WAHYU 4
4
Penyembahan neak surgo
1Sesudo'o uku dapet kemliak igai. Uku kemliak debueak bang tukok neak surgo. Sesudo'o teni'uk igai sa'ei de mulo-mulone bi miling ngen uku awei sa'ei trupet. Sa'ei o madeak, “Maro kenek mio. Uku bakea kemten ngen udi jano de bakea tejijai be.” 2#Yeh. 1:26-28, 10:1 Langsung bae uku kenuaso Roh Allah. Lajau uku kemliak neak surgo ade debueak takhta, ngen ade suang tun temot neak takhta o. 3Papea tun o bersinar awei permata baiduri pandan ngen permata delima. Do warno zamrud belikea neak takhta o. 4Lem betuk lingkaran sekeliling takhta o ade duai puluak pat takhta de luyen. Neak di temot duai puluak pat pemipin de makei keracok putiak, ngen makei mahkota mas. 5#Kel. 19:16; Yeh. 1:13; Za. 4:2; Why. 1:4, 8:5, 11:19, 16:18 Kunei takhta o terpancar cahayo glep ngen keluea sa'ei gutua de kembiak lai. Ngen neak adep takhta o ade tujuak obor de nyala; do'oba ketujuak Roh Allah. 6#Yeh. 1:22 #Yeh. 1:5-10, 10:14 Ade kulo neak adep takhta o sesuaktau de keten awei lautan kaco, bening awei kristal.
Neak sekeliling takhta, tiep bidingne, ade pat makhluk, de rogok adep ngen rogok belakangne penuak ngen matai. 7Makhluk de pertamo keten awei singo. De keduai, awei sapai sebong. De ketelau temuan papea awei papea manusio. De kepat, keten awei burung rajawali de gidong tebang. 8#Yes. 6:2-3; Yeh. 1:18, 10:12 Kepat makhluk o, masing-masing temuan num sayep, sekelilingne ngen neak peak lemne penuak ngen matai. Lueng kelmen makhluk-makhluk o coa bedan-bedanne nyanyi,
“Sucai, sucai, sucaiba Tuhan, Allah Mahakuaso;
de ade, de sudo ade, ngen de ade seterusne.”
9Kepat makhluk o mbin legau pujian, hormat ngen syukur ngen Si de temot neak takhta o, adeba Si de idup utuk selamo-lamone. Ngen pado waktau makhluk-makhluk o nyanyi, 10keduai puluak pat pemipin o tukup neak adep tun de temot neak takhta o, lajau nyembeak Si de idup selamo-lamone. Sesudo'o tobo'o muang mahkota-mahkota tobo'o neak adep takhta o serto madeak,
11“Ya Tuhan, ya Allah keme!
Ko bae de layak temimo pujian, hormat ngen kuaso.
Sebab Koba pencipta kute sesuaktau,
ngen das kelok-Nu kulo kute sesuaktau o bi tejijai ngen idup.”
Currently Selected:
WAHYU 4: REJ
Highlight
Share
Compare
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
