WAHYU 20
20
Tetang waktau seribau taun
1Sesudo'o uku kemliak malaikat tu'un kunei surgo. Neak tangenne si megong kucai jurang maut ngen debueak ratoi lai. 2#Kej. 3:1 Lajau si temakep nagai o, dung tuai o, – adeba Iblis atau roh kidek o, – ngen si meketne utuk seribau taun anne. 3Sesudo'o malaikat o muang nagai o moi lem jurang maut, lajau kemucai jurang o ngen semegelne, supayo nagai o cigai dapet mike bangsa-bangsa ayok masa seribau taun o abis. Sesudo'o si harus npas utuk waktau de siket.
4 #
Dan. 7:9, 22 Lajau uku kemliak takhta-takhta, ngen tun-tun de temot neak takhta-takhta o nelei kuaso utuk melei keputusan ukuman. Uku kemliak kulo tun-tun de sudo tentus ulaune kerno tobo'o melei saksai tetang Yesus, ngen melei namen firman Allah. Tun-tun o coa nyembeak benatang, atau patungne. Tobo'o kulo coa perneak temimo tando benatang o neak ning atau tangen tobo'o. Mako tobo'o idup igai ngen meriteak sebagai rajo besamo Kristus selamo seribau taun. 5Dioba tahap pertamo tun-tun matei nidup igai. (Tapi tun-tun matei luyenne coa nidup igai selamo maso seribau taun o.) 6Riangba tun-tun de nidup igai lem tahap pertamo o. Tobo'o patas jijai de Allah temuan. Kematian tahap keduai coa bekuaso das tobo'o. Tobo'o bakea jijai imem-imem Allah ngen imem-imem Kristus. Ngen tobo'o bakea meriteak besamo Si seribau taun anne.
Iblis nukum
7Sesudo abis masa seribau taun o, Iblis bakea bebas kunei selne, 8#Yeh. 7:2, 38:2, 9, 15 ngen si bakea lalau mike bangsa-bangsa de tersebea neak kute dunio, adeba Gog ngen Magog. Iblis kemopoa tobo'o utuk perang, suaktau jumlah de kembiak lai, kedau benei neak laut. 9Mako tobo'o kulo becibea moi kute dunio, lajau kempung perkemahan umat Allah ngen kota de Allah kasihi. Tapi opoi tu'un kunei lenget ngen mbem tobo'o. 10Sesudo'o de mike tobo'o, nuang moi lem lautan opoi ngen bli'ang. Neak di ba penanne benatang ngen nebai palsu o nuang lebiak dute. Tobo'o bakea senikso lueng kelmen utuk selamo-lamone.
Hukuman terakhir
11 #
Dan. 7:9-10
Sesudo'o uku kemliak debueak takhta putiak de lai ngen Si de temot neak dasne. Lenget ngen bumai nyep kunei adep-Ne, sehinggo coa keten igai. 12Ngen uku kemliak tun-tun matei, lai titik, je neak adep takhta o. Mako kiteb-kiteb kulo nukok. Lajau debueak kiteb de luyen nukok, adeba Kiteb Tun Idup. Sesudo'o ukuman nelei ngen tun matei, setipal ngen plep tobo'o temurut de ade neak lem bukau-bukau o. 13Lajau laut semreak tun-tun matei de ade neak lemne. Maut ngen Alam Maut kulo semreak tun-tun matei de ade ngen si. Ngen tun-tun matei o kutene nelei ukuman setipal ngen plep tobo'o. 14Sesudo'o Maut ngen Alam Maut nuang moi lem lautan opoi. (Lautan opoi yo adeba kematian tahap keduai.) 15Tun-tun de genne coa tetulis neak lem Bukau Tun Idup, nuang moi lem lautan opoi.
Currently Selected:
WAHYU 20: REJ
Highlight
Share
Compare
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
