ROMA 13
13
Ketaatan ngen pemeriteak
1Tiep-tiep tun harus taat ngen pemeriteak de neak dasne, sebab coa ade pemeriteak, de asalne iso kunei Allah; ngen pemeriteak-pemeriteak de ade, das periteak kunei Allah. 2Sebab o api de melawen pemeriteak, si melawen periteak Allah ngen api de menea awei o, bakea teko hukuman das diraine. 3Sebab amen tun menea baik, si jibeak saben ngen pemeriteak, cuma amen si menea de coa baik. Jano udi lok idup supayo coa saben tea'dep pemeriteak? Neaba jano de baik ngen udi bakea nujai. 4Kerno pemeriteak adeba hamba Allah utuk kebaikannu. Tapi amen udi menea de coa baik, sabenba ngen si, kerno coa sio-sio pemeriteak mukum tun. Pemeriteak adeba hamba Allah utuk males murka Allah das tobo'o de menea de coa baik. 5Sebab o Saudaro harus taat ngen pemeriteak, iso bae kerno kemurkaan Allah, tapi kulo kerno sa'ei atei nurani ite.
6 #
Mat. 22:21; Mrk. 12:17; Luk. 20:25 Do'oba kulo sebabne mako udi masen pajak. Kerno tobo'o de murus hal o adeba pelayan-pelayan Allah. 7Nasenba ngen kute tun jano de harus udi masen: pajak ngen tun de temuan hok temimo pajak, nasenba cukai ngen tun de temuan hok temimo cukai; asai saben ngen tun de berhok temimo asai saben ngen hormat ngen tun de berhok temimo hormat.
Kasih adeba kegenapan hukum agamo Yahudi
8Jibeakba udi butang jejano ngen api bae, tapi lokba udi sesamo mengasihi. Sebab api mengasihi sesamone manusio, si sudo kemerjo hukum agamo Yahudi. 9#Kel. 20:13-15, 17; Im. 19:18; Ul. 5:17-19, 21 Kerno Firman: Jibeak berzinah, jibeak munuak, jibeak maling, jibeak lok temuan jano de tun luyen temuan; kutene o besamo-samo ngen hukum-hukum de luyen, sudo temasuk lem firman yo, adeba: “Kasihiba sesamonu manusio awei dirainu su'ang!” 10Kasih coa menea de coa baik teadep sesamo manusio, kerno o kasih adeba kegenapan hukum agamo Yahudi.
11Hal yo harus udi nea, kerno udi namen keadaan waktau uyo, adeba bahwo saatne bi sapei utuk udi jagai kunei tidua. Sebab uyo keselamatan bi lebiak pa'ok utuk ite kunei pado waktau ite jijai pecayo. 12Bilai bi uak malem, tegoa igai lueng. Sebab o maroba ite bedan menea plep-plep kidek, ngen makei perlengkapan senatai te'ang! 13Maroba ite idup ngen sopan, awei tengeak bilai, jibeak lem pesta pora ngen mabuk, jibeak lem percabulan ngen hawa nafsu, jibeak lem selisiak ngen kidek atei. 14Tapi kunyauba Tuhan Yesus Kristus sebagai perlengkapan senatai te'ang ngen jibeakba murus awoknu utuk memuaskan kelokne.
Currently Selected:
ROMA 13: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
