü duü̃xü̃gümaxã. Rü ñu̱xũchi wüxi ga poperagu nanaxümatü ga yema mugü rü Tupanapatagu nayaxǘ. Rü yemawena ga Chamué rü ínayamugü ga guxü̃ma ga yema Iraéanecüã̱xgü nax napatawa naxĩxü̃ca̱x.
26Rü yexguma ga nüma ga Chaú rü nachiü̃ca̱x nataegu ga Guibeáwa. Rü nawe narüxĩ ga ñuxre ga yatü ga daiwa imexü̃ ga Cori ya Tupana norü maxü̃gu ingógügüxü̃ nax íyaxümücügüãxü̃ca̱x.
27Natürü nayexmagü ta ga duü̃xü̃gü ga Chaúmaxã chixexü̃gu rüxĩnüexü̃ rü ñagüxü̃: —¿Ñuxãcü tá i ñaa yatü i tamaxã inacuáxü̃? —ñagüxü̃. Rü yemaacü nüxü̃ naxõõ̱xgü rü tama namaxã nataãẽgü. Natürü nüma ga Chaú rü tama yemagu narüxĩnü.
Currently Selected:
1 Chamué 10: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
